Œuvres complètes

C’est de la Povretei Rutebuef.

Ms. 7633.

Je ne sai par où je coumance,

Tant ai de matyère abondance

Por parleir de ma povretei.

Por Dieu vos pri, frans Rois de France,

Que me doneiz queilque chevance :

Si fereiz trop grant charitei.

J’ai vescu de l’autrui chatei

Que hon m’a créu et prestei ;

Or me faut chacuns de créance,

C’om me seit povre et endetei :

Vos r’aveiz hors dou reigne estei

Où toute avoie m’atendance.

Entre chier tens et ma mainie,

Qui n’est malade ne fainie,

Ne m’ont laissié deniers ne gage.

Gent truis d’escondire arainie

Et de doneir mal enseignie :

Dou sien gardeir est chacuns sages.

Mors me r’a fait de granz damages ;

Et vos, boens Rois, en .ij. voiages

M’aveiz bone gent esloignié,

Et li lointainz pélerinages

De Tunes qui est leuz sauvages,

Et la male gent renoié.

Granz Rois, c’il avient qu’à vos faille,

A touz ai-ge failli sanz faille :

Vivres me faut et est failliz.

N’uns ne me tent, n’uns ne me baille :

Je touz de froit, de fain baaille,

Dont je sui mors et maubailliz.

Je suis sanz coutes et sanz liz ;

N’a si povre juqu’à Senliz.

Sire, si ne sai quel part aille :

Mes costeiz connoit le pailliz,

Et liz de paille n’est pas liz

Et en mon lit n’a fors la paille.

Sire, je vos fais asavoir

Je n’ai de quoi do pain avoir :

A Paris sui entre touz biens,

Et n’i a nul qui i soit miens.

Pou i voi et si i preig pou ;

Il m’i souvient plus de saint Pou

Qu’il ne fait de nul autre apôtre.

Bien sai Pater, ne sai qu’est notre,

Que li chiers tenz m’a tot ostei,

Qu’il m’a si vuidié mon hostei

Que li Credo m’est dévéeiz,

Et je n’ai plus que vos véeiz.

Explicit.

Le Mariage Rustebeuf, ou CI ENCOMMENCE LI MARIAGES RUTEBUEF.

Mss. 7218, 7633, 7615.

En l’an de l’incarnacion,

Viij. jors après la nascion

Jhésu qui soufri passion,

En l’an soissante,

Qu’arbres n’a foille, oisel ne chante,

Fis-je toute la rien dolante

Qui de cuer m’aime ;

Nis li musars musart me claime.

Or puis filer, qu’il me faut traime ;

Mult ai à faire.

Diex ne fist cuer tant de put’aire,

Tant li aie fet de contraire

Ne de martire,

S’il en mon martire se mire,

Qu’il ne doie de bon cuer dire :

« Je te claim cuite. »

Envoier .i. homme en Égypte,

Ceste dolor est plus petite

Que n’est la moie ;

Et je qu’en puis se je m’esmoie ?

L’en dit que fols qui ne foloie

Pert sa seson :

Sui-je mariez sanz reson ?

Or n’ai ne borde ne meson.

Encor plus fort :

Por plus doner de reconfort

A cels qui me héent de mort,

Tel fame ai prise

Que nus fors moi n’aime ne prise,

Et s’estoit povre et entreprise

Quant je la pris.

A ci mariage de pris,

C’or sui povres et entrepris

Ausi comme ele !

Et si n’est pas gente ne bele.

L. anz a en s’escuele,

S’est maigre et sèche :

N’ai pas paor qu’ele me trèche.

Despuis que fu nez en la grèche

Diex de Marie

Ne fu mès tele espouserie.

Je sui toz plains d’envoiserie,

Bien pert à l’uevre.

Or dira l’en que mal se prueve

Rustebuef qui rudement oevre :

L’en dira voir,

Quant je ne porai robe avoir.

