Vie de saint Louis (page 4)

Monseigneur Guilleaume conte de Flandres, et sa bataille, firent merveilles. Car aigrement et vigoureusement courirent sus à pié et à cheval contre les Turcs, et faisoient de grans faiz d’armes. Et quant je vy ce, commandé à mes arbelestriers qu’ilz tirassent à foison tretz sur les Turcs qui estoient en celle bataille à cheval. Et tantoust qu’ilz sentirent qu’on les bleczoit eulx et leurs chevaulx, ilz commancerent à fuir et à habandonner leurs gens à pié. Et quant le conte de Flandres et s’armée virent que les Turcs fuyoient, ils passerent par dessoubz la lice, et coururent sus les Sarrazins qui estoient à pié, et en tuerent grant quantité, et gaignerent plusieurs de leurs targes. Et là entre autres s’esprouva vigoureusement messire Gaultier de la Horgne, qui pourtoit la bannierre à monseigneur le conte d’Aspremont.

Aprés celle bataille estoit la bataille de monseigneur le conte de Poitiers frere du Roy, laquelle bataille estoit toute de gens de pié ; et n’y avoit que le conte seul à cheval, dont mal en advint. Car les Turcs deffirent celle bataille à pié, et prindrent le conte de Poitiers. Et de fait l'emmenoient, si n’eust esté les bouchiers, et tous les autres hommes et femmes qui vendoient les vivres et denrées en l’ost : lesquelz, quant ilz oirent qu’on emmenoit le conte de Poitiers frere du Roy, s’escrierent en l'ost et s’esmeurent tous ; et tellement coururent sus aux Sarrazins, que le conte de Poitiers fut rescoux, et chasserent les Turcs hors de l’ost à force.

Aprés la bataille du conte de Poitiers estoit une petite bataille, et la plus feble de tout l’ost, dont ung nommé messire Jocerant de Brançon estoit le maistre et chief : et l’avoit amené en Egipte mondit seigneur le conte de Poitiers. La bataille d’icelui Jocerant de Brançon estoit de chevaliers à pié, et n’y avoit à cheval que lui, et messire Henry son filz. Celle bataille deffaisoient les Turcs à tous coustz. Et voiant ce messire Jocerant et son filz, ilz venoient par derriere contre les Turcs, frappant à coups d’espées. Et si bien les pressoient par derriere, que souventesfois les Turcs se reviroient contre messire Jocerant de Brançon, et lessoient ses gens pour lui courir sus. Toutesvoies, au long aller, ce ne leur eust gueres valu ; car les Turcs les eussent tous desconfiz et tuez, si n’eust esté messire Henry de Cone, qui estoit en l'ost du duc de Bourgoigne, sage chevalier et prompt, qui congnoissoit bien la bataille de monseigneur de Brançon estre trop feble. Et toutes les foiz qu’il veoit les Turcs courir sus audit seigneur de Brançon, il faisoit tirer les arbalestriers du Roy contre les Turcs. Et fist tant que le sire de Brançon eschappa de tel meschief celle journée, et perdit, de vingt chevaliers qu’on disoit qu’il avoit, les douze, sans ses autres gensd’armes. Et lui mesme en la par fin, des grans coups qu’il eut, mourut de celle journée au service de Dieu, qui bien l’en a guerdonné, ce devons croire. Icelui seigneur estoit mon oncle ; et lui ouy dire à sa mort qu’il avoit esté en son temps en trente six batailles et journées de guerres, desquelles souventesfoiz il avoit emporté le pris d’armes ; et d’aucunes ay-je bien congnoissance. Car une foiz, lui estant en l’ost du conte de Mascon qui estoit son cousin, il s’en vint à moy et à ung mien frere le jour d’un vendredi saint en caresme, et nous dist : « Mes nepveux, venez moy aider à toute vostre gent à courir sus aux Allemans, qui abatent et rompent le monstier de Mascon. » Et tantoust sur piedz fusmes prestz, et allasmes courir contre lesdiz Allemans ; et à grans coups et pointes d’espées les chassasmes du monstier, et plusieurs en furent tuez et navrez. Et quant ce fut fait, le bon preudom s’agenoulla devant l’autel, et cria à haulte voix à Nostre Seigneur, lui priant qu’il lui pleust avoir pitié et mercy de son ame, et qu’il mourust une foiz pour lui, et en son service ; ad ce que en la fin il lui donnast son paradis. Et ces choses vous ay racomptées, affin que congnoissez, comme je foiz et croy, que Dieu lui octroia ce que avez ouy cy-devant de lui.

Aprés ces choses, le bon Roy manda querir tous ses barons, chevaliers, et autres grans seigneurs. Et quant ilz furent devant lui venuz, il leur dist benignement : « Seigneurs et amys, or povez vous veoir et congnoistre clerement les grans graces que Dieu nostre createur nous a faites puis n’agueres, et fait par chacun jour, dont grans loüenges lui en sommes tenuz rendre : et que mardi darrenier, qui estoit caresme-prenant, nous avons à son aide chassé et debouté noz ennemys de leurs logeis et herbergemens, esquelz nous sommes logez à present. Aussi ce vendredi qui est passé nous nous sommes deffenduz à pié, et les aucuns non armez, contr’eulx bien armez, à pié et à cheval, et sur leurs lieux. » Et moult d’autres belles paroles leur disoit et remonstroit tant doulcement le bon Roy. Et ce faisoit-il pour les reconforter, et donner tousjours bon couraige et fiance en Dieu.

Et pour ce que en poursuivant nostre matiere il nous y convient entre-lacer aucunes choses et les reduire à memoire, affin d’entendre et savoir la maniere que le Souldan tenoit en la faczon de ses gensd’armes, et dont ils venoient ordinairement : il est vray que le plus de sa chevallerie estoit faicte de gens estranges que les marchans allans et venans sur mer vendoient, lesquelz gens les Egiptiens de par le Souldan achaptoient, et venoient d’Orient. Car quant ung des roys d’Orient avoit desconfit et conquis l’autre Roy, celui Roy qui avoit eu victoire, et ses gens, prenoient les povres gens qu’ilz povoient avoir à prisonniers, et les vendoient aux marchans, qui les ramenoient revendre en Egipte, comme j’ay dit devant. Et de telz gens sortoit des enfans que le Souldan faisoit nourrir et garder. Et quant ilz commançoient à avoir barbe, le Souldan les faisoit aprandre à tirer de l’arc par esbat : et chacun jour, quant il estoit deliberé, les faisoit tirer. Et quant on veoit qu’il y en avoit aucuns qui commançoient d’enforcer, on leur oustoit leurs febles arcs, et leur en bailloit-on de plus forts selon leur puissance. Ces jeunes gens portoient les armes du Souldan, et les appelloit-on les Bahairiz du Souldan. Et tout incontinant que barbe leur venoit, le Souldan les faisoit chevaliers : et portoient ses armes, qui estoient d’or pur et fin, sauf que pour differance on y mettoit des barres vermeilles, roses, oiseaux, griffons, ou quelque autre differance à leur plaisir. Et telz gens estoient appellez les gens de la Haulcqua, comme vous diriez les archiers de la garde du Roy ; et estoient tousjours prés du Souldan, et gardans son corps. Et quant le Souldan estoit en guerre, ilz estoient tousjours logez prés de lui, comme gardes de son corps. Et encores plus prés de lui avoit-il autres gardes, comme portiers et menestriers. Et sonnoient iceulx menestriers au point du jour, au lever du Souldan, et au soir à sa retraicte : et o leurs instruments faisoient tel bruit, que ceulx qui estoient illecques prés ne se povoient oir ne entendre l’un l’autre ; et les oyoit-on clerement parmy l’ost. Et saichez que de jour ils n’eussent esté si hardiz d’avoir sonné, sinon par le congié du maistre de la Haulcqua. Et quant le Souldan vouloit quelque chose, ou commander à ses gensd’armes, il disoit au maistre de la Haulcqua, lequel faisoit venir ses menestriers, qui sonnoient et disoient de leurs cors sarrazinois, tabours et naquaires : et à ce son se assembloit toute sa gent devant le Souldan. Et lors le maistre de la Haulcqua disoit le bon plaisir du Souldan, et incontinant le faisoient à leur povoir. Quant le Souldan estoit en personne en guerre combatant, celui des chevaliers de la Haulcqua qui mieux s’esprouvoit et faisoit des faiz d’armes, le Souldan le faisoit admiral ou capitaine, ou bien lui bailloit et donnoit charge de gensd’armes, selon ce qu’il le meritoit. Et qui plus faisoit, plus lui donnoit le Souldan. Et par ce chacun d’eulx s’efforçoit de faire oultre leur povoir, s’ilz eussent peu le faire.

