Perceval ou le Conte du Graal (page 9)

et dit quant il fu devant lui :

« Sire, vostre prisoniers sui

por fere ce que vos voldroiz,

et si est bien reisons et droiz,

que ensi le me comanda

li vaslez qui vos demanda

armes vermoilles, si les ot. »

Tot maintenant que li rois ot,

si antant bien que il volt dire :

« Desarmez vos, fet il, biau sire,

(376b.4003)

que joie et bone avanture ait

cil qui de vos presant m’a fait ;

et vos si soiez bien venuz.

Por lui seroiz vos chier tenuz

et enorez a mon ostel.

— Sire, ancor me comanda el.

Mes tant anquerre vos voldroie,

ençois que je desarmez soie,

que la reïne et ses puceles

venissent oïr ces noveles

que je vos ai ci aportees,

qu’eles ne seront ja contees

tant que cele sera venue

qui an la joe fu ferue

por un seul ris que ele ot fet,

c’onques n’i ot plus de mesfet. »

Icil si sa parole fine.

Qant li rois ot que la reïne

devant lui mander li covient,

lors l’a mandee ; et ele i vient,

et totes les puceles vienent,

main a main.ii. et.ii. se tienent.

Qant la reïne asise fu

lez son seignor le roi Artu,

et li Orguelleus de la Lande

li dist : « Dame, saluz vos mande

uns chevaliers que je mout pris,

qui par ses armes m’a conquis.

De lui ne sai que plus vos die,

mes qu’il vos anvoie m’amie,

ceste pucele qui est ci.

— Amis, la soe grant merci »,

fet la reïne. Et il li conte

tote la viltance et la honte

qu’il li avoit longuement fete,

et la poinne que ele ot trete.

Trestot sanz rien celer li dist,

et l’acheison por qu’il le fist.

Aprés li mostrerent celi

que Kex li seneschax feri,

et il li dist : « Cil me pria,

pucele, qui ça m’anvea,

que de par lui vos saluasse

ne jamés piez ne remuasse

(376c.4047)

tant que je vos eüsse dit

que ja puis Dex ne li aït

qu’il anterra por rien qu’aveigne

an cort que li rois Artus teigne

tant que il vos avra vangiee

de la bufe et de la frangiee

qui por lui donee vos fu. »

Et quant li fos l’a antandu,

si saut an piez et si s’escrie :

« Dan Kex, se Dex me beneïe,

vos le conparroiz voiremant,

mes ce sera prochenement. »

Aprés le fol parla li rois :

« Ha ! Kex, ne feïs que cortois

del vaslet quant tu le gabas.

Par ton gabois tolu le m’as,

si que jamés nel cuit veoir. »

Lors fist devant lui aseoir

li rois son chevalier prison,

si li pardone sa prison

et puis desarmer le comande ;

et messire Gauvains demande,

qui delez le roi sist a destre :

« Por Deu, sire, qui puet cil estre

qui par seul ses armes conquist

si boen chevalier con est cist ?

An totes les Isles de mer

n’ai oï chevalier nomer,

ne nel vi ne ne le conui,

qui se poïst prandre a cestui

d’armes ne de chevalerie.

— Biax niés, je ne le conuis mie,

fet li rois, et si l’ai veü.

Qant ge le vi, tant ne m’an fu

que rien nule li anqueïsse,

et il me dist que jel feïsse

chevalier tot de maintenant.

Je le vi bel et avenant,

si li dis : « Frere, volantiers.

Mes descendez andemantiers

tant que l’an vos ait aportees

unes armes totes dorees. »

Et il dist que ja nes prandroit

ne ja a pié ne descendroit

(376d.4091)

tant qu’il eüst armes vermoilles.

Ancor dist il autres mervoilles

qu’il ne voloit autres baillier

se celes non au chevalier

qui ma cope d’or anportoit.

Et Kex, qui enuieus estoit,

et est ancor et tozjorz iert

ne ja nul bien dire ne quiert,

li dist : « Frere, li rois vos done

les armes et vos abandone. »

Cil cuida que voir li deïst,

s’ala aprés et si l’ocist

d’un javelot que il lança.

Je ne sai comant comança

la meslee ne li toauz,

mes que li Chevaliers Vermauz

de la forest de Quinqueroi

le feri, je ne sai por coi,

de sa lance, si fist orguel.

Et li vaslez tres parmi l’uel

le referi d’un javelot,

si l’ocist et les armes ot.

