Perceval ou le Conte du Graal (page 18)

amie avez et bele et sage,

et si est mout de haut parage,

et bele et gente et debonere,

se ele otroie ensi l’afere

con vos ici m’avez conté. »

Et cil dit : « Sire, grant bonté

me feroiz, ce vos acreant,

se vos mon anel an presant

me portez a m’amie chiere,

que ge l’aim mout de grant meniere.

Ge le vos guerredonerai

et de ce chastel vos dirai

le non que demandé m’avez.

Li chastiax, se vos nel savez,

a non la Roche del Chanpguin.

Maint boen drap vermoil et sanguin

i taint an et mainte escarlate,

s’an i vant an mout et achate.

Or vos ai dit ce que vos plot,

que ne vos ai manti de mot,

et vos me ravez dit mout bien.

Demanderoiz me vos plus rien ?

— Nenil, sire, se congié non. »

Et cil dit : « Sire, vostre non

me diroiz, se il ne vos poise,

einz que de moi partir vos loise. »

Et messire Gauvains li dist :

« Sire, se Damedex m’aïst,

onques mes nons ne fu celez.

Je sui cil que vos tant haez,

je sui Gauvains. — Gauvains iés tu ?

— Voire, li niés le roi Artu.

— Par foi, donc es tu mout hardiz,

ou mout fos, qui ton non me diz,

si sez que ge te haz de mort.

Or m’annuie et poise mout fort

que ge n’ai mon hiaume lacié

et l’escu au col anbracié ;

que se ge fusse armez ensi

con tu es, ce saches de fi,

la teste orandroit te tranchasse,

que ja por rien ne t’espargnasse.

(393d.8579)

Mes se tu m’osoies atandre,

ge iroie mes armes prandre,

puis me vanroie a toi conbatre,

s’amanroie homes.iii. ou quatre

por esgarder nostre bataille.

Ou, se tu viax, autrement aille,

que jusqu’a.vii. jorz atandrons

et au sesme jor revandrons

an ceste place tuit armé,

et tu aies le roi mandé

et la reïne et ses genz totes,

et ge ravrai les moies rotes

de par tot le païs mandees,

et si n’iert pas fete an anblees

nostre bataille, ainz la verront

tuit cil qui veoir la volront ;

que bataille de.ii. prodomes,

si con l’an dit que nos dui somes,

ne doit an pas feire en aguait,

einz est bien droiz que il i ait

dames et chevaliers assez.

Et quant li uns sera lassez,

que toz li mondes le savra,

.m. tanz plus d’enor i avra

li vainquerres que il n’avroit

quant nus fors lui ne le savroit.

— Sire, fet messire Gauvains,

volantiers m’an feïsse a mains,

s’il poïst estre et vos pleüst

que ja bataille n’i eüst.

Et se ge rien mesfet vos ai,

mout volantiers l’amanderai

par voz amis et par les miens

si que il soit reisons et biens. »

Et cil dit : « Ge ne puis savoir

quel reison il i puisse avoir,

s’a moi conbatre ne t’an oses.

Ge t’ai devisees.ii. choses,

si fai lequel que tu voldras :

se tu oses, tu atandras

et ge irai mes armes querre ;

ou tu manderas an ta terre

tot ton pooir jusqu’a.vii. jorz,

que a Pantecoste ert la corz

(393e.8623)

le roi Artus an Orcanie,

bien en ai la novele oïe,

n’il n’i a mes que.ii. jornees.

Le roi et ses genz atornees

i porra trover tes messages.

Anvoie i, si feras que sages.

c’uns jorz de respit.c. solz valt. »

Et cil respont : « Se Dex me salt,

la ert la corz sanz nule dote,

la verité an savez tote ;

et g’i anvoierai mon voel.

— Gauvains, fet il, et ge te voel

mener au meillor port del monde.

Ceste eve est si roide et parfonde

que passer n’i puet riens qui vive

ne saillir jusqu’a l’autre rive. »

Et messire Gauvains respont

qu’il n’i querra ne gué ne pont

por riens nule qu’il l’an aviegne.

« Einz que a mauvestié le tiegne

la dameisele felenesse

cui ge en ai fet la promesse,

si m’an irai tot droit a li. »

Lors point et li chevax sailli

oltre l’eve delivremant,

que point n’i ot d’anconbrement.

Quant devers li passé le voit

la puce* qui tant l’avoit

de sa parole sormené,

si a cuer et talant mué,

que tot maintenant le salue

et dit qu’ele li est venue

merci crier de son mesfet,

que por li a grant poinne tret.

« Biau sire, fet ele, or escoute

por coi j’ai esté si estoute

vers toz les chevaliers del mont

qui aprés aus menee m’ont.

Gel te dirai, s’il ne t’enuie.

Cil chevaliers, cui Dex destruie,

qui de la d’outre a toi parla,

s’amor an moi mal anplea,

qu’il m’ama, et ge haï lui ;

car il me fist si grant enui

(393f.8667)

qu’il ocist, n’an mantirai mie,

celui a cui g’estoie amie ;

puis me cuida tant d’enor fere

qu’a s’amor me cuida atraire.

