Perceval ou le Conte du Graal (page 13)

Ensi les.v. anz anplea,

et por ce ne lessa il mie

a requerre chevalerie ;

et les estranges avantures,

les felenesses et les dures,

ala querant, si les trova

tant que mout bien s’i esprova,

n’onques n’anprist chose si grief

dom il ne venist bien a chief.

.L. chevaliers de pris

a la cort le roi Artus pris

dedanz les.v. anz anvea.

(383f.6028)

Ensi les.v. anz anplea

c’onques de Deu ne li sovint.

Au chief de.v. anz li avint

que il par.i. desert aloit

cheminant, si con il soloit,

de totes ses armes armez ;

s’a.v. chevaliers ancontrez

et, avoec, dames jusqu’a dis,

lor chiés an lor chaperons mis,

et si aloient tuit a pié

et an langes et deschaucié.

De ce que il armez estoit

et escu et lance portoit

se mervellierent trop les dames,

que por sauvement de lor ames

lor penitance a pié feisoient

por lor pechiez que fez avoient.

Et li uns des.v. chevaliers

l’areste et dit : « Estez arriers !

Don ne creez vos Jhesu Crist,

qui la novele loi escrist

et la dona as crestiens ?

Certes, il n’est reisons ne biens

d’armes porter, einz est granz torz,

au jor que Jhesu Criz fu morz. »

Et cil qui n’avoit an porpans

de jor ne d’ores ne de tans,

tant avoit a son cuer enui,

a dit : « Quex jorz est il donc hui ?

— Quex, sire ? Si ne le savez ?

C’est li vanredis aorez,

qu’an doit sinplement enorer

la croiz et ses pechiez plorer.

Hui fu cil an croiz estanduz

qui trante deniers fu vanduz,

cil qui de toz pechiez est monde.

Por les pechiez de tot le monde,

don toz li monz ert antechiez,

devint il hom, bien le sachiez.

Voirs est que Dex et hom fu il,

et de la Virge nasqui il,

et par le Saint Espir conçut,

ou Dex et char et sanc reçut,

et fu sa deïtez coverte

(384a.6072)

de char d’ome, c’est chose certe.

Et qui issi ne le crerra

ja an la face nel verra.

Il fu nez de la Virge dame,

et si prist d’ome et forme et ame

avoec la sainte deïté,

que a tel jor por verité

con hui est fu an la croiz mis

et trest d’anfer toz ses amis.

Mout par fu sainte cele morz,

qui sauva les vis et les morz

et suscita de mort a vie.

Li fel Giu par lor anvie,

qu’an devroit tüer come chiens,

se firent max, et a nos biens,

qant il an la croiz le leverent ;

aus perdirent et nos salverent.

Tuit cil qui an lui ont creance

doivent hui estre an penitance.

— Et don venez vos or ensi ?

fet Percevax. « Sire, de ci,

d’un boen home, d’un saint hermite,

qui an ceste forest abite,

qui ne vit, tant par est sainz hon,

se de la gloire de Deu non.

— Por Deu ! seignor, la que queïstes ?

Que demandastes ? Que feïstes ?

— Quoi, sire ? fet une des dames.

De noz pechiez i demandames

consoil, et confesse i preïsmes.

La greignor besoigne i feïsmes

que nus crestiens puisse feire

qui bien voelle a Damedeu pleire. »

Ce que Percevax oï ot

le fist plorer, et si li plot

que au bon home alast parler.

« La voldroie, fet il, aler,

a l’ermite, se ge savoie

tenir le santier et la voie.

— Sire, qui aler i voldroit,

si tenist le santier tot droit

et se preïst garde des rains

que nos noames a noz mains

qant nos par ilueques venismes.

(384b.6116)

Tex antresaignes i feïsmes

por ce que nus n’i esgarast,

qui a ce saint hermite alast. »

Atant a Deu s’antrecomandent,

rien nule plus ne li demandent.

Et Percevax el santier antre,

qui sopire del cuer del vantre

por ce que mesfez se savoit

vers Deu et si s’an repantoit.

Plorant s’an vet vers le boschage,

et quant il vint a l’ermitage,

si descent et si se desarme.

Son cheval atache a un charme,

aprés s’an antre chiés l’ermite.

An une chapele petite

trova l’ermite et le provoire

et.i. clerdon, ce est la voire,

qui comançoient le servise,

le plus bel qui an sainte eglise

puisse estre diz, et li plus dolz.

Percevax se met a genolz

tantost con antre an la chapele ;

et li bons hom a lui l’apele,

qui mout le vit sinple et plorant,

et vit jusqu’au manton colant

l’eve qui des ialz li degote.

