Œuvres complètes (page 10)

Que li sien firent à mort traire

Par s’avarisce.

Quant j’oi parler de si lait visce,

Par foi toz li cuers m’en hérice

De duel et d’ire

Si fort que je ne sai que dire ;

Quar je voi roiaume et empire

Trestout ensamble.

Que dites-vous ? que il vous samble

Quant mesires Nobles dessamble

Toutes ses bestes,

Qu’il ne puéent metre lor testes

Aus bons jors ne aus bones festes

En sa meson ;

Et se n’i set nule reson

Fors qu’il doute de la seson,

Que n’enchiérisse ;

Mès jà de ceste anée n’isse,

Ne mès coustume n’establisse

Qui ce brassa !

Quar trop vilain fet embraça :

Roneaus li chiens le porchaça

Avoec Renart.

Nobles ne set engin ne art

Ne c’uns des asnes de Sénart

Qui busche porte ;

Il ne set pas de qu’est sa porte.

Por ce fet mal qui li enorte

Se tout bien non.

Des bestes orrez ci le non

Qui de mal fère ont le renon

Tosjours éu.

Mult ont grevé, mult ont néu ;

Aus seignors en est meschéu

Et il s’en passent.

Assez emblent, assez amassent ;

C’est merveille qu’il ne se lassent.

Or entendez

Com Nobles a les iex bendez,

Et se son ost estoit mandez

Par bois, par terre,

Où porroit-il trover ne querre

En qui il se fiast de guerre

Se mestier ière ?

Renars porteroit la banière,

Roneaus, qu’à toz fet laide chière,

Feroit la bataille première,

O soi nului.

Bien vous puis dire de celui

Jà nus n’aura honor de lui

De par servise.

Quant la chose seroit emprise,

Ysengrins, que chascuns desprise,

L’ost conduiroit ;

Où se devient, il s’enfuiroit.

Bernart l’asne les déduiroit,

O sa grant croiz.

Cil .iiij. sont fontaine et doiz,

Cil .iiij. ont l’otroi et la voiz

De tout l’osté.

La chose gist sor tel costé

C’onques rois de bestes n’ot té

Le bel aroi.

Cist sont bien mesnie de roi ;

Il n’aiment noise ne desroi

Ne grant murmure.

Quant mesires Nobles pasture

Chascuns s’en ist de sa pasture ;

Nus n’i remaint ;

Par tens ne saurons où il maint,

Jà autrement ne se demaint

Por querre avoir,

Qu’il en porra assez avoir,

Et cil ont assez de savoir

Qui font son conte.

Bernars gete, Renars mesconte :

Ne connoissent honor de honte ;

Roneaus abaie,

Et Ysengrins pas ne s’esmaie.

Le seau porte troupt qu’il paie,

Gart chascuns soi :

Ysengrins a .i. filz o soi

Qu’a toz jors de mal fère soi ;

S’a non Primaut :

Renars .i. qui a non Grimaut.

Poi lor est comment ma rime aut,

Mès que mal facent,

Et que toz les bons us effacent.

Diex lor otroit ce qu’il porchacent !

S’auront la corde.

Lor ouvraingne bien s’i acorde,

Quar il sont sanz miséricorde

Et sanz pitié,

Sanz charité, sanz amistié.

Monseignor Noble ont tuit getié

De bons usages :

Ses ostex samble uns reclusages.

Assez font paier de musages

Et d’avaloingnes

A ces povres bestes lontaingnes

A cui il font de granz essoingnes.

Diex les confonde

Qui sires est de tout le monde !

Et je r’otroi que l’on me tonde

Se maus n’en vient ;

Quar d’un proverbe me sovient,

Que l’en dit : Tout pert qui tout tient :

C’est à bon droit.

La chose gist sor tel endroit

Que chascune beste voudroit

Que venist l’Once.

Se Nobles copoit à la ronce

De mil n’est pas .i. qui en gronce,

C’est voirs sanz faille :

L’en seusche guerre et bataille,

Il ne me chaut, mès que bien n’aille.

Explicit Renart le Bestorné.

Du Pharisian,

ou

C’EST D’YPOCRISIE,

ou

L’AUTRE DIST D’YPOCRISIE.

Mss. 7218, 7633, 7615.

Seignor qui Dieu devez amer,

En qui amor n’a point d’amer,

Qui Jonas garda en la mer

Par grant amor

Les .iij. jors qu’il i fist demor,

A vous toz faz-je ma clamor

D’Ypocrisie

Cousine germaine Hérésie,

Qui bien a la terre saisie ;

Tant est grant dame

Qu’ele en enfer metra mainte âme.