Puis si bien a gré m’an servi

que par monseignor saint Davi

que l’an aore et prie an Gales

jamés an chanbres ne an sales

.ii. nuiz pres a pres ne girrai

jusque tant que je le verrai

s’il est vis, an mer ou an terre,

einz movrai ja por aler querre. »

Lués que li rois ot ce juré,

si furent tuit asseüré

que il n’i ot que de l’aler.

Qui lors veïst dras anmaler,

et covertors et orelliers,

cofres anplir, trosser somiers

et chargier charretes et chars,

dont il n’i ot pas a eschars,

tantes et pavellons et trez,

uns clers sages et bien letrez

ne poïst escrire an.i. jor

tot le hernois et tot l’ator

qui fu aparelliez tantost.

Ensi con por aler an l’ost

(376e.4135)

se part li rois de Carlion,

si le sivent tuit li baron ;

neïs pucele n’i remaint

que la reïne n’i amaint

por hautesce et por seignorie.

La nuit, an une praerie,

lez une forest sont logié.

Cele nuit ot il bien negié,

que mout froide estoit la contree.

Et Percevax la matinee

fu levez si con il soloit,

qui querre et ancontrer voloit

avanture et chevalerie ;

et vint droit an la praerie

ou l’oz le roi estoit logiee,

qui fu gelee et annegiee.

Et einz que il venist as tentes,

voloit une rote de gentes

que la nois avoit esbloïes.

Veües les a et oïes,

qu’eles s’an aloient fuiant

por.i. faucon qui vint bruiant

aprés eles de grant randon,

tant c’une an trova a bandon

qu’ert d’antre les altres sevree,

si l’a ferue et si hurtee

qu’ancontre terre l’abati ;

mes trop fu tart, si s’an parti,

il ne la volt lier ne joindre.

Et Percevax comance a poindre

la ou il ot veü le vol.

La gente fu ferue el col,

si seinna.iii. gotes de sanc

qui espandirent sor le blanc,

si sanbla natural color.

La gente n’a mal ne dolor

qu’ancontre terre la tenist

tant que il a tans i venist ;

ele s’an fu ençois volee,

et Percevax vit defolee

la noif qui soz la gente jut,

et le sanc qui ancor parut.

Si s’apoia desor sa lance,…*

Que la fresche color li sanble

(376f.4179)

qui est an la face s’amie,

et panse tant que il s’oblie.

Ausins estoit, an son avis,

li vermauz sor le blanc asis

come les gotes de sanc furent

qui desor le blanc aparurent.

An l’esgarder que il feisoit

li ert avis, tant li pleisoit,

qu’il veïst la color novele

de la face s’amie bele.

Percevax sor la gote muse

tote la matinee et use

tant que hors des tantes issirent

escuier qui muser le virent

et cuiderent qu’il somellast.

Ençois que li rois s’esvellast,

qui ancor gisoit an son tré,

ont li escuier ancontré

devant le pavellon le roi

Sagremor, qui par son desroi

estoit Desreez apelez.

« Di va, fet il, nel me celez,

por coi venez vos ça si tost ?

— Sire, font il, hors de cest ost

avons veü.i. chevalier

qui somoille sor son destrier.

— Est il armez ? — Par foi, oïl.

— G’irai a lui parler, fet il,

et si l’an amanrai a cort. »

Tot maintenant Sagremors cort

au tref le roi et si l’esvoille.

« Sire, fet il, la hors somoille

uns chevaliers an cele lande. »

Et li rois aler li comande,

et avoec ce li dit et prie

qu’il li amaint, ne le lest mie.

Tantost comande Sagremors

qu’an li traie son cheval hors,

et ses armes redemanda.

Fet fu quanque il comanda,

si se fet armer bien et tost ;

trestoz armez s’an ist de l’ost

et vet tant qu’au chevalier vient.

« Sire, fet il, il vos covient

(377a.4223)

venir a cort. » Et il ne mot

et fet sanblant que pas ne l’ot ;

et il li recomance a dire,

et cil ne mot ; et il s’aïre

et dit : « Par saint Pere l’apostre,

vos i vanroiz ja maugré vostre.

De ce que prié vos en ai

me poise il, car ge i ai

ma parole mal anploiee. »

Lors a l’anseigne desploiee

et porprant terre a une part,

et dit celui que il se gart,

ja le ferra s’il ne s’i garde.

Percevax, qui vers lui esgarde,

le voit venir tot eslessié,

si a tot son pansé lessié,

si li revint poignant ancontre.

A ce que li uns l’autre ancontre,

Sagremors sa lance peçoie ;

la Perceval ne fraint ne ploie,

ençois l’anpaint de tel vertu

que del cheval l’a abatu.

Et li chevax sanz demoree

s’an va fuiant, teste levee,

vers les tantes le grant troton.