A toz mes amis faz savoir

Qu’il se confortent :

Plus bel qu’il porront se déportent ;

A cels qui tels novèles portent

Ne doignent gaires.

Petit dout mès provos ne maires :

Je cuit que Diex li debonaires

M’aime de loing ;

Bien l’ai prové à cest besoing ;

Là sui où le mail met le coing :

Diex m’i a mis.

Or faz feste à mes anemis,

Duel et corouz à mes amis.

Or du voir dire,

Se Dieu ai fet corouz ne ire,

De moi se puet jouer et rire

Que biau s’en vange.

Or me covient froter au lange ;

Je ne dout privé ne estrange

Que il riens m’emble ;

N’ai pas busche de chesne ensamble :

Quant g’i suis si à fou et tramble

N’est-ce assez ?

Mes pos est briziez et quassez

Et j’ai toz mes bons jors passez.

Je qu’en diroie ?

Nis la destructions de Troie

Ne fu si grant comme est la moie !

Encore i a,

Foi que doi Ave Maria,

S’onques nus hom por mort pria,

Si prît por moi :

Je n’en puis mès se je m’esmoi.

Avant que viegne avril ne may

Vendra quaresme :

De ce puis bien dire mon esme.

De poisson autant com de cresme

Aura ma fame ;

Grant loisir a de sauver s’âme :

Or géunt por la douce Dame,

Qu’ele a loisir,

Et voist de haute eure gésir,

Qu’el n’aura pas tout son désir,

C’est sanz doutance.

Or soit plaine de grant soufrance,

Que c’est la plus grant porvéance

Que je i voie.

Par cel Seignor qui tout avoie,

Quant je la pris petit avoie

Et ele mains :

Je ne sui pas ouvriers des mains ;

L’en ne saura jà où je mains

Por ma poverte :

Jà n’i sera ma porte ouverte,

Quar ma meson est trop déserte

Et povre et gaste,

Sovent n’i a ne pain ne paste.

Ne me blasmez se je me haste

D’aler arrière,

Que jà n’i aurai bele chière :

L’en n’a pas ma venue chière

Se je n’aporte ;

C’est ce qui plus me desconforte,

Que je n’ose huchier à ma porte

......A vuide main.

Savez comment je me demain :

L’espérance de lendemain

Ce sont mes festes.

L’en cuide que je soie prestres,

Quar je faz plus sainier de testes

(Ce n’est pas guile)

Que se je chantaisse Évangile.

L’en se saine parmi la vile

De mes merveilles.

On les doit bien conter aus veilles :

Il n’y a nules lor pareilles,

Ce n’est pas doute.

Il pert bien que je n’i vi goute ;

Diex n’a nul martir en sa route

Qui tant ait fet.

S’il ont esté por Dieu deffet,

Rosti, lapidé ou detret,

Je n’en dout mie

Que lor paine fu tost fenie ;

Mès ce durra toute ma vie

Sanz avoir aise.

Or pri à Dieu que il li plaise

Ceste dolor, ceste mésaise

Et ceste enfance

M’atort à vraie pénitance,

Si qu’avoir puisse s’acointance.

Amen.

Explicit le Mariage Rustebuef

La Complainte Rutebeuf, ou CI ENCOUMENCE LA COMPLAINTE RUTEBUEF DE SON ŒUL, ou CI ENCOUMENCE LE DIT DE L’UEIL RUSTEBUEF.

Mss. 7218, 7633, 7615, 198 N.-D.

Ne covient pas que vous raconte

Comment je me sui mis à honte,

Quar bien avez oï le conte

En quel manière

Je pris ma fame darrenière,

Qui bele ne gente n’en ière.

Lors nasqui paine,

Qui dura plus d’une semaine,

Qu’el commença en lune plaine.

Or entendez,

Vous qui rime me demandez,

Comment je me sui amendez

De fame prendre :

Je n’ai qu’engagier ne que vendre,

Que j’ai tant éu à entendre

Et tant à fère :

Quanques j’ai fet est à refère,

Que qui le vous voudroit retrère

Il durroit trop.

