Gargantua (page 2)

Ce mal paſſa me torchant d’vn bonnet de paige, bien emplumé à la Souice.

Puis, fiantant derriere vn buiſſon, trouuay vn chat de Mars, d’icelluy me torchay, mais ſes gryphes me exulcererent tout le perinee.

De ce me gueryz au lendemain, me torchant des guands de ma mere, bien parfumez de mauioin.

Puis me torchay de Saulge, de Fenoil, de Aneth, de Mariolaine, de roſes, de fueilles de Courles, de Choulx, de Bettes, de Pampre, de Guymaulues, de Verbaſce (qui eſt eſcarlatte de cul), de Lactues & de fueilles de Eſpinards. Le tout me feiſt grand bien à ma iambe : de Mercuriale, de Perſiguire, de Orties, de Conſolde : mais i’en eu la cacqueſangue de Lombard. Dont feu gary me torchant de ma braguette.

Puis me torchay aux linceux, à la couuerture, aux rideaulx, d’vn coiſſin, d’vn tapiz, d’vn verd, d’vne mappe, d’vne ſeruiette, d’vn mouſchenez, d’vn peignouoir. En tout ie trouuay de plaiſir plus que ne ont les roigneux quand on les eſtrille.

Voyre, mais (diſt Grandgouſier) lequel torchecul trouuas tu meilleur ? Ie y eſtois (diſt Gargantua), & bien touſt en ſçaurez le tu autem. Ie me torchay de foin, de paille, de bauduffe, de bourre, de laine, de papier. Mais

Touſiours laiſſe aux couillons eſmorche

Qui ſon hord cul de papier torche.

Quoy ? diſt Grandgouſier, mon petit couillon, as tu prins au pot ? veu que tu rimes deſia ? Ouy dea (reſpondit Gargantua), mon roy, ie rime tant & plus : & en rimant ſouuent m’enrime. Eſcoutez que dict noſtre retraict aux fianteurs,

Chiart,

Foirart,

Petart,

Brenous,

Ton lard

Chappart

S’eſpart

Sus nous.

Hordous

Merdous

Eſgous,

Le feu de ſainct Antoine te ard :

Sy tous

Tes trous

Eſclous

Tu ne torche auant ton depart.

En voulez-uous daduentaige ? Ouy dea, reſpondit Grandgouſier. Adoncq diſt Gargantua :

Rondeav

En chiant l’aultre hyer ſenty

La guabelle que à mon cul doibs,

L’odeur feut aultre que cuydois :

I’en feuz du tout empuanty.

O ſi quelcun euſt conſenty

M’amener vne que attendoyſ

En chiant.

Car ie luy euſſe aſſimenty

Son trou d’vrine à mon lourdoys.

Cependant euſt auec ſes doigtz

Mon trou de merde guarenty,

En chiant.

Or dictes maintenant que ie n’y ſçay rien. Par la mer dé, ie ne les ay faict mie. Mais les oyant reciter à dame grand que voyez cy, les ay retenu en la gibbeſiere de ma memoire.

Retournons (diſt Grandgouſier) à noſtre propos. Quel ? (diſt Gargantua) Chier ? Non diſt Grandgouſier. Mais torcher le cul. Mais (diſt Gargantua) voulez vous payer vn buſſart de vin Breton ſi ie vous foys quinault en ce propos ? Ouy vrayement, diſt Grandgouſier.

Il n’eſt (diſt Gargantua) poinct beſoing torcher cul, ſinon qu’il y ayt ordure. Ordure n’y peut eſtre ſi on n’a chié : chier doncques nous fault dauant que le cul torcher. O (diſt Grandgouſier) que tu as bon ſens, petit guarſonnet. Ces premiers iours ie te feray paſſer docteur en gaie ſcience, par Dieu, car tu as de raiſon plus que d’aage.

