Œuvres complètes (page 14)

S’en vinrent droit à l’espouzei.

N’uns n’i fu de parleir laniers :

« Doneiz-nos maîtres ou deniers,

Font-il, qu’il est drois et raisons ;

S’ira chascuns en sa maison. »

Que vos iroie-je dizant,

Ne me paroles esloignant ?

Chascun ot maître, nès Challoz

Qui n’estoit pas mult biauz valloz.

Challoz ot à maître celui

Qui li lièvres fist teil anui.

Ces lettres li furent escrites,

Bien saellées et bien dites ;

Ne cuidiez pas que je vos boiz.

Challoz en est venuz au bois,

A Guillaume ces lettres baille ;

Guillaume les resut cens faille,

Guillaumes les commance à lire,

Guillaumes li a pris à dire :

« Challot, Charlot, biauz dolz amis,

Vos estes ci à moi tramis

Des noces mon couzin germain ;

Mais je croi bien, par saint Germain,

Que vos cuit teil choze doneir,

Que que en doie gronsonneir,

Qui m’a coutei plus de .c. souz,

Se je soie de Dieu assouz. »

Lors a apelei sa maignie,

Qui fu sage et bien enseignie.

La pel d’un lièvre rova querre,

Por cui il fist maint pas de terre ;

Cil l’aportèrent à grant aleure,

Et Guillaumes de rechief jure :

« Charlot, se Diex me doint sa grâce,

Ne se Dieux plus grant bien me face,

Tant me coûta com je te di. »

— « Hom n’en auroit pas samedi,

Fait Charlos, autant au marchié,

Et s’en aveiz mains pas marchié.

Or voi-ge bien que marchéant

Ne sont pas toz jors bien chéant. »

La pel prent que cil li tendi ;

Onques grâces ne l’en rendi ;

Car bien saveiz, n’i ot de quoi.

Pencis le véissiez et quoi ;

Pencis s’en est issus là fuer ;

Et si pence dedens son cuer,

Se il puet, qu’il li vodra vendre,

Et li vendi bien au rendre.

Porpenceiz c’est que il fera,

Et coment il li rendera.

Por li rendre la félonie,

Fist en la pel la vilonie…

Vos savez bien ce que vuet dire.

Arier vint et li dist : « Biau sire,

Se ci a riens, si le preneiz. »

— « Or as-tu dit que bien seneiz ? »

— « Oïl, foi que doi Notre Dame. »

— « Je cuit c’est la coiffe ma fame,

Ou sa toaille, ou son chapel ;

Je ne t’ai donei que la pel. »

Lors a boutei se main dedens :

Eiz-vos l’escuier qui ot gans

Qui furent punais et puerri,

Et de l’ouvrage maître Horri.

Ensi fu .ij. fois conchiez :

Dou ménestreil fu espiez

Et dou lièvre fu mal bailliz,

Que ces chevaus l’en fu failliz.

Rutebuez dit, bien m’en souvient :

« Qui barat quiert, baraz li vient. »

Explicit.

DE LA

Damme qui fist les trois tours entour le Moustier,

OU CI ENCOUMANCE

DE LA DAME QUI ALA .III. FOIS ENTOR LE MOUTIER. .

Mss. 7218, 7633, 7615.

Qui fame voudroit decevoir,

Je li faz bien apercevoir

Qu’avant decevroit l’anemi,

Le déable, à champ arami.

Cil qui fame viaut justicier,

Chascun jor la puet combrisier,

Et lendemain r’est tote saine

Por resouffrir autre tel paine ;

Mès quant fame a fol debonère,

Et ele a riens de lui afère,

Ele li dist tant de bellues,

De truffes et de fanfelues,

Qu’ele li fet à force entendre

Que le ciel sera demain cendre :

Issi gaaingne la querele.

Je l’ dis por une damoisele

Qui ert fame à .i. escuier,

Ne sai chartrain ou berruier.

La damoisele, c’est la voire,

Estoit amie à un provoire.

Mult l’amoit cil et ele lui,

Et si ne lessast por nului

Qu’ele ne féist son voloir,

Cui qu’en déust le cuer doloir.

Un jor, au partir de l’église,

Ot li prestres fet son servise :

Ses vestemenz lest à ploier,

Et si vet la dame proier

Que le soir en un boschet viengne :

Parler li veut d’une besoingne

Où je cuit que pou conquerroie

Se la besoingne vous nommoie.

La dame respondi au prestre :

« Sire, vez me ci toute preste,

C’or est-il poins et saison :

Ausi n’est pas cil en maison. »

Or avoit en cele aventure,

Sans plus itant de mespresure,

Que les maisons n’estoient pas

L’une lez l’autre à quatre pas ;

Ains i avoit, dont mult lor poise,

Le tiers d’une liue franchoise.