Diex m’a fet compaignon à Job,

Qu’il m’a tolu à .i. seul cop

Quanques j’avoie.

De l’ueil destre, dont miex véoie,

Ne voi-je pas aler la voie

Ne moi conduire.

A ci dolor dolente et dure,

Qu’à miédi m’est nuiz obscure

De celui oeil.

Or n’ai-je pas quanques je vueil ;

Ainz sui dolenz, et si me dueil

Parfondement,

C’or sui en grant afondement,

Se par cels n’ai relevement

Qui jusqu’à ci

M’ont secoru la lor merci.

Le cuer en ai triste et noirci

De cest mehaing,

Quar je n’i voi pas mon gaaing.

Or n’ai-je pas quanques je haing ;

C’est mes domages :

Ne sai ce c’a fait mes outrages.

Or devendrai sobres et sages

Après le fet,

Et me garderai de forfet ;

Mes que ce vaut quant c’est jà fet ?

Tart sui méus ;

A tart me sui aparcéus

Quant je sui jà ès las échéus.

Cest premier an

Me gart cil Diex en mon droit san

Qui por nous ot paine et ahan

Et me gart l’âme :

Or a d’enfant géu ma fame ;

Mon cheval a brisié la jame

A une lice ;

Or veut de l’argent ma norrice,

Qui m’en destraint et me pélice,

Por l’enfant pestre,

Ou il reviendra brère en l’estre.

Cil dame Diex à qui le fist nestre,

Li doinst chevance

Et li envoit sa soustenance,

Et me doinst encore aléjance

Qu’aidier li puisse,

Que la povretez ne me nuise

Et que miex son vivre li truise

Que je ne fais.

Se je m’esmai je n’en puis mais,

C’or n’ai ne dousaine ne fais,

En ma meson,

De busche por ceste seson.

Si esbahiz ne fu mès hom

Com je sui, voir,

C’onques ne fui à mains d’avoir.

Mes ostes veut l’argent avoir

De son osté,

Et j’en ai presque tout osté,

Et si me sont nu li costé

Contre l’yver.

Cist mot me sont dur et diver,

Dont mult me sont changié li ver

Envers antan.

Por poi n’afol quant g’i entan ;

Ne m’estuet pas taner en tan,

Quar le resveil

Me tane assez quant je m’esveil.

Si ne sai se je dorm ou veil,

Ou se je pens,

Quel part je penrai mon despens

Par quoi puisse passer le tens.

Tel siècle ai-gié :

Mi gage sont tuit engagié

Et de chiés moi desmanagié,

Car j’ai géu

Iij. mois, que nului n’ai véu.

Ma fame r’a enfant éu,

C’un mois entier

Me r’a géu sor le chantier.

Je me gisoie endementier

En l’autre lit,

Où je avoie pou de délit ;

Onques mès mains ne m’abelit

Gésir que lors ;

Quar j’en sui de mon avoir fors

Et s’en sui mehaigniez du cors

Jusqu’au fénir.

Li mal ne sevent seul venir :

Tout ce m’estoit à avenir

S’est avenu.

Que sont mi ami devenu

Que j’avoie si près tenu

Et tant amé ?

Je cuit qu’il sont trop cler semé ;

Il ne furent pas bien semé,

Si sont failli.

Itel ami m’ont mal bailli,

C’onques tant com Diex m’assailli

En maint costé

N’en vi .i. seul en mon osté :

Je cuit li vens les a osté.

L’amor est morte :

Ce sont ami que vens enporte,

Et il ventoit devant ma porte ;

S’es enporta,

C’onques nus ne m’en conforta

Ne du sien riens ne m’aporta.

Ice m’aprent

Qui auques a privé le prent ;

Mès cil trop à tart se repent

Qui trop a mis

De son avoir por fère amis,

Qu’il ne’s trueve entiers ne demis

A lui secorre.

