Perceval ou le Conte du Graal (page 12)

La pucele a une fenestre

trova seant, si li presante.

La pucele plus de sissante

merciz rant, le cheval fet prandre,

et il s’an va les merciz randre

a son seignor, qui sanbloit estre

del tornoiement sire et mestre,

qu’il n’i a chevalier si cointe,

se de la lance a lui s’acointe,

qu’il ne li toille les estriers.

Onques de gaaignier destriers

ne fu mes si antalantez.

.IIII. en a le jor presantez,

que il gaaigna de sa main,

si anvea le premerain

a la dameisele petite,

de l’autre a la dame s’aquite

au vavasor, qui mout li plot ;

l’une de ses.ii. filles ot

le tierz, et l’autre ot le quart.

Et li tornoiemenz depart,

si s’an rantrent parmi la porte,

et messire Gauvains an porte

d’une part et d’autre le pris.

Il n’estoit pas ancor midis

qant il fu partiz de l’estor.

Messire Gauvains au retor

ot de chevaliers tele rote

que plainne an fu la rue tote,

et tuit icil qui le veoient

anquerre et demander voloient

dom il ert et de quel contree.

La pucelete a ancontree

tot droit a l’uis de son ostel,

et ele ne fist onques el

(382a.5543)

mes que lués a l’estrié le prist,

sel salua et si li dist :

« Vostre merci, fet ele, sire ! »

Et il sot bien qu’ele volt dire,

si li respondi come frans :

« Einz seroie chenuz et blans,

pucele, que je me recroie

de vos servir, ou que je soie.

Ja de vos ne serai si loing,

se savoir puis vostre besoing,

que ja essoinnes me retaigne

qu’au premier message ne vaigne.

— Granz merciz », fet la dameisele.

Ensi parloient cil et cele

qant ses peres vint an la place,

qui de tot son pooir porchace

que messire Gauvains remaigne

la nuit et que son ostel praigne.

Messire Gauvains s’escondit

de remenoir et si li dit

que il ne puet ; et cil li prie,

se lui plest, que son non li die.

« Sire, Gauvains sui apelez,

onques mes nons ne fu celez

an leu ou il me fust requis

n’onques ancores ne le dis

s’ainçois demandez ne me fu. »

Qant li sires a entandu

que c’estoit messire Gauvains,

mout fu ses cuers de joie plains,

et li dist : « Sire, or an venez,

anquenuit mon ostel prenez,

que de rien ne vos ai servi,

n’onques an ma vie ne vi

chevalier, ce puis ge jurer,

que ge tant volsisse enorer. »

De remenoir mout li pria,

et messire Gauvains li a

tote sa proiere escondite.

Et la dameisele petite,

qui n’estoit fole ne mauveise,

le prant par le pié, si le beise

et a Damedeu le comande ;

et messire Gauvains demande

(382b.5587)

que ele i avoit antandu ;

et ele li a respondu

que ele li avoit beisié

par tele antancion le pié

que de li li resovenist

an quelque leu que il venist.

Et il li dist : « N’an dotez mie,

que, si m’aïst Dex, bele amie,

jamés ne vos oblierai,

ja si loing de vos ne serai. »

Atant s’an part et congié prant

a son oste et a l’autre gent ;

si le comandent a Deu tuit.

Messire Gauvains cele nuit

an une obediance jut,

si ot quanque il li estut.

Et l’andemain bien par matin

aloit chevalchant son chemin

tant que il vit an trespassant

bestes qui aloient pessant

lez l’oroille d’une forest.

Yvonez* dit que il s’arest,

qui.i. de ses chevax menoit,

tot le mellor que il avoit,

et une lance roide et fort.

La lance dit que il aport

et que le cheval li estraigne,

celui que il an destre mainne,

et il li a sanz demorance

baillié son escu et la lance.

Et il s’an torne aprés les biches,

si lor fet tant torz et tant guiches

que un an i antreprist

delez.i. ronçoi et li mist

sor le col la lance an travers.

Et la biche saut de travers,

si s’an foï aprés les cers,

et il chace tant qu’a bien pres

la retenist et arestast,

se ses chevax ne desferrast.

Quant il ne pot la biche prandre,

Yvonet comande a descendre,

que ses chevax mout duremant

clochoit ; cil son comandement

(382c.5631)

a fet, le pié li lieve an haut

et trova que uns fers li faut,

et dist « Sire, il l’estuet ferrer.

Il n’i a mes que de l’errer

tot soavet tant que l’an truisse

fevre qui referrer le puisse. »

Puis errerent tant que il virent

gent qui hors del* chastel issirent.