Chascune ert en un espinois

Com ces maisons de Gastinois ;

Mès li bochez que je vous nome

Estoit à ce vaillant preudomme

Qu’à saint Ernoul doit la chandoile.

Le soir, qu’il ot jà mainte estoile

Parant el ciel, si com moi samble,

Li prestres de sa maison s’amble,

Et se vint el boschet séoir

Por ce c’on ne l’ puisse véoir.

Mès à la dame mésavint,

Que sire Ernous ses mariz vint

Toz moilliez et toz engelez ;

Ne sai dont où il ert alez ;

Por ce remanoir là covint :

De son provoire li sovint.

Si se haste d’appareillier ;

Ne le vout pas faire veillier :

Por ce n’i ot .v. mès ne .iiij.

Après mengier petit esbattre

Le lessa, bien le vos puis dire.

Sovent li a dit : « Biaus dou sire,

Alez gésir, si ferez bien.

Veillier griève sor toute rien

A homme quant il est lassez :

Vous avez chevauchié assez. »

D’aler gésir tant li reprouche

Por pou le morcel en la bouche

Ne fait celui aler gésir,

Tant a d’eschaper grant désir.

Li bons escuier i ala,

Qui sa damoisele apela,

Por ce que mult la prise et aime.

— « Sire, fet-elle, il me faut traime

A une toile que je fais,

Et si m’en faut encor grant fais

Dont je ne me soi garde prendre,

Et je n’en truis nès point à vendre ;

Par Dieu, si ne sai que j’en face. »

— « Au déable soit tel filace,

Fet li vallés, comme la vostre !

Foi que je doi saint Pol l’apostre,

Je voudroie qu’el fust en Saine. »

Atant se couche, si se saine,

Et cele se part de la chambre.

Petit séjornèrent si membre

Tant qu’el vint là où cil l’atent :

Li uns les bras à l’autre tent.

Iluec furent à grant déduit,

Tant qu’il fu près de mienuit.

Du premier somme cil s’esveille,

Mès mult li vient à grant merveille

Quant il ne sent lez lui sa fame.

— « Chamberière, où est vostre dame ? »

— « Ele est là fors, en cele vile,

Chiés sa comère, où ele file. »

Quant cil oï que là fors ière,

Voirs est qu’il fist mult laide chière.

Son sercot vest, si se leva,

Sa damoisele querre va.

Chiés sa comère la demande,

Ne trueve qui raison l’en rande,

Qu’ele n’i avoit esté mie.

Ez-vous celui en frénésie !

Par delez cels qu’el boschet furent

Ala et vint (cil ne se murent),

Et quant il fu outre passez :

« Sire, fet-ele, or est assez ;

Or covient-il que je m’en aille :

Vous orrez jà noise et bataille. »

Fait li prestres : « Ice me tue

Que vous serez jà trop batue :

Onques de moi ne vous soviengne. »

— « Dant prestres, de vous vous coviengne, »

Dist la damoisele en riant.

Que vous iroie controuvant ?

Chascuns s’en vint à son repère.

Cil qui se jut ne se pot tère :

« Dame orde, viex pute provée,

Vous soiez or la mal trovée !

Dist li escuiers. Dont venez ?

Bien pert que pour fol me tenez. »

Cele se tut et cil s’esfroie :

« Voiz por le sanc et por le foie,

Por la froissure, por la teste,

Ele vient d’avec nostre prestre ! »

Issi dit voir, et si ne l’ sot ;

Cele se tut, si ne dist mot.

Quant cil ot qu’el ne se desfent,

Par un petit d’iror ne fent

Qu’il cuide bien en aventure

Avoir dit la vérité pure.

Mautalenz l’arguë et atise :

Sa fame a par les trèces prise ;

Por le trenchier son coutel tret :

— « Sire, fet-el, por Dieu atret,

Or covient-il que je vous die

(Or orrez jà trop grant voisdie) ;

J’amasse miex estre en la fosse.

Voirs est que je sui de vous grosse :

Si m’enseigna l’en à aler

Entor le moustier sans parler

Iij. tors, dire trois patrenostres

En l’onor Dieu et ses apostres ;

Une fosse au talon féisse

Et par trois jorz i revenisse.

S’au tiers jorz ouvert le trovoie,

C’estoit .i. filz qu’avoir devoie,

Et s’il estoit clos, c’estoit fille.

Or ne revaut tout une bille,

Dist la dame, quanques j’ai fet ;

Mès, par saint Jaque, il ert refet

Se vous tuer m’en deviiez. »

Alant s’est cil desavoiez

De la voie où avoiez ière ;

Si parla en autre manière :

« Dame, dist-il, je que savoie

Du voiage ne de la voie ?