La faczon et maniere de faire du Souldan estoit : que quant aucuns de ses chevaliers de sa Haulcqua par leurs prouesses ou chevalerie avoient gaigné du bien tant qu’ilz n’avoient plus de souffreté, et qu’ilz se povoient passer de lui de paeur qu’il avoit qu’ilz ne le deboutassent ou tuassent, il les faisoit prandre et mourir en ses prisons secretement, et prenoit tout le bien que leurs femmes et enfans avoient. Et ceste chose fut esprouvée durant que fusmes ou païs de par de là. Car le Souldan fist prandre et emprisonner ceulx qui avoient prins les contes de Montfort et de Bar, pour leur vaillance et hardiesse : et en hayne et envie qu’il avoit contr’eulx, et aussi pour ce qu’il les doubtoit, les fist mourir. Et à semblable fist-il des Boudendars, qui sont gens subgetz audit Souldan. Et pour ce que, après qu’ilz eurent desconfit le roy d’Ermenie, ung jour ilz vindrent devers le Souldan lui racompter la nouvelle, et le trouverent chassant aux bestes sauvaiges, et tous descendirent à pié pour lui faire la reverence et le saluer, cuidans avoir bien fait et estre remunerez de lui. Et il leur respondit malicieusement qu’il ne les saluoit mye, et qu’ilz lui avoient fait perdre sa chasse. Et de fait leur fit coupper les testes.

Or revenons à notre matière, et disons que le Souldan, qui darrenierement estoit mort avoit ung filz qui estoit de l’eage de vingt-cinq ans, moult saige, instruit, et ja malicieux. Et pourtant que le Souldan doubtoit qu’il le voulsist desheriter, ne l’avoit point voulu tenir emprés lui ; mais lui avoit donné un royaume qu’il avoit en Orient. Et tantoust que le Souldan son père fut mort, les admiraulx de Babiloine l’envoierent querir, et le firent leur souldan. Et quant il se vit maistre et seigneur, il ousta aux connestable, mareschaux et senneschaux de son père, les verges d’or et offices qu’ilz avoient, et les donna à ceulx qu’il avoit amenez avecques lui d’Orient. Dont de ce tous furent esmeuz en leurs courages ; et aussi ceulx qui avoient esté du conseil de son père en eurent grant despit, et doubtoient fort qu’il voulsist faire d’eulx, après ce que il leur avoit osté leurs biens, comme avoit fait le Souldan, qui avoit fait mourir ceulx qui avoient prins le conte de Montfort et le conte de Bar, dont j’ay devant parlé. Et pourtant furent-ilz tous d’un commun assentement de le faire mourir : et trouverent faczon que ceulx que on appelloit de la Haulcqua, qui devoient garder le corps du Souldan, leur promisdrent qu’ilz le occiroient.

Après ces deux batailles dont je vous ay devant parlé, qui furent grandes et fortes à merveilles, l’une le mardi de caresmentrant, et le premier vendredi de caresme, commença à venir en nostre ost ung autre tres-grant meschief. Car au bout de neuf ou dix jours les gens qui avoient esté occis et tuez en celles batailles sur la rive du fleuve qui estoit entre noz deux ostz, et qu’on avoit gectez dedans, tous se leverent sur l’eauë. Et disoit-on que c’estoit aprés ce qu'ilz avoient le fiel crevé et pourry. Et descendirent cesdiz corps mors aval dudit fleuve, jusques au poncel qui estoit à travers dudit fleuve, par où nous passions de l’une part à l’autre. Et pour ce que l’eauë, qui estoit grande, toucheoit et joignoit à icelui pont, les corps ne povoient passer. Et en y avoit tant que la riviere en estoit si couverte de l’une rive jusques à l’autre, que l’on ne veoit point l’eauë, et bien le gect d’une petite pierre contremont ledit poncel. Et loüa le Roy cent hommes de travail, qui furent bien huit jours à séparer les corps des Sarrazins d’avecques les Chrestiens, que on congnoissoit assez les ungs d’avecques les autres. Et faisoient passer les Sarrazins à force oultre le pont, et s’en alloient aval jusques en la mer : et les Chrestiens faisoit mettre en grans fosses en terre, les uns sur les autres. Dieux sache quelle puanteur, et quelle pitié de congnoistre les grans personnages, et tant de gens de bien qui y estoient ! Je y vis le chambellan de feu monseigneur le conte d’Arthois, qui cerchoit le corps de son maistre : et moult d’autres querans leurs amys entre les morts. Mais oncques depuis ne ouy dire, que de ceulx qui estoient là regardans, et endurans l'infection et pueur de ces corps, qu’il en retournast ung. Et saichez que toute celle caresme nous ne mangeons nulz poissons, fors que de burbotes, qui est ung poisson glout, et se rendent tousjours aux corps morts, et les mengeoient. Et de ce, et aussi que ou païs de là ne pluvoit nulle foiz une goute d’eau, nous vint une grant persecution et maladie en l’ost, qui estoit telle que la chair des jambes nous dessecheoit jusques à l’os, et le cuir nous devenoit tanné de noir et de terre, à ressemblance d’une vieille houze qui a esté long-temps mucée derriere les coffres. Et oultre, à nous autres qui avions celle maladie, nous venoit une autre persecution de maladie en la bouche de ce que avions mengié de ces poissons, et nous pourrissoit la chair d’entre les gencives, dont chacun estoit orriblement puant de la bouche. Et en la fin gueres n’en eschappoient de celle maladie, que tous ne mourussent. Et le signe de mort que on y congnoissoit continuellement estoit quant on se prenoit à seigner du neys : et tantoust on estoit bien asseuré d’estre mort de brief. Et pour mieulx nous guerir, à bien quinze jours de là les Turcs, qui bien savoient noustre maladie, nous affamerent en la faczon que vous diray. Car ceulx qui partoient de nostre ost pour aller contremont le fleuve à Damiete, qui estoit à l’environ d’une grosse lieuë, pour avoir des vivres, ces paillars et infames Turcs les prenoient, et n’en retournoit pas ung à nous : dont moult de gens s’esbahirent. Et n’en ouzoit venir ung de Damiete à nous apporter aucuns vivres ; et autant qu’il y en alloit, autant en demouroit. Et jamés n’en peusmes rien savoir que par une des gallées du conte de Flandres, qui eschappa outre leur gré, et à force ; et nous disdrent les nouvelles, et que les gallées du Souldan estoient en l’eauë, qui guettoient ceulx qui alloient à Damiete, et avoient ja bien gaigné quatre-vingtz de noz gallées, et qu’ilz tuoient les gens qui estoient dedans. Et par ce advint en l’ost si très-grant chereté, que tantoust que la Pasque fut venue, ung beuf estoit vendu quatre-vingtz livres, ung mouton trente livres, ung porc trente livres ; le muy de vin dix livres, et ung euf douze deniers, et ainsi de toutes autres choses.

