Perceval ou le Conte du Graal (page 11)

que vos veïssiez de voz ialz.

Il est plus biax et si valt mialz

que tuit cil qui sont au tornoi. »

Et la petite dist : « Ge voi

plus bel et mellor, se devient. »

Et cele maintenant li vient

et dist con anflamee et chaude :

« Vos, garce, vos fustes si baude

que par vostre male avanture

osastes nule criature

(380a.5015)

blasmer que j’eüsse loee !

Si an tenez ceste joee

et vos an gardez autre foiz. »

Lors la fiert si que toz les doiz

li a enz el vis seelez,

et les dames qui sont delez

l’an blasment mout et si li tolent,

et puis aprés si reparolent

de monseignor Gauvain antr’eles.

« Dex, fet l’une des dameiseles,

cil chevaliers desoz ce charme,

que atant il que il ne s’arme ? »

Une autre pucele mainsnee

li dist qu’il a la pes juree,

et une autre redit aprés :

« Marcheanz est, nel dites mes !

— Einz est changierres, fet la quarte.

Il n’a talant que il departe

as povres chevaliers ancui

cest avoir que il mainne o lui.

Ne cuidiez pas que ge vos mante,

c’est monoie et vesselemante

an ces vessiax et an ces males.

— Voir, mout avez les lengues males,

fet la petite, s’avez tort.

Cuidiez vos que marcheanz port

si grosse lance con il porte ?

Certes mout m’an avez hui morte

qui tel deablie avez dite.

Foi que ge doi Saint Esperite,

il sanble mialz tornoieor

que marcheant ne changeor.

Il est chevaliers, ce me sanble. »

Et les dameiseles ansanble

li dïent : « Bele dolce amie,

s’il le sanble, ne l’est il mie ;

mes il le se fet resanbler

por ce qu’ainsi vialt il anbler

les costumes et les passages.

Fos est, si cuide estre si sages,

que de ce san sera il pris

con lerres atainz et repris

de larrecin vilain et fol.

Il en avra la hart el col. »

(380b.5059)

Messire Gauvains cleremant

ot les paroles et antant

que les dames dïent de lui,

si en a et honte et enui ;

mes il panse, et a reison,

qu’an l’apele de traïson,

s’estuet que desfandre s’an aille,

que s’il n’aloit an la bataille

si con il ot an covenant,

il avroit lui honi avant,

et aprés son linage tot.

Et por ce qu’il est an redot

qu’il ne soit afolez et pris,

ne s’est del tornoi antremis,

et si en ot il boen talant,

que il voit le tornoiement

qui tozjorz anforce et amande.

Et Melianz de Liz demande

grosse lance por mialz ferir.

Tote jor jusqu’a l’anserir

fu li tornoiz devant la porte.

Qui a gaaignié, si l’anporte

la ou mialz le cuide avoir sauf.

.I. escuier et grant et chauf

voient les dames, qui tenoit

.i. tros de lance, et venoit

une testiere an son col.

Une des dames celui fol

apela et puis si li dist :

« Danz escuiers, se Dex m’aïst,

mout estes fos et estapez

qui an cele presse hapez

ces fers de lances et testieres

et ces retros et ces banieres,

si vos fetes boen escuier.

Qui si s’anbat, petit s’a chier,

que ge voi ci, mout pres de vos,

an ce pré qui est desoz nos,

l’avoir sanz garde et sanz desfanse.

Fos est qui a son preu ne panse

demantres que il le puet fere.

Et vez ci le plus debonere

chevalier qui onques fust nez ;

car qui li avroit toz plumez

(380c.5103)

les grenons, ne se movroit il.

Or n’aiez pas le gaaing vil !

Toz les chevax et tot l’avoir

me prenez, si feroiz savoir,

que ja ne le vos desfandra. »

Maintenant el pré s’an antra

et si feri.i. des chevax

de son retrous, et dist : « Vasax,

dont n’iestes vos sains et heitiez,

qui ci tote jor agaitiez

et nule rien n’i avez fete,

escu troé ne lance frete ?

— Di va, fet il, a toi que taint ?

La chose por coi il remaint,

espoir, savras tu bien ancore.

Mes, par mon chief, ce n’iert mie ore,

que dire nel te daigneroie.

Mes fui de ci, si tien ta voie

et si va fere ta besoigne. »

Maintenant cil de lui s’esloigne,

ne fu pas tex que puis osast

parler de rien qui li grevast.