Mes onques rien ne li valut,

que au plus tost que il me lut

de sa conpeignie m’anblai

et au chevalier m’asanblai

cui tu me ras gehuir tolue,

dont il ne m’est a une alue.

Mes de mon premerain ami,

quant morz de lui me departi,

ai esté si longuement fole

et si estoute de parole

et si vilainne et si musarde

c’onques ne me prenoie garde

cui j’alasse contraliant,

einz le feisoie a esciant,

por ce que trover an volsisse

.i. si ireus que gel feïsse

a moi irestre et correcier

por moi trestote depecier,

que piece a volsisse estre ocise.

Sire, or prenez de moi justise

tel que jamés nule pucele

qui de moi oie la novele

ne die a nul chevalier honte.

— Bele, fet il, a moi que monte

que ge de vos justise face ?

Ja le fil Damedeu ne place

que vos por moi nul mal aiez,

mes montez, si ne delaiez,

s’irons jusqu’a ce chastel fort.

Veez le notonier au port,

qui nos atant por passer outre.

— Vostre volanté d’outre an outre

ferai, sire », fet la pucele.

Lors est montee sor la sele

del petit palefroi crenu ;

si sont au notonier venu,

qui oltre l’eve les anmainne,

qu’il ne li fu travalz ne painne.

Et les dames venir le voient,

et les puceles, qui avoient

(394a.8711)

por lui mout grant duel demené.

Por lui restoient forsené

trestuit li vaslet del palés.

Or ont tel joie c’onques mes

ne fu nule plus granz anprise.

Devant le palais fu asise

la reïne por lui atandre ;

ses puceles avoit fet prandre

totes ansanble por dancier

et por grant joie comancier.

Contre lui grant joie comancent,

chantent et querolent et dancent ;

et il vient et descent antr’eles.

Les dames et les dameiseles

et les.ii. reïnes l’acolent

et de grant joie a lui parolent ;

si le desarment a grant feste,

janbes et braz et piez et teste.

De celi qu’il ot amenee

ront mout grant joie demenee,

que tuit et totes la servirent

por lui, que por li rien n’an firent.

A grant joie el palés s’an vont,

par leanz tuit assis se sont.

Et messire Gauvains a prise

sa seror et si l’a assise

lez lui el Lit de la Mervoille ;

si li dit an bas et consoille :

« Dameisele, ge vos aport

un anelet d’outre ce port,

don l’esmeraude mout verdoie.

Uns chevaliers le vos anvoie

par amor et si vos salue

et dit que vos estes sa drue.

— Sire, fet ele, gel cuit bien.

Mes se ge l’aim de nule rien,

c’est de loing que s’amie sui,

c’onques ne me vit ne ge lui

s’outre cele eve ne le vi.

Mes il m’a, la soe merci,

s’amor donee grant piece a

et se ne vint onques de ça,

mes si message m’ont proiee

tant que ge li ai otroiee

(394b.8755)

m’amor, n’an mantiroie mie.

De plus ne sui ancor s’amie.

— Ha ! bele, ja s’est il vantez

que vos voldriez mialz assez

que morz fust messire Gauvains,

qui est vostre freres germains,

qu’il eüst mal an son ortoil.

— Avoi ! sire, mout me mervoil

comant il dist si grant folie.

Par Deu, ge nel cuidoie mie

que il fust si mal afeitiez.

Or s’i est il mout mal gueitiez,

qui ceste chose m’a mandee.

Lasse ! il ne set se ge sui nee,

mes freres, n’onques ne me vit.

Li Grinomalanz a mesdit. »

Queque cil dui ensi parloient,

et les dames les escoutoient,

et la vielle reïne sist

delez sa fille et si li dist :

« Bele fille, que vos est vis

de ce seignor qui s’est assis

delez vostre fille, ma niece ?

Consellié a a li grant piece,

ne sai de coi, mes mout me siet

n’il n’est pas droiz que il me griet ;

que de grant hautesce li vient

quant a la plus bele se tient

et a la plus sage qui soit

an cest palés, et si a droit.

Et pleüst Deu que il l’eüst

esposee et tant li pleüst

con fist a Eneas Lavine.

— Ha ! dame, fet l’autre reïne,

Dex li doint si metre son cuer

que il soient con frere et suer ! »

An sa proiere antant la dame

qu’il l’aint et qu’il la praigne a fame.

Cele ne reconuist son fil ;

come frere et suer seront il,

que d’autre amor point n’i avra.

Quant ele de fi le savra,

qu’ele est sa suer et il ses frere,

s’an avra grant joie sa mere,

(394c.8799)

autre que ele n’i atant.

Et messire Gauvains a tant

parlé a sa seror la bele

que il se lieve et si apele

.i. vaslet que il vit a destre,

celui qui plus li sanbla estre

hunbles et preuz et serviables,

et plus saiges et plus resnables

de toz les vaslez de la sale.

An une chanbre s’an avale,

et li vaslez seus avoec lui.

Quant il furent aval andui,

si li dist : « Vaslez, ge te cuit

mout vezié et mout recuit.

Se ge.i. mien consoil te di,

del bien celer mout te chasti

por ce que tu i aies preu.

