Œuvres complètes (page 17)

Devisèrent au miex qu’il sorent.

Por ce c’on les trova ou voir,

Si covint tout par estovoir

Que cil fussent lié et pris

Qui si durement ont mespris.

Pris furent et mis en prison

Por tel fet et tel mesprison ;

Et cil s’en vont lor garant querre

Qui ne sont pas loing de lor terre.

Or furent pris cil et loié

Que li maufès ot desvoié.

Par maintes foiz m’a l’en conté

C’on doit réprover sa bonté.

Li preudom sa bonté reprueve :

La glorieuse dame rueve

Que de cel péril les délivre,

Qu’il cuident avoir esté yvre.

Dist li preudom : « Virge pucele,

Qui de Dieu fus mère et ancele,

Qu’en toi éus la déité,

Qu’il prist en toi humanité,

Se ta portéure ne fust

Qui fu mise en la crois de fust,

En enfer fussons sanz retor :

Ci éust péreilleuse tor.

Dame, qui par ton douz salu

Nous a geté de la palu

D’enfer qui est vil et obscure,

Virge pucele, nete et pure,

Dame servie et réclamée,

Par qui toute fame est amée,

Si com la rose ist de l’espine,

Issis, glorieuse roïne,

De juerie qui est poingnanz,

Et tu es souez et oingnanz ;

Dame, je vous ai tant servi,

Se ce pert que j’ai deservi,

Ci aura trop grant cruauté.

Virge plaine de léauté,

Par ta pitié de ci nous oste !

Ci a mal ostel et mal oste. »

Dist la dame : « Virge honorée,

Que j’ai tantes foiz aorée

Et servie si volentiers,

Secor-nous, c’or en est mestiers !

Virge pucele, Virge dame,

Qui es saluz de cors et d’âme,

Secor ton serf, secor ta serve

Où ci a péreilleuse verve.

Pors de salu, voie de mer

Que toz li siècles doit amer,

Quar regarde ceste forfète

Qui de t’aïde a grant soufrete.

Dame, cui la grâce est donée

D’estre des angles coronée

Et d’aidier toute créature,

De ceste grant prison obscure

Nous gète par la volanté

Qu’anemis nous a enchanté ;

Et se par toi ne sons délivre,

A grant dolor nous covient vivre. »

Bien a oïe la complainte

La mère Dieu de la gent sainte,

Si comme il i a bien paru :

En la chartre à els s’aparu.

De la grant clarté souveraine

Fu si toute la chartre plaine

Que la gent qui furent humain

Ne porent movoir pié ne main.

Cele clartez qui si resclère

Avoec tout ce si souef flère.

Devant els vint la glorieuse

Qu’à nul besoing n’est oublieuse :

Les maufez tint enchaenez

Qui ces gens ont si mal menez ;

Tant d’amor lor commande à fère

Comme il lor ont fet de contrère.

Cil ne l’osèrent refuser ;

Ne ne s’en porent escuser.

Chascuns de ces deux anemis

A l’un de cels sor son col mis :

D’iluec s’en tornèrent grant oirre ;

Lor petit pas sanble tonoirre.

Isnel et tost vindrent à porte

Atout ce que chascuns enporte ;

Li uns met celui en sa couche

Et li autres la dame couche,

Lez son seignor si doucement

Que cil qui dormoit durement

Ne s’esveilla, ne ne dist mot,

Ne ne sot quant il sa fame ot.

Et l’avoir ont si ordené

Qu’il ont aus moines or doné

Et argent que cil avoit pris

Qui si durement ot mespris.

Li chevaliers r’ot son avoir

C’onques ne pot apercevoir

C’on i éust onques touchié.

Ès-vous l’afère si couchié

C’or n’i pert ne que cops en eve.

Dès que Diex fist Adan ne Eve

Ne fu afères si deffez

Ne effaciez si grant meffez.

Cil, qui savoit de la nuit l’eure,

Vest sa robe et se liève seure

Et va ses matines soner.

Qui oïst moines tençoner

Si fis : « Ha, ha ! hé, hé ! sus, sus ! »

Dist li abés : « Vois de lasus,

Biaus douz Père, ce que puet estre,

Ce soit de par le roi célestre ! »

Tuit se lièvent isnel le pas ;

Apris l’ont : ne lor griève pas.

Si s’en sont venu à l’église

Por commencier le Dieu servise.

Quant le soucretain ont véu

Durement furent esméu.

Dist li abés : « Biaus douz amis,

Qui vous a ci iluec tramis ?

Alez en autre leu entendre,

Qu’il n’a mès ou trésor que prendre. »

Dist li soucretains : « Biaus dous sire,

Qu’est or ce que vous volez dire ?

Prenez-vous garde que vous dites ?