Et li tornoiemanz remaint,

mes chevaliers i ot pris maint

et maint cheval i ot ocis,

s’an orent cil de la le pris,

et cil dehors i gaaignerent,

et au departir rafierent

que l’andemain rasanbleroient

et tote jor tornoieroient.

Ensi departirent la nuit

et retornent el chastel tuit

cil qui an estoient issu.

Et messire Gauvains i fu,

qui aprés la rote i antra,

et devant la porte ancontra

le prodome, le vavasor,

qui au seignor dona le jor

consoil del tornoi comancier,

si le prie de herbergier

et debonerement et bel,

et dist : « Sire, an ce chastel

est vostre ostex toz atornez.

Se vost plest, huimés remenez,

(380d.5147)

que, se vos avant aleiez,

boen ostel huimés n’avreiez.

Por ce de remenoir vos pri.

— Ge remandrai, vostre merci,

fet messire Gauvains, biau sire,

que j’ai asez pis oï dire. »

Li vavasors an son ostel

l’anmainne o lui, et d’un et d’el

li demande et que ce devoit

que le jor avoec ax n’avoit

armes portees au tornoi.

Et il li dit tot le por coi,

qu’an l’apele de traïson,

si se doit garder de prison,

de lui marmetre et de blecier

tant qu’il se puisse hors gitier

del blasme qui sus li est mis.

Et lui et trestoz ses amis

porroit honir par sa demore,

s’il ne pooit venir a ore

de la bataille qu’anprise a.

Li vavasors mialz l’an prisa

et dit que bon gré li savoit :

qant il por ce lessié l’avoit,

le tornoi, il ot fet reison.

Lors l’anmena an sa meison

li vavasors, lors si descendent.

Et les genz de la tor antandent

a lui ancuser duremant

et an tienent lor parlement

comant li sires prandre l’aille.

Et s’ainznee fille travaille

de quanque ele puet et set

de sa seror que ele het :

« Sire, fet ele, ge sai bien

que vos n’avez hui perdu rien,

einz cuit que gaaignié avez

plus asez que vos ne savez,

et si vos dirai bien comant.

Ja mar feroiz que seulement

comander que l’an aille prandre

.i. chevalier qui, sanz desfandre,

sert ceanz de malvese guile.

S’a amené an ceste vile

(380e.5191)

escuz, et lances fet porter

et chevax an destre mener,

et se franchist an tele guise

con s’il voist an marcheandise.

Mes or l’an randez sa desserte.

Il est chiés Gerin le fil Berte,

qu’a son ostel herbergié l’a.

Orandroit par ci trespassa,

que ge vi que il l’anmenoit. »

Tot ensi cele se penoit

qu’ele li feïst fere honte.

Et li sires maintenant monte ;

il meïsmes aler i vialt,

tot droit a la meison s’aquialt

ou messire Gauvains estoit.

Qant sa petite fille voit

que il i vet an tel meniere,

si s’aquiaut par un huis derriere ;

ele n’a soing que nus la voie,

si s’an va tost et droite voie

a l’ostel monseignor Gauvain,

chiés dan Gerin le fil Bertain,

qui.ii. filles avoit mout beles.

Et quant ce virent les puceles

que lor petite dame vient,

joie fere lor an covient,

et si font eles sanz faintise.

Chascune par la main l’a prise,

si l’anmainnent joie feisant,

les ialz et la boche beisant.

Et remontez fu danz Gerin,

qui ne fu povres ne frarin,

et li filz Bertain* avoec lui,

si s’an aloient amedui

a la cort si con il soloient.

A lor seignor parler voloient,

si l’ancontrent enmi la rue.

Et li vavasors le salue,

si li demande ou il aloit ;

et il li dit que il voloit

an sa meison aler deduire.

« Ce ne me doit grever ne nuire,

fet danz Gerins, ne desseoir,

et vos i porroiz ja veoir

(380f.5235)

le plus bel chevalier de terre.

— Par foi, ge ne le vois pas querre,

fet li sires. Gel ferai prandre.

Marcheanz est et si vialt vandre

chevax, et chevaliers se fet.

—Avoi ! ci a trop vilain plet,

fet danz Gerins, que vos oi dire !

Ge sui vostre hom et vos mes sire :

de moi et de tot mon lignage

vos rant ge ici vostre homage

et vos desfi tot maintenant

einz qu’a cestui desavenant

fere an mon ostel vos sofrisse.

— Ge n’oi talant que gel feïsse,

fet li sires, si m’aïst Dex.

Ja vostre oste ne vostre ostex

n’avront se enor non par moi,

non pas por ce, en moie foi,

que il ne m’ait mout bien esté

conseillié et amonesté.