Le cheval voient li baron,

si enuia a tex i ot.

Et Kex, qui onques ne se pot

tere de felenie dire,

s’an gabe et dist au roi : « Biau sire,

veez con Sagremors revient.

Par le frain le chevalier tient,

si l’an amainne maugré suen.

— Kex, fet li rois, n’est mie buen,

qu’isi vos gabez des prodomes.

Or i alez et si verromes

con vos le feroiz mialz de lui.

— Sire, fet Kex, mout liez an sui

qant il vos plest que ge i aille,

et ge l’an amanrai sanz faille

tot a force, vuelle il ou non,

si li ferai nomer son non. »

Lors se vet armer tot a san.

Armez est et monte et va s’an

(377b.4267)

a celui qui tant antandoit

aus.iii. gotes ou il musoit

qu’il n’avoit d’autre chose soing.

Et cil li crie de mout loing :

« Vasax, vasax, venez au roi !

Vos i vanroiz ja par ma foi,

ou vos le conparroiz mout fort. »

Le chief de son cheval estort

Percevax, qui s’ot menacier,

et point des esperons d’acier

le cheval, qui pas ne va lant.

Del bien fere a chascuns talant,

si s’antrevienent sanz faintise.

Kex le fiert, et sa lance brise

et esmie con une escorce,

que il i mist tote sa force.

Et Percevax pas ne s’an faint,

par desor la bocle l’ataint,

si l’abati sor une roche,

que la chanole li esloche,

et antre le code et l’essele,

ausi con une sesche estele,

l’os del braz destre li brisa,

si con li fos le devisa,

si con li fos deviné l’ot ;

bien fu voirs li devins au sot.

Kex se pasme de la destresce,

et li chevax fuiant s’adresce

vers les tantes tot le troton.

Le cheval voient li Breton

qui revient sanz le seneschal,

et vaslet corent a cheval,

et dames et chevalier muevent.

Qant le seneschal pasmé truevent,

si cuident tuit que il soit morz.

Li rois en a granz desconforz

et por lui font duel tuit et totes.

Et Percevax sor les trois gotes

se rapoia desor sa lance

por esgarder cele sanblance.

Et li seneschax est bleciez ;

Li rois an est mout correciez,

et l’an li dit qu’il ne s’esmait,

qu’il garra bien, mes que il ait

(377c.4311)

mire qui se sache antremetre

de la chenole an son leu metre

et d’os brisié fere reprandre.

Et li rois, qui mout l’avoit tandre

et mout l’amoit an son corage,

li anvoie.i. mire mout sage

et.iii. puceles de s’escole,

qui li raloient la chenole

et si li ont le braz lié

et resoudé l’os esmié.

Et l’ont au tref le roi porté

et si l’ont mout reconforté,

et li dïent qu’il garra bien,

ne ja ne s’an esmait de rien.

Et messire Gauvains li dist :

« Sire, se Damedex m’aïst,

il n’est reisons, bien le savez,

si con vos meïsmes l’avez

tozjorz dit et jugié a droit,

que chevaliers autre ne doit

oster, si con il dui ont fet,

de son pansé, quel que il l’et ;

et s’il an ont le tort eü,

ce ne sai, mes mesavenu

lor an est, ce est chose certe.

Li chevaliers d’aucune perte

estoit pansis qu’il avoit fete,

ou s’amie li ert fortrete,

si l’an enuiot et pesoit.

Mes se vostre pleisirs estoit,

veoir sa contenance iroie,

et se an tel point le trovoie

que son panser eüst guerpi,

diroie et prieroie li

qu’il venist a vos jusque ça. »

A cest mot Kex se correça

et dist : « Ha ! messire Gauvain,

vos l’amanroiz ja par la main,

le chevalier, mes bien li poist.

Bien le feroiz, se il vos loist

et la baillie vos remaint.

Ensi en avez vos pris maint.

Qant li chevalier sont lassez

et il ont fet d’armes assez,

(377d.4355)

lors vet au roi congié requerre

que l’an li lest aler conquerre !

Gauvain, maudahez ait mes cos

se vos estes mie si fos

que l’an ne puist a vos aprandre !

Bien savez paroles antandre,

qui sont et beles et polies.

Granz orguiauz et granz felenies

et grant enui li diroiz ja ?

Maudahez ait qui le cuida

et qui l’otroiera, qui soie !

Certes an.i. bliaut de soie

poez ceste bataille fere.

Ja ne vos an covandra trere

espee ne lance brisier.