— « Je cuidai vous fussiez hermite,

Dist li abés, Dans glouz léchierres,

Et vous estes .i. mauvès lerres

Qui nous avez emblé le nostre ! »

— « Foi que je doi sains Pol l’apostre,

Dist li soucretains, sire chiers,

De parler estes trop légiers :

Se je vous ai fet vilonie,

Ne sui-je en vostre baillie ?

Si me poez en prison metre.

Ne vous devez pas entremetre

De dire chose se n’est voire,

Ne ne me devez pas mescroire.

Alez véoir à vostre perte :

Se vous la trovez descouverte

Et j’ai vers vous de rien mespris,

Je lo bien que je sois pris. »

Au trésor aler les rouva ;

Chascuns i va : ainz n’i trova

C’on i éust mesfet noiant.

« Fantosme nous va fauvoïant,

Dist li abés. Seignor, sanz faille,

N’avoit ier ci vaillant maaille,

Et or n’i pert ne que devant. »

Ez-vos esbahi le couvant.

La dame, qui aler voloit

Au moustier si com el soloit,

Geta en son dos sa chemise

Et puis si a sa robe prise.

Atant li chevaliers s’esveille,

Quar mult li vînt à grant merveille

Quant il senti lez lui la dame :

« Qui est ceci ? — C’est vostre fame.

— Ma fame ne fustes-vous oncques. »

Li chevaliers se saine adoncques,

Saut sus, s’a un tortiz pris,

Au lit s’en vient d’iror espris ;

Plus de cent croiz a fet sor lui.

« Ne cuidai qu’il éust nului,

Dist li chevaliers, avoec moi,

Et orendroit gésir i voi

La rien que je doi plus haïr.

Or me doi-je bien esbahir,

Que ore aurai non sire Ernous ;

Ce seurenon ai-je par vous. »

Dist la dame : « Bien porriez

Miex dire se vous voliiez.

Alez véoir à vostre chose ;

Péchié fet qui de néant chose. »

Tant l’amena, çà va, là va :

Li chevaliers véoirs i va ;

Ne treueve qu’il ait rien perdu.

Ez-le-vous si fort esperdu

C’on le péust penre à la main.

« S’il ne me convenist demain

A mon jor aler, sachiez, dame,

Ne vous mescréisse par m’âme ;

Quar j’ai quanque perdu avoie :

C’est fantosme qui me desvoie. »

Au point du jor tantost se liève,

Au couvent vient et ne li griève,

« Seignor, dist-il, ma fame tain :

R’avez-vous vostre soucrétain ? »

— « Oïl, oïl, dient li moine ;

C’est fantosme qui nous demaine. »

— « Biau, seignor, dist-il au couvent,

Nous avons à enqui convent

Que nous irons à nostre jor

Et nous somes ci à séjor. »

Por ce chascuns s’appareilla,

Montent, chevauchent viennent là,

Et truevent les deus anemis

Qui ès sanblances se sont mis

De cels qu’ils en orent getié

Quant Nostre-Dame en ot pitié.

Ez-vous la gent toute esbahie

Et du siècle et de l’abéie,

C’onques mès si fort ne le furent,

Por ce c’onques ne s’aperçurent

D’avoir perdu or ne argent ;

Et si r’orent arrier la gent

Qu’il avoient devant perdue.

Por ce en fu gent esperdue.

Conseus lor done qu’il alaissent

A l’évesque et li demandaissent

Quel chose il loeroit à fère

D’un tel cas et d’un tel afère.

Tuit ont pié en estrier mis

Et se sont à la voie remis ;

Mès n’orent pas alé granment,

Se li Escripture ne ment,

Que de l’évesque oient parler.

Cèle part prennent à aler ;

Viennent là : li uns li raconte

La chose, et li évesques monte,

Qu’il veut savoir ce que puet estre ;

Mult se saine de la main destre.

Tant ont chevauchié que là vienent

Et li déable qui se tienent

En lieu de cels que il avoient

Délivré, quant il venir voient

Le prélat molt grant paor orent,

Por ce que en vérité sorent

Que li prélas mult preudom iere :

Chascuns en inclina la chière.

Li prélas entre en la prison :

Si resgarde chascuns prison,

Et quant il les a regardez

Si lor a dit : « Or vous gardez

Que vous me dites de ce voir :

Est-ce por la gent decevoir

Que pris en prison vous tenez ?

Or me dites dont vous venez. »

Cil, qui n’osèrent au preudomme

Mentir, li ont dite la some

De lor afère et de lor voie.

Dist li uns : « Guerroié avoie

Une dame et un soucretain,

Par qoi pris en prison me tain ;

Quar honte lor cuidoie fére.

Onques ne les poi à moi trère,

Ne atorner à mon servise ;

Si m’en sui mis en mainte guise

Par qoi sor els pooir éusse,

Et que decevoir les péusse.

