Œuvres complètes (page 9)

Des Jacobins,

ou

LE DIST DES JACOPINS,

ou ci encoumence

LI DIS DES JACOBINS.

Mss. 7218, 7633, 7615.

Seignor, mult me merveil que cist siècles devient,

Et de ceste merveille trop souvent me souvient,

Si qu’en moi merveillant, à force me convient

Faire .i. dit merveilleus qui de merveille vient.

Orgueil et Convoitise, Avarisce et Envie

Ont bien leur enviaus seur cels qui sont en vie ;

Bien voient envieus que lor est la renvie,

Car Charité s’en va et Larguesce dévie.

Humilitez n’est mès en cest siècle terrestre,

Puisqu’ele n’est en cels où ele déust estre.

Cil qui onques n’amèrent son estat ne son estre

Bien sai que de légier la metront à sénestre.

Se cil amaissent pais, pacience et acorde

Qui font semblant d’amer foi et miséricorde,

Je ne recordaisse hui ne descort ne descorde,

Mès je vueil recorder ce que chascuns recorde.

Quant Frère Jacobin vindrent premier el monde,

S’estoient par semblant et pur et net et monde.

Grant pièce ont or esté si com l’eve parfonde,

Qui sanz corre tornoie entor à la roonde.

Premier ne demandèrent c’un pou de repostaille,

Atout .i. pou d’estrain ou de chaume ou de paille.

Le non Dieu sermonoient à la povre piétaille ;

Mès or n’ont mès que fère d’omme qui à pié aille.

Tant ont éu deniers et de clers et de lais,

Et d’exécucions, d’aumosnes et de lais,

Que des basses mesons ont fet si granz palais

C’uns hom lance sor fautre i feroit .i. eslais.

Ne vont pas après Dieu tel gent le droit sentier,

Ainz Diex ne vout avoir tonel sor son chantier,

Ne denier l’un sor l’autre, ne blé, ne pain entier ;

Et cil sont changéor qui vindrent avant ier.

Je ne di pas ce soient li Frère Preschéor,

Ainçois sont une gent qui sont bon peschéor,

Qui prenent tel poisson dont il sont mengéor :

L’en dit léchièrres lèche, mès il sont mordeor.

Por l’amor Jhésu-Christ lessièrent la chemise

Et pristrent povreté, car l’ordre estoit promise ;

Mès il ont povreté glosée en autre guise :

Humilité sermonent qu’il ont en terre mise.

Je croi bien des preudommes i ait à grant plenté,

Mès cil ne sont oï fors tant qu’il ont chanté ;

Car tant i a orgueil des orguillex enté

Que li preudomme en sont sorpris et enchanté.

Honiz soit qui croira jamès por nule chose

Que desouz simple abit n’ait mauvestié enclose ;

Quar tels vest rude robe où félons cuers repose :

Li rosiers est poingnanz et s’est souef la rose.

Il n’a en tout cest mont ne bougre, ne hérite.

Ne fort popelican, vaudois ne sodomite,

Se il vestoit l’abit où papelars s’abite,

C’on ne le tenist jà à saint ou à hermite.

Hé, Diex ! com vendront or tart à la repentance,

S’entre cuer et habit a point de dessevrance !

Fère leur convendra trop dure pénitance :

Trop par aime le siècle qui par ce s’i avance.

Divinitez qui est science espéritable,

Ont-il torné le dos et s’en font connestable ;

Chascuns cuide estre apostre quant il sont à la table ;

Mès Diex pot ses apostres de vie plus metable.

Cil Diex qui par sa mort volt la mort d’enfer mordre

Me vueille, s’il li plest, à son amors amordre ;

Bien sai qu’est grant corone, mès je ne sai qu’est ordre,

Car il font trop de choses qui mult font à remordre.

Explicit des Jacobins.

Li Diz des Cordeliers.

Ms. 7615.

Seigneur, or escoutez ; que Diex vos soit amis !

S’orroiz des Cordeliers commant chascuns a mis

Son cors à grant martire contre les anemis,

Qui sont plus de .c. foiz le jor à nos tramis.

Or escotez avant dont ces gens sont venu :

Fil à roi et à conte sont menor devenu,

C’au siègle estoient gros, or sont isi venu

Qu’il sont saint de la corde et sont tuit lor pié nu.

Il pert bien que leur ordre nostre Sires ama,

Quant saint François transsi Jéshu-Crist réclama,

En .v. leuz, ce m’est vis, le sien cors entama :

A ce doit-on savoir que Jhésu-Criz s’âme a.

Au jor dou jugement devant la grant assise,

Que Jhésu-Criz penra de péchéors justice,

Saint François aura ceuz qui seront à sa guise :

Por ce sont Cordelier la gent que je miex prise.