Maint homme a mis et mainte fame

En sa prison :

Mult l’aime-on et mult la prise-on ;

Ne puet avoir los ne pris hom

S’il ne l’oneure :

Honorez est qu’à li demeure,

Grant honor a, ne garde l’eure ;

Sanz honor est qui li cort seure

En brief termine.

Gésir soloit en la vermine ;

Or n’est mès hom qui ne l’encline

Ne bien créanz,

Ainz est bougres et mescréanz.

Ele a jà fet toz recreanz

Ses aversaires.

Ses anemis ne prise gaires,

Qu’ele a baillis, provos et maires,

Et si a juges,

Et de deniers plaines ses huges ;

Si n’est cité où n’ait refuges

A grant plenté ;

Partout fet mès sa volenté :

Ne la retient Nonostenté

N’autre justise :

Le siècle gouverne et justice.

Resons est quanqu’ele devise,

Soit maus, soit biens.

Ses serjanz est Justiniens,

Et toz canons et Graciens.

Je qu’en diroie ?

Bien puet lier et si desloie.

S’en .i. mauvès leu ensailloie,

Ne puet el estre.

Or vous vueil dire de son estre,

Qui sont si seignor et si meistre

Parmi la vile :

Diex les devise en l’Évangile,

Qui n’est de barat ne de guile,

Ainz est certaine :

Granz robes ont de simple laine,

Et si sont de simple couvaine ;

Simplement chascuns se demaine.

Color ont simple et pâle et vaine,

Simple viaire,

Et sont cruel et de put’aire

Vers cels à cui ils ont afaire

Plus que lyon

Ne lyepart, ne escorpion.

N’i a point de relegion,

C’est sanz mesure ;

Itel gent, ce dist l’Escripture,

Nous metront à desconfiture ;

Car vérité,

Pitié et foi et charité,

Et larguèce et humilité

Ont jà sous mise ;

Et maint postiau de sainte Yglise,

Dont li uns plesse et l’autres brise,

Ce voit-on bien,

Contre li ne valent mès rien.

Les plusors fist de son merrien,

Si l’obéissent,

Nous engingnent et Dieu traïssent ;

S’il fust en terre il l’océissent,

Quar il ocient

La gent qui vers aus s’umelient.

Assez font el que il ne dient :

Prenez-i garde.

Ypocrisie la renarde,

Qui defors uint et dedenz larde,

Vint ou roiaume ;

Tost ot trouvé frère Guillaume,

Frère Robert et frère Aliaume,

Frère Giefroi,

Frère Lambert, frère Lanfroi ;

N’estoit pas lors de tel effroi,

Mès or s’effroie.

Tel cuide-on qu’au lange se froie

Qu’autre chose a souz la corroie,

Si com je cuit :

N’est pas tout or quanqu’il reluit.

Ypocrisie est en grant bruit ;

Tant a ouvré,

Tant se sont li sien aouvré,

Que par engin ont recouvré

Grant part el monde.

N’est mès nus tels qui la responde

Que maintenant ne le confonde

Sanz jugement ;

Et par ce véez plainement

Que c’est contre l’avénement

A Antecrist.

Ne croient pas le droit escrist

De l’Évangile Jesu-Crist

Ne ses paroles :

En leu de voir dient frivoles,

Et mençonges vaines et voles

Por decevoir

La gent, et por apercevoir

S’à pièce voudront recevoir

Celui qui vient,

Que par tel gent venir covient ;

Quar il vendra, bien m’en sovient,

Par ypocrites ;

Les prophécies en sont escrites :

Or vous ai tel gent descrites.

Explicit du Pharisian, ou de l’autre dist d’Ypocrisie.

De Brichemer, ou

C’EST DE BRICHEMER .

Mss. 7218, 7615.

Rimer m’estuet de Brichemer

Qui jue de moi à la briche :

Endroit de moi je l’ doi amer ;

Je ne l’ truis aeschars ne chiche.

N’a si large jusqu’outre mer,

Quar de promesse m’a fet riche :

Du forment qu’il fera semer

Me fera anc’ouan flamiche.

Brichemer est de bel afère ;

N’est pas uns hom plains de desroi :

Cortois et douz et debonère

Le trueve-on, et de bel aroi ;

Mès n’en puis fors promesse atrère,

Ne je n’i voi autre conroi :

Autele atente m’estuet fère

Com li Breton font de lor roi.

Ha, Brichemer ! biaus très doux sire,

Paié m’avez cortoisement,

Quar vostre bourse n’en empire,

Ce voit chascuns apertement ;

Mès une chose vos vueil dire

Qui n’est pas de grand coustement :

Ma promesse fetes escrire ;

Si soit en votre testament.

Explicit de Brichemer.

CI ENCOUMENCE Li Diz des Ribaux de Greive.

Ms. 7633.