Or lerai donc fortune corre :

Si entendrai à moi rescorre,

Se je l’ puis fère.

Vers les preudommes m’estuet trère

Qui sont cortois et débonère

Et m’ont norri :

Mi autre ami sont tuit porri ;

Je les envoi à mestre Orri,

Et se l’i lais ;

On en doit bien fère son lais

Et tel gent lessier en relais

Sanz réclamer,

Qu’il n’a en els rien à amer,

Que l’en doie à amor clamer.

Or pri celui

Qui .iij. parties fist de lui,

Qui refuser ne set nului

Qui le réclaime,

Qui l’aeure et Seignor le claime,

Et qui cels tempte que il aime,

Qu’il m’a tempté,

Que il me doinst bone santé,

Que je face sa volenté

Tout sanz desroi.

Mon seignor, qui est filz de Roi,

Mon dit et ma complainte envoi,

Qu’il m’est mestiers,

Qu'il m’a aidié mult volontiers :

Ce est li bons quens de Poitiers

Et de Toulouse ;

Il saura bien que cil goulouse

Qui si fètement se doulouse.

Explicit la Complainte Rustebuef, ou Explicit le dit de l’ueil Rustebuef.

C’est la Paiz de Rutebues, ou LA PRIÈRE RUTEBUEF.

Mss. 7633, 7615.

Mon boen ami Diex le mainteingne !

Mais raisons me montre et enseingne

Qu’à Dieu fasse une teil prière :

C’il est moiens, que Diex l’i tiengne,

Que puis qu’en seignorie veingne

G’i per honeur et bele chière !

Moiens est de bele menière

Et s’amors est ferme et entière

Et ceit bon grei qui le compeingne ;

Car com plus basse est la lumière,

Miex voit hon avant et arrière,

Et com plus hauce, plus esloigne.

Quant li moiens devient granz sires,

Lors vient flaters et naît mesdires ;

Qui plus en seit, plus a sa grâce.

Lors est perduz joers et rires :

Ces roiaumes devient empires

Et tuit ensuient une trace.

Li povre ami est en espace :

C’il vient à cort, chacuns l’en chace

Par gros moz ou par vitupires.

Li flatères de pute estrace

Fait cui il vuet vuidier la place :

C’il vuet, li mieudres est li pires.

Riches hom qui flateour croit

Fait de légier plus tort que droit,

Et de légier faut à droiture

Quant de légier croit et mescroit.

Fox est qui sor s’amour acroit

Et sages qui entour li dure.

Jamais jor ne metrai ma cure

En fère raison ne mesure

Se n’est por celui qui tot voit ;

Car s’amours est ferme et séure,

Sages est qu’en li s’aséure :

Tuit li autre sunt d’un endroit.

J’avoie un boen ami en France ;

Or l’ai perdu par meschéance.

De totes pars Diex me guerroie,

De totes pars pers-je chevance !

Diex le m’atort à pénitance

Que par tanz cuit que pou i voie ;

De sa véue r’ait-il joie

Ausi grant com je de la moie,

Qui m’a méu teil mésestance ;

Mais bien le sache et si le croie :

J’aurai asseiz où que je soie,

Qui qu’en ait anui et pezance.

Explicit.

De la Griesche d’Yver, ou ci encoumence LI DIZ DE LA GRIESCHE D’YVER.

Mss. 7218, 7633, 7615.

Contre le tens qu’arbre deffueille,

Qu’il ne remaint en branche fueille

Qui n’aut à terre,

Por povreté, qui moi aterre,

Qui de toutes pars me muet guerre,

Contre l’yver,

Dont mult me sont changié li ver,

Mon dit commence trop diver

De povre estoire.

Povre sens et povre mémoire

M’a Diex doné li rois de gloire

Et povre rente.

Et froit au cul quant bise vente.

Li vens me vient, li vens m’esvente,

Et trop sovent

Plusors foies sent le vent.

