Œuvres complètes (page 12)

S’on a Dieu si légièrement

Por large cote et por pélice.

Vous devins et vous discretistre,

Je vous jete fors de mon titre ;

De mon titre devez fors estre,

Quant le cinquième esvengelitre

Vost’ droit frère, mestre et menistre ;

De parler dou roi célestre,

Encor vous feroit en champ estre,

Com autre brebiz chanpestre,

Cil qui font la novelle espitre.

Vous estes mitrés non pas mestre ;

Vous copez Dieu l’oroille destre :

Diex vous giete de son regitre.

De son registre il n’en puet mais :

Bien puet passer et avril et mays

Et sainte Église puet bien brère,

Car véritez a fet son lais.

Ne l’ose dire clers ne lais :

Si s’en refuit en son repère

Qui la vérité veut retrère.

Vous dotez de vostre doère,

Si ne puet issir dou palais,

Car les denz muevent le trère

Et li cuers ne s’ose avant trère :

Se Diex vous het, il n’en puet mais.

Ahi ! prélat et nervoié,

Com a l’en or bien emploié

Le patremoine à Crucefi !

Par les goles vous ont loié

Cil qui sovant ont rimoié

Dieu lessié por son atefi !

Dou remanant vous di-je : Fi !

N’en aurez plus, je vous afi ;

Encor vous a Diex trop paié.

De par ma langue vous desfi :

Vous en yrez de fi en fi

Juqu’en enfer le roié.

Il est bien raison et droiture

Vous laissiez la sainte Écriture,

Dont sainte Église est desconfite :

Vous tesiez la sainte Escriture,

Selonc Dieu menez vie obcure,

Et c’est vostre vie petite :

Qui vous flate entor vous abite.

La profécie est bien escrite :

Qui Dieu aime, droit prent en cure ;

La char est en enfer asflite,

Qui por paor aura despite

Droiture et raison et mesure.

L’eve qui sanz corre tornoie

Assez plus tost .i. home noie

Que celle qui adès decort.

Por ce vous di, se Diex me voie,

Tiex fet semblent qu’à Dieu s’aploie

Que c’est l’eve qui pas ne cort.

Hélas ! tant en corent à cort

Qu’à povre gent font si le sort

Et aus riches font feste et joie,

Et prometent à .i. mot cort

Saint paradis ; à coi que tort,

Jà ne diront se Diex l’otroie.

Je ne blâme pas gent menue ;

Si sont ausi com ...

L’en lor fet cançon ...

L’en lor fet croire de veve voix

Une si grant descovenue

Que brebiz blanche est tote noire.

Si l’on laus ceste gloire loire,

Il n’en font une grant estoire

Nès dou chanche de la charrue,

Por coi il n’ont autre mimoire.

Dites-lor : « C’es de saint Grigoire : »

Quelque chose soit, est créue.

Se li Rois féist or enqueste

Sor ceus qui ce fut si honeste

Si com il fet sor ces bailliz,

C’ausin ne trueve cler ne prestre

Qui est enquerre de lor geste

Dont li ciègles est mal bailliz.

Sanz naturel lor est faillis

Quant cil qui jurent ès palliz

Ne font orendroit grant moleste

S’il n’ont bon vins et les blanz liz.

Se Diex les a por ce esliz,

Por pou perdi saint Poz la teste.

Explicit de sainte Église.

CI COUMENCE

Li Diz de l’Erberie,

ou ci coumance

L’ERBERIE RUSTEBUEF.

Mss. 7633, 198 N.-D.

Seigneur qui ci estes venu,

Petit et grant, jone et chenu,

Il vos est trop bien avenu,

Sachiez de voir ;

Je ne vos vuel pas desovoir :

Bien le porreiz aparsouvoir,

Ainz que m’en voize.

Aséeiz-vos, ne faites noise :

Si escoutez, c’il ne vos poize.

Je sui uns mires ;

Si ai estei en mainz empires :

Dou Caire m’a tenu li sires

Plus d’un estei ;

Lonc tanz ai avec li estei ;

Grant avoir i ai conquestei.

Meir ai passée,

Si m’en reving par la Morée,

Où j’ai fait mout grant demorée,

Et par Salerne,

Par Burienne et par Byterne.

En Puille, en Calabre, Palerne

Ai herbes prises

Qui de granz vertuz sunt emprises :

Sus quelque mal qu’el soient mises,

Li maux c’enfuit.