— Granz merciz, fet li vavasors,

et il me sera ja enors

que vos veigniez veoir mon oste. »

Li uns delez l’autre s’acoste

tot maintenant et si s’an vont

tant que a l’ostel venu sont

ou messire Gauvains estoit.

Qant messire Gauvains les voit,

qui mout estoit bien anseigniez,

ses salue et dit : « Bien vaigniez ! »

Et il le salüent andui,

aprés s’asieent delez lui.

Lors li a li prodom anquis,

qui estoit sires del païs,

por coi s’estoit le jor tenuz

qu’il n’estoit au tornoi venuz

et por coi il n’ot tornoié.

Et il ne lor a pas noié,

mes totevoie li reconte,

que il n’i eüst let ne honte,

que de traïson l’apeloit

uns chevaliers, si s’an aloit

desfandre a une cort real.

— Acheison eüstes leal,

(381a.5279)

fet li sires, sire, sanz faille.

Mes ou sera ceste bataille ?

— Sire, fet il, devant le roi

d’Escavalon aler an doi,

et ge i vois mout droit, ce cuit.

— Ge vos i baillerai conduit,

fet li sires, qui vos manra.

Et por ce qu’il vos covanra

par povre terre a trespasser,

vos donrai vitaille a porter,

et chevax qui la porteront. »

Et messire Gauvains respont

que il n’a nul mestier del prandre,

que s’il an puet trover a vandre,

il avra a planté vitaille

et bons chevax, ou que il aille,

et tot quanque mestiers li iert.

Por ce del suen mie ne quiert.

A cest mot li sires s’an part.

Au partir vit, de l’autre part,

li sires sa fille venant,

qui par la janbe maintenant

monseignor Gauvain anbraça

et dit : « Sire, antandez ça !

A vos me sui clamer venue

de ma seror qui m’a batue ;

si m’an fetes droit, se vos plest. »

Et messire Gauvains se test,

qui ne savoit que ele dist,

et sa main sor le chief li mist ;

et la dameisele le tire

et dist : « A vos di ge, biau sire,

a vos de ma seror me clain,

cui ge n’ai chiere ne ne l’ain,

que por po m’a hui fete honte.

— A moi, fet il, bele, que monte ?

Quel droit feire vos an puis gié ? »

Li sires, qui ot pris congié,

ot ce que sa fille demande,

si dist : « Fille, qui vos comande

venir clamer as chevaliers ? »

Et Gauvains li dist : « Sire chiers,

einz a trop bone anfance dite

come pucele si petite,

(381b.5323)

ne ja ne l’an refuserai ;

mes, quant li plest, demain serai

une piece ses chevaliers.

— Vostre merci, biau sire chiers »,

fet cele qui tel joie en a

qui jusqu’au pié l’an anclina.

Atant s’an partent sanz plus dire.

Sa fille an reporte li sire

sor le col de son palefroi

et si li demande por coi

cele tançons estoit montee.

Et ele li a bien contee

la verité de chief an chief,

et li dist : « Sire, il m’estoit grief

de ma seror qui tesmoignoit

que Melianz de Liz estoit

li miaudres, li plus biax de toz,

et ge veoie la desoz

an ce biau pré.i. chevalier,

si ne pooie pas lessier

que ancontre ne li deïsse

que plus bel de lui i veïsse.

Et por ce ma suer m’apela

fole garce et eschevela,

et dahez ait cui il fu bel !

Les treces jusqu’au haterel

an.ii. tranchier me lesseroie,

don mout anpiriee seroie,

par covant que demain au jor

cil chevaliers enmi l’estor

abatist Melianz de Liz,

et lors seroit cheüz ses criz

que ma dame de suer an fet.

Si en a hui tenu grant plet

qu’a totes les dames enuie,

mes granz vanz chiet a po de pluie.

— Bele fille, fet li prodom,

ge vos comant et abandon

que vos aucune druerie

li anvoiez par corteisie,

vostre manche ou vostre guinple. »

Et cele li dist, qui fu sinple :

« Volantiers, sire, quant le dites.

Mes mes manches sont si petites

(381c.5367)

qu’anveier ne li oseroie.

Espoir se ge li anveoie,

il ne la priseroit ja rien.

— Fille, ge an panserai bien,

fet li peres. Or vos teisiez,

que ge an sui bien aeisiez. »

Ensi parlant antre ses braz

l’an porte, si a grant solaz

de ce que il l’acole et tient,

tant que devant le palés vient.

Et quant cele le vit venir

et sa petite suer tenir,

si en ot enui an son cuer

et dist : « Sire, don vient ma suer,

la Pucele as Petites Manches ?