Bien le m’ot griesche en covent

Quanques me livre ;

Bien me paie, bien me délivre :

Contre le sout me rent la livre

De grant poverte.

Povretez est sor moi reverte :

Toz jors m’en est la porte ouverte,

Toz jors i sui

Ne nule foiz ne m’en essui ;

Par pluie moil, par chaut essui.

Ci a riche homme ;

Je ne dorm que le premier somme.

De mon avoir ne sai la somme

Qu’il n’i a point.

Diex me fet le tens si à point :

Noire mousche en esté me point,

En yver blanche.

Issi sui com l’osière franche

Ou com li oisiaus seur la branche :

En esté chante,

En yver plor et me gaimante,

Et me desfuel ausi com l’ente

Au premier giel.

En moi n’a ne venin ne fiel ;

Il ne me remaint rien souz ciel :

Tout va sa voie.

Li enviail que je savoie

M’ont avoié quanques j’avoie

Et forvoié,

Et fors de voie desvoié.

Fols enviaus ai envoié,

Or m’en souvient ;

Or voi-je bien, tout va, tout vient :

Tout venir, tout aler covient,

Fors que bien fet.

Li dé qui li détier ont fet

M’ont de ma robe tout desfet ;

Li dé m’ocient,

Li dé m’aguetent et espient,

Li dé m’assaillent et deffient,

Ce poise moi ;

Je n’en puis mès, se je m’esmai.

Ne voi venir avril ne may :

Vezci la glace ;

Or sui entrez en male trace.

Li trahitor de pute estrace

M’ont mis sanz robe :

Li siècles est si plains de lobe !

Qui auques a, si fet le gobe ;

Et je que fais,

Qui de povreté sent le fais ?

Griesche ne m’i lest en pais ;

Mult me desroie,

Mult m’assaut et mult me guerroie,

Jamès de cest mal ne garroie

Par tel marchié :

Trop ai en mauvès leu marchié.

Li dé m’ont pris et emparchié ;

Je les claim quite :

Fols est qu’à lor conseil abite ;

De sa dète pas ne s’aquite,

Ainçois s’encombre :

De jor en jor acroist le nombre.

En esté ne quiert-il pas l’ombre

Ne froide chambre,

Que nu li sont sovent li membre.

Du duel son voisin ne li membre,

Mès le sien pleure ;

Griesche li a coru seure,

Desnué l’a en petit d’eure,

Et nus ne l’aime ;

Cil qui devant cousin le claime

Li dist en riant : « Ci faut traime

Par lécherie.

Foi que tu dois sainte Marie,

C’or va ore en la draperie,

Du drap acroire.

Se li drapiers ne t’en veut croire,

Si t’en reva droit à la foire

Et va au change.

Se tu jures saint Michiel l’ange,

Que tu n’as seur toi lin ne lange

Où ait argent,

L’en te verra mult biau sergent.

Bien t’apercevront la gent ;

Créus seras :

Quant d’iluecques remouveras,

Argent ou faille enporteras. »

Or a sa paie ;

Ainsi vers moi chascuns s’apaie :

Je n’en puis mès.

Explicit la Griesche d’yver.

La Griesche d’Esté,

OU CI ENCOUMENCE

DE LA GRIESCHE D’ESTÉ.

Mss. 7218, 7633, 7615.

En recordant ma grant folie,

Qui n’est ne gente ne jolie

Ainz est vilaine

Et vilains cil qui la demaine,

Me plaing .vij. jors en la semaine

Et par reson :

Si esbahiz ne fu mès hom

Qu’en yver toute la seson

Ai si ouvré

Et en ouvrant m’ai aouvré

Qu’en ouvrant n’ai rien recouvré

Dont je me cuevre.

Ci a fol ouvrier et fole oevre ;

Qui par ouvrer riens ne recuevre

Tout torne à perte,

Et la griesche est si aperte,

Qu’eschec dit à la descouverte

A son ouvrier,

Dont puis n’i a nul recouvrier.