Devant avoit gent secorciee

qui vindrent tote la chauciee,

garçons a pié qui chiens menoient,

et vaneor aprés venoient

qui portoient espiez tranchanz ;

aprés ot archiers et sergenz

qui ars et saietes portoient,

et aprés chevalier venoient.

Aprés trestoz les chevaliers

an venoient dui sor destriers,

dont li uns estoit jovanciax

et de toz autres li plus biax.

Icil seus monseignor Gauvain

salua et prist par la main,

et dist : « Sire, ge vos detaing.

Alez huimés la don ge vaing

et descendez an mes meisons.

Bien est huimés tans et reisons

de herbergier, s’il ne vos poise.

J’ai une seror mout cortoise

qui de vos grant joie fera,

et cil sires vos i manra

que vos veez ci devant moi. »

Et dist : « Sire, ge vos anvoi,

biax conpainz, avoec cest seignor,

si le menez a ma seror.

Salüez la premierement

et li dites que ge li mant

que par l’amor et par la foi

qui doit estre antre li et moi,

se onques ama chevalier,

qu’ele aint cestui et teigne chier

et que autant face de lui

con de moi, qui ses freres sui.

Tel solaz et tel conpaignie

li face, si ne li poist mie,

(382d.5675)

tant que nos soions revenu.

Qant ele l’avra detenu

avoec li deboneremant,

si revenez hastivement,

que ge m’an voldrai revenir

por lui conpaignie tenir

au plus tost que ge porrai onques. »

Li chevaliers s’an part adonques,

qui monseignor Gauvain conduit

la ou de mort le heent tuit.

Mes il n’i est pas coneüz,

que onques mes n’i fu veüz,

si n’i cuide avoir nule garde.

Le siege del chastel esgarde,

qui sor.i. braz de mer seoit,

et les murs et la tor veoit

si forz que nule rien ne dote.

Il esgarde la vile tote,

pueplee de mout bele gent,

et les changes d’or et d’argent,

qui tuit sont covert de monoies,

et vit les places et les voies,

qui totes sont plainnes d’ovriers

qui feisoient divers mestiers,

si con li mestier sont divers.

Cil fet hiaumes et cil haubers

et cil lances et cil blazons,

cil lorains et cil esperons,

et cil lor espees forbissent.

Li un font dras et cil les tissent,

cil les paignent et cil les tondent ;

et li autre or et argent fondent,

cil font oevres bones et beles,

cil font henas, cil escueles

et oisiax ovrez a esmax,

eniax, ceintures et fermax.

Bien poïst an et dire et croire

qu’an la vile eüst tozjorz foire,

qui de tant d’avoir estoit plainne,

de cire, de poivre et de grainne

et de panes veires et grises

et de totes marcheandises.

A cez choses vet regardant

et de leus an leus atardant.

(382e.5719)

S’ont tant alé qu’a la cort furent,

et vaslet vindrent qui reçurent

tot lor hernois et lor ator.

Li chevaliers antre an la tor

sus avoec monseignor Gauvain

et si le mainne par la main

jusqu’a la chanbre a la pucele,

et il li dist : « Amie bele,

vostre freres saluz vos mande

et de cest seignor vos comande

qu’il soit enorez et serviz.

Et nel fetes mie a enviz,

mes trestot ausi de boen cuer

con se vos esteiez sa suer

et con s’il estoit vostre frere.

Gardez que ne soiez avere

de tote sa volanté fere,

mes large et preuz et debonere.

Or an pansez, que je m’an vois,

que il le m’estuet sivre el bois. »

Et cele dit, qui grant joie a :

« Beneoiz soit qui m’anvea

tel conpaignie come ceste !

Qui si bel conpaignon me preste

ne me het pas, soe merci.

Biax sire, or vos seez ici,

fet la pucele, delez moi.

Por ce que bel et gent vos voi,

et por mon frere qui m’an prie,

vos ferai bone conpaignie. »

Tantost li chevaliers s’an torne,

que avoec ax plus ne sejorne ;

et messire Gauvains remaint,

qui de ce mie ne se plaint

se il est seus o la pucele,

qui est et avenanz et bele,

et tant estoit bien afeitiee

que pas ne cuide estre agueitiee

de ce que ele est seule o lui.

D’amors parloient amedui,

que se d’autre chose parlassent,

de grant folie se meslassent.

Messire Gauvains la requiert

d’amors et prie, et dit qu’il iert

(382f.5763)

ses chevaliers tote sa vie,

et ele n’an refuse mie,

einz l’otroie mout volantiers.