Et Percevax, qui mout se dote

avoir vers Damedeu mespris,

a l’ermite par le pié pris,

si l’anclina et les mains joint

et prie Deu que il li doint

consoil, que grant mestier en a.

Et li boens hom li comanda

a dire sa confession,

que ja n’avra comenion,

se n’est confés et repantanz.

« Sire, fet il, bien a.v. anz

que ge ne soi ou ge me fui,

ne Deu n’amai ne ne le crui,

n’onques puis ne fis se mal non.

— Ha ! biax amis, fet li prodon,

di moi por coi tu as ce fait,

et prie Deu que merci ait

de l’ame de son pecheor.

(384c.6160)

— Sire, chiés le Roi Pescheor

fui une foiz, et vi la lance

don li fers sainne sanz dotance,

et del graal que ge i vi

ge ne sai cui l’an an servi.

S’an ai puis eü si grant duel

que morz eüsse esté mon vuel,

et Damedeu an obliai,

qu’ainz puis merci ne li criai

ne ne fis rien que ge seüsse

par coi merci avoir deüsse.

— Ha ! biax amis, fet li prodon,

or me di comant tu as non. »

Et il li dist : « Percevax, sire. »

A cest mot li prodon sopire,

qui son non a reconeü,

et dit : « Frere, mout t’a neü

uns pechiez don tu ne sez mot,

ce est li diax que ta mere ot

de toi quant tu partis de li,

que pasmee a terre cheï

au chief del pont, delez la porte,

et de ce duel fu ele morte.

Por le pechié que tu en as

avint que tu ne demandas

de la lance ne del graal,

si t’an sont avenu li mal.

Et n’eüsses pas tant duré,

s’ele ne t’eüst comandé

a Damedeu, ce saches tu.

Mes sa parole ot tel vertu

que Dex por li t’a regardé

de mort et de prison gité.

Pechiez la lengue te trancha,

qant le fer qui ainz n’estancha

devant toi trespasser veïs

et la reison n’an anqueïs.

Quant tu del graal ne seüs

cui l’an an sert, fol san eüs.

Cil cui l’an an sert fu mes frere.

Ma suer et soe fu ta mere,

et del Riche Pescheor roi,

qui filz est a celui, ce croi,

qui del graal servir se fait.

(384d.6204)

Et ne cuidiez pas que il ait

luz ne lanproies ne saumons :

d’une seule oiste, ce savons,

que l’an an ce graal aporte,

sa vie sostient et conforte,

tant sainte chose est li graax ;

et tant par est esperitax

que sa vie plus ne sostient

que l’oiste qui el graal vient.

.XV. anz a ja esté ensi,

que hors de la chanbre n’issi

ou le graal veïs antrer.

Or te voel anjoindre et doner

penitance de ce pechié.

— Biax oncles, ensi l’otroi gié,

fet Percevax, et de boen cuer.

Quant ma mere fu vostre suer,

bien me devez neveu clamer,

et je vos oncle, et mialz amer.

— Voirs est, biax niés. Or te repant !

Qant de t’ame pitiez te prant

si aies an toi repantance

et si voises an penitance

au mostier einz qu’an autre leu

chascun jor, si i avras preu.

Et si ne leisse por nul plait,

se tu es an leu ou il ait

mostier, chapele ne barroche,

va la quant sonera la cloche

ou einçois, se tu es levez.

Ja de ce ne seras grevez,

einz an sera t’ame avanciee.

Et se la messe est comanciee,

tant i fera il meillor estre ;

tant i demore que li prestre

avra tot dit et tot chanté.

Se il te vient a volanté,

ancor porras antrer an pris

et avoir leu an paradis.

Deu croi, Deu ainme, Deu aore,

prodome et boene fame enore.

Contre le provoire te lieve,

c’est uns servises qui po grieve,

et Dex l’ainme por verité,

(384e.6248)

por ce qu’il vient d’umilité.

Ce voel que por tes pechiez faces,

se tu viax avoir de Deu graces

ausi con tu avoir les siax.

Or me di donc se tu le viax.

— Oïl, fet il, mout volantiers.

— Or te pri que.ii. jorz antiers

avoec moi ici te remaignes

et que an penitance praignes

tel viande come la moie. »

Et Percevax le li otroie,

et li hermites li consoille

une orison dedanz s’oroille

et li ferma tant qu’il la sot ;

et an cele orison si ot

asez des nons Nostre Seignor,

tuit li meillor et li greignor

que nomer ost ja boche d’ome,

se por peor de mort nes nome.

Quant l’orison li ot aprise,

desfandi li qu’an nule guise

ne la deïst sanz grant peril.