Or pourſuiz ce propos torcheculatif, ie t’en prie. Et, par ma barbe, pour vn buſſart tu auras ſoixante pippes, i’entends de ce bon vin Breton, lequel poinct ne croiſt en Bretaigne, mais en ce bon pays de Verron.

Ie me torchay apres (diſt Gargantua) d’vn couurechief, d’vn aureiller, d’vgne pantophle, d’vgne gibbeſſiere, d'un panier. Mais ô le mal plaiſant torchecul. Puis d’vn chappeau. Et notez que des chappeaulx, les vns ſont ras, les aultres à poil, les aultres veloutez, les aultres taffetaſſez, les aultres ſatinizez. Le meilleur de tous eſt celluy de poil. Car il faict tres bonne abſterſion de la matiere fecale.

Puis me torchay d’vne poulle, d’vn coq, d’vn poulet, de la peau d’vn veau, d’vn lieure, d’vn pigeon, d’vn cormoran, d’vn ſac d’aduocat, d’vne barbute, d’vne coyphe, d’vn leurre.

Mais, concluent, ie dys & mantiens qu’il n’y a tel torchecul que d’vn oyzon bien dumeté, pourueu qu’on luy tienne la teſte entre les iambes. Et m’en croyez ſus mon honneur. Car vous ſentez au trou du cul vne volupté mirificque, tant par la doulceur d’icelluy dumet que par la chaleur temperee de l’oizon, laquelle facilement eſt communicquee au boyau culier & aultres inteſtines, iuſques à venir à la region du cueur & du cerueau. Et ne penſez que la beatitude des Heroes & ſemidieux, qui ſont par les champs Elyſiens ſoit en leur Aſphodele ou Ambroſie, ou Nnectar, comme diſent ces vieilles ycy. Elle eſt (ſcelon mon opinion) en ce qu’ilz ſe torchent le cul d’vn oyzon. Et telle eſt l’opinion de Maiſtre Iehan d’Eſcoſſe.

esté : été

Comment Gargantua feut inſtitué par vn Sophiſte en lettres latines.

Chapitre XIIII.

es propos entenduz, le bon homme Grandgouſier fut rauy en admiration, conſiderant le hault ſens & merueilleux entendement de ſon filz Gargantua.

Et diſt à ſes gouuernantes, Philippe roy de Macedone congneut le bon ſens de ſon filz Alexandre, à manier dextrement vn cheual. Car ledict cheual eſtoit ſi terrible & efrené que nul auſoit monter deſſus : Par ce que à tous ſes cheuaucheurs il bailloit la ſaccade : à l’vn rompant le coul, à l’aultre les iambes, à l’aultre la ceruelle, à l’aultre les mandibules. Ce que conſiderant Alexandre en l’hippodrome (qui eſtoit le lieu ou l’on pourmenoit & voultigeoit les cheuaulx), aduiſa que la fureur du cheual ne venoit que de frayeur qu’il prenoit à ſon vmbre. Dont montant deſſus le feiſt courir encontre le Soleil, ſi que l’vmbre tumboit par derriere, & par ce moien rendit le cheual doulx à ſon vouloir. A quoy congneut ſon pere le diuin entendement qui en luy eſtoit, & le feiſt treſbien endoctriner par Ariſtoteles, qui pour lors eſtoit eſtimé ſus tous philoſophes de Grece.

Mais ie vous diz qu’en ce ſeul propos que i’ay preſentement dauant vous tenu à mon filz Gargantua, ie congnois que ſon entendement participe de quelque diuinité : tant ie le voy agu, ſubtil, profund & ſerain. Et paruiendra à degré ſouuerain de ſapience, ſ’il eſt bien inſtitué. Pourtant, ie veulx le bailler à quelque homme ſçauant pour l’endoctriner ſelon ſa capacité. Et n’y veulx rien eſpargner.