Uns vavasors andemantiers

antra leanz, qui mout lor nut,

qui monseignor Gauvain conut,

si les trova antrebeisant

et mout grant joie antrefeisant.

Et des que il vit cele joie,

ne pot tenir sa lengue coie,

einz s’escria a grant vertu :

« Fame, honie soies tu !

Dex te destruie et te confonde,

qu’a l’ome de trestot le monde

que tu devroies plus haïr

te leisses ensi conjoïr,

et qui te beise et si t’acole !

Fame maleüree fole,

tu fez bien ce que tu doiz feire.

A tes mains li deüsses treire

le cuer einz que beisier sa boche.

Se tes beisiers au cuer li toche,

le cuer del vantre li as tret,

mes asez mialz eüsses fet

s’as mains arachié li eüsses,

que ensi fere le deüsses,

se fame deüst fere bien.

Mes de ce n’a an fame rien

qu’el* het le mal et le bien ainme,

tort a qui puis fame la clainme,

que la an pert ele son non

ou ele n’ainme se bien non.

Mes tu es fame, bien le voi,

que cil qui se siet delez toi

ocist ton pere, si le beises.

Qant fame puet avoir ses eises,

del soreplus petit li chaut. »

A cest mot a terre* s’an saut

ençois que messire Gauvains

li eüst dit ne plus ne mains,

et cele chiet el pavemant

et jut pasmee longuement ;

et messire Gauvains l’ahert,

si l’an leva et pale et vert

(383a.5807)

de la peor qu’ele ot eüe.

Et quant ele fu revenue,

si dit : « Ha ! or somes nos mort !

Por vos morrai ja ci a tort,

et vos, mien esciant, por moi.

Ja vandra ci, si con ge croi,

la comune de ceste vile,

la en verroiz plus de.x. mile

devant ceste tor amassez.

Mes ceanz a armes asez

dont ge vos armerai bien tost.

Uns prodon de trestote un ost

porroit bien ceste tor desfandre. »

Maintenant cort les armes prandre,

s’an arma monseignor Gauvain

qui ne se desfant pas an vain,

einz les fet toz jus avaler.

Il n’i covient pas apeler

meillor portier qu’il i avoit.

De tot ice mot ne savoit

li sires qui herbergié l’ot,

mes il revint plus tost qu’il pot

de la ou il ala chacier.

Totevoies a pis d’acier

antor la tor asaillent cil.

Atant ez vos Guinganbresil,

qui, par ne sai quele avanture,

vint el chastel grant aleüre,

et fu durement esbaïz

del hui et del marteleïz

que il oï fere as vilains.

De ce que messire Gauvains

ert an la tor ne savoit mot ;

mes quant ce fu que il le sot,

si desfandi qu’il n’i eüst

mes si hardi qui se meüst,

si con il avoit son cors chier,

qui an osast pierre eslochier.

Et il dïent qu’il n’an leiront

neant por lui, einz l’abatront

sor son cors meïsmes ancui,

se il estoit dedanz o lui.

Et quant il vit que sa desfansse

n’i valoit rien, lores s’apansse

(383b.5851)

que il iroit querre le roi

et l’amanroit a ce desroi

que comancié ont li borjois.

Et ja venoit del bois li rois,

et il a l’ancontre li conte :

« Sire, mout vos ont fet grant honte

li meres et li eschevin,

qui asaillent des hui matin

a vostre tor et si l’abatent.

S’il nel conperent et achatent,

ge vos an savroie mal gré.

J’avoie Gauvain apelé

de traïson, bien le savez,

et ce est il que vos avez

fet herbergier an voz meisons.

Si seroit bien droiz et reisons,

qant vos vostre oste en avez fet,

que ja n’i ait honte ne let. »

Et li rois a Guinganbresil

a dit : « Mestre, non avra il,

puis que nos serons la venu.

De ce qu’il li est avenu

me mervoil mout et poise fort ;

et ma gent le heent de mort,

ge ne m’an doi ja mervellier ;

mes de son cors prandre et blecier,

se ge puis, le garderai gié.

Por ce que ge l’ai herbergié,

li porterai ge grant enor. »

Ensi vienent jusqu’a la tor

ou mout demenoient grant noise.

Au maior dit que il s’an voise

et que la comune an remaint.

Tuit s’an vont, que nus n’i remaint

des ice que au maior plot.

An la vile.i. vavasor ot,

qui del chastel estoit naïs,

si conselloit tot le païs,

que il estoit de bien grant san.