Juqu’à la rivière qui bruit

Dou flun des pierres jor et nuit

Fui pierres querre.

Prestres Jehans i a fait guerre :

Je n’osai entrer en la terre,

Je fui au port.

Mout riches pierres en aport

Qui font resusciter le mort.

Ce sunt ferrites

Et dyamans et cresperites,

Rubiz, jagonces, marguarites,

Grenaz, stopaces,

Et tellagons, et galofaces :

De mort ne doutera menaces

Cil qui les porte. Foux est ce il ce desconforte ;

N’a garde que lièvres l’en porte

C’il se tient bien ;

Si n’a garde d’aba de chien,

Ne de reching d’azne anciien ;

C’il n’est coars

Il n’a garde de toutes pars.

Carbonculus et garcelars,

Qui sunt tuit ynde,

Herbes aport des dézers d’Ynde

Et de la terre Lincorinde

Qui siet seur l’onde

Elz quatre parties dou monde,

Si com il tient à la roonde.

Or m’en creeiz :

Vos ne saveiz cui vos véeiz ;

Taisiez-vos, et si vos séeiz.

Véiz m’erberie :

Je vos di, par sainte Marie,

Que ce n’est mie freperie,

Mais granz noblesce ;

J’ai l’erbe qui les v… redresce

Et cele qui les c… estresce

A pou de painne ;

De toute fièvre sanz quartainne

Gariz en mainz d’une semainne,

Ce n’est pas faute ;

Et si gariz de goute flautre :

Jà faut n’en iert basse ne haute,

Toute l’abat.

Ce la vainne dou cul vos bat,

Je vos en garrai sanz débat,

Et de la dent

Gariz-je trop apertement

Par .i. petitet d’oignement.

Que vos dirai ?

Oiez coument jou confirai :

Dou confire ne mentirai,

C’est cens riote. Preneiz dou sayn de la marmote,

De la merde de la linote

Au mardi main

Et de la fuelle dou plantain,

Et de l’estront de la putain

Qui soit bien ville,

Et de la pourre de l’estrille,

Et du ruyl de la faucille,

Et de la lainne,

Et de l’escorce de l’avainne

Pilei premier jor de semainne ;

Si en fereiz

Un amplastre : dou juz laveiz

La dent, l’amplastrei metereiz

Desus la joe.

Dormeiz .i. pou, je le vos loe ;

S’au leveir n’i a merde ou boe,

Diex vos destruie !

Escouteiz, c’il ne vos anuie,

Ce n’est pas jornée de truie

Cui poéiz faire ;

Et vos cui la pierre fait braire,

Je vos en garrai sanz contraire

Ce g’i met cure.

De foie eschausfei, de routure,

Gariz-je tout à desmesure,

A quel que tort ;

Et ce voz saveiz home sourt,

Faites-le venir à ma cort :

Jà iert touz sainz.

Onques mais nul jor n’oy mains,

Ce Diex me gari ces .ij. mains,

Qu’il orra jà.

Or oeiz ce que m’en charja

Ma dame, qui m’envoia sà.

Bele gent, je ne suis pas de ces povres prescheurs, ne de ces povres herbiers qui vont par devant ces mostiers, à ces povres chapes mau cozues, qui portent boîtes et sachez, et si estendent .i. tapiz ; car teiz vent poivre et coumin et autres espices, qui n’a pas autant de sachez com il ont. Sachiez que de ceulz ne sui-je pas ; ainz suis à une dame qui a non madame Trote de Salerne, qui fait cuevre-chief de ces oreilles, et li sorciz li pendent à chaainnes d’argent par-desus les espaules ; et sachiez que c’est la plus sage dame qui soit enz quatre parties dou monde. Ma dame si nos envoie en diverses terres et en divers païs, en Puille, en Calabre, en Tosquanne, en Terre de Labour, en Alemaingne, en Soissoinne, en Gascoingne, en Espaigne, en Brie, en Champaingne, en Borgoigne, en la forest d’Ardanne, por occir les bestes sauvages et por traite les oignemens, por doneir médecines à ceux qui ont les maladies ès cors. Ma dame si me dist et me commande que, en queilque leu que je venisse, que je déisse aucune choze si que cil qui fussent entour moi i prissent boen essample, et por ce qu’ele me fist jureir seur sainz quant je me départi de li, je vos apanrai à garir dou mal des vers se volez oïr. — Voleiz oïr ?