De faict, l’on luy enſeigna vn grand docteur ſophiſte nommé maiſtre Thubal Holoferne, qui luy aprint ſa charte ſi bien qu’il la diſoit par cueur au rebours, & y fut cinq ans & troys mois, puis luy leut Donat, le Facet, Theodolet, & Alanus in parabolis : & y fut treze ans ſix moys & deux ſepmaines.

Mais notez que ce pendent il luy aprenoit à eſcripre Gotticquement & eſcripuoit tous ſes liures. Car l’art d’impreſſion n’eſtoit encores en vſaige.

Et portoit ordinairement vn gros eſcriptoire peſant plus de ſept mille quintaulx, duquel le gualimart eſtoit auſſi gros & grand que les gros pilliers de Enay, & le cornet y pendoit à groſſes chaines de fer à la capacité d’vn tonneau de marchandiſe.

Puis luy leugt De modis ſignificandi auecques les commens de Hurtebize, de Faſquin, de Tropditeulx, de Gualehaul, de Iean le Veau, de Billonio, Brelinguandus, & vn tas d’aultres, & y fut plus de dix huyt ans & vnze moys. Et le ſceut ſi bien que, au coupelaud, il le rendoit par cueur à reuers. Et prouuoit ſus ſes doigtz à ſa mere que de modis ſignificandi non erat ſcientia.

Puis luy leugt le compoſt, ou il fut bien ſeize ans & deux moys, lors que ſon dict precepteur mourut : & fut l’an mil quatre cens & vingt, de la verolle que luy vint.

Apres, en eut vn aultre vieux touſſeux, nommé maiſtre Iobelin bridé, qui luy leugt Hugutio, Hebrard Greciſme, le doctrinal, les pars, le quid eſt, le ſupplementum, Marmotret de moribus in menſa ſeruandis, Seneca de quatuor virtutibus cardinalibus, Paſſauantus cum commento. Et Dormi ſecure pour les feſtes. Et quelques aultres de ſemblable farine, à la lecture deſquelz il deuint auſſi ſaige qu’onques puis ne fourneaſmes nous.

esté : été

Comment Gargantua fut mis ſoubz aultres pedagoges.

Chapitre XV.

tant ſon pere aperceut que vrayement il eſtudioit tres bien & y mettoit tout ſon temps, touteſfoys qu’en rien ne prouffitoit. Et que pis eſt, en deuenoit fou, niays, tout reſueux & raſſoté.

Dequoy ſe complaignant à Don Philippe des Marays, Viceroy de Papeligoſſe, entendit que mieulx luy vauldroit rien n’aprendre que telz liures ſoubz telz precepteurs aprendre. Car leur ſçauoir n’eſtoit que beſterie, & leur ſapience n’eſtoit que moufles, abaſtardiſant les bons & nobles eſperitz & corrompent toute fleur de ieuneſſe. Qu’ainſi ſoit, prenez (diſt il) quelcun de ces ieunes gens du temps preſent, qui ait ſeulement eſtudié deux ans, en cas qu’il ne ait meilleur iugement, meilleures parolles, meilleur propos que voſtre filz, & meilleur entretien & honneſteté entre le monde, reputez moy à iamais vn taillebacon de la Brene. Ce que à Grandgouſier pleuſt tres bien, & commanda qu’ainſi feuſt faict.

Au ſoir, en ſoupant, ledict des Marays introduict un ſien ieune paige de Villegongys, nommé Eudemon, tant bien teſtonné, tant bien tiré, tant bien eſpouſſeté, tant honneſte en ſon maintien, que trop mieulx reſſembloit quelque petit angelot qu’vn homme. Puis diſt à Grandgouſier :

Voyez vous ce ieune enfant ? Il n’a encor douze ans, voyons, ſi bon vous ſemble, quelle difference y a entre le ſçauoir de voz reſueurs mateologiens du temps iadis & les ieunes gens de maintenant. L’eſſay pleut à Grandgouſier, & commanda que le paige propozaſt.