Quant le Roy et ses barons virent celle chouse, et que nul autre remède n’y avoit, tous s’accorderent que le Roy fist passer son ost devers la terre de Babilonne, en l’ost du duc de Bourgoigne, qui estoit de l’autre part du fleuve qui alloit à Damiete. Et pour retraire ses gens aisément, le Roy fist faire une barbacanne devant le poncel, dont je vous ay devant parlé. Et estoit faite en maniere que on povoit assez entrer dedans par deux coustez tout à cheval. Quant celle barbacanne fut faite et apprestée, tous les gens de l’ost se armerent ; et là y eut ung grant assault des Turcs, qui virent bien que nous en allions oultre en l’ost du duc de Bourgoigne, qui estoit de l’autre part. Et comme on entroit en icelle barbacanne, les Turcs frapperent sur la queuë de nostre ost : et tant firent, qu’ils prindrent messire Errart de Vallery. Mais tantoust fut rescoux par messire Jehan son frère. Toutesfoiz le Roy ne se meut, ne toute sa gent, jusques à ce que tout le harnois et armeures fussent portez oultre. Et alors passasmes tous aprés le Roy, fors que messire Gaultier de Chastillon, qui faisoit l’arriere-garde en la barbacanne. Quant tout l’ost fut passé oultre, ceulx qui demourerent en la barbacanne, qui estoit l'arriere-garde, furent à grant malaise des Turcs qui estoient à cheval; car ilz leur tiroient de visée force de trect, pour ce que la barbacanne n’estoit pas haulte. Et les Turcs à pié leur gectoient grosses pierres et motes dures contre les faces, et ne se povoient deffendre ceulx de l’arriere-garde. Et eussent esté tous perduz et destruiz, si n’eust esté le conte d’Anjou frere du Roy, qui depuis fut roy de Sicile, qui les alla rescourre asprement, et les amena à sauveté.

Le jour devant caresme-prenant, je vis une chose que je vueil bien racompter. Car celui jour mourut un tres-vaillant preux et hardy chevalier, qui avoit nom messire Hugues de Landricourt, qui estoit avec moy à banniere, et fut enterré en ma chappelle. Et ainsi que je oyoie messe, six de mes chevaliers estoient là appuiez sur des sacs d’orge qui estoient en madite chappelle, et parloient hault l’un à l’autre, et faisoient ennuy au prestre qui chantoit messe. Et je me levé, et leur allé dire qu’ilz se teussent, et que c’estoit chose villaine à gentils-hommes de parler ainsi hault tandis qu’on chantoit la messe. Et ilz commancerent à rire, et me disdrent qu’ilz parloient ensemble de remarier la femme d’icelui messire Hugues, qui estoit là en biere. Et de ce je les reprins durement, et leur dis que telles paroles n'estoient bonnes ne belles, et qu’ilz avoient trop toust oublié leur compaignon. Or advint-il que le landemain qui fut la grant bataille, dont j’ai devant parlé, du jour de caresme-prenant. Car on se povoit bien rire de leur follie; et en fist Dieu telle vengeance, que de tous les six n’en eschappa pas ung qu’ilz ne feussent tuez, et non point enterrez : et en la fin a convenu à leurs femmes leur remarier toutes six. Parquoy est à croire que Dieu ne laisse riens impugny de son malfait. Quant est de moy, je n’avois pas pis ne mieulx que les autres; car j’estois navré griefvement, et blecié de ladicte journée de caresme-prenant. Et en oultre ce j’avois le mal des jambes et de la bouche, dont j’ay devant parlé; et la ruyme en la teste, qui me filloit à merveilles par la bouche et par les narilles. Et avecques ce j’avoie une fievre double, qui est fievre quarte, dont Dieu nous gard. Et de ces maladies acousché au lit environ la my-caresme, où je fu longuement. Et si j’estoie bien malade, pareillement l’estoit mon povre prebstre. Car ung jour advint, ainsi qu’il chantoit messe devant moy, moy estant au lit malade, quant il fut à l’endroit de son sacrement, je l’apperceu si tres-malade, que visiblement je le veoie pasmer. Et quant je vy qu’il se vouloit laisser tomber en terre, je me gecté hors de mon lit tout malade comme j’estois, et prins ma cotte, et l’allé embrasser par derriere : et lui dis qu’il fist tout à son aise et en paix, et qu’il prensist courage et fiance en celui qu’il devoit tenir entre ses mains. Et adonc s’en revint ung peu, et ne le lessé jusques ad ce qu’il eust achevé son sacrement : ce qu’il fist. Et aussi acheva-il de celebrer sa messe, et onques puis ne chanta, et mourut. Dieu en ait l’ame.

Pour rentrer en nostre matiere, il fut bien vray que entre les conseils du Roy et du Souldan fut fait aucun parlement de accord et de paix faire entr’eulx : et ad ce fut mis et assigné jour. Et estoit le traicté de leur accord tel, que le Roy devoit rendre au Souldan la cité de Damiete. Et le Souldan devoit rendre au Roy tout le royaume de Jerusalem, et semblablement lui devoit garder tous les malades qui estoient dedans Damiete, et lui rendre les chairs sallées qui y estoient, parce que les Turcs et Sarrazins n’en mengeussent point : et aussi lui rendroit les engins du Roy. Et povoit le Roy envoier querir toutes ces choses audit lieu de Damiete. Que fut-il fait ? Le Souldan fist demander au Roy quelle seureté il lui bailleroit de lui rendre sa cité de Damiete. Et ad ce leur fut offert qu’ilz detiensissent prisonnier l’un des freres du Roy jusques à l’accomplissement de la promesse du Roy, ou le conte d’Anjou, ou le conte de Poitiers. Les Turcs de telle offre ne voulurent, ains demandoient en houstaige la personne du Roy. Et ad ce respondit le bon chevalier messire Geffroy de Sergines que ja n’auroient les Turcs la personne du Roy : et qu’il aymoit beaucoup mieulx que les Turcs les eussent tous tuez, qu’ilz leur fust reprouché qu’ilz eussent baillé leur Roy en gaige. Et ainsi demoura la chose. Tantoust la maladie dont je vous ay devant parlé commença à renforcer en l’ost : tellement qu’il failloit que les barbiers arrachassent et coupassent aux malades de celle maladie de grosse char qui surmontoit sur les gencives, en maniere que on ne povoit mengier. Grant pitié estoit là de oyr crier et braire par tous les lieux en l’ost ceulx à qui en couppoit celle char morte. Il me ressembloit de pouvres femmes qui travaillent de leurs enfans quant ilz viennent sur terre, et ne saurois dire la pitié que c’estoit.