Ribaut, or estes-vos à point :

Li aubre despoillent lor branches

Et vos n’aveiz de robe point ;

Si en aureiz froit à voz hanches,

Queil vos fussent or li porpoint

Et li seurquot forrei à manches.

Vos aleiz en estei si joint,

Et en yver aleiz si cranche,

Vostre soleir n’ont mestier d’oint,

Vos faites de vos talons planghes.

Les noires mouches vos ont point,

Or vos repoinderont les blanches.

Explicit.

La Desputoison de Challot et du Barbier,

OU CI ENCOUMENCE

LA DESPUTISONS DE CHARLOT ET DOU BARBIER DE MELEUN,

OU CI COMMANCE

LE DIT DE CHARLOT ET DU BARBIER.

Mss. 7218, 7633, 198 N.-D.

L’autr’ier .i. jor jouer aloie

Devers l’Auçoirrois Saint-Germain,

Plus matin que je ne soloie,

Que ne lief pas volentiers main.

Si vi Charlot enmi ma voie,

Qui le barbier tint par la main,

Et bien monstroient toute voie

Qu’il n’èrent pas cousin germain.

Il se disoient vilonie

Et si getoient gas de voir :

— « Charlot, tu vas en compaignie

Por crestienté decevoir ;

C’est trahison et félonie,

Ce puet chascuns apercevoir.

La teue loi soit la honie :

Tu n’en as point, au dire voir. »

— « Barbier, foi que doit la baulive

Où vous avez vostre repaire,

Vous avez une goute vive ;

Jamès n’ert jor qu’il ne vous paire.

Saint Ladres a rompu la trive,

Si vous a feru el viaire ;

Por ce que cist maus vous eschive

Ne requerrez mès saintuaire. »

— « Charlot, foi que doi sainte Jame,

Vous avez ouan fame prise :

Est-ce selonc la loi esclame

Que Kayfas vous a aprise ?

Vous créez autant Notre-Dame,

Où virginitez n’est maumise,

Com je crois c’uns asnes ait âme ;

Vous n’amez Dieu ne sainte Yglise. »

— « Barbier sanz rasoir, sanz cisailles,

Qui ne sez rooigner ne rére,

Tu n’as ne bacins ne toailles,

Ne de qoi chaufer eve clère.

Il n’est rien née que tu vailles,

Fors à dire parole amère ;

S’outre mer fus, encor i ailles,

Et fais proesce qu’il i père. »

— « Charlot, tu as toutes les lois :

Tu es juys et crestien,

Tu es chevaliers et borgois,

Et quant tu veus clerc arcien.

Tu es maqueriaus chascun mois,

Ce dient bien li ancien ;

Tu fez sovent par ton gabois

Joindre .ij. cus à .i. lien. »

— « Barbier, or est li tens venuz

De mal parler et de mesdire,

Et vous serez ainçois chenuz

Que vous lessiez ceste matire ;

Mès vous morrez povres et nuz,

Car vous devenez de l’empire ;

Je sui por maqueriaus tenuz :

L’en vous retient à va-li-dire. »

— « Charlot, Charlot, biaus douz amis,

Tu le fez aus enfanz le roi ;

Se tu i es, qui t’i a mis ?

Tu i es autant comme à moi.

De sambler fols t’és entremis,

Mès, par les iex dont je te voi,

Tels t’a argent en paume mis

Qui est assez plus fols de toi. »

— « Barbier, or vienent les groiseles ;

Li groiselier sont boutoné,

Et je vous raport les noveles

Qu’el front vous sont li borjon né.

Ne sai se ce seront cenèles

Qui ce vis ont avironé :

Els seront vermeilles et bêles

Avant que l’en ait moissoné. »

— « Ce n’est mie méselerie,

Charlot, ainçois est goute rose,

Foi que je doi sainte Marie

Que vous n’amez de nule chose.

Vous créez miex en juerie,

Qui la vérité dire en ose,

Qu’en celui qui par seignorie

A la porte d’enfer desclose.

« Et nequedent se Rustebues,

Qui nous connoist bien a .x. anz

Voloit dire .ij. motés nués,

Mès qu’au dire fust voir disanz,

Ne contre toi, ne à mon oés,

Mès por le voir se fust mis anz,

Je le vueil bien se tu le veus,

Que le meillor soit eslisanz. »

— « Seignor, par la foi que vous doi,

Je ne sai le meillor eslire ;

Le mains pieur, si com je croi,

Vous eslirai-je bien du pire :

Charlot ne vaut ne ce ne qoi,

Qui en veut la vérité dire ;

Il n’a ne créance ne foi

Ne que chiens qui charoingne tire.

« Li barbiers connoist bone gent,

Et si les sert et les honeure,

Et met en els cor et argent,

Paine de servir d’eure en eure ;

Et set son mestier bel et gent,

Se besoins li recoroit seure,

Et s’a en lui mult biau sergent

Que com plus vit et plus coleure. »

Explicit la Desputison de Charlot et dou Barbier.