Se je séusse ceste chose

Dont je à tort vous blasme et chose,

Je sui cil qui mot n’en déisse,

Se je anuit de cest soir isse ! »

Atant se turent ; si font pès,

Que cil n’en doit parler jamès ;

De chose que sa fame face,

N’en orra noise ne manace.

Rustebuef dist en cest fablel :

Quant fame a fol, s’a son avel.

Explicit de la Dame qui fist les .iij. tors entor le moustier.

Du Secrestain ET

DE LA FAMME AU CHEVALIER,

OU CI ENCOUMENCE

LI MIRACLES QUE NOSTRE-DAME FIST DOU SOUCRÉTAIN

ET D’UNE DAME.

Mss. 7218, 7633.

Ce soit en la bénéoite heure

Que Benéoiz, qui Dieu aeure,

Me fet fère bénéoite œvre ;

Por Benéoit un poi m’aœvre.

Benoiz soit qui escoutera

Ce que por Benéoit fera

Rustebues, que Diex bénéisse.

Diex doinst que s’uevre espénéisse

En tel manière que il face

Chose dont il ait gré et grace.

Cil qui bien fet bien doit avoir ;

Mès cil qui n’a sens ne savoir

Par qoi il puisse en bien ouvrer,

Si ne doit mie recouvrer

A avoir garison ne rente ;

L’en dit : De tel marchié tel vente.

Cist siècles n’est mès que marchiez,

Et vous qui au marchié marchiez,

S’au marchié estes mal chéant

Vous n’estes pas bon marchéant.

Li marchéanz, la marchéande,

Qui sagement ne marchéande,

Pert ses pas et quanqu’ele marche.

Puisque nous sons en bone marche,

Penssons de si marchéander

C’on ne nous puisse demander

Nule riens au jor du juise,

Quant Diex prendra de cels justise

Qui auront issi barguingnié,

Qu’au marchié seront engingnié.

Or, gardez que ne vous engingne

Li maufès, qu’adès vous barguingne :

N’aiez envie sor nule âme :

C’est la chose qui destruit l’âme.

Envie samble hériçon :

De toutes pars sont li poiçon :

Envie point de toutes pars ;

Pis vaut que guivre ne liépars.

Li cors où envie s’embat

Ne se solace ne esbat.

Toz jors est ses viaires pales,

Tos jors sont ses paroles males ;

Lors rist-il que son voisin pleure,

Et lors li recort li deuls seure

Que ses voisins a bien assez ;

Jà n’ert de mesdire lassez.

Or poez-vous savoir la vie

Que cil maine qui a envie.

Envie fet home tuer

Et si fet bonne remuer ;

Envie fet rooingner terre,

Envie met ou siècle guerre,

Envie fet mari et fame

Haïr, envie destruit âme,

Envie met descorde ès frères,

Envie fet haïr les mères,

Envie destruit gentillece,

Envie grève, envie blece,

Envie confont charité,

Envie ocist humilité.

Et por l’envie d’un maufé,

Dont maintes genz sont eschaufé,

Vous vueil raconter de deus genz

Dont li miracles est molt genz.

Granment n’a mie que la fame

A un chevalier, gentiz dame,

Estoit en ce païs en vie.

Sanz orgueil ere et sanz envie,

Simple, cortoise, preus et sage.

N’estoit ireuse ne sauvage,

Mès sa bonté, sa loiauté

Passoit cortoisie et biauté.

Dieu amoit et sa douce mère ;

N’estoit pas aus pauvres amère.

Le soir, quant l’en doit herbregier

La povre gent, nès un bergier

Fesoit-èle si très biau lit

C’uns rois i géust à délit.

Plus avoit en li charité

(Ce vous di-je par vérité)

Qu’il n’a demi en cels du monde ;

N’est pas orendroit la seconde.

De tout ce me doi-je bien tère,

Avers le très biau luminère

Qu’ele monstroit au samedi.

Et bien sachiez, sus m’âme di,

Que matines voloit oïr :

Jà ne l’en véissiez fuir

Tant com avoit fet le servise ;

Ce ne vous sai-je en quel guise

Fesoit les festes Nostre-Dame ;

Ce ne porroit dire nule âme.

Se j’estoie bons escrivains,

Ainz seroie d’escrire vains

Que j’éusse escrit la moitié

De l’amour et de l’amistié

Qu’à Dieu monstroit et jor et nuit.

Encor dout-je ne vous anuit

Ce que j’ai un petit conté

De son sens et de sa bonté.

Ses sires l’avoit forment chière

Et mult li fesoit bèle chière

De ce qu’en vérité savoit,

Que si grant preude fame avoit ;

Mult l’amoit, et mult li plesoit

Trestoz li biens qu’ele fesoit.

En la vile ot une abeïe

Qui n’estoit pas mult esbahïe

De servir Dieu l’espéritable,

Et si estoit mult charitable

La gent qui estoit en cel leu.