Quant le bon roy saint Loys veoit celle pitié, il joignoit les mains, la face levée ou ciel, en beneissant nostre Seigneur de tout ce qu’il lui donnoit. Et voiant qu’il ne povoit ainsi longuement demourer sans qu’il ne mourust lui et toute sa gent, il ordonna de mouvoir de là le mardi au soir aprés les octaves de Pasques, pour s’en retourner à Damiete. Et fist commander de par lui aux mariniers des gallées qu’ilz apprestassent leurs vaisseaux, et qu’ilz recuillissent tous les malades, pour les mener à Damiete. Aussi commanda-il à ung nommé Josselin de Corvant, et autres ses maistres d’euvres et ingenieux, qu’ilz couppassent les cordes qui tenoient des ponts d’entre nous et les Sarrazins. Mais riens n’en firent, dont grant mal en arriva. Quant je vis que chacun s’apprestoit pour s’en aller à Damiete, je me retiré en mon vaissel, et deux de mes chevaliers que j’avoye encore de remenant avecques mon autre mesgnie. Et sur le soir, qu’il commença fort à faire noir, je commandé à mon marinier qu’il levast son encre, et que nous en alassons aval. Et il me respondit qu’il n’ouzeroit, et que entre nous et Damiete estoient les grans gallées du Souldan, qui nous prandroient et occiroient tous. Les mariniers du Roy avoient fait de grans feuz pour recuillir et chauffer les pouvres malades en leurs gallées. Et estoient lesdiz malades attendans les vaisseaux sur la rive du fleuve. Et ainsi que admonnestoie mes mariniers de nous en aller peu à peu, j’aperceu les Sarrazins à la clarté du feu qui entrerent en nostre ost, et tuoient les malades sur la rive. Et ainsi que mes mariniers tiroient leur encre, et que commançasmes ung peu à vouloir descendre aval, veez-cy venir les mariniers, qui devoient prandre les pouvres malades, qui apperceurent que les Sarrazins les tuoient : et coupperent hastivement leurs cordes de leurs encres et de leurs grans gallées, et acouvrirent mon petit vaissel de tous coustez, et n’attendoie l’eure qu’ilz ne nous affondrassent au fons de l’eauë. Quant nous fusmes eschappez de ce peril, qui estoit bien grant, nous commençasmes à tirer aval le fleuve. Et voiant le Roy, qui avoit la maladie de l’ost et la menoison comme les autres, que nous le laissions ; et si se fust bien garenty s’il eust voulu és grans gallées : mais il disoit qu’il aymoit mieulx mourir que laisser son peuple. Il nous commença à hucher et crier que demourasson. Et nous tiroit de bons garrotz pour nous faire demourer, jusques à ce qu’il nous donnast congié de nager. Or je vous lerray icy, et vous diray la façon et maniere comme fut prins le Roy, ainsi que lui mesmes me compta. Je luy ouy dire qu’il avoit laissé ses gensd’armes et sa bataille, et s’estoient mis lui et messire Geffroy de Sergines en la bataille de messire Gaultier de Chastillon, qui faisoit l’arrière-garde. Et estoit le Roy monté sur ung petit coursier, une housse de soie vestuë. Et ne lui demoura, ainsi que lui ay depuis oy dire, de tous ses gensd’armes que le bon chevalier messire Geffroy de Sergines, lequel le rendit jusques à une petite ville nommée Casel, là où le Roy fut prins. Mais avant que les Turcs le peussent avoir, luy oy compter que messire Geffroy de Sergines le deffendoit en la faczon que le bon serviteur deffend le hanap de son seigneur, de paeurs des mouches. Car toutes les foiz que les Sarrazins l’approuchoient, messire Geffroy le deffendoit à grans coups d’espée et de pointe, et ressembloit sa force luy estre doublée d’oultre moitié, et son preux et hardi courage ; et à tous les coups les chassoit de dessus le Roy. Et ainsi l’emmena jusques au lieu de Casel, et là fut descendu ou giron d’une bourgeoise qui estoit de Paris. Et là le cuiderent veoir passer le pas de la mort, et n’esperoient point que jamais il peust passer celui jour sans mourir.

Tantoust arriva devers le Roy messire Phelippe de Montfort, et lui dist qu’il venoit de veoir l’admiral du Souldan, à qui il avoit autresfoiz parlé de la treve : et que si c’estoit son bon plaisir, que encores derechief il lui en yroit parler. Et le Roy lui pria de le faire ainsi, et qu’il la vouloit tenir et faire en la maniere qu’ilz le vouloient. Adonc partit monseigneur Phelippe de Montfort, et s’en alla vers les Sarrazins, lesquelz avoient osté leurs toailles de leurs testes. Et bailla le sire de Montfort son anel, qu’il tira du doy, à l’admiral des Sarrazins, en asseurance de tenir les treves ; et cependant, que l’en feroit l'appointement tel qu’ilz l’avoient demandé autresfoiz, comme a esté touché cy-dessus. Or advint que après ce fait ung traistre mauvais huissier, nommé Marcel, commença à crier à noz gens à haulte voix : « Seigneurs chevaliers, rendez vous tous ; le Roy le vous mande par moy, et ne le faites point tuer. » A ces motz furent tous effroiez, et cuidoient que le Roy leur eust ainsi mandé ; et chacun rend aux Sarrazins ses bastons et harnois. Quant l’admiral vit que les Sarrazins emmenoient prinsonniers les gens du Roy, il dist à messire Phelippe de Montfort qu’il ne lui asseuroit mye la treve, et qu’il veoit ja que tous ses gens estoient prins des Sarrazins. Et voiant messire Phelippe que tous les gens du Roy estoient prins, il fut bien esbahy. Car il savoit bien, nonobstant qu’il fust messagier de demander la treve, que tantoust il seroit aussi prins ; et ne savoit à qui avoir recours. Or en Paiennie y a une tres-mauvaise coustume. Car quant entre le Souldan et aucun des roys d’icelui païs envoient leurs messagiers l’un à l’autre pour avoir ou demander treves, et l’un des princes se meurt, le messagier, s’il est trouvé, et que la treve ne soit donnée, il sera prins prinsonnier, de quelque part que ce soit, soit-il messagier du Souldan ou du Roy.

Or devez savoir que nous autres, qui estions en noz vaisseaux en l’eauë, cuidans eschapper jusques à Damiete, ne fusmes point plus habilles que ceulx qui estoient demourez à terre. Car nous fusmes prins, comme vous orrez cy-aprés. Il est vray que, nous estans sur l’eauë, il s’esleva ung terrible vent contre nous qui venoit de devers Damiete, qui nous tollut le cours de l’eau, en faczon que ne povions monter : et nous convint retourner arriere vers les Sarrazins. Le Roy avoit bien laissé et ordonné plusieurs chevaliers à garder les malades sur la rive de l’eauë, mais ce ne nous servit de riens pour nous retirer à eulx ; car ilz s’en estoient tous fuiz. Et quant vint vers le point du jour, nous arrivasmes au passage ouquel estoient les gallées du Souldan, qui gardoient que aucuns vivres ne fussent amenez de Damiete à l’oust dont a esté touché cy-devant. Et quant ilz nous eurent apperceuz, ilz menerent grant bruit, et commancerent à tirer à nous, et à d’autres de noz gens de cheval qui estoient de l’autre cousté de la rive, grant foizon de pilles avec feu gregois, tant qu’il ressembloit que les estoilles cheussent du ciel. Et ainsi que mes mariniers nous eurent remis au cours de l’eauë, et que nous voulions tirer oultre, nous trouvasmes ceulx que le Roy avoit laissez à cheval pour garder les malades, qui s’enfuioient vers Damiete. Et le vent se va relever plus fort que devant, et nous gecta à couste à l’une des rives du fleuve. Et à l’autre rive y avoit si grant quantité de vaisseaux de noz gens que les Sarrazins avoient prins et gaignez, que nous ne ouzasmes en approucher. Et aussi nous voions bien qu’ilz tuoient les gens qui estoient dedans, et les gectoient en l’eauë. Et leur voions tirer hors des nefz les coffres et les harnois qu’ilz avoient gaignez. Et pour ce que ne voulions aller aux Sarrazins qui nous menaczoient, ilz nous tiroient force de tret. Et lors je me fis vestir mon haubert, affin que les pilles qui cheoient en nostre vessel ne me bleczassent. Et au bout de nostre vessel y avoit de mes gens qui me vont escrier : « Sire, Sire, nostre marinier, pour ce que les Sarrazins le menacent, nous veult mener à terre, là où nous serions tantoust tuez et occis. » Adonc je me fis lever, pour ce que j’estois malade, et prins m’espée toute nue, et leur dis que je les turoie s’ilz tiroient plus avant à me vouloir mener à terre aux Sarrazins. Et ilz me vont respondre, qu’ilz ne me sauroient passer oultre : et pour ce, que advisasse lequel j’amois le mieulx, ou qu’ilz me menassent à rive, ou qu’ilz m’encrassent en la riviere. Et j’aymé mieux, dont bien me print ainsi que vous orrez, qu’il m’encrassent ou fleuve, que qu’ilz me menassent à rive, où je veoie noz gens tuer ; et ainsi me crurent. Mais ne tarda gueres, que tantoust veez-cy venir vers nous quatre des gallées du Souldan, esquelles avoit dix mil hommes. Lors je appellé mes chevaliers, et requis qu’ilz me conseillassent de ce qu’estoit de faire, ou de nous rendre aux gallées du Souldan qui venoient, ou de nous aller rendre à ceulz qui estoient à terre. Et fusmes tous d’un accord qu’il valoit mieulx se rendre à ceulx des gallées qui venoient, par ce qu’ilz nous tiendroient tous ensemble : que de nous rendre aux autres, qui estoient en terre, qui nous eussent tous séparez les ungs d’avecques les autres, et nous eussent par adventure venduz aux Beduins dont je vous ay devant parlé. A ce conseil ne se voulst mye consentir ung mien clerc que j’avoie, més disoit que tous nous devions laisser tuer, affin d’aler en paradis. Ce que ne voulusmes croire ; car la paeurs de la mort nous pressoit trop fort.