Mult cuidai bien avoir gabé

Chevalier, couvent et abé

Quant jusques ci les fis venir,

Quar lors les cuidai bien tenir.

Onques n’es poi à ce mener,

Tant fort m’en séusse pener

Que péchier les péusse fère.

Or ai perdu tout mon afère ;

Si m’en r’irai là dont je vain,

Quar j’ai bien laboré en vain.

Or aint li chevaliers sa dame,

C’onques ne vi si preude fame ;

Cil tiegnent lor chanoine chier,

C’onques ne l’ poi fère péchier. »

Quant ces genz la parole oïrent,

Molt durement s’en esjoïrent.

Li chevaliers a molt grant joie ;

Tart li est que sa fame voie.

Si l’embracera doucement ;

Quar or set-il bien voirement

Qu’il a preude fame sanz doute.

La gent de l’abéie toute

Refet grant joie d’autre part ;

D’iluec cele gent se départ.

Molt fu bien la paine séue

Que ces gens avoient éue :

Se l’ sot mesires Benéoiz,

Qui de Dieu soit tos benéoiz,

A Rustebuef le raconta,

Et Rustebuef en un conte a

Mise la chose et la rima.

Or dist-il que s’en la rime a

Chose où il ait se bien non,

me vous regardez à son non :

Rudes est, et rudement œuvre ;

Li rudes hom fet la rude œuvre ;

Se rudes est, rude est bués,

Rudes est s’a non Rudebués :

Rustebués œvre rudement,

Savez en sa rudèce ment.

Or prions au définement

Jhésu-Crist, le roi bonement,

Qu’il nous doint joie pardurable

Et paradis l’espéritable.

Dites Amen trestuit ensanble :

Ci faut li diz, si com moi sanble.

Explicit du Secrestain et de la Famme au Chevalier.

NOTES ET ÉCLAIRCISSEMENTS.

NOTE A.

(Voyez page 2, note 4.)

Les deux fabliaux qui suivent contiennent chacun des détails fort curieux sur la ménestrandie, et commentent longuement les paroles de Rutebeuf : c’est pour cela que je les donne ici. Le premier a été analysé avec beaucoup d’infidélité par Legrand d’Aussy (voyez 2e vol., page 369, édition Renouard) et imprimé en 1834 par M. Robert ; mais cette édition, faite à quelques exemplaires seulement, n’ayant point été livrée au public, peut être considérée comme non avenue. Le second est entièrement inédit, et m’a semblé propre à jeter quelques lumières sur le sujet qui nous occupe. Le lecteur en jugera.

LES DEUX TROVEORS RIBAUZ.

Ms. 1830 fonds de l’abbaye St.-Germain.

Diva ! quar lai ester ta jangle ;

Si te va séoir en cel angle.

Nos n’avons de ta jangle cure :

Quar il est raison et droiture

Por tot le mont que cil se taise

Qui ne sait dire riens qui plaise.

Tu ne sez vaillant .ij. festuz ;

Com tu es ore bien vestuz

De ton gaaige d’oan,

Voix quiex sollers de cordoan

Et com bones chauces de Bruges,

Certes ce n’est mie de druges

Que tu es si chaitis et las :

Ge cuit biens, par saint Nicolas,

Que tu aies faim de forment ?

Conment es-tu si povrement ?

Que ne gaaignes-tu deniers ?

Tu es si granz pautoniers :

Tu n’es pas mendre d’un frison.

Or déusses en garnison

Avoir .ij. porpoinz endossez

Ou à une veure de fossez

Déusses porter une hote,

Tant que d’amone poure cote

Péusses iluec amender :

Mais tu aimes mielz truander,

Lechières, que estre à hennor :

Or esgardez, por Dieu, seignor,

Cils homs, com richement se prueve :

Jamais, à nul jor, robe nueve

N’a éu por chose qu’il dit :

Or esgardez quel hiraudie

Il s’est iluec entorteilliez.

Mout est or bien apareilliez

De quant tel chaitis doit avoir.

Si t’aïst Diex, or me di voir,

Quiex hom es-tu ? or me di quiex ?

Tu n’es mie ménesterex

Ne de nule bone œuvre ovrieis.

Tu sanbles un vilains bouvieis

Ausi contrefez com un bugles.

Tu sanbles un meneur d’avugles

Miels que tu ne faces autres home.

Ge ne pris pas .i. troe de pome

Ne toi ne quanques que tu as.

Se Diex t’aïst, s’onques tu as

Onques nul home si te tue

Que tu ne volz une letue

Ne chose que tu saiches faire.

Pour de si te devroies taire :

Ne dois paller contre moi.

Que t’ai-ge dit ? Or me di, quoi ?

Tu ne sez à nul bien repondre,

Pour ce te devroit-on tondre.