« Non ferai ge, sire », fet il.

Ensi remest et si oï

le servise et mout s’esjoï.

Aprés le servise aora

la croiz et ses pechiez plora

et se repanti humblemant ;

et fu ensi mout longuement.

Et cele nuit a mangier ot

ice que a l’ermite plot ;

et ses chevax ot de l’estrain

et de l’orge.i. bacin tot plain,

et estable tel con il dut,

conreez fu si com estut.

Ensi Percevax reconut

que Dex au vanredi reçut

mort et si fu crocefiez.

A la Pasque comeniez

fu Percevax mout sinplement.

De Perceval plus longuemant

ne parole li contes ci,

einçois avroiz asez oï

de monseignor Gauvain parler

(384f.6292)

que plus m’oiez de lui conter.

Messire Gauvains tant ala,

puis que de prison eschapa

ou la comune l’asailli,

que antre tierce et le midi

vint vers une angarde avalant,

et vit.i. chasne haut et grant,

et une lance tote droite.

D’aler vers le chasne s’esploite,

et de delez le chasne vit

.i. palefroi norrois petit ;

si li vint mout a grant mervoille,

que ce n’estoit chose paroille

escu et armes, ce li sanble,

et petit palefroi ansanble.

Se li palefroiz fust chevax,

donc cuidast il qu’aucuns vasax,

qui por son los ou por son pris

alast errant par le païs,

et* eüst montee l’angarde.

Atant desoz le chasne esgarde

et vit seoir une pucele,

qui mout ert avenanz et bele,

se ele eüst joie et leesce.

Mes ele ot ses doiz an sa tresce

fichiez por ses chevox detrere

et s’esforçoit mout de duel fere.

Por.i. chevalier duel feisoit

que ele mout sovant beisoit,

les ialz et le front et la boche.

Qant messire Gauvains l’aproche,

si ne set s’il est morz ou vis ;

si dist : « Pucele, est vostre amis

cil chevaliers que vos tenez ?

— Sire, fet el, veoir poez

qu’an ses plaies a grant peril,

que de la menor morroit il. »

Et il li dit : « Ma dolce amie,

esvelliez lo, nel lessiez mie,

que noveles li vuel anquerre

des afaires de ceste terre.

— Sire, ge ne l’esveilleroie,

fet la pucele, einz me leiroie

(385a.6335)

trestote vive depecier,

c’onques nul home n’oi si chier

ne n’avrei mes tant con ge vive.

Mout seroie fole et cheitive,

qant ge voi qu’il dort et repose,

se ge feisoie nule chose

par coi il se plainsist de moi.

— Et ge l’esvellerai, par foi. »

Del chief de la lance l’adoise

a l’esperon, si qu’il ne poise

au chevalier s’il l’esveilla,

que si tres soavet bota

l’esperon que mal ne li fist,

ençois li anclina et dist :

« Sire,.v.c. merciz vos rant,

qant vos si debonerement

boté et esvellié m’avez

que de neant ne fui grevez.

Mes por vos meïsmes vos pri

que vos n’ailliez avant de ci,

que vos fereiez trop que fos.

Remenez, et creez mon los.

— Remanrai, sire ? Et ge por coi ?

— Gel vos dirai, sire, par foi,

des que vos le volez oïr.

Einz chevaliers ne pot venir

qui ça alast ne chanp ne voie.

Ce est la bone de Galvoie ;

mout dure et mout est felenesse,

et s’i est la genz mout perversse.

Einz chevaliers n’i pot passer

qui vis an poïst retorner,

n’ancor n’an est nus eschapez,

fors moi, qui sui si atornez,

si malement, si con ge cuit,

ne verrai pas jusqu’a la nuit,

que ge trovai.i. chevalier

preu et hardi et fort et fier ;

onques si hardi ne trovai

ne a si fort ne m’esprovai.

Por ce vos an lo mialz aler

que ceste angarde a avaler.

— Par foi, fet messire Gauvains,

cist retorners seroit vilains.

(385b.6379)

Ge ne ving pas por sejorner ;

l’an le me devroit atorner

a trop leide recreantise,

des que ge ai la voie anprise,

se ge de ci m’an retornoie.

Je irai ça tant que ge voie

por coi retorner an n’an puet.

— Je voi bien qu’a fere l’estuet,

fet li chevaliers afolez.

Vos i iroiz, quant le volez.

Mes volantiers vos prieroie,

se avanture vos avoie,

c’onques chevaliers a nul tans

ne pot avoir, si con ge pans,

que, se il avient por nul pleit

que vos ne altres ne nus l’eit,

que vos an revaigniez par ci,

et verroiz, la vostre merci,

se ge serai ou morz ou vis,

ou il me sera mialz ou pis.