Quant je viz, qu’il estoit force de me rendre, je pris ung petit coffret que j’avoie, où estoient mes joyaulx et mes reliques, et gecté tout dedans le fleuve. Et me dist l’un de mes mariniers, que si je ne lui laissois dire aux Sarrazins que j’estois cousin du Roy, qu’ilz nous tueroient tous. Et je lui respondy qu’il dist ce qu’il vouldroit. Et adonc veez-cy arriver à nous la première des quatre gallées, qui venoit de travers, et gectèrent leur ancre prés de nostre vessel. Lors m’envoia Dieu, et ainsi le croy, ung Sarrazin qui estoit de la terre de l’Empereur, qui seullement avoit unes braies vestues d’une toille escrue ; et vint noant parmy l’eauë droit à mon vessel, et m’embrassa par les flans, et me dist : « Sire, si vous ne me croiez, vous êtes perdu. Car il vous convient pour sauveté vous mettre hors de vostre vessel, et vous gecter en l’eauë : et ilz ne vous verront mye, par ce qu’ilz s’attendront au gaing de vostre vessel. » Et il me fist gecter une corde de leur gallée sur l’escot de mon vessel. Et adonc je sailli en l’eauë, et le Sarrazin aprés moy : dont besoing me fut, pour me soustenir et conduire en la gallée. Car j’estois si feble de maladie que j’alloie tout chancellant, et fusse cheu au fons du fleuve.

Je fuz tiré jusques dedans la gallée, en laquelle avoit bien encore quatre-vingtz hommes ; oultre ceulx, qui estoient entrez en mon vessel, et ce povre Sarrazin me tenoit embrassé. Et tantoust fu porté à terre, et me coururent sus pour me vouloir couper la gorge, et bien m’y attendoys : et celui qui m’eust tué cuidoit bien estre à honneur. Et celui Sarrazin, qui m’avoit tiré hors de mon vessel, ne me vouloit lascher, et leur crioit : « Le cousin du Roy, le cousin du Roy ! » Et alors je sentois le coutel emprés la gorge, et m’avoient ja mis à genoullons à terre. Et Dieu de ce péril me délivra o l’aide de ce pouvre Sarrazin, lequel me mena jusques au chastel, là où les Sarrazins estoient. Et quant je fu avecques eulx, ilz me oustèrent mon haubert : et de pitié qu’ils eurent de moy, me voiant ainsi malade, ilz me gectèrent sur moy une mienne couverte d’escarlate fourrée de menu ver, que madame ma mere m’avoit donnée. Et ung autre d’eulx m’apporta une courroie blanche, dequoy je me ceigny par dessus mon couvertouer. Et ung autre des chevaliers sarrazins me bailla ung chapperonnet, que je mis sur ma teste. Et tantoust je commençay à trembler des dens, tant de la grant paeur que j’avoie, que aussi de la maladie. Je demandé à boire, et on me alla quérir de l’eauë en ung pot. Et si toust que j’en eu mis en ma bouche, pour cuider l’envoier aval, elle me sault par les narilles Dieux sceit en quel piteux point j’estoie ! Car j’esperoie beaucoup plus la mort, que la vie, car j’avois l’apoustume en la gorge. Et quant mes gens me virent ainsi sortir l’eauë par les narilles, ilz commancerent à pleurer, et mener deul. Et le Sarrazin, qui m’avoit sauvé, dont j’ay devant parlé, demanda à mes gens, pourquoy ilz pleuroient. Et ilz lui firent entendre, que j’estois presque mort, et que j’avois l’apoustume en la gorge, qui m’estrangleroit. Et icelui bon Sarrazin, qui tousjours avoit eu pitié de moy, le va dire à ung des chevaliers sarrazins : lequel chevalier sarrazin lui dist qu’il me reconfortast, et qu’il me donneroit tantoust quelque chose à boire, dont je serois guery dedans deux jours ; et ainsi le fist. Et tantoust fu guery o l’aide de Dieu, et du breuvage, que me donna le chevalier sarrazin.

Tantoust après que je fu guery, l’admiral des gallées du Souldan m’envoia quérir devant lui, pour savoir si j’estois cousin du Roy, comme l’on disoit. Et je lui responds, que non. Et lui comptay comment ce avoit esté fait, ne pourquoy. Car ce avoit esté le marinier, qui le m’avoit ainsi conseillé, de paeurs que les Sarrazins des gallées, qui nous prindrent, nous tuassent tous. Et l’admiral me respondit, que moult bien avoie esté conseillé ; car autrement nous eussent-ils tuez sans faille, et gectez dedans le fleuve. Derechief me demanda ledit admiral, si j’avoie aucune congnoissance de l’empereur Ferry d’Almaigne, qui lors vivoit ; et si j’estoie mie de son lignage. Et je lui respondy la vérité, que j’entendois que madame ma mère estoit sa cousine née de germain. Et l’admiral me respondit qu’il m’en aymoit de tant mieulx. Et ainsi comme nous estions là mengeans et buvans, il m’avoit fait là venir devant moy ung bourgeois de Paris. Quant le bourgeois me vit menger, il me va dire : « Ha ! Sire, que faites-vous ? » Que je fays ? fis-je. Et le bourgeois me va advertir de par Dieu, que je mengeoie au jour du vendredi. Et subit je lancé mon escuelle, où je mengeois, arriere. Et ce voiant l’admiral, demanda au Sarrazin, qui m’avoit sauvé, qui estoit tousjours avecques moy, pourquoy j’avoie laissé à mengier. Et il lui dist, que c’estoit pour ce qu’il estoit vendredi, et que je n’y pensois point. Et l’admiral respondit, que jà Dieu ne l’auroit à desplaisir, puis que je ne l’avois fait à mon escient. Et saichez, que souvant le légat, qui estoit venu avecques le Roy, me tenczoit dequoy je jeunois, et que j’estois ainsi malade : et qu’il n’y avoit plus avecques le Roy homme d’Estat que moy, et pourtant que je faisois mal de jeûner. Mais non pourtant que je fusse prinsonnier, point ne laissé à jeûner tous les vendrediz en pain et eauë.

