Sacramentaire Léonien (Sacramentarium Veronense) (page 13)

P SP F E (suite)

VIII. Item alia. -- Ab omnibus nos, quaesumus, Domine, peccatis propitiatus absolve, et eos qui nos impugnare nituntur expugna. Per, etc. Comprime, Domine, quaesumus, os iniqua loquentium, et eos qui nos moliuntur insimulare confuta. Per, etc.

Quaesumus, Domine Deus noster, ut per haec coelestis vitae commercia, declinantes laqueos falsitatum, ad veritatem tuam, concessa nobis divinitus via et tramite, dirigamur. Per, etc.

Vere dignum. Qui famulos tuos informare dignaris, ut non tam nos exagitet inepta laceratio superborum, quam potius moveat miseratio lacerantum. Quoniam, sicut nos convenit praecavere ne veraciter impetamur, sic eorum qui a veritate sunt devii, flere debemus interitum, quaesumus ut vel illis correctionem suppliciter exorando subvenire possimus, vel nobis fructum pietatis acquirere. Per, etc.

Quos refecisti, Domine, coelesti mysterio, propriis alienisque propitius absolve delictis; ut divino munere purificatis mentibus perfruamur. Per, etc.

Porrige dexteram, quaesumus, Domine, plebi tuam misericordiam postulanti, per quam et errores declinet humanos, et solatia vitae mortalis accipiat, et sempiterna gaudia comprehendat. Per, etc. 58

IX. Item alia. --Libera nos, Domine, quaesumus, a nostrorum debitis peccatorum, atque ut nos a malis omnibus propitiatus eripias, iniquitates nostras, quibus juste retribuuntur, absolve. Per, etc. Contere, quaesumus, Domine, hostes populi tui, et delicta nostra, quorum merito nobis dominantur, emunda; ut, cum tibi placitam puritatem mentibus nostris infuderis, largiaris et pacem. Per, etc.

Accipe, Domine, quaesumus, sacrificium singulare, quod majestati tuae semper et redditur et debetur. Per, etc.

Sit nomini tuo, Domine, hoc sacrificium, cum exhibetur, acceptum, ut efficiatur jugiter exigendum. Per, etc.

Vere dignum. Qui nos castigando sanas et refovendo benignus erudis, dum mavis salvos esse correptos, quam perire neglectos. Per, etc.

Supplices te rogamus, Domine Deus noster, ut qui percepimus coelestis mensae substantiam, ad vitam pertingamus aeternam. Per, etc.

Tui sunt, Domine, populi, qui ministerium nostrae vocis exspectant. Quaesumus clementiam tuam ut salutaria ejus poscentibus, quidquid fiducia non habet deprecantis, gratia tua, quae bonorum nostrorum non indiget, largiatur. Per, etc.

X. Item alia. --Adesto, Domine, supplicibus tuis, et sperantes in tua misericordia coelesti protege benignus auxilio. Per, etc. Respice, Domine, quaesumus, pietatis tuae subsidium postulantes. Da indulgentiam reis, ut nobis subvenias propitiatus afflictis. Per, etc.

Sanctificationem tuam nobis, Domine, his mysteriis placatus operare, quae nos et a terrenis purget vitiis, et ad coelestia dona perducat. Per, etc.

Vere dignum. Qui nostras mentes expiando justificas, et immortalitatis efficis justificando capaces. Per, etc.

Repleamur, Domine, gratia muneris sacri, et quae gustu corporeo dulci veneratione contingimus, dulciora mentibus sentiamus. Per, etc.

Familiae tuae, Domine, preces miseratus 59 intende, et toto tibi corde subjectam prosequere, sustenta, circumtege; ut quae te gubernatore confidit, et nullis implicetur malis, et bonis omnibus expleatur. Per, etc.

XI. Item alia. --Omnipotens sempiterne Deus, cujus viae misericordia est semper et veritas, praesta, quaesumus, ut qui a tua clementia confovemur, crescamus etiam religionis augmento. Per, etc. Da nobis, quaesumus, Domine, tua digne tractare mysteria, ut et miserationibus tuis congrua respondeamus obsequia, et fiducialius speranda poscamus. Per, etc.

Vere dignum. Pietatem tuam votis omnibus expetentes, ut humanarum rerum prosperitate percepta, terrenis eatenus consolationibus gratulemur, ne gaudia quaerere superna cessemus, sed quidquid laetitiae temporali impenditur, eruditioni proficiat sempiternae. Per, etc.

Quaesumus, Domine, Deus noster, quos sacramentis reficis, sustenta praesidiis, et quos beneficiis temporalibus refoves, pasce (divinis) perpetuis. Per, etc.

Ecclesiam tuam, Domine, perpeti miseratione prosequere, ut inter saeculi turbines constituta, et praesenti jucunditate respiret, et aeternae beatitudinis percipiat claritatem. Per, etc.

XII. Item alia. --Adesto, Domine, supplicationibus nostris, et apostolicis intercessionibus confidentes, nec minis adversantium, nec ullo perturbemur incursu. Per, etc. Auxiliare, Domine, temporibus nostris, ut tua nos ubique dextera protegente, et religionis integritas, et Romani nominis securitas reparata consistat. Per, etc

Supplices quaesumus, Domine, ut munus trepida servitute propositum, non de nostris meritis aestimetur, sed quod a te institutum est, offerentium tua sanctificetur dignatione praesentum. Per, etc.

Vere dignum. Cujus nobis etiam ipsa medetur austeritas, dum peccandi coercet affectum, dum ad supplicandum tibi mens humana fit promptior, dum gratior redit post adversa tranquillitas, et inter haec, probata fides eruditur ad praemium. Per, etc.

Libera nos ab omni malo, propitiusque concede ut, quae nobis poscimus relaxari, ipsi quoque proximis remittamus. Per, etc.

Quaesumus, Domine Deus noster, ut quod nobis ad immortalitatis pignus esse voluisti, 60 ad salutis aeternae tribuas provenire suffragium. Per, etc.

Inclinantes se, Domine, majestati tuae propitiatus intende, ut qui divino munere sunt refecti, coelestibus semper muniantur auxiliis. Per, etc.

XIII. Item alia. --Da nobis, quaesumus, Domine Deus noster, in tua semper devotione gaudere, quia perpetua est et plena felicitas, si bonorum omnium jugiter serviamus auctori. Per, etc. Quaesumus, omnipotens Deus, ne ad dissimulationem tui cultus prospera nobis collata succedant, sed ad gratiarum actionem, tibi propensius exhibendam, potius nos semper accendant. Per, etc.

Hostias tibi, Domine, deferimus immolandas, qui temporali consolatione significas, ut promissa non desperemus aeterna. Per, etc.

Vere dignum. Quoniam sicut tua clementia non solum beneficia praestat immeritis, sed affectum quoque nobis, quo gratias referamus, inspirat, ita nos convenit laudes tuas, quia non possumus competenter explere, saltem sine cessatione depromere; ut quas numquam sufficienter exsolvimus, numquam reddere desinamus. Per, etc.

Observationis annuae celebritate gratulantes, ut eorum quorum actionibus inhaeremus, plenis effectibus gaudeamus. Per, etc.