Sacramentaire Léonien (Sacramentarium Veronense) (page 4)

Vere dignum. Quoniam tu es gloriosus in sanctis, quibus et in persecutione tolerantiam tribuisti, et in passione victoriam contulisti. Per, etc.

Memento, Domine, quaesumus, conditionis humanae, ut sancti tui pro nobis et clementiam tuam semper exorent, et incessabiliter audiantur. Per, etc.

XXX. Item alia. --Protege nos, Domine, tuorum deprecatione justorum (sanctorum); ut, quorum circumdamur suffragio, foveamur auxiliis. Per, etc. Da nobis, quaesumus, Domine, semper haec tibi vota deferre, quibus, sanctorum tuorum Natalia celebrantes, tuam gloriam praedicemus. Per, etc.

Vere dignum. Quia sanctorum tuorum solemnia repetimus, quorum veneranda 14 confessio et mirabilia virtutis tuae explevit, et illis praemium coeleste quaesivit, et nobis patrocinia praeparavit. Per, etc.

Prosint nobis, Domine, justorum tuorum frequentia solemnia: quoniam quanto fragiliores sumus, tanto tibi placentibus praesidiis indigemus. Per, etc.

XXXI. Item alia. --Peccatorum nostrorum, Domine, multitudine praevalente, sanctorum tuorum, Domine, annua festa recolimus; singulare suffragium per eos tuam misericordiam deprecantes, quorum nos voluisti patrociniis adjuvari. Per, etc. Offerentium tibi munera, quaesumus, Domine, ne delicta respicias; sed intercessorum merita propitius intuere. Per, etc.

Vere dignum. Te in tuorum glorificantes confessione sanctorum, qui, mirabili dispensatione sapientiae tuae, et illis beatitudinem sempiternam, et fragilitati nostrae congrua praeparasti subsidia; ut quos ad te placandum praevideres dignos, eorum qui tibi placuerunt dignis precibus propitiatus intenderes. Unde supplices imploramus ut sicut illos manet aeterna felicitas, sic pro nobis eorum deprecatio continuata non desit. Per, etc.

Peccavimus tibi, omnipotens et misericors Deus. Remedium non habemus, nisi miserearis nobis tuorum deprecatione sanctorum. Per, etc.

XXXII. Item alia. --Da nobis, omnipotens et misericors Deus, ut sanctorum tuorum Natalitia celebrantes, quorum praedicamus triumphos, eorum fidem veraciter imitemur. Per, etc. Offerimus, Domine, munera tuorum tibi solemnitatibus grata sanctorum, tuam clementiam deprecantes ut quod ad illorum gloriam, nobis prosit ad veniam. Per, etc.

Vere dignum. Quoniam martyrum beatorum pro confessione tui nominis venerabilis sanguis effusus sicut tua mirabilia manifestat, qui perficis in infirmitate virtutem, ita nostris et studiis dat profectum, et fragilitatibus praestat auxilium. Per, etc.

XXXIII. Item alia. --Sanctis intervenientibus, Domine, tibi servitus nostra complaceat, et obsequia munerum fiant praesidia devotorum. Per, etc. Aspice nos, Domine, precibus exoratus 15 venerandi martyris Gregorii, tua miseratione concedens, ut sicut nobis ejus passio contulit hodiernum in tua virtute conventum (laetitiam), ita suffragetur et meritum. Per, etc.

Fiat, Domine, quaesumus, hostia sacranda placabilis pretiosi celebritate martyrii, quae et corda nostra purificet, et tuorum tibi vota conciliet. Per, etc.

Vere dignum. Propensius exorantes, ut sicut infirmitati nostrae praescius contulisti subsidia copiosa justorum, ita nobis eorum tribuas intercessione refoveri. Per, etc.

Exaudi nos, Domine, clamantes ad te, et quos non deseris sacramentis, necessariis attolle praesidiis. Per, etc.

IN DEDICATIONE.

XXXIV. Item alia. --Deus, qui beati Petri apostoli dignitatem ubique facis esse gloriosam: praesta, quaesumus, ut et doctrina semper ipsius foveamur et meritis. Per, etc. Suscipe, Domine, quaesumus, hostias, quas majestati tuae in honore beati apostoli Petri, cui haec est basilica sacrata, deferimus, et ejus precibus nos tuere. Per, etc.