En la corde s’encordent cordée à .iij. cordons,

A la corde s’acordent dont nos descorderons.

La descordance acordent des maux que recordons,

En lor lit se descordent por ce que nos tortons.

Chacuns de nos se tort de bien fère sanz faille,

Chacuns d’aux s’an détort et est en grant bataille ;

Nos nos faisons grant tort ..........

Quant chacuns de nos dort chacuns d’aus se travaille.

La corde sénefie, là où li neu sont fet,

Que le mauffé desfient et lui et tot son fet.

Cil qui en aux se fie, si mal et si mesfet

Seront, n’en doutez mie, dépecié et desfet.

Menor sont apellé li Frère de la corde ;

Menor vient au premier, chacuns d’aux s’i acorde,

Que l’âme viaut sauver ainz que la mors l’amorde,

Et l’âme de chacun qu’à lor acort s’acorde.

Se sinifie plaint, par Eve se doit-on plaindre.

Par Eve fu âme en plaint, Eve fit âme plaindre.

Quant vint filz dame à point, ne soffri point le poindre,

M. a âme desjoint dont ève la fit joindre.

Eve en esté va, et en yver par glace,

Nus piez por sa viande qu’elle quiert et porchace.

Isi font li Menor, Diex gart que vent ne glace,

Qui ne chiée empéchié qui ne faille à sa grâce.

Cest roons en O a emmi une espasse,

Et roons est li cors ; dedenz a une place ;

Trésor y a : c’est l’âme, que li maufez menace.

O gart le cors et l’âme, maufez mal ne li face !

Devant l’espicerie vendent de lor espices,

Ce sont saintes paroles en coi il n’a nul vices :

Tote lor a fet tort, et teles au pélices

Les ont ci pesciez qu’entrer n’osent ès lices.

La béasse qui cloche la cloiche dou clochier

Fist devant li venir, qui la véist clochier.

Ainz qu’elle venist là la covint mout lochier,

La porte en fist porter celle qui n’ot Dieu chier.

La béasse qu’est torte lor a fet mult grant tort :

Encore est correciée se fromages estort.

A l’apostole alèrent li droit contre le tort,

Li droiz n’ot point de droit ne la torte n’ot tort.

L’apostolles lor vost sor ce doner sentence,

Car il set bien que fame de po volontiers tance ;

Ainz manda s’il pooit estre sans mésestance,

L’évesque lor féist là avoir demorance.

L’évesques ot consoil par .iij. jors ou par .iiij. ;

Mais fames sont noiseuses ; ne pot lor noise abatre

Et vit que chacun jor les convenoit combatre :

Si juga qu’il alassent en autre leu esbatre.

Dortor et refretor avoient, belle yglise,

Vergiés, praiaux et troilles, trop biau leu à devise.

Or dit la laie gent que c’est par convoitise

Qu’il ont se leu lessié et autre place prise.

Se cil leuz fust plus biaus de celi qu’il avoient,

Si le poïst-on dire, mais la fole gent voient

Que lor leus laissent cil qui desvoiez avoient

Por oster le péchié qui en tel leus avoient.

En ce leu faisoit-on péchié et grant ordure ;

A l’osteil ont éu mainte parole dure,

Mais Jhésu-Criz li rois qui toz jors régne et dure

Si conduise celui qui les i fit conduire.

La coe dou cheval desfant la beste tote,

Et c’est li plus vilz membres et la mouche la doute

Nos avons euz ès testes, et si ne véons gote.

...................

Se partout avoit ève, tiex buvroit qu’a soi,

Vos véez, li navrez viaut le mire lez soi,

Et nous qui sons navré chacun jor endroit soi,

N’avons cure dou mire, ainz nous morons de soi.

Là déust estre mire là où sont li plaié,

Car par les mires sont li navré apaié.

Menor sont mire et nous sons par eus apaié,

Por ce sont li Menor en la vile avoié.

Ou miex de la cité doivent tel gent venir,

Car ce qui est oscur, font-il cler devenir,

Et si font les navrez en senté revenir ;

Or la veut la béesse de la vile banir.

Et messires Ytiers, qui refu nez de Rains,

Ainz dit que mangeroit ainçois fuielles et rains,

Que fussent en s’esglises confessor par meriens,

Et que d’aler à Paie auroit lassé les rains.

Bien le déust sofrir ; mès Ytiers li prestres,

Paranz a et parentez mariez à grant festes ;

Des biens de sainte Yglise lor a achetez bestes :

Li biens espéritiex est devenuz terrestres.

Explicit des Cordeliers.

Des Béguines,

ou ci encoumence

LI DIZ DES BÉGUINES.

Mss. 7633, 7615.