« Sire, fet il, or vos doit an

a bien et a foi consellier.

Ce ne fet pas a mervellier

se cil qui la traïson fist

de vostre pere qu’il ocist,

(383c.5895)

se il a esté asailliz,

que il i est de mort haïz

ensi droit con vos le savez.

Mes ce que herbergié l’avez

le doit garantir et conduire,

qu’il n’i soit pris et qu’il n’i muire.

Et cil qui n’an voldroit mantir,

le doit sauver et garantir :

Guinganbreisil, que ge voi la,

qui de grant traïson l’ala

a la cort le roi apeler.

Ice ne fet pas a celer :

il s’an estoit venuz desfandre

an vostre cort, et ge lo prandre

.i. respit de ceste bataille,

et messire Gauvains s’an aille

querre la lance don li fers

sainne, ja ne sera si ters

c’une gote de sanc n’i pande.

Ou il cele lance vos rande

ou il se remandra ici

an tel prison con ge vos di.

Lors avroiz meillor acheison

de lui retenir an prison

que vos orandroit n’avreiez.

Et ge cuit que nel savreiez

metre an nule prison si grief

que il n’an poïst trere a chief.

Et de quanque l’an puet panser

doit an son anemi grever ;

de vostre anemi travellier

ne vos savez mialz consellier. »

Li rois a ce consoil se tient.

An la tor a sa seror vient,

si la trova mout correciee.

Ele s’est contre lui dreciee,

et messire Gauvains ansanble,

qui ne mue color ne manbre

por nule peor que il ait.

Guinganbresis avant se trait

et dist.ii. paroles an vain :

« Sire Gauvain, sire Gauvain,

ge vos avoie an conduit pris,

mes tant i ot que ge vos dis

(383d.5939)

que ja si hardiz ne fussiez

que vos el chastel antressiez

n’an cité que mes sire eüst,

se trestorner vos an pleüst.

De ce que l’an vos a ci fet

n’estuet ores ja tenir plet. »

Et uns sages vavasors dist :

« Sire, se Damedex m’aïst,

tot ce puet an bien amander.

Cui an puet an rien demander

se li vilain l’ont asailli ?

Ne seroient li plet failli

devant le grant jor del joïse.

Mes il iert fet a ma devise.

Mes sire li rois qui est ci

le me comande et ge le di,

mes qu’il ne poist ne vos ne lui,

que vos respitiez amedui

jusqu’a.i. an ceste bataille,

et messire Gauvains s’an aille

querre la lance don li fers

sainne tozjorz, ja n’iert si ters

del sanc tot cler que ele plore ;

ert escrit que il ert ancore

que toz li reaumes de Logres,

qui jadis fu la terre as ogres,

ert destruite par cele lance.

De ce seremant et fiance

vialt avoir mes sire li rois.

— Certes ge me leiroie ençois,

fet messire Gauvains, leanz

ou lenguir ou morir. viii. anz

que seremant vos an feïsse

ne neïs ma foi i meïsse.

N’ai pas de mort tele peor

que ge mialz ne voelle a enor

la mort sofrir et andurer

que vivre a honte et parjurer.

— Biau sire, fet li vavasors,

il ne vos iert ja desenors

ne ja par foi n’an seroiz pire

an.i. san que ge vos voel dire :

vos jureroiz que de la lance

querre feroiz vostre puissance.

(383e.5983)

Se vos la lance ne trovez,

an ceste tor vos remetez,

si seiez del seremant quites.

— Ensi, fet il, con vos le dites

sui ge prez del serement faire. »

A*.i. precieus saintuaire

li a l’an maintenant fet traire

…*

que il metra tote sa painne

a querre la lance qui sainne.

Ensi la bataille est lessiee

et jusqu’a.i. an respitiee

de lui et de Guinganbresil ;

eschapez est de grant peril.

A la pucele congié prist

et a trestoz ses vaslez dist

que an sa terre s’an ralassent

et ses chevax an remenassent

trestoz, fors que le Gringalet.

Plorant s’an tornent li vaslet

de lor seignor, ensi s’an vont,

ne d’ax ne del duel que il font

rien plus a dire ne me plest.

De monseignor Gauvain se test

li contes ici a estal,

si parlerons de Perceval.

Percevax, ce conte l’estoire,

a si perdue la memoire

que de Deu ne li sovient mais.

.V. foiz passa avrix et mais,

ce sont.v. anz trestuit antier,

qu’an eglise ne an mostier

ne Deu ne ses sainz n’aora.