Le dimanche d’après que je fu prins, l’admiral nous fîst tous descendre du chastel aval le fleuve sur la rive, ceulx qui avoient esté prins sur l’eauë. Et quant je fu là, messire Jehan mon chappellain fut tiré de la soulte de la gallée, et quant il vit l’air il se pasma. Et incontinant le tuèrent les Sarrazins devant moy, et le gectèrent ou fleuve. Son clerc, qui aussi n’en povoit plus de la maladie de l’ost qu’il avoit, les Sarrazins lui gectèrent un mortier sur la teste, et le tuèrent ; puis le gectèrent ou fleuve, après son maistre. Et semblablement faisoient-ilz des autres prisonniers. Car ainsi qu’on les tiroit de la soulte des gallées, où ilz avoient esté prinsonniers, il y avoit des Sarrazins propices, qui dés ce qu’ilz en veoient ung mal disposé ou feible, ilz le tuoient, et gectoient en l’eauë ; et ainsi estoient traictez les pouvres malades. Et en regardant celle tirannie, je leur fis dire par mon Sarrazin, qu’ilz faisoient grant mal : et que c’estoit contre le commandement de Saladin le paien, qui disoit que on ne devoit tuër ne faire mourir homme, puis qu’on lui avoit donné à mengier de son pain et de son sel. Et ilz me firent respondre que ce nestoient mie hommes d’aucune valuë, et qu’ilz ne povoient plus faire aucune œuvre, puis qu’ilz estoient ainsi malades. Et après ces choses, ilz me firent venir devant moy tous mes mariniers, et me disoient qu’ilz estoient tous régniez. Et je leur dis qu’ilz n’y eussent jà fiance, et que c’estoit seulement de paeurs qu’on les tuast : et qu’aussi toust qu’ilz seroient trouvez en lieu et en païs, incontinant ilz se retourneroient à la foy. Et ad ce me respondit l’admiral qu’il m’en croioit bien : et que Saladin disoit, que jamés on ne vit d’un Chrestien bon Sarrazin, n’aussi d’un bon Sarrazin Chrestien. Et tantoust l’admiral me fist monter sur ung pallefroy, et chevauchions l’un joignans l’autre. Et me mena passer à ung pont, jusques au lieu où estoit saint Loys, et ses gens prinsonniers. Et à l’entrée d’un grant pavillon trouvasmes l’escrivain qui escrivoit les noms des prinsonniers de par le Souldan. Et là me faillut nommer mon nom, que ne leur voulu celer : et fut escript comme les autres. Et à l’entrée dudit pavillon, celui Sarrazin qui tousjours m’avoit suyvi et acompaigné, et qui m’avoit sauvé en la gallée, me dist : « Sire, je ne vous puis plus suivre, et me pardonnez. Et vous recommande ce jeune enfant que avez avecques vous, et vous pry que le tenez tousjours par le poing, ou autrement je sçay que les Sarrazins le tueront.» L’enfant avoit nom Berthelemy de Montfaucon, filz du seigneur de Montfaucon de Bar. Tantoust que mon nom fut escript, l’admiral nous mena le jeune filz et moy dedans le pavillon, où estoient les barons de France, et plus de dix mil autres personnes avecques eulx. Et quant je fu dedans entré, tous commencèrent à mener si grant joie de me veoir, qu’on ne povoit rien ouïr, pour le bruit de joie qu’ilz en faisoient ; car ilz me cuidoient avoir perdu.

Et ainsi que nous estions ensemble esperans l’aide dé Dieu, nous ne demourasmes gueres, que ung grant richomme Sarrazin nous mena tous plus avant en ung autre pavillon, et faisions chiere piteuse. Moult d’autres chevaliers et d’autres de nos gens estoient aussi prisonniers, encloux en une grant court, qui estoit douze de murailles de terre. Et ceulx-là faisoient tirer hors les prisonniers l’un après l’autre, et leur demandoient, si se vouloient regnoier. Et ceulx qui disoient oy, et qui se regnoient, estoient mis à part : et ceulx-là qui ne le vouloient faire, tout incontinant on leur couppoit la teste.

Tantoust après nous envoia le Souldan son conseil parler à nous, et demanda le conseil, auquel de nous il diroit le message du Souldan. Et tous nous accordasmes que ce fust au conte Pierre de Bretaigne, par ung trucheman que avoient les Sarrazins, qui parloit l’un et l’autre des langaiges françois et sarrazins. Et furent telles les paroles : « Seigneurs, le Souldan nous envoie par devers vous savoir si vous vouldriez point estre delivrez, et que vous lui vouldriez donner ou faire pour vostre delivrance avoir. » Et à ceste demande respondit le conte Pierre de Bretaigne que moult voulentiers vouldrions estre délivrez des mains du Souldan, ou avoir jà fait et enduré ce que possible seroit par raison. Et lors le conseil du Souldan demanda au conte de Bretaigne si nous vouldrions point donner pour nostre délivrance aucuns des chasteaux et places appartenans aux barons d’oultre mer. Et le Conte respondit que ce ne povoyons nous faire. La raison si estoit pource que lesdiz chasteaux et places estoient tenuz de l’empereur d’Almaigne, qui lors estoit : et que jamais il ne consentiroit que le Souldan tiensist rien soubz lui. Derechief demanda le conseil du Souldan si nous vouldrions randre nulz des chasteaux du Temple ou de l’Ospital de Rodes, pour nostre délivrance. Et le Conte respondit qu’il ne se povoit faire ; car ce seroit contre le serement acoustumé, qui est que, quant on met les chastellains et gardes desdiz lieux, ilz juroient à Dieu que pour la délivrance de corps de homme ilz né rendroient nulz desdiz chasteaux. Et les Sarrazins ensemble respondirent qu’il sembloit que nous n’avions nul tallent ne envie d’estre délivrez : et qu’ils nous iroient envoier les joueux d’espées, qui nous feroient comme aux autres. Et sur ce s’en allerent. Et tantoust après que le conseil du Souldan s’en fust allé, veez-cy venir à nous ung grant viel Sarrazin de grant apparence, lequel avoit avecques lui une grant multitude de jeunes gens Sarrazins qui tous avoient chacun une espée ceinte au cousté, dont fusmes tous effroiez. Et nous fist demander celui anxien Sarrazin par un trucheman qui entendoit et parloit nostre langue, s’il estoit vray que nous créussions en ung seul Dieu qui avoit esté né pour nous, crucifié et mort pour nous, et au tiers jour après sa mort ressuscité pour nous ? Et nous respondismes que oy vraiement. Et lors il nous respondit que puis que ainsi estoit, que nous ne nous devions desconforter, d’avoir soufîert ne de souffrir telles persécutions pour lui, et que encores n’avions nous point enduré la mort pour lui, comme il avoit pour nous fait : et que s’il avoit eu pouvoir de soy ressusciter, que certainement il nous délivreroit de brief. Et adonc s’en alla ce Sarrazin avecques tous ses jeunes gens, sans autre chose nous faire. Dont je fu moult joieux et haitié ; car m’entencion estoit qu’ils nous fussent venuz coupper les testes à tous. Et ne tarda après gueres de temps que n’eussions nouvelles de nostre délivrance.