Alors Eudemon, demandant congié de ce faire audict viceroy ſon maiſtre, le bonnet au poing, la face ouuerte, la bouche vermeille, les yeulx aſſeurez & le reguard aſſis ſuz Gargantua, auecques modeſtie iuuenile ſe tint ſus ſes pieds, & commença le louer & magnifier premierement de ſa vertus & bonnes meurs, ſecondement de ſon ſçauoir, tiercement de ſa nobleſſe, quartement de ſa beaulté corporelle. Et pour le quint doulcement l’exhortoit â reuerer ſon pere en toute obſeruance, lequel tant s’eſtudioit à bien le faire inſtruire, en fin le prioit qu’il le voulſiſt retenir pour le moindre de ſes ſeruiteurs. Car aultre don pour le preſent ne requeroit des cieulx, ſinon qu’il luy feuſt faict grace de luy complaire en quelque ſeruice agreable.

Le tout feut par icelluy proferé auecques geſtes tant propres, pronunciation tant diſtincte, voix tant eloquente, & languaige tant aorné & bien latin, que mieulx reſembloit vn Gracchus, vn Ciceron ou vn Emilius du temps paſſé, qu’vn iouuenceau de ce ſiecle.

Mais toute la contenence de Gargantua fut qu’il ſe print à plorer comme vne vache & ſe cachoit le viſaige de ſon bonnet, & ne fut poſſible de tirer de luy vne parolle non plus q’vn pet d’vn aſne mort.

Dont ſon pere fut tant courrouſſé, qu’il voulut occire maiſtre Iobelin. Mais ledict des Marays l’en guarda par belle remonſtrance qu’il luy feiſt, en maniere que fut ſon ire moderee. Puis commenda qu’il feuſt payé de ſes guaiges, & qu’on le feiſt bien chopiner ſophiſticquement, ce faict, qu’il allaſt à tous les diables. Au moins (diſoit il) pour le iourd’huy ne couſtera il gueres à ſon houſte, ſi d’auenture il mouroit ainſi, ſou comme vn Angloys.

Maiſtre Iobelin party de la maiſon, conſulta Grandgouſier auecques le vice roy quel precepteur l’on luy pourroit bailler, & feut auiſé entre eulx que à ceſt office ſeroit mis Ponocrates, pedaguoge de Eudemon, & que tous enſemble iroient à Paris, pour congnoiſtre quel eſtoit l’eſtude des iouuenceaulx de France pour icelluy temps.

esté : été

Comment Gargantua fut enuoyé à Paris, & de l’enorme iument qui le porta, & comment elle deffit les mouſches bouines de la Bauce.

Chapitre XVI.

n ceſte meſmes ſaiſon Fayoles, quart roy de Numidie, enuoya du pays de Africque à Grandgouſier vne iument la plus enorme & la plus grande que feut oncques veue, & la plus monſtreuſe, comme aſſez ſçauez que Africque aporte touſiours quelque choſe de noueau.

Car elle eſtoit grande comme ſix Oriflans, & auoit les pieds fenduz en doigtz, comme le cheual de Iules Ceſar, les aureilles ainſi pendentes comme les chieures de Languegoth, & vne petite corne au cul. Au reſte, auoit poil d’alezan touſtade, entreillizé de grizes pommelettes. Mais ſus tout auoit la queue horrible. Car elle eſtoit poy plus poy moins groſſe comme la pile ſainct Mars aupres de Langes : & ainſi quarree, auecques les brancars ny plus ny moins ennicrochez, que ſont les eſpicz au blé.

Si de ce vous eſmerueillez, eſmerueillez vous d’aduantaige de la queue des beliers de Scythie : que peſoit plus de trente liures, & des moutons de Surie, eſquelz fault (ſi Tenaud dict vray) affuſter vne charrette au cul, pour la porter, tant elle eſt longue & peſante. Vous ne l’auez pas telle, vous aultres paillards de plat pays. Et fut amenee par mer, en troys carracques & vn brigantin, iuſques au port de Olone en Thalmondoys.