En riens que Béguine die

N’entendeiz tuit se bien non ;

Tot est de religion

Quanque hon trueve en sa vie :

Sa parole est prophécie ;

S’ele rit, c’est compaignie ;

S’el’ pleure, dévocion ;

S’ele dort, ele est ravie ;

S’el’ songe, c’est vision ;

S’ele ment, non créeiz mie.

Se Béguine se marie,

S’est sa conversacions :

Ces veulz, sa prophécions

N’est pas à toute sa vie.

Cest an pleure et cest an prie,

Et cest an panrra baron.

Or est Marthe, or est Marie ;

Or se garde, or se marie,

Mais n’en dites se bien non :

Li Rois no sofferroit mie.

Explicit des Béguines.

Des Règles,

ou

C’EST LI DIZ DES RÈGLES.

Mss. 7218, 7633.

Puisqu’il covient vérité tère,

De parler n’ai-je mès que fère :

Vérité ai dite en mains leus

(Or est li dires périlleux)

A cels qui n’aiment vérité,

Qui ont mis en auctorité

Tels choses que metre n’i doivent.

Aussi nous peinent et deçoivent

Com li gorpis fet les oisiaus.

Savez que fet li damoisiaus :

En terre rouge se toueille,

Le mort fet et la sorde oreille ;

Si vienent li oisel des nues,

Et il aime mult lor venues,

Quar il les ocist et afole.

Ausi vous di à brief parole

Cil nous ont mort et afolé

Qui paradis ont acolé.

A cels le donent et délivrent

Qui les aboivrent et enyvrent

Et qui lor engressent les pances

D’autrui chatels, d’autrui substances,

Qui sont, espoir, bougre parfet,

Et par paroles et par fet,

Ou userier mal et divers,

Dont el sautier nous dit li vers

Qu’il sont jà dampné et perdu.

Or ai le sens trop esperdu.

S’autres paradis porroit estre

Que cil qui est le roi célestre ;

Quar à celui ont-il failli

Dont en la fin sont mal bailli.

Qui porroit paradis avoir

Après la mort por son avoir,

Bon feroit embler et tolir ;

Mès il les covendra boillir

Ou puis d’enfer sanz jà réembre :

Tel mort doit l’en douter et criembre.

Bien sont or mort et avuglé,

Bien sont or fol et desjuglé,

S’ainsi se cuident délivrer.

Au mains sera Diex au livrer

De paradis, qui que le vende.

Je ne cuit que saint Pières rende

Ouan les clez de paradis ;

Et il i metent .x. et .x.

Cels qui vivent d’autrui chaté

Ne l’ont or bien cist achaté.

S’on a paradis por si pou,

Je tieng por bareté saint Pou,

Et si tieng por fol et por nice

Saint Luc, saint Jaque de Galice,

Qui s’en firent martirier,

Et saint Pierre crucefier !

Bien pert qu’il ne furent pas sage,

Se paradis est d’avantage ;

Et cil si rementi forment

Qui dist que paine ne torment

Ne sont pas digne de la grâce

Que Dieu par sa pitié nous face.

Or avez la première riègle

De cels qui ont guerpi le siècle.

La seconde vous dirai-gié :

Nostre prélat sont enragié,

Si sont décrestistre et devin.

Je di, por voir, non pas devin

Qui por paor à mal se ploie,

Et à malfetor se souploie,

Et por amor vérité lesse :

Qui à ces .ij. choses se plesse,

Si maint bone vie en cest monde,

Qu’il a failli à la seconde.

Je vis jadis, si com moi samble,

Xxiiij. prélas ensamble,

Qui par acort bon et léal,

Et par conseil fin et féal,

Firent de l’Université,

Qui est en grant aversité,

Et des Jacobins bone acorde.

Jacobins rompirent la corde :

Ne fu lors bien nostre créance,

Et nostre loi en grant balance,

Quant les prélaz de sainte Yglise

Desmentirent toz en tel guise.

N’orent-ils lors assez vescu,

Quant l’en lor fist des boches cu,

C’onques puis n’en firent clamor ?

Le preudomme de Saint-Amor,

Porce qu’il sermonoit le voir

Et le disoit par estovoir,

Firent tantost semondre à Romme

Quant la cort le trova preudomme,

Sanz mauvaistié, sanz vilain cas.

Sainte Yglise, qui tel cler as,

Quant tu le lessas escillier

Te péus-tu miex avillier ?

Et fu baniz sanz jugement :

Ou cil qui à droit juge ment,

Ou encor en prendra venjance ;

Et si cuit bien que jà commance.

La fin du siècle est mès prochiene :

Encor est ceste gent si chiene !