Ge voel anvoier an.i. leu

ou granz joie te sera feite.

— Sire, mialz voldroie avoir treite

la lengue par desoz la gole

c’une parole tote sole

me fust de la boche volee

que volsissiez qui fust celee.

— Amis, fet il, donc iras tu

a monseignor le roi Artu,

que ge ai non Gauvains, ses niés.

La voie n’est longue ne griés,

que a la cité d’Orcanie

a li rois sa cort establie

a tenir a la Pantecoste.

Et se la voie rien te coste

jusque la, si t’an tien a moi.

Quant tu vandras devant le roi,

mout correcié le troveras ;

et quant tu le salüeras

de par moi, mout avra grant joie.

Ja n’i avra.i. seul qui oie

la novele qui liez n’an soit.

Au roi diras, foi qu’il me doit,

qui est mes sire et ge ses hom,

qu’il ne lest por nule acoison

que ge nel truisse einz le quint jor

de la feste soz ceste tor

(394d.8843)

logié aval la praerie,

et s’i ait tele conpaingnie

con a sa cort avra venue,

de haute gent et de menue ;

que j’ai une bataille anprise

vers.i. chevalier qui ne prise

ne moi ne lui qui gaires vaille.

C’est li Grinomalanz sanz faille,

qui me het de mortel haïne.

Autel diras a la reïne,

qu’ele i vaigne par la grant foi

qui doit estre antre li et moi,

que ele est ma dame et m’amie,

et ele nel lessera mie

puis qu’ele savra les noveles ;

et les dames et les puceles

qui a sa cort seront le jor

i amaint por la moie amor.

Mes d’une chose ai grant peor,

que tu n’aies boen chaceor

qui tost te port anjusque la. »

Et cil li respont que il l’a,

grant et isnel et fort et buen,

que il manra come le suen.

« Ce, fet il, ne me poise pas. »

Et li vaslez eneslepas

vers unes estables l’anmainne

et si an tret fors et amainne

chaceors gras et sejornez,

don li uns estoit atornez

por chevauchier et por errer,

qu’il ot fet de novel ferrer,

qu’il n’i failloit sele ne frains.

« Par foi, fet messire Gauvains,

vaslez, tu es bien a hernois.

Or va, que li sires des rois

te doint bien aler et venir

et la droite voie tenir. »

Ensi le vaslet an anvoie

et jusqu’a l’eve le convoie

et si comande au notonier

que il le face outre nagier.

Li notoniers le fist passer,

c’onques ne l’an covint lasser.

(394e.8887)

Li vaslez est outre passez,

qu’il avoit nageors assez.

Et vers la cité d’Orcanie

a la droite voie acoillie,

car qui set voie demander

par tot le monde puet aler.

Et messire Gauvains retorne

an son palés, ou il sejorne

a grant joie et a grant deduit.

Joie li font totes et tuit,

et la reïne fist estuves

et bainz chaufer an.v.c. cuves,

s’i fist toz les vaslez antrer

por baignier et por estuver ;

et an lor ot robes tailliees

qui bien furent aparelliees

quant il furent del baing issu.

Li drap de soie sont tissu

et les robes furent d’ermines.

Au mostier jusqu’aprés matines

li vaslet an estant vellierent,

c’onques ne s’i agenoillierent.

Au matin messire Gauvains

chauça a chascun de ses mains

l’esperon destre et ceint l’espee

et si li dona la colee.

Lors ot il conpaignie viax

de.v.c. chevaliers noviax.

Et li vaslez a tant alé

qu’il est venuz a la cité

d’Orcanie, ou li rois tenoit

cort si grant con il plus devoit.

Et li contret et li ardant,

qui le vaslet vont regardant,

dïent : « Cist vient a grant besoing,

je cuit qu’il aporte de loing

estranges noveles a cort.

Mout trovera et mu et sort

le roi, tel chose puet il dire,

qu’il est mout plains de duel et d’ire.

Et qui ert ore qui savra

consoil doner, quant il avra

oï del message com iert ?

— Di va, font il, a nos qu’afiert

(394f.8931)

a parler del consoil le roi ?

Nos devriens estre an esfroi

et esmaié et esperdu

quant nos avons celui perdu

qui por Deu toz nos revestoit

et don toz li biens nos venoit

par aumosne et par charité. »

Ensi par tote la cité

monseignor Gauvain regretoient

la povre gent qui mout l’amoient.

Et li vaslez outre s’an va,

s’a tant alé que il trova

le roi seant an son paleis,

antor lui.c. contes paleis

et.c. dus et.c. rois assis.

Li rois fu mornes et pansis

quant il vit sa grant baronie

et de son neveu n’i vit mie,

si chiet pasmez par grant destrece.

Au relever fu sanz perece

qui einçois i pot avenir,

car tuit le corent sostenir.

Et madame Lore seoit

an unes loiges, si ooit

le duel qu’an fist parmi la sale.

De la loige jus s’an avale,

s’est a la reïne venue

ausi come tote esperdue,

et quant la reïne la voit,

si li demande qu’ele avoit…

Explycyt Percevax le viel.