Aucune genz i a qui me demandent dont les vers viennent. Je vos fais asavoir qu’il viennent de diverses viandes reschauffées, et de ces vins enfuteiz et boteiz. Si se congrient ès cors par chaleur et par humeurs ; car, si com dient li philosophe, toutes chozes en sont criées, et por ce, si viennent li ver ès cors qui montent jusqu’au cuer, et font morir d’une maladie c’on apele morts obitainne. Seigniez-vos ! Diex vos en gart touz et toutes !

Por la maladie des vers garir (à vos iex la véeiz, à vos piez la marchiez !) la meilleur herbe qui soit elz quatre parties dou monde, ce est l’ermoize. Ces fames c’en ceignent le soir de la Saint-Jehan, et en font chapiaux seur lor chiez, et dient que goute ne avertinz ne les puet panre n’en chiez, n’en braz, n’en pié, n’en main ; mais je me merveil quant les testes ne lor brisent et que li cors ne rompent parmi, tant a l’erbe de vertu en soi. En cele Champaigne où je fui néiz l’appele-hon marreborc, qui vaut autant comme la meire des herbes. De cele herbe panrroiz troiz racines, .v. fuelles de sauge ; .x. fuelles de plantaing. Bateiz ces chozes en .i. mortier de cuyvre, à un peteil de fer, desgeuneiz-vos dou jus par .iij. matins : gariz sereiz de la maladie des vers.

Osteiz vos chaperons, tendeiz les oreilles, regardeiz mes herbes que ma dame envoie en cest païs et en cest terre ; et por ce qu’el vuet que li povres i puist ausi bien avenir coume li riches, ele me dist que j’en féisse danrrée ; car télé a .i. denier en sa borce qui n’i a pas .v. livres ; et me dist et me commanda que je prisse .i. denier de la monoie qui corroit el païs et en la contrée où je vanrroie : à Paris .i. parisi, à Orliens .i. orlenois à Aumans .i. mansois, à Chartres .i. chartain, à Londres en Aingleterre .i. esterlin ; por dou pain, por dou vin à moi ; por dou fain, por de l’avainne à mon roncin ; car teil qui auteil sert d’auteil doit vivre.

Et je di que c’il estoit si povres, ou honz ou fame, qu’il n’éust que doner, venist avant : je li presteroie l’une de mes mains por Dieu et l’autre por sa meire, ne mais que d’ui en .i. an féist chanteir une messe do Saint-Espérit, je di nouméement por l’arme de ma dame, qui cest mestier m’aprist je ne fasse jà trois pez que li quars ne soit por que l’arme de son père et de sa mère en rémission de leur péchiez. Ces herbes, vos ne les mangereiz pas ; car il n’a si fort buef en cest pays, ne si fort destrier que cil en avoit ausi groz com .i. pois sor la langue qu’il ne morust de mal mort, tant sont forts et ameires ; et ce qui est ameir à la bouche, si est boen au cuer. Vos les metreiz .iij. jors dormir en boen vin blanc ; se vos n’aveiz blanc, si preneiz vermeil ; si vos n’aveiz vermeil, preneiz de la bele yaue clère ; car teiz a un puis devant son huix, qui n’a pas .i. tonel de vin en son célier. Si vos en desgeimerciz par .xiij. matins. Ce vos failleiz à un, preneiz autre ; car ce ne sont pas charaies ; et je vos di par la paission dont Diex maudist Corbitaz le juif qui forja les .xxx. pièces d’argent en la tour d’Abilent, à .iij. lieues de Jhérusalem dont Diex fu venduz, que vos sereiz gariz de diverses maladies et de divers mahainz, de toutes fièvres sanz quartainne, de toutes goutes sanz palazine, de l’enflure dou cors, de la vainne dou cul c’ele vos débat ; car ce mes pères et ma mère estoient ou péril de la mort et il me demandoient la meilleure herbe que je lor péusse doneir, je lor donroie ceste.

En teil menière venz-je mes herbes et mes oignemens : qui vodra si en preingne, qui ne vodra si les laist.

Explicit l’Erberie Rustebuef.

De Frère Denise,

ou ci encoumence

LI DIZ DE FREIRE DENIZE LE CORDELIER.

Mss. 7218, 7633.

Li abis ne fet pas l’ermite ;

S’uns hom en hermitage abite

Et il en a les dras vestus,

Je ne pris mie .ij. festus

Son abit ne sa véstéure,

S’il ne maine vie ausi pure

Comme son abit nous démonstre ;

Mès maintes genz font bele monstre

Et merveilleux sanblant qu’il vaillent :

Il sanblent les arbres qui faillent

Qui furent trop bel au florir.