Tantôt autresi com un sot

Tu ne sez dire nul bon mot

Dont tu puisses en pris monter ;

Mais ge sai aussi bien conter

Et en roumanz et en latin,

Aussi au soir com au matin

Devant contes et devant dus,

Et si resai bien faire plus

Quant ge sui à cort et à feste,

Gar ge sai de chançon de geste.

Gautières sui, qu’el mont n’a tel :

Ge sai de Guillaume au tinel

Si com il arriva as nés ;

Et de Renoart au cort nés

Sai-ge bien chanter com ge vueil ;

Et si sai d’Aie de Nantueil

Si com ele fu en prison ;

Si sai de Garins d’Avignon

Qui mult estore bon romans :

Si sai de Guion d’Aleschans

Et de Vivien de Bourgogne :

Si sai de Bernart de Saisoigne

Et de Guiteclin de Brebant :

Si sai d’Ogier de Montaubant

Si com il conquist Ardennois ;

Si sai de Renaut le Danois ;

Mais de chanter n’ai-ge or cure :

Ge sai des romanz d’aventure

De cels de la reonde table

Qui sont a oïr délitable ;

De Gauvain sai le mal parler

Et de Quex le bon chevalier.

Si sai de Perceval de Blois

Et de Percenoble le Galois.

Sai-ge plus de .xl. laisses ;

Mais tu, chaitif, te laisses

De mauvaitié et de peresce.

En tot le monde n’a proesce

De quoi tu te puisses vanter ;

Mais ge sai aussi bien conter

De Blancheflor conme de Floire.

Si sai encor moult bon estoire,

Chançon moult bone et anciene :

Ge sai de Tibaut de Viane,

Si sai de Girart d’Aspremont.

Il n’est chançon en tot le mont

Que ge ne saiche por nature.

Grant despit ai com tel ordure,

Com tu es, contre moi parole :

Sez-tu nule riens de citole,

Ne de viele, ne de gigue ?

Tu ne sez vaillant une figue.

De toi n’est-il nus recouvriers ;

Mais ge sui moult très bons ovriers,

Dont je me puis bien recouvrer,

Se de ma main voloie ovrer :

Ansi, com ge voi mainte gent,

Ge conquerroie assez argent,

Mais à nuz tens ge ne faz œuvre.

Ge sui cil qui les maisons cueuvre

D’ues friz, de torteax en paele ;

Il n’a home jusqu’à Neele

Qui mielz les cuevres que ge faz.

Ge sui bons seignerres de chaz

Et bons ventousierres de bués.

Si sui bons relierres d’ués,

Li mieldres qu’en el monde saiches.

Si sai bien faire frains à vaches

Et ganz à chiens, coifes à chièvres ;

Si sai faire haubers à lièvres,

Si forz qu’il n’ont garde de chiens.

Il n’a el monde, el siècle riens

Que ge ne saiche faire à point.

Ge sai faire broches à oint

Mielz que nus hom qui soit sor piez :

Si faz bien forreax à trepiez

Et bones gaînes à sarpes :

Et se ge avoie .ij. harpes,

Ge ne l’ fairai que ne vos die,

Ge feroie une meloudie !

Ainz ne fu oie si grantz.

Et tu, di va, di, fax noienz,

Tu ne sai pas vaillant un pois.

Ge connois force bons borgois

Et toz les bons sirjanz du monde ;

Ge connois Gautier Trenche-fonde ;

Si connois Guillaume gros-groing

Qui asomma le buef au poing ;

Et Trenchefer, et Rungefoie,

Qui ne doute home qu’il voie,

Mache-Buignet et Guinement.

Et tu, connois-tu mile gent

Qui onques te faissent bien ?

Nenil, voir, tu ne conois rien

Qui riens vaille en nulle saison :

Or me di donc pour quel raison

Tu te venis ici enbatre :

Près va que ne te faz tant batre

D’un tinel ou d’un baston gros

Tant que tu fusses ausi mox

Com une coille de mouton :

Ainc mais, por la croix d’un voutost

· · · · · · · · · · · · · · · · · · · · · · · · ·

N’oï parler de tel fouet.

Vez quel vuideor de brouet

Et quel humerre de kenas :

A bien poi se tient que tu n’as

Du mien, se ne fust por pechié ;

Mais il ne m’ert ja reprochié

Que tel chetif fière ne bate :

Quar trop petit d’ennor achate

Qui sur tel chetif met sa main ;

Mais se tu ne voies demain

Entre nos qui somes de feste

Tu te plaindroies de la geste.

Or t’en va, beax amis, va-t’en,

Esté avons en autre anten.

Fui de ci, si feras que saiges,

Ou tu auras parmi les naiges

D’une grosse aguille d’acier.

Nos ne t’en volons pas chacier

Vilenement ; par nostre honte,

Nos savons bien que henor monte.

LA RESPONSE DE L’UN DES DEUX RIBAUZ.

Tu m’as bien dit tot ton voloir :