Lors que Grandgouſier la veit, Voicy (diſt il) bien le cas pour porter mon filz à Paris. Or ça, de par dieu, tout yra bien. Il ſera grand clerc on temps aduenir. Si n’eſtoient meſſieurs les beſtes, nous viurions comme clercs.

Au lendemain apres boyre (comme entendez) prindrent chemin Gargantua, ſon precepteur Ponocrates, & ſes gens, enſemble eulx Eudemon le ieune paige. Et par ce que c’eſtoit en temps ſerain & bien attrempé, ſon pere luy feiſt faire des botes fauues : Babin les nomme brodequins.

Ainſi ioyeuſement paſſerent leur grand chemin, & touſiours grand chere : iuſques au deſſus de Orleans.

Au quel lieu eſtoit vne ample foreſt de la longueur de trente & cinq lieues, & de largeur dix & ſept, ou enuiron. Icelle eſtoit horriblement fertile & copieuſe en mouſches bouines & freſlons, de ſorte que c’eſtoit vne vraye briguanderye pour les pauures iumens, aſnes & cheuaulx. Mais la iument de Gargantua vengea honneſtement tous les oultrages en icelle perpetrees ſur les beſtes de ſon eſpece par vn tour duquel ne ſe doubtoient mie.

Car ſoubdain qu’ilz feurent entrez en la dicte foreſt : & que les freſlons luy eurent liuré l’aſſault, elle deſguaina ſa queue : & ſi bien s’eſcarmouſchant les eſmoucha qu’elle en abatit tout le boys, à tord, à trauers, deçà, de là, par cy, par là, de long, de large, deſſus, deſſoubz, abatoit boys comme vn fauſcheur faict d’herbes. En ſorte que depuis n’y eut ne boys ne freſlons, mais feuſt tout le pays reduict en campaigne.

Quoy voyant, Gargantua y print plaiſir bien grand ſans aultrement s’en vanter. Et diſt à ſes gens. Ie trouue beau ce. Dont fut depuis appellé ce pays la Beauce : mais tout leur deſieuner feut par baiſler. En memoire de quoy encores de preſent les Gentilz hommes de Beauce deſieunent de baiſler, & s’en trouuent fort bien & n’en crachent que mieulx.

Finablement arriuerent à Paris. Auquel lieu ſe refraiſchit deux ou troys iours, faiſant chere lye auecques ſes gens, & s’enqueſtant quelz gens ſçauans eſtoient pour lors en ville : & quel vin on y beuuoit.

esté : été

Comment Gargantua paya ſa bien venue es Pariſiens, & comment il print les groſſes cloches de l’egliſe Noſtre Dame.

Chapitre XVII.

velqves iours apres qu’ilz ſe feurent refraichiz il viſita la ville : & fut veu de tout le monde en grande admiration. Car le peuple de Paris eſt tant ſot, tant badault, & tant inepte de nature, qu’vn baſteleur, vn porteur de rogatons, vn mulet auecques ſes cymbales, vn vielleuz au mylieu d’vn carrefour aſſemblera plus de gens, que ne feroit vn bon preſcheur euangelicque.

Et tant moleſtement le pourſuuyuirent, qu’il feut contrainct ſoy repoſer ſuz les tours de l’egliſe noſtre dame. Au quel lieu eſtant, & voyant tant de gens, à l’entour de ſoy, diſt clerement :

Ie croy que ces marroufles voulent que ie leurs paye icy ma bien venue & mon proficiat. C’eſt raiſon. Ie leur voys donner le vin. Mais ce ne ſera que par rys.

Lors en ſoubriant deſtacha ſa belle braguette, & tirant ſa mentule en l’air les compiſſa ſi aigrement, qu’il en noya deux cens ſoixante mille quatre cens dix & huyt. Sans les femmes & petiz enfans.