Après ces choses dessusdictes, le conseil du Souldan revint à nous, et nous dist que le Roy avoit tant fait qu’il avoit pourchassé noz délivrances ; et que nous lui envoiassions quatre de nous autres pour ouïr et savoir la manière du traicté de nostre délivrance. Et à ce faire lui envoiasmes messeigneurs Jehan de Valéry, Phelippe de Montfort, Baudouyn d’Ebelin, senneschal de Chippre, et Guion d’Ebelin son frère, connestable de Chippre, qui estoit l’un des beaux et des biens conditionnez chevaliers qu’onques je congnusse, et qui moult aymoit les gens de ce païs. Lesquelz quatre chevaliers dessuz nommez nous rapportèrent tantoust la façon et maniere de nostre délivrance. Et pour essaier le Roy, le conseil du Souldan lui fist telles et semblables demandes qu’il nous avoit faites cy-devant. Et ainsi qu’il pleut à nostre seigneur, le bon roy saint Loys leur respondit autelle et semblable responce à chascune des deux demandes, comme nous avions fait par la bouche du conte Pierre de Bretaigne. Et voians les Sarrazins, que le Roy ne vouloit optemperer à leurs demandes, ilz le menasserent de le mectre en bernicles: qui est le plus grief tourment qu’ilz puissent faire à nully. Et sont deux grans tisons de bois qui sont entretenans au chief. Et quant ilz veullent y mectre aucun, ilz le couchent sur le cousté entre ces deux tisons, et lui font passer les jambes à travers de grosses chevilles : puis couschent la pièce de bois qui est là dessus, et font asseoir ung homme dessus les tisons. Dont il advient qu’il ne demeure à celui qui est là cousché, point demy pié d’ossemens qu’il ne soit tout desrompu et escaché. Et pour pis lui faire, au bout des trois jours lui remettent les jambes, qui sont grosses et enflées, dedans celles bernicles, et le rebrisent de rechief, qui est une chose moult cruelle à qui sauroit entendre : et le lient à gros nerfz de beuf par la teste, de paeur qu’il ne se remue de là dedans. Mais de toutes celles menaces ne fist compte le bon Roy, et leur dist qu’il estoit leur prinsonnier, et qu’ilz pouvoient faire de lui à leur vouloir.

Quant les Sarrazins virent, qu’ilz ne peurent vaincre le Roy par menasses, ilz retournèrent à lui, et lui demanderent combien il vouldroit donner de finance au Souldan en oultre Damiete, qu’il leur rendroit. Et le Roy respondit que si le Souldan vouloit prandre pris et ranczon raisonnable, qu’il manderoit à la Royne qu’elle le paiast pour la ranczon de sa gent. Et les Sarrazins lui demandèrent, pourquoy il le vouloit mander à la Royne. Et il leur respondit que c’estoit bien raison qu’il le fist ainsi, et qu’elle estoitsa dame et compaigne. Et adonc le conseil du Souldan alla savoir audit Souldan combien il demandoit au Roy. Et tantoust retournèrent vers le Roy, et lui disrent que si la Royne vouloit paier dix cens mille besans d’or, qui valoient lors cinq cens mille livres, qu’elle délivreroit le Roy par ce faisant. Et le Roy leur demanda par leur serement, si la Royne leur paioit les cinq mil livres, si le Souldan consentiroit sa délivrance. Et ilz retournèrent savoir au Souldan s’il le vouloit ainsi faire et promettre. Et rapportèrent les gens de son conseil qu’il le vouloit bien, et lui en firent le serement. Et si toust que les Sarrazins lui eurent juré et promis en leur foy d’ainsi le faire et de le délivrer, le Roy promist qu’il paieroit voulentiers pour la ranczon et délivrance de sa gent cinq cens mil livres, et pour son corps qu’il rendroit Damiete au Souldan : et qu’il n’estoit point tel qu’il se voulsist redimer, ne avoir pour aucune finance de deniers la delivrance de son corps. Quant le Souldan entendit la bonne voulenté du Roy, il dist : « Par ma loy, franc et libéral est le François qui n’a voulu barguigner sur si grant somme de deniers : mais a octroié faire et paier ce qu’on lui a demandé. Or lui allez dire, fist le Souldan, que je lui donne sur sa ranczon cent mil livres, et ne paiera que quatre cens mil.»

Adonc le Souldan tantoust fist mettre en quatre gallées sur le fleuve tous les plus grans gens que le Roy eust, et les plus nobles, pour les mener à Damiete. Et estoient, en la gallée où je fu mis, le bon conte Pierre de Bretaigne, Guilleaume conte de Flandres, Jehan le bon conte de Soissons, messire Hymbert de Beau-jeu connestable, et les deux bons chevaliers messires Baudouyn d’Ebelin, et Guy son frère. Et ceulx de la gallée nous firent aborder devant une grant maison que le Souldan avoit fait tendre sur le fleuve. Et estoit fait ce hebergement, qu’il y avoit une belle tour faite de perches de sapin, et toute clouse à l’entour de une toille taynte. Et à l’entrée de la porte y avoit ung grant pavillon tendu. Et là laissoient les admiraulx du Souldan leurs espées et bastons, quant jlz vouloient aller parler au Souldan. Aprés celui pavillon y avoit une autre belle grant porte, et par celle porte on entroit en une grant salle, qui estoit la salle du Souldan. Empres celle salle y avoit une autre tour faite comme la première, par laquelle seconde tour on montoit en la chambre du Souldan. Ou meilleu d’icelui hébergement y avoit ung grant prael ; et y avoit en icelui prael une tour plus grant que toutes les autres. Et par celle haulte tour le Souldan montoit, pour veoir tout le païs d’illec environ, et l’ost d’une part et d’autre. Et y avoit en icelui prael une allée tirant vers le fleuve ; et au bout d’icelle allée le Souldan avoit fait tendre ung pavillon sur l’orée du fleuve, pour s’aller baigner. Et estoit celui logeis tout couvert par dessus le fust de trillis, et par dessus le trillis couvert de toille de Ynde, affin qu’on ne peust voir de dehors dedans. Et estoient toutes les tours couvertes de toilles. Devant celui hébergement arrivasmes le jeudi devant la feste de l’Ascencion Nostre Seigneur en celui temps. Et illecques prés fut descendu le Roy en ung pavillon pour parler au Souldan, et lui accorder que le sabmedi d’après le Roy lui rendroit Damiete.

Et ainsi comme on estoit sur le partement à vouloir venir à Damiete pour la rendre au Souldan ; l’admiral, qui avoit esté du temps du père du jeune Souldan qui lors estoit, eut en lui aucun remors du desplaisir que lui avoit fait ce jeune Souldan. Car à son avenement, et que icelui admiral l’eut envoié querir pour estre Souldan aprés son père qui mourut à Damiete, et pour pourveoir ses gens qu’il avoit amenez avecques lui d’estranges terres, il desapointa l’admiral qui avoit esté ou vivant de son pere, et pareillement les connestable, mareschaux et seneschaux de son pere. Et pour ceste cause prindrent conseil en eulx, et disoient l’un à l’autre : « Seigneurs, vous voiez le deshonneur que le Souldan nous a fait ; car il nous a ousté des preheminences et gouvernemens esquelz le Souldan son père nous avoit mis. Pour laquelle chose nous devons estre certains que, s’il rentre une foiz dedans les forteresses de Damiete, il nous fera puis aprés tous prandre et mourir en ses prinsons, de paeurs que par succession de temps nous prensisson vengeance de lui : ainsi comme fist son ayeul de l’admiral et des autres qui prindrent les contes de Bar et de Montfort. Et pourtant vault-il mieulx que nous le fassons tuer avant qu’il sorte de noz mains.» Et ad ce se consentirent tous. Et de fait s’en allerent parler a ceulx de la Haulcqua, dont j’ay devant parlé, qui sont ceulx qui ont la garde du corps du Souldan. Et leur firent semblables remonstrances, comme ilz avoient euës entr’eulx ; et les requisdrent qu’ilz tuassent le Souldan. Et ainsi le leur promisdrent ceulx de la Haulcqua.