Se ge sui morz, par charité

et por la Sainte Trinité,

de ceste pucele vos pri

que vos aiez merci de li,

qu’ele n’ait honte ne meseise.

Et por ce a fere vos pleise

que Dex ne fist ne ne volt feire

plus franche ne plus deboneire,

plus cortoise, plus afeitiee.

Or me sanble que desheitiee

est mout por moi, si n’a pas tort,

que ele me voit pres de mort. »

Messire Gauvains li otroie,

se essoines ne le desvoie

ou de prison ou d’autre enui,

que il s’an revanra par lui

et a la pucele donra

si boen consoil con il porra.

Lors les lesse, si s’achemine,

par plains ne par forez ne fine

tant que il vit.i. chastel fort,

don l’eve venoit au regort

de mer, mout grant et de navie.

Petit valoit moins de Pavie

(385c.6423)

li chastiax, qui mout estoit nobles.

D’autre part estoit li vignobles

et li bois biax et avenanz,

qui mout estoit biax par dedanz,

et la riviere fu desoz

qui aceingnoit les murs trestoz,

s’avoit jusqu’an la mer son cors.

Li chastiax estoit, et li bors,

mout bien antor de murs fermez.

Messire Gauvains est antrez

el plus fort de tot le chastel ;

Desoz.i. yf ot un pomel,

el chastel, par desor un pont.

Et quant il fu venuz amont,

trova une pucele sole,

qui miroit son vis et sa gole,

qui plus estoit blanche que nois.

D’un cercelet estroit d’orfrois

avoit antor son chief corone.

Messire Gauvains esperone

vers la pucele l’anbleüre,

et ele li crie : « Mesure,

mesure, sire ! Belemant,

que vos alez trop folemant !

Fos est qui por neant esploite.

— De Deu soiez vos beneoite,

fet messire Gauvains, pucele.

Or me dites, amie bele,

de coi fustes vos apansee,

qui si tost m’avez amanbree

mesure, ne savez por coi ?

— Si faz, chevaliers, par ma foi,

que ge sai bien que vos pansez.

— Et coi ? fet il. — Vos me volez

prandre et porter ci contreval

sor le col de vostre cheval.

— Vos dites bien voir, dameisele.

— Ge le savoie bien, fet ele.

Mal dahé ait qui le pansa !

Garde ne le panser tu ja,

que tu sor ton cheval me metes.

Je ne sui pas de ces foletes

don cil chevalier se deportent,

qui desor lor chevax les portent

(385d.6467)

quant il vont an chevalerie.

Mes moi n’an porteras tu mie !

Et neporquant, se tant valoies,

avoec toi mener m’an porroies.

Se tant t’an voloies pener

que tu m’alasses amener

de ce jardin mon palefroi,

je m’an iroie avoeques toi

tant que maleurtez et pesance

et ire et diax et mesestance

t’avenist an ma conpaignie.

— Et remanra il, bele amie,

se por hardement non ? fet il.

— Par le mien esciant, nenil,

fet la dameisele, vasax.

— Ha ! bele amie, mes chevax,

ou remanra il, se g’i pas ?

Que passer ne porroit il pas

par cele planche que ge voi.

— Non voir, sire, bailliez le moi,

et vos an passez outre a pié.

Le cheval vos garderai gié

tant con ge le porrai garder.

Mes hastez vos del retorner,

qu’il ne m’eschap ou soit toluz

einz que vos soiez revenuz.

— Verité, fet il, avez dite.

S’an le vos tolt, s’an soiez quite,

et, s’il vos eschape, autretel,

que ja ne m’an orroiz parler*.

Ensi li baille, et s’an passe*,

et pansa que il portera

totes ses armes avoec lui ;

se il trueve el vergier nelui

qui veer li vuelle et desfandre

que il n’aille le cheval prandre,

einz i avra noise et estor

que il ne l’an maint au retor.

Atant a la planche passee,

et voit asez gent amassee

qui a grant mervoille l’esgardent ;

et dïent tuit : « Que* deable ardent,

pucele, qui tant as mal fait !

Li tuens cors male avanture ait,

(385e.6511)

c’onques prodome n’eüs chier !

A maint en avras fet tranchier

la teste, don il est granz diax.

Chevaliers qui mener an viax

le palefroi, que ne sez ore

quex max t’an avandra ancore

se tu de ta main i atoches !

Ha ! chevaliers, por coi l’aproches ?

Que ja voir ne l’atocheroies

se tu la grant honte savoies

et les granz max et les granz poinnes