Quelque nombre d’iceulx euada ce piſſefort à legiereté des pieds. Et quand furent au plus hault de l’vniuerſité, ſuans, touſſans, crachans, & hors d’halene, commencerent à renier & iurer, les vngs en cholere, les aultres par rys. Carymary, Carymara, par ſaincte Mamye, nous ſon baignez par rys, dont fut depuis la ville nommee Paris, laquelle au parauant on appelloit Leucece, comme diſt Strabo lib. iiij. C’eſt à dire en Grec, Blanchette, pour les blanches cuiſſes des dames dudict lieu. Et par autant que à ceſte nouuelle impoſition du nom tous les aſſiſtans iurerent chaſcun les ſaincts de ſa paroiſſe : les Pariſiens, qui ſont faictz de toutes gens & toutes pieces, ſont par nature & bons iureurs & bons iuriſtes, & quelque peu oultrecuydez. Dont eſtime Ioaninus de Barranco, Libro, de copioſitate reuerentiarum, que ſont dictz Parrheſiens en Greciſme, c’eſt à dire fiers en parler.

Ce faict, conſidera les groſſes cloches que eſtoient eſdictes tours : & les feiſt ſonner bien harmonieuſement. Ce que faiſant luy vint en penſee qu’elles ſeruiroient bien de campanes au coul de ſa iument, laquelle il vouloit renuoier à ſon pere toute chargee de froumaiges de Brye & de harans frays. De faict, les emporta en ſon logis.

Ce pendent vint vn commandeur iambonnier de ſainct Antoine, pour faire ſa queſte ſuille : lequel pour ſe faire entendre de loing, & faire trembler le lard au charnier, les voulut emporter furtiuement. Mais par honneſteté les laiſſa, non par ce qu’elles eſtoient trop chauldes, mais par ce qu’elles eſtoient quelque peu trop peſantes à la portee. Cil ne fut pas celluy de Bourg. Car il eſt trop de mes amys.

Toute la ville feut eſmeue en ſedition, comme uous ſçauez que à ce ilz ſont tant faciles, que les nations eſtranges s’eſbahiſſent de la patience des Roys de France, leſquelz aultrement par bonne iuſtice ne les refrenent : veuz les inconueniens qui en ſortent de iour en iour. Pleuſt à dieu, que ie ſceuſſe l’officine en laquelle ſont forgez ces chiſmes & monopoles, pour les mettre en euidence es confraries de ma paroiſſe. Croyez que le lieu auquel conuint le peuple tout folfré & habaliné feut Neſle ou lors eſtoit, maintenant n’eſt plus, l’oracle de Lucece. Là feut propoſé le cas, & remonſtré l’inconuenient des cloches tranſportees.

Apres auoir bien ergoté pro & contra, feut conclud en Baralipton, que l’on enuoyroit le plus vieux & ſuffiſant de la faculté vers Gargantua pour luy remonſtrer l’horrible inconuenient de la perte d’icelles cloches. Et nonobſtant la remonſtrance d’aulcuns de l’vniuerſité, qui alleguoient que ceſte charge mieulx competoit à vn orateur, que à vn Sophiſte, feut à ceſt affaire eſleu noſtre maiſtre Ianotus de Bragmardo.

esté : été

Comment Ianotus de Bragmardo feut enuoyé pour recouurer de Gargantua les groſſes cloches.

Chapitre XVIII.

aistre Ianotus, tondu à la Ceſarine, veſtu de ſon lyripipion à l’antique, & bien antidoté l’eſtomac de coudignac de four & eau beniſte de caue, ſe tranſporta au logis de Gargantua, touchant dauant ſoy troys vedeaulx à rouge muzeau, & trainant apres cinq ou ſix maiſtres inertes, bien crottez à profit de meſnaige.

A l’entree les rencontra Ponocrates : & eut frayeur en ſoy, les voyant ainſi deſguiſez, & penſoit que feus ſent quelques maſques hors du ſens. Puis s’enqueſta à quelqu’vn des dictz maiſtres inertes de la bande, que queroit ceſte mommerie. Il luy feut reſpondu qu’ilz demandoient les cloches leurs eſtre rendues.