Vere dignum. Qui ut in omni loco dominationis tuae beati Petri apostoli magnifices potestatem, non solum ubi venerabiles ejus reliquiae conquiescunt, sed ubicumque pretiosa reverentia fuerit invocata, tribuis esse praesentem; nunc etiam perseverare demonstres, quod in omnem terram sonus ejus exeat, et toto orbe salutaria verba decurrant. Per, etc.

Benedicimus, Domine, misericordias tuas, qui nos incessabiliter beati apostoli tui Petri sinis commemoratione foveri, suppliciter exorantes ut cujus solemnia gerimus, patrocinia sentiamus. Per, etc. 16

XXXV. Item alia. --Si vis, potens es mundare, Domine; et quam vox iniquitatis nostrae non obtinet, tuorum nobis precibus veniam donare sanctorum. Per, etc. Supplices, Domine, te rogamus, ut quamvis offensiones nostrae impediant, recordatione tamen martyrum tuorum munus nostrum non sit ingratum. Per, etc.

Vere dignum. Prostrato corde poscentes ut quamvis tanta sint nostra facinora, quibus etiam cum innumerabilibus sanctorum suffragiis laboremus, tu tamen immensa pietate concedas ne scelera magis nostra praevaleant, quam satisfactio pro nobis copiosa justorum. Per, etc.

Praesta, Domine, quaesumus, ut quam immensis erroribus aggravati fiduciam conscientiae non habemus, martyrum tuorum nobis supplicatio beata subveniat. Per, etc.

XXXVI. Item alia. --Prosint meritis, Domine, patrocinia multiplicata sanctorum, et injustitias nostras tot oratio beatorum pro nobis fusa dissolvat. Per, etc.

Ne, quaesumus, Domine, pro nostris excessibus munera delata despicias, sed pro tuorum intercessione sanctorum potius ad indulgentiam convertere supplicibus. Per, etc.

Vere dignum. Tu etenim, Domine, discernis populum tuum; et ad martyrum festa multitudo conveniat, qui in tuorum vere fidelium sint parte cognoscis; atque ideo in nulla remaneat diaboli portione, qui in sanctorum cupit sorte numerari. Per, etc.

Annue, quaesumus, Domine, sacris martyribus tuis, ut opem nobis suae deprecationis impendant, et iram tuam, quam nostris 17 pravitatibus meruimus, evadamus. Per, etc.

XXXVII. Item alia. --Non obruamur, Domine, quaesumus, quamvis immensis molibus peccatorum, qui ubique sanctis tuis deprecantibus exoramus, ut malis nostris offensus praesentes hostias non repellas, sed tibi nos placitos sacramenti virtute perficias. Per, etc. Vere dignum. Donari nobis suppliciter exorantes ut sicut sancti tui mundum in tua virtute vicerunt, ita nos a mundanis erroribus postulent expediri. Per, etc.

Quia nostrae voces, Domine, non merentur audiri, sanctorum tuorum interventio, quaesumus, sit accepta (fiat grata) pro nobis. Per, etc.

XXXVIII. Item alia. --Preces nostras, Domine, propitiatus admitte, et ut digne tuis famulemur altaribus, sanctorum tuorum nos intercessione custodi. Per, etc. Tribue nos, Domine, quaesumus, donis tuis libera mente servire, ut, purificante nos gratia tua, iisdem quibus famulamur mysteriis emendemur. Per, etc.

Vere dignum. Tibi etenim, Domine, sacra festivitas agitur, tibi dies sacrata celebratur, quam beatorum martyrum tuorum sanguis, in veritatis tuae testificatione profusus, magnifico nominis tui honore signavit. Per, etc.

Omnipotens sempiterne Deus, qui fragilitati nostrae consulens, assidua nos sanctorum celebritate solaris, da nobis sub patronis talibus constitutis, et perpetua securitate muniri, et salutari gaudere profectu. Per, etc.

Grata tibi munera nostra sint, Domine, quae et tuis sunt instituta praeceptis, et sanctorum tuorum festivitas gloriosa commendat. Per, etc.