Bien devroient tels genz morir

A grant dolor et à grant honte.

I. proverbe dist et raconte

Que tout n’est pas or c’om voist luire :

Por ce m’estuet ains que je muire

Fere .i. ditié d’une aventure

De la plus bele créature

Que l’en puisse trover ne querre

De Paris jusqu’en Engleterre ;

Vous dirai comment il avint.

Granz gentiz homes plus de .x.

L’avoient à fame requise ;

Mès ne voloit en nule guise

Avoir ordre de mariage,

Ainz a fet de son pucelage

Veu à Dieu et à Nostre-Dame.

La pucele fu gentil fame ;

Chevaliers ot esté son père :

Mère avoit, mès n’ot suer ne frère.

Mult s’entr’amèrent, ce me sanble,

La pucele et la mère ensanble.

Frères Meneurs laianz hantoient

Tuit cil qui par iluec passoient.

Or avint c’uns en i hanta

Qui la damoisele enchanta :

Si vous dirai en quel manière.

La pucele li fist proière

Que il sa mère requéist

Qu’en relégion la méist,

Et il li dist : « Ma douce amie,

Se mener voliiez la vie

Saint François, comme nous feson,

Vous ne porriiez par reson

Faillir que vous ne fussiez sainte. »

Et cele, qui fu jà atainte,

Et conquise, et mate, et vaincue,

Si tost comme ele ot entendue

La reson du Frère Meneur,

Si dist : « Se Diex me doinst honeur !

Si grant joie avoir ne porroie

De nule riens comme j’auroie

Si de vostre ordre pooie estre.

De bone eure me fist Diex nestre

Se g’i pooie estre rendue ! »

Quant li Frères ot entendue

La parole à la damoisele,

Se li a dit : « Gentil pucele,

Se me doinst Diex s’amor avoir,

Se de voir pooie savoir

Qu’en nostre ordre entrer vousissiez,

Et que sanz fausser péussiez

Garder vostre virginité,

Sachiez en fine vérité

Qu’en nostre ordre bien vous metroie. »

Et la pucèle li otroie

Qu’el gardera son pucelage

Trestoz les jors de son éage.

Atant li Frères la reçut ;

Par sa guile cele deçut

Qui à barat n’i entendi :

Desus s’âme li desfendi

Que riens son conseil ne déist,

Mès si céelement féist

Coper ses beles treces blondes

Que jà ne le séust li mondes,

Et féist rère estancéure,

Et préist tele vestéure

Comme à tel homme covendroit,

Et qu’en tel guise venist droit

En .i. leu dont il ert custodes.

Cil, qui estoit plus faus qu’Hérodes,

S’en part atant et li met terme ;

Et cele a ploré mainte lerme

Quant de li départir le voit.

Cil qui la glose li devoit

Fère entendre de la leçon

L’a mise en male soupeçon.

Male mort le praingne et ocie !

Cele tient toute à prophésie

Quanques cil li a sermoné.

Cele a son cuer à Dieu doné ;

Cil refet du sien autel don

Qui bien l’en rendra guerredon :

Mult par est contrère sa pensse

Au bon pensser où ele pensse ;

Mult est lor penssée contrère,

Car cele pensse à li retrère

Et oster de l’orgueil du monde,

Et cil, en qui pechié soronde,

Qui toz art du feu de luxure,

A mis sa penssée et sa cure

A la pucele acompaignier

Au baing où il se veut baignier,

Où il s’ardra, se Diex n’en pensse,

Que jà ne li fera deffense,

Ne ne li saura contredire

Chose que il li veuille dire.

A ce vait li Frères penssant,

Et ses compains en trespassant,

Qui s’esbahist qu’il ne parole,

Li a dite ceste parole :

« Où pensez-vous, frère Symon ? »

— « Je pens, fet-il, à .i. sermon,

Au meilleur que je pensaisse oncques. »

Et cil respont : « Or penssez donques ! »

Frère Symons ne puet desfensse

Metre en son cuer que il ne pensse

A la pucele qui demeure ;

Et cele désirre mult l’eure

Qu’ele soit çainte de la corde :

Sa leçon en son cuer recorde

Que li Frères li a donée.

Dedenz .iij. jors s’en est emblée

De la mère qui la porta,

Qui forment s’en desconforta.