Ja set et de torz et de ganches,

mout s’i est ja tost adonee.

Dont l’avez vos or aportee ?

— Et vos, fet il, qu’an volez fere ?

Vos vos an deüssiez bien tere.

Ele valt mialz que vos ne fetes,

qui les treces li avez tretes

et batue, don il me poise.

N’avez mie fet que cortoise. »

Lors fu ele mout desconfite

de son pere, qui li ot dite

ceste ranpone, tot afit.

Et il fist.i. vermoil samit

fors de son cofre ilueques trere

et si an fist maintenant fere

une manche bien longue et lee

et si a sa fille apelee,

et li dist : « Fille, or vos levez

demain matin et si alez

au chevalier ainz qu’il se mueve.

Par amor ceste manche nueve

li donez, si la portera

au tornoi quant il i ira. »

Et ele respont a son pere,

lués qu’ele verra l’aube clere,

iert ele son voel esveilliee

et vestue et apareilliee.

Li peres s’an part a cest mot,

et cele qui mout grant joie ot

(381d.5411)

a totes ses conpaignes prie

que eles ne la lessent mie

au matin dormir longuement,

einz l’esvoillent hastivement,

s’eles voelent avoir s’amor,

lués que eles verront le jor.

Et celes volantiers le firent,

que maintenant que eles virent

au matinet l’aube lever*

la firent vestir et lever.

La pucele matin leva

et tote seule s’an ala

a l’ostel monseignor Gauvain.

Mes ele n’i va pas si main

que il ne fussent ja levé,

et furent au mostier alé

oïr messe qu’an lor chanta.

Et la dameisele tant a

chiés le vavasor demoré

qu’il orent longuement oré

et oï quanque oïr durent.

Quant del mostier revenu furent,

contre monseignor Gauvain saut

la pucele et dit : « Dex vos saut

et vos doint joie hui an cest jor !

Mes portez por la moie amor

ceste manche que je tieng ci.

— Volantiers, la vostre merci,

fet messire Gauvains, amie. »

Aprés ce ne tardierent mie

li chevalier qu’il ne s’armassent.

Armé fors de la vile amassent,

et les dameiseles resont

montees sor les mur amont,

les dames de la vile totes,

et virent asanbler les rotes

des chevaliers preuz et hardiz.

Devant toz Melianz de Liz

s’an vint montez, toz eslessiez,

et ot ses conpaignons lessiez

bien loing.ii. arpanz et demi.

La dameisele son ami

vit, ne pot sa lengue tenir,

einz dit : « Dames, veez venir

(381e.5455)

celui qui de chevalerie

a le los et la seignorie. »

Et messire Gauvains s’esmuet

tant con chevax porter le puet

vers celui qui po le redote

et met sa lance an pieces tote.

Et messire Gauvains fiert lui

si qu’il li fist mout grant enui,

que maintenant le mist au plain.

Et tant a son cheval la main,

sel prant au frain et si le baille

a.i. vaslet et dit qu’il aille

a celi por cui il tornoie,

si li die qu’il li anvoie ;

le premier gaaing qu’il a fet

le jor, il vialt que ele l’et.

Et li vaslez atot la sele

le cheval mainne a la pucele,

qui de la tor a bien veü,

d’une tornele ou ele fu,

dan Meliant de Liz cheoir ;

si dist : « Suer, or poez veoir

dan Meliant de Liz gisant,

que vos aleiez si loant.

Mout savez bien a droit prisier !

Or pert ce que je vos dis hier,

or voit an bien, se Dex me saut,

que il i a tel qui mialz vaut. »

Tot ensi cele a esciant

va sa seror contraliant,

que ele la giete del san,

et cele dit : « Garce, tes t’an !

Se huimés t’an oi mot soner,

ge t’irai tel bufe doner

que n’avras pié qui te sostaigne.

— Avoi ! suer, de Deu vos sovaigne,

fet la dameisele petite.

Por ce que j’ai verité dite,

ne me devez vos mie batre.

Par foi, ge le vi bien abatre,

et vos ausi come ge fis ;

n’ancor ne m’est il pas avis

qu’il ait pooir del relever.

Et s’or an deveiez crever,

(381f.5499)

si diroie ge totevoie

qu’il n’a ci dame qui nel voie

janbeter et gesir tot plat. »

Lors li aüst doné.i. flat

l’autre, s’an li volsist sofrir ;

mes ne la lessierent ferir

les dames qui antor estoient.

Atant l’escuier venir voient,

qui le cheval amainne an destre.