De l’Estat du Monde.

Ms. 7218.

Por ce que li mondes se change

Plus sovent que denier à change,

Rimer vueil du monde divers :

Toz fu estés, or est yvers ;

Bons fu, or est d’autre manière ;

Quar nule gent n’est mès manière

De l’autrui porfit porchacier,

Se son preu n’i cuide chacier.

Chascuns devient oisel de proie ;

Nus ne vit mès se il ne proie :

Por ce dirai l’estat du monde,

Qui de toz biens se vuide et monde.

Relegieus premièrement

Déussent vivre saintement,

Ce croi selonc m’entencion.

Si a double relegion :

Li .i. sont moine blanc et noir,

Qui maint biau lieu et maint manoir

Ont et mainte richece assise,

Qui toz sont sers à covoitise.

Toz jors vuelent sanz doner prendre,

Toz jors achatent sans riens vendre.

Il tolent, l’en ne lor tolt rien ;

Il sont fondé sus fort mesrien,

Bien puéent lor richece acroistre ;

L’en ne préesche mès en cloistre

De Jésus-Christ ne de sa mère,

Ne de saint Pol, ne de saint Père :

Cil qui plus set de l’art du siècle,

C’est le meillor selonc lor riègle.

Après si sont li mendiant

Qui par la vile vont criant :

« Donez, por Dieu, du pain aus frères ! »

Plus en i a de .xx. manières.

Ci a dure fraternité ;

Quar, par la sainte Trinité,

Li uns covenz voudroit de l’autre

Qu’il fust en .i. chapiau de faultre

El plus péreillueus de la mer :

Ainsi s’entraiment li aver.

Covoitex sont, si com moi samble :

Fors lerres est qu’à larron emble,

Et cil lobent les lobéors

Et desrobent les robéors

Et servent lobéors de lobes,

Ostent aux robéors lor robes.

Après ce que je vous devise,

M’estuet parler de sainte Yglise,

Que je voi que plusor chanoine

Qui vivent du Dieu patremoine

Il n’en doivent, selonc le livre,

Prendre que le souffisant vivre,

Et, le remanant humblement,

Déussent-il communément

A la povre gent départir ;

Mès il verront le cuer partir

Au povre, de male aventure,

De grant fain et de grant froidure.

Quant chascuns a chape forrée,

Et de denier la grant borsée,

Les plains coffres, la plaine huche,

Ne li chaut qui por Dieu le huche,

Ne qui riens por Dieu li demande ;

Quar avarisce li commande,

Cui il est sers, à mettre ensamble,

Et si fet-il, si com moi samble ;

Mès ne me chaut se Diex me voie.

En la fin vient à male voie

Tels avoirs, et devient noianz ;

Et droiz est, car ses iex voianz,

Il est riches du Dieu avoir,

Et Diex n’en puet aumosne avoir ;

Et se il vait la messe oïr,

Ce n’est pas por Dieu conjoïr,

Ainz est por des deniers avoir,

Quar tant vous faz-je à savoir,

S’il n’en cuidoit riens raporter,

Jà n’i querroit les piez porter.

Encor i a clers d’autre guise,

Que quant il ont la loi aprise

Si vuelent estre pledéeur

Et de lor langues vendéeur ;

Et penssent baras et cauteles,

Dont il bestornent les quereles,

Et metent ce devant derrière.

Ce qui ert avant va arrière,

Car quant dant Denier vient en place

Droiture faut, droiture efface.

Briefment tuit clerc fors escoler

Vuelent avarisce acoler.

Or m’estuet parler des genz laies

Qui resont plaié d’autres plaies.

Provost et bailli et majeur

Sont communement li pieur,

Si com convoitise le vost ;

Quar je regart que li provost

Qui acenssent les provostez,

Que il plument toz les costez

A cels qui sont en lor justise

Et se deffendent en tel guise :

« Nous les acenssons chièrement ;

Si nous covient communement,

Font-il, partout tolir et prendre

Sanz droit ne sanz reson atendre :

Trop aurions mauvès marchié

Se perdons en nostre marchié. »

Encor i a une autre gent,

Cil qui ne donent nul argent,

Comment li bailli qui sont garde ;

Sachiez que au jor d’ui lor tarde

Que la lor garde en lor baillie

Soit à lor tens bien esploitie,

Que au tens à lor devancier

N’i gardent voie ne sentier

Par où onques passast droiture.

De cèle voie n’ont-il cure ;

Ainçois penssent à porchacier

L’esploit au seignor et traitier

Le lor porfit de l’autre part :

Ainsi droiture se départ.

Or i a gent d’autres manières

Qui de vendre sont coustumières

De choses plus de .v. cens paires