Bien séust véoir cler de leu

Qui i véist un mauvès cas :

Or, ont tout atorné à gas.

Chanoine réguler estoient ;

Lor riègle honestement gardoient.

Léenz avoit .i. soucrétain ;

Orendroit nul home ne tain

A si preudome comme il ière.

La glorieuse dame chière

Servoit de bon cuer et de fin

Si com il parut à la fin ;

Et si vous di qu’en .iij. parties

Estoient ses evres parties :

Dormir, ou mengier, ou orer

Voloit ; ne savoit laborer.

Tos jors vous fust devant l’autel.

Vous ne verrez jamès autel

Comme il estoit, ne si preudome.

N’en prisoit avoir une pome,

Ne n’avoit cure ne corage

De ce qui est chose volage,

C’on voit bien avenir sovent

Qu’avoirs s’envole avoec le vent ;

Por ce n’en avoit covoitise.

Quant la chandoile estoit esprise

Devant la Virge débonère,

De l’oster n’avoit-il que fère :

Tout ardoit, n’i remanoit point.

Je ne di pas s’il fust à point

Que plains li chandelabres fust

Ou li granz chandeliers de fust,

il en otast jusqu’à reson

Qui fesoit bien à la meson.

Par maintes foiz si avenoit

Que la bone dame venoit

A l’église por Dieu proier ;

Celui trovoit qui otroier

Doit Nostre-Dame son douz raine ;

Jamès n’aura si bon chanoine.

Ces genz molt saintement vivoient.

Li félon envieus qui voient

Cels qui vivent de bone vie

D’els desvoier orent envie ;

De lor enviaus envoièrent ;

Soventes foiz i avoièrent

Tant qu’il les firent desvoier

De lor voie, et avoier

A une péreilleuse voie.

Or, est mestiers que Diex les voie ;

Tost va (ce poez vous véoir)

Chose qui prent à déchéoir :

Tost fu lor pénitance frete

Qui n’estoit pas demie fete :

Anemis si les entama

Que li amis l’amie ama,

Et l’amie l’ami amot.

Li uns ne set de l’autre mot ;

De plus en plus les enchanta.

Quant cil chantoit Salve, sancta,

Li parens estoit oubliez,

Tant estoit fort desavoiez ;

Et quant il voloit grâces rendre,

.Vii. foiz li convenoit reprendre,

Ainz que la moitié dit éust.

Or est mestiers Diex les aïut.

Du tout en tout a geté fuer

L’abit saint Augustin de cuer ;

N’i a mès se folie non.

Fors tant que chanoines a non :

De l’ordre Augustin n’i a goute

Fors que l’abit, ce n’est pas doute.

Or est vaincus, or est conclus

Nostre religieus reclus.

N’a plus fol en la région

Que cil de la relégion ;

Et la dame relegieuse

R’est d’amer si fort curieuse

Qu’ele n’a d’autre chose cure.

Or est la dame mult obscure,

Quar li obscurs l’a obscurcie

De s’obscurté et endurcie :

De male cure l’a curie ;

Ci a mult obscure curie

Qui n’est pas entre char et cuir,

Ainz est dedenz le cuer obscuir

Qui estoit clers et curiex

De servir Dieu le gloriex.

Curer la puisse li curières

Qui des obscurs est escurières ;

Quar si forment est tormentée,

Si vaincue et si enchantée

Quant ele est assise au mengier

Il li covient avant changier

Color .v. fois ou .vi.,

Por son cuer qui est si penssis,

Que li premiers mès soit mengiez.

Or est ses afères changiez.

Voirement dit-on, ce me samble :

Diex done blef, déable l’anble,

Et li déable ont bien enblé

Ce que Diex amoit miex que blé.

Or face Diex novele amie

Qu’il sanble ceste ne l’ soit mie.

Tost est alé, prenez-y garde,

Ce que nostre Sires ne garde.

Dist la dame dolente lasse :

« Ceste dolor toute autre passe.

Lasse ! que porrai devenir ?

Comment me porrai contenir

En tel manière qu’il parçoive

Que la seue amor me deçoive ?

Dirai-je lui ? nenil, sanz doute.

Or ai-je dit que fole gloute,

Que fame ne doit pas proier ;

Or me puet s’amor asproier

Que par moi n’en saura mès riens.

Or sui aussi com li mesriens

Qui porrist desouz la goutière :

Or amerai en tel manière. »

Ainsinc la dame se demaine :

Or vous vueil remener au moine.

Li bons moines aime la dame

Qui acroist sor sa lasse d’âme ;

Mès la dame n’en set noiant.

Mult va entor li tornoiant

Quant ele est au moustier venue ;

Et s’il séust la convenue

Que la dame l’amast si fort,

Confortez fust de grant confort.

Il n’est en chemin ne en voie

Que li déables ne le voie :

Tout adès le tient par l’oreille ;