Et ainsi comme ung jour le Souldan convia à disner ses chevaliers de la Haulcqua, advint que aprés disner se voulut retirer en sa chambre. Et ainsi qu’il eut prins congié de ses admiraulx, ung des chevaliers de la Haulcqua, qui portoit l’espée du Souldan, ferit le Souldan sur la main, et la lui fendit jusques emprés le braz entre les quatre doiz. Et adonc le Souldan se retourna vers ses admiraulx qui avoient conclud le fait, et leur dist : « Seigneurs, je me plains à vous de ceulx de la Haulcqua, qui m’ont voulu tuer, comme vous povez veoir à ma main.» Et ilz lui respondirent tous à une voix, qu’il leur valoit beaucoup mieulx qu’ilz le tuassent que qu’il les fist mourir, ainsi qu’il le vouloit faire, si une foiz il estoit és forteresses de Damiete. Et saichez que cauteleusement le firent les admiraulx. Car ils firent sonner les trompetes et naquaires du Souldan ; et tout l’ost des Sarrazins se assembla pour savoir que le Souldan vouloit faire. Et les admiraulx, leurs complices et alliez disdrent que Damiete estoit prinse, et que le Souldan s’y en alloit, et leur avoit commandé que tous allassent en armes après lui. Et subit tous se armèrent, et s’en allerent picquans des espérons vers Damiete, dont nous autres fusmes à grant malaise. Car nous cuidions que de vray Damiete fust prinse. Et ce voiant le Souldan, qui estoit encore jeune, et la malice qui avoit esté conspiiée contre sa personne, il s’enfuit en sa haute tour qu’il avoit prés de sa chambre, dont j’ay devant parlé. Car ses gens mesme de la Haulcqua lui avoient ja abatu tous ses pavillons, et environnoient celle tour où il s’en estoit fouy. Et dedans la tour y avoit trois de ses evesques, qui avoient mengé avecques lui, qui lui escrierent qu’il descendist. Et il leur dist, que voulentiers il descendroit, mais qu’ilz l’asseurassent. Et ilz lui respondirent que bien le feroient descendre par force, et malgré lui ; et qu’il n’estoit mye encor à Damiete. Et tantoust ilz vont gecter le feu gregois dedans celle tour, qui estoit seullement de perches de sappin, et de toille, comme j’ay devant dit. Et incontinant fut embrasée la tour. Et vous promets, que jamais ne viz plus beau feu, ne plus souldain. Quant le Souldan vit que le feu le pressoit, il descendit parla voie du prael dont j’ay devant parlé, et s’enfuit vers le fleuve. Et en s’enfuyant, l’un des chevaliers de la Haulcqua le ferit d’un grant glaive parmy les coustes, et il se gecte o tout le glaive dedans le fleuve. Et après lui descendirent environ de neuf chevaliers, qui le tuèrent là dedans le fleuve assez prés de nostre gallée. Et quant le Souldan fut mort, l’un desdits chevaliers, qui avoit nom Faracataic, le fendit, et lui tira le cueur du ventre. Et lors il s’en vint au Roy, sa main toute ensanglantée, et lui demanda : « Que me donneras-tu, dont j’ay occis ton ennemy, qui t’eust fait mourir s’il eust vescu ? » Et à ceste demande ne lui respondit oncques ung seul mot le bon roy saint Loys.

Quant ilz eurent ce fait, il en entra bien trente en nostre gallée avec leurs espées toutes nues és mains, et au coul leurs haches d’armes. Et je demanday à monseigneur Boudouyn d’Ebelin, qui entendoit bien sarrazinois, que c’estoit que celles gens disoient. Et il me respondit qu’ilz disoient qu’ilz nous venoient coupper les testes. Et tantoust je viz un grant trouppeau de noz gens, qui là estoient, qui se confessoient à ung religieux de la Trinité qui estoit avecques Guilleaume conte de Flandres. Mais endroit moy ne me souvenoit alors de mal ne de pechié que oncques j’eusse fait : et ne pensois sinon à recevoir le coup de la mort. Et je me agenoillé aux piez de l’un d’eulx lui tendant le coul, et disant ces motz en faisant le signe de la croix : « Ainsi mourut sainte Agnès. » Encouste moy se agenoilla messire Guy d’Ebelin connestable de Chippre, et se confessa à moy : et je lui donnay telle absolucion, comme Dieu m’en donnoit le povoir. Mais de chose qu’il m’eust dite, quant je fu levé oncques ne m’en recorday de mot.

Nous fusmes tantoust mis en la soulte de la gallée, tous couschez adans : et cuidions beaucoup de nous qu’ilz ne nous ouzassent assaillir tous à un coup, mais pour nous avoir l’un après l’autre leans. Fusmes à tel meschief toute la nuyt. Et avoie mes piez à droit du viz à monseigneur le conte Pierre de Bretaigne, et aussi les siens piez estoient à l’endroit du mien viz. Advint que le landemain nous fusmes tirez hors de celle soulte, et nous envoyèrent dire les admiraulx que nous leur alissions renouveller les convenances que nous avions faictes au Souldan. El y allerent ceulx qui peurent aller. Mais le conte de Bretaigne, et le connestable de Chippre, et moy, qui estions griefvement malades, demourasmes.

Ceulx qui allerent parler aux admiraulx, c’est assavoir le conte de Flandres, le conte de Soissons, et les autres qui y peurent aller, racompterent la convencion de noz délivrances. Et les admiraulx promisdrent que, si toust comme on leur aurait délivré Damiete, ilz délivreroient le Roy, et les autres grans personnages qui estoient prinsonniers. Et lui disdrent que si le Souldan eust vescu, qu’il eust fait coupper la teste au Roy et à tous eulx ; et que jà, contre les convenances qu’il avoit faites et promises au Roy, il avoit fait emmener vers Babilonne plusieurs de leurs grans riches hommes : et qu’ilz l’avoient fait tuër, parce qu’ils savoient bien que si toust qu’il auroit Damiete, qu’il les feroit aussi tous tuër, ou mourir en ses prinsons.

Par ceste convenance le Roy devoit jurer en oultre faire à leur gré de deux cens mil livres avant qu’il partist du fleuve, et les deux autres cens mil il les leur bailleroit en Acre : et qu’ilz detiendroient pour sehureté de paiement les malades qui estoient en Damiete, avec les arbalestes, armeures, engins et les chars sallées, jusques ad ce que le Roy les envoieroit querir, et envoieroit les deux darreniers cens mil livres. Le serement qui devoit estre fait entre le Roy et les admiraulx fut devisé. Et fut tel le serement des admiraulx, que ou cas qu’ils ne tenoient au Roy leurs convencions et promesses, qu’ilz vouloient estre ainsi honnis et déshonnorez comme cil qui par son pèché alloit en pellerinage à Mahommet, la teste toute nuë, et celui qui laissoit sa femme, et la reprenoit aprés. Et en ce cas second nul ne povoit selon la loy de Mahommet laisser sa femme, et puis la reprandre, avant qu’il eust veu aucun autre gisant ou lit avecques elle. Le tiers serement estoit qu’ilz fussent deshonorez et deshontez, comme le Sarrazin qui mengeuë la char de porc. Et receut le Roy les seremens dessusditz, parce que maistre Nicolle d’Acre, qui savoit leur façon de faire, lui dist que plus grans seremens ne povoient-ilz faire.

Quant les admiraulx eurent juré et fait leurs seremens, ilz firent escripre et baillerent au Roy le serement tel qu’ilz vouloient qu’il feist, qui fut tel, et par le conseil d’aucuns Chrestiens regnoiez qu’ilz avoient, que ou cas que le Roy ne leur tenoit sa promesse, et les convencions d’entr’eulx, qu’il fust séparé de la compaignie de Dieu et de sa digne mère, des douze apoustres, et de tous les autres saints et saintes de paradis. Et à celui serement se accorda le Roy. L’autre estoit, que oudit cas que le Roy ne tenoit lesdites choses promises, qu’il fust réputé parjure comme le Chrestien qui a regnié Dieu, et son baptesme, et sa loy ; et qui en despit de Dieu crache sur la croix, et l’escache o les piez. Quant le Roy oyt celui serement, il dist que jà ne le feroit-il.