Quant .i. riche homme vont entor,

Seignor de chastel ou de tor,

Ou userier ou clerc trop riche,

Qu’il aiment miex grant pain que miche,

Si sont tuit seignor de léenz :

Jà n’enterront clerc ne lai enz

Qu’il ne’s truisent en la meson ;

A ci granz seignors sanz reson.

Quant maladie ces genz prent

Et conscience les reprent,

Et anemis les haste fort

Qui jà les voudroit trover mort,

Lors si metent lor testament

Sor cele gent, que Diex ament.

Puisqu’il sont saisi et vestu,

La montance d’un seul festu

N’en donront jà puis por lor âme :

Ainsi requet qui ainsi same.

Sanz avoir cureur ont l’avoir,

Et li curez n’en puet avoir

S’à paine non du pain por vivre,

Ne achater .i. petit livre

Où il puisse dire complies ;

Et cil en ont pances emplies,

Et bibles et sautiers glosez,

Que l’en voit cras et reposez.

Nus ne puet savoir lor couvaine ;

Je n’en sai c’une seule vaine :

Il vuelent fère lor voloir,

Cui qu’en doie le cuer doloir ;

Il ne lor chaut, mès qu’il lor plèse,

Qui qu’en ait paine ne mesèse.

Quant chiés povre provoire vienent,

Où pou sovent la voie tienent

S’il n’i a rivière ou vingnoble,

Lors sont si cointe et sont si noble

Qu’il samble que ce soient roi.

Or covient por elz grant aroi

Dont li povres boni est en trape ;

S’il devoit engagier sa chape,

Si covient-il autre viande

Que l’Escripture ne commande.

S’il ne sont péu sanz défaut,

Se li prestres de ce défaut,

Il ert tenuz à mauvès homme,

S’il valoit saint Piere de Romme ;

Puis lor covient laver les james.

Or i a unes simples fames

Qui ont envelopé les cols,

Et sont barbées comme cols,

Qu’à ces saintes genz vont entor,

Qu’eles cuident au premier tor

Tolir saint Pière sa baillie ;

Et riche fame est mal baillie

Qui n’est de tel corroie çainte :

Qui plus bèle est, si est plus sainte.

Je ne di pas que plus en facent,

Mès il samble que pas n’es hacent ;

Et saint Bernars dist, ce me samble :

« Converser homme et fame ensamble

Sanz plus ouvrer selonc nature,

C’est vertu si nète et si pure

(Ce tesmoingne bien li escriz)

Com de ladre fist Jhésus-Chriz ! »

Or ne sai-je ci sus qu’entendre.

Je voi si l’un vers l’autre tendre

Qu’en .i. chaperon a .ij. testes,

Et il ne sont angles ne bestes.

Amis se font de sainte Yglise,

Por ce que en plus bèle guise

Puissent sainte Yglise sozmetre,

Et por ce nous dit ci la lettre :

« Nule dolor n’est plus fervant

Qu’ele est de l’anemi servant. »

Ne sai que plus briefment vous die :

Trop sons en péreilleuse vie.

Expliciunt les Règles .

Renart le Bestourné,

ou ci encoumence

LI DIZ DE RENART LE BESTORNEI. ,

Mss. 7218, 7633, 7615.

Renars est mors, Renars est vis,

Renars est ors, Renars est vils,

Et Renars règne ;

Renars a mult régné el règne ;

Bien i chevauche à lasche regne,

Col estendu.

L’en le devoit avoir pendu

Si com je l’avoie entendu,

Mès non a voir :

Par tens le porrez bien savoir.

Il est sires de tout l’avoir

Monseignor Noble,

Et de la Brie et du vingnoble.

Renars fist en Constantinoble

Bien ses aviaus,

Et en cases et en caviaus.

N’i laissa vaillant .ij. naviaus

L’emperéor,

Ainz en fist povre péchéor ;

Par pou ne le fist peschéor

Dedenz la mer.

Ne doit l’en bien Renars amer

Qu’en Renars n’a fors que l’amer,

C’est sa droiture.

Renars a mult grant norreture ;

Mult en avons de sa nature

En ceste terre.

Renars porra movoir tel guerre

Dont mult bien se porroit soufferre

La régions.

Mesires Nobles li lyons

Cuide que sa sauvacions

De Renart viegne.

Non fet voir ; de Dieu li soviegne !

Ainçois dout qu’il ne l’en aviegne

Domage et honte.

Se Nobles savoit que ce monte

Et les paroles que l’en conte

Parmi la vile,

Dame Raimborc, dame Poufile

Qui de lui tienent lor concile,

Çà .x. çà vint,

Et dient c’onques mès n’avint

N’onques à franc cuer ne sovint

De tel geu faire,

Bien li déust membrer de Daire