Soubdain ce propos entendu, Ponocrates courut dire les nouuelles à Gargantua : affin qu’il feuſt preſt de la reſponce, & deliberaſt ſur le champ ce que eſtoit de faire. Gargantua, admoneſté du cas, appella à part Ponocrates ſon precepteur, Philotomie ſon maiſtre d’hoſtel, Gymnaſte ſon eſcuyer, & Eudemon, & ſommairement confera auecques eulx ſus ce que eſtoit tant à faire que à reſpondre.

Tous feurent d’aduis que on les menaſt au retraiſt du goubelet, & là on les feiſt boyre ruſtrement, & affin que ce touſſeux n’entraſt en vaine gloire pour à ſa requeſte auoir rendu les cloches, l’on mandaſt, cependent qu’il chopineroit, querir le Preuoſt de la ville, le Recteur de la faculté, le vicaire de l’egliſe : eſquelz, dauant que le Sophiſte euſt propoſé ſa commiſſion, l’on deliureroit les cloches. Apres ce, iceulx preſens, l’on oyroit ſa belle harangue. Ce que fut faict, & les ſuſdictz arriuez, le Sophiſte feut en plene ſalle introduict, & commença ainſi que s’enſuit, en touſſant.

esté : été

La harangue de maiſtre Ianotus de Bragmardo, faicte à Gargantua pour recouurer les cloches.

Chapitre XIX.

hen, hen, hen, Mna dies, Monſieur, Mna dies. Et vobis, Meſſieurs. Ce ne ſeroyt que bon que nous rendiſſiez noz cloches, car elles nous font bien beſoing. Hen, hen, haſch. Nous en auions bien aultreſfoys refuſé de bon argent de ceulx de Londres en Cahors, ſy auions nous de ceulx de Bourdeaulx en Brye, qui les vouloient achapter pour la ſubſtantificque qualité de la complexion elementaire que eſt intronificquee en la terreſterité de leur nature quidditatiue pour extraneizer les halotz & les turbines ſuz noz vignes, vrayement non pas noſtres, mais d’icy aupres. Car, ſi nous perdons le piot, nous perdons tout, & ſens & loy. Si vous nous les rendez à ma requeſte, ie y guaigneray ſix pans de ſaulcices, & vne bonne paire de chauſſes, que me feront grant bien à mes iambes, ou ilz ne me tiendront pas promeſſe. Ho par Dieu, Domine, vne pair de chauſſes eſt bon. Et vir ſapiens non abhorrebit eam. Ha, ha, il n’a pas pair de chauſſes qui veult, ie le ſçay bien quant eſt de moy. Aduiſez, Domine : il y a dixhuyt iours que ie ſuis à matagraboliſer ceſte belle harangue. Reddite que ſunt Ceſaris Ceſari, & que ſunt dei deo. Ibi iacet lepus.

Par ma foy, Domine, ſi voulez ſouper auecques moy in camera, par le corps Dieu, charitatis, nos faciemus bonum cherubin. Ego occidi vnum porcum, & ego habet bon vino. Mais de bon vin on ne peult faire mauluais latin.

Or ſus, de parte dei, date nobis clochas noſtras. Tenez, ie vous donne de par la faculté vng ſermones de Vtino que vtinam vous nous baillez nos cloches, Vultis etiam pardonos ? Per diem vos habebitis, & nihil poyabitis.

O Monſieur, Domine, clochidonnaminor nobis. Dea, eſt bonum vrbis. Tout le monde s’en ſert. Si voſtre iument s’en trouue bien, auſſi faict noſtre faculté, que comparata eſt iumentis inſipientibus, & ſimilis facta eſt eis, pſalmo neſcio quo, ſi l’auoys ie bien quotté en mon paperat, & eſt vnum bonum Achilles, hen, hen, ehen, haſch.