De tant vos poez vos prisier

que, se la lengue ne vos faut

por dire : « Sire, Dex vos saut

et vos doigne vie et santé »,

fera il vostre volanté.

N’an di rien por vos anseignier,

mes bien le savroiz apleignier

si con an aplaigne le chat,

et dira l’an : « Or se conbat

messire Gauvains duremant. »

— Ha ! sire Kex, plus belemant,

fet il, le me poïssiez dire.

Cuidiez vos or vangier vostre ire

et vostre mautalant a moi ?

Je l’an amanrai, par ma foi,

se j’onques puis, biax dolz amis.

Ja n’an avrai le braz maumis

et sanz chenole desloier,

que je n’aim mie tel loier.

— Or m’i alez, niés, dit li rois,

que mout avez dit que cortois.

S’estre puet, si l’an amenez,

et totes voz armes prenez,

que desarmez n’iroiz vos pas. »

Armer se fet eneslepas

cil qui de totes les bontez

ot los et pris, et est montez

sor.i. cheval fort et adroit,

et vint au chevalier tot droit,

(377e.4399)

qui sor sa lance ert apoiez.

Ancor n’estoit pas enuiez

de son pansé qui mout li plot,

et neporquant li solauz ot

.ii. des gotes del sanc remises

qui sor la noif erent remises*,

et la tierce aloit remetant,

por ce n’i pansoit mie tant

li chevaliers con il ot fet.

Et messire Gauvains se tret

vers lui tote une voie anblant,

sanz fere nul felon sanblant,

et dit : « Sire, je vos eüsse

salué, se autel seüsse

vostre cuer con je faz le mien.

Mes tant vos puis ge dire bien

que ge sui messages le roi ;

il vos mande et dit par moi

que vos alez parler a lui.

— Il an i ont ja esté dui,

fet Percevax, qui me toloient

ma joie et mener m’an voloient

ausi con se ge fusse pris.

Et je estoie si pansis

d’un pansé qui mout me pleisoit ;

et cil qui partir m’an voloit

n’aloit mie querant mon preu,

que devant moi an ice leu

avoit.iii. gotes de frés sanc

qui anluminoient le blanc.

An l’esgarder m’estoit avis

que la fresche color del vis

m’amie la bele i veïsse,

ja mes ialz partir n’an queïsse.

— Certes, fet messire Gauvains,

cil pansers n’estoit pas vilains,

ençois estoit cortois et dolz,

et cil estoit fos et estolz

qui vostre cuer an remuoit.

Mes ge desir mout et covoit

a savoir que vos voldroiz fere.

Au roi, s’il ne vos doit desplere,

vos manroie ge volantiers.

— Or me dites, biau sire chiers,

(377f.4443)

por verité, fet Percevax,

se Kex i est li seneschax.

— Oïl, voiremant i est il,

et si sachiez que ce est cil

qui orandroit a vos josta,

et la joste tant li costa

que le braz destre li avez

peçoié, et si nel savez,

et la chenole desloiee.

— Donc est la pucele vangiee,

fet Percevax, que Kex feri. »

Qant messire Gauvains l’oï,

si s’an mervoille et tressaut,

et dist : « Sire, se Dex me saut,

li rois ne queroit se vos non.

Sire, comant avez vos non ?

— Percevax, sire. Et vos, comant ?

— Sire, sachiez veraiement

que ge ai non an baptestire

Gauvains. — Gauvains ? — Voire, biau sire. »

Percevax mout s’an esjoï

et dit : « Sire, bien ai oï

de vos parler an plusors leus

et l’acointance de nos deus

desirroie mout a avoir,

se il ne vos doit desseoir.

— Certes, fet messire Gauvains,

ele ne me plest mie mains

qu’ele fet vos, mes plus, ce croi. »

Et Percevax li dist : « Par foi,

donc irai ge la ou voldroiz

volantiers, que il est bien droiz,

et ge m’an ferai or plus cointes

de ce que ge sui vostre acointes. »

Lors cort li uns l’autre anbracier ;

il comancent a deslacier

andui lor hiaumes et vantailles

et traient contremont les mailles.

Ensi s’an vont joie menant ;

et vaslet corent maintenant,

qui ensi conjoïr les voient

d’une angarde ou il estoient,

et sont venu corant au roi.

« Sire, sire, font il, par foi,

(378a.4487)

messire Gauvains en amainne

le chevalier, et si demainne

li uns a l’autre trop grant joie. »

N’i a nul qui la novele oie

qui hors de la tante ne saille

et a l’ancontre ne lor aille,

et Kex dit au roi, son seignor :

« Or en a le pris et l’enor

messire Gauvains, vostre niés.