Mult fu à malaise la mère,

Qu’el’ ne savoit où sa fille ère ;

Grant dolor en son cuer demaine

Trestoz les jors de la semaine,

En plorant regrete sa fille ;

Mès cele ne done une bille,

Ainz pensse de li esloingnier.

Ses biaus crins ot fet rooingnier :

Comme vallet fu estancie

Et fu de bons housiaus chaucie,

Et de robe à homme vestue

Qui estoit par devant fendue :

Bien sambloit jone homme de chière ;

Et vint en itèle manière

Là où cil li ot terme mis.

Li Frères, que li anemis

Contraint et semont et argue,

Ot grant joie de sa venue.

En l’ordre la fist recevoir :

Bien sot ses frères decevoir.

La robe de l’ordre li done

Et li fist fère grant corone ;

Puis la fist au moustier venir.

Bel et bien se sot contenir

Et en cloistre et dedenz moustier,

Et ele sot tout son sautier,

Et fu bien de chanter aprise :

O les autres chante en l’église

Mult bel et mult cortoisement ;

Mult se contient honestement.

Or ot damoisele Denise

Quanqu’ele vout à sa devise.

Oncques son non ne li muèrent ;

Frère Denise l’apelèrent,

Frère Denise mult amèrent

Tuit li Frère qui léenz èrent ;

Mult plus l’amoit frères Symons.

Sovent se metoit ès limons,

Com cil qui n’en ert pas retrais,

Et il s’i amoit miex qu’ens trais :

Mult ot en lui bon limonier.

Vie menoit de pautonier,

Et ot lessié vie d’apostre.

A cele aprist sa patrenostre,

Qui volontiers la retenoit.

Parmi le païs la menoit ;

N’avoit d’autre compaignon cure :

Tant qu’il avint par aventure

Qu’il vindrent chiés .i. chevalier

Qui ot bons vins en son celier,

Qui volentiers lor en dona ;

Et la dame s’abandona

A regarder frère Denise :

Sa chière et son samblant avise ;

Aparcéue s’est la dame

Que frère Denise estoit fame.

Savoir veut se c’est voirs ou fable :

Quant l’en ot fet oster la table

La dame, qui bien fu aprise,

Prist par la main Frère Denise.

A son seignor prist à sorrire ;

En souriant li dist : « Biaus sire,

Alés-vous là defors esbatre,

Et fesons .ij. pars de nous .iiij. :

Frère Symon o vous menez,

Frère Denise est assenez

De ma confession oïr. »

Lor n’ont talent d’els esjoïr :

Li Cordelier dedens Pontoise

Vousissent estre ; mult lor poise

Que la dame de ce parole ;

Ne leur plut pas ceste parole,

Quar paor ont d’apercevance.

Frère Symons vers li s’avance,

Puis li dist quant de li s’apresse :

« Dame, à moi vous ferez confesse,

Quar cil Frères n’a pas licence

De vous enjoindre pénitence. »

Et ele respondi : « Biaus sire,

A cestui vueil mes pechiez dire

Et de confession parler. »

Lors l’a fet en sa chambre aler,

Et puis clot l’uis et bien le ferme ;

Avoec li dant Denise enferme,

Puis li a dit : « Ma douce amie,

Qui vous conseilla tel folie

D’entrer en tel relégion ?

Si me doinst Diex confession

Quant l’âme du cors partira,

Que jà pis ne vous en sera

Se vous la vérité me dites.

Si m’aït li Sains-Espérites,

Bien vous poez fier en moi. »

Et cele, qui ot grant esmoi,

Au miex que pot de ce s’escuse ;

Mès la dame la fist concluse

Par les resons qu’el li sot rendre,

Si que plus ne se pot desfendre.

A genillons merci li crie,

Jointes mains ü requiert et prie

Qu’ele ne li face fère honte,

Et puis de chief en chief li conte

Que il l’a trest de chiés sa mère,

Et se li conta qui ele ère,

Si que riens ne li a celé.

La dame a le Frère apelé,

Puis li dist devant son seignor

Si grant honte c’onques greignor

Ne fu mès à nul homme dite :

« Faus papelars, faus ypocrite,

Fausse vie menez et orde.

Qui vous pendroit à vostre corde

Qui est en tant de lieus noée,

Il auroit fet bone jornée.

Tels genz font bien le siècle pestre

Qui par dehors samblent bons estre