Œuvres complètes (page 24)

Fist-il morir en sa prison, etc.

Et plus loin (même édition, page 124) :

Cis vaillans rois dont ge te conte

Que l’en soloit tenir à conte,

Cui nuis et jors et mains et soirs,

L’âme, le cors et tous ses hoirs

Gart Diex et desfende et conseille,

Cil donta l’orguel de Marselle,

Et prist des plus grans de la vile

Les testes, ains que de Sézile

Li fust li roiaumes donnés,

Dont il fut puis rois couronnés

Et vicaire de tout l’empire.

Je crois devoir donner ici maintenant un petit poëme qui ne se trouve que dans le seul Ms. 2736 La Vallière, et que M. Buchon a compris dans sa première collection historique, où il est pour ainsi dire perdu, et qu’il n’a pas reproduit dans les autres. Ce poëme biographique, qui contient des détails curieux, est dû au trouvère Adam de la Halle, ménestrel du comte d’Anjou, et dont il est probable que les pièces dramatiques furent représentées à Naples dans la cour de ce prince.

C’EST DU ROI DE SÉZILE.

On doit plaindre, et s’est honte à tous bons trouveours,

Quant bonne matère est ordenée à rebours ;

Car qui miex set plus doit metre paine et secours

A che bien ordener qui miex doit estre encours,

Ne chiex ne meffait mie qui les vers fait meillours,

Mais chiex qui les emprent et si n’en set les tours.

Che fu damages grans, nichetés et folours,

Se si bele matère où jà iert mes retours

Demouroit si qu’ele est mau rimée à tous jours.

Li matère est de Dieu et d’armes et d’amours,

Et du plus noble prinche en proueche et en mours

Qui onques endossast chevalereus atours,

N’à qui onques en terre avenist grainde honnours,

Que Diex et hardemens et sa roiaus vigours

Li fisent conquester par proueche en estours.

C’est du bon roy Charlon, le seigneur des seignours,

Par cui li drois estas de le foi est ressours,

Qui fu roys de Sézile et de Puille et d’aillours,

Et de royal lignie ensieut les anchissours

Et de chevalerie est chiex et dieus et flours.

D’autre part fu valours en cestui bien assise,

Car nature i fu toute à son pooir esquise

En biauté et en forche, en gentil taille alise.

Lui quart de frères fu, drois est que les descrise :

Li uns fu Loeys, li roys de Saint-Denise,

Chiex qui tant essaucha et ama sainte Eglize,

Par cui fu Damiete as Sarrasins conquise ;

Et li bons quoins d’Artois qui fu à chele prise,

Et li quoins de Poitiers et chis qui les ravise,

Les seurmontoit de non et de fait et d’emprise.

Mar virent mescréant lui ne se vaillandie ;

Car de ses anemis ne se mist mie en mise,

N’il n’en prist raenchon, ains le mist à yuise,

Si com vos m’orrés dire ains que je gaires lise.

Li hardemens de lui se gent muet et atise,

Si qu’il ne puet en aus demourer couardise.

De canques il ot empris ot-il victoire aquise,

N’onques de lui ne fist nus plus bele devise,

Car le vertu du cors ot toute en armes mise,

Et le cuer en largueche, en Dieu et en franquise.

En avoec che qu’il eut cuer et cors de vassal

Ne vit onques de lui nus prinche plus loial,

Ne compaignon aussi de lui plus général,

Ne qui plus honnerast dames d’amour coral,

Et bien en mainte marche i parut chi aval.

Pour eles escilla chevaus, pourpoint, chendal :

Bachelerie est bien depuis muée en mal.

C’est mais tout reuberie ; il n’ont point d’apoial :

Mais s’encore fust Charles en Franche le roial

Encore trouvast-on Rolant et Parcheval.

Tel gent ot avoec lui pour bien tenir estal,

Nos bons roys de Sézile en maint estour mortal,

Car par le hardement séur et natural

Fu chascuns Oliviers et séurs au cheval.

Teus hom doit tenir terre et règne empéreal :

Nient plus ne doutoit chaus que s’il fust de métail ;

Et l’espée en ses puins fait valoir Durendal.

Chiex seus fu Diex en terre, il n’eut nui principal,

Mais par s’umelité furent tout parigal.

Or avés se proueche en général oïe :

Chi après vous sera clèrement desploïe

Et depuis qu’il fu nés en orde poursievie

Se loenge est si bele et si autorisie

Qu’ele doit vilain cuer purgier de vilenie,

Et d’armes esmouvoir toute chevalerie,

Et de joie eslever cuer d’amant et d’amie.

Ne sai quel ménestrel l’avoient depêchie,

Mais jou Adans d’Arras l’ai à point radrechie,

Et, pour chou c’on ne soit de moi en daserie,

On m’apele bochu, mais je ne le sui mie.

Deus fust se ceste estoire éust esté périe,

Car peine i est si bien et si biel emploïe

Et me créanche est tele, et pour che je m’afie

Que pour l’amour du Roy m’en iert Diex en aïe,

Car il l’ama et fist tant pour lui en sa vie

Que je croi qu’il plaist Dieu que je l’ai commenchie ;

Et d’autre part j’ai si ceste oevre encoragie

Que je croi qui m’en cuer fenderoit à moitie

Du bon prinche i veroit le figure entaillie.

Li mainés fiex leur père fu Charles li gentiex,

Mais aussi proprement comme mais et avriex

Entre les autres mois est biaus et dous et piex,

Fu Charles li plus gens et li plus signeriex.

Tout furent filz de roy, mais Charles le fu miex,

Car au jour qui fu nés estoit la poestiex

Li pères dou roiaurne et sacrés et esliex :

Che n’iert-il quant il eut ses .iij. primerains fiex.

Or dirai de s’enfanche, il en est chi bien liex.

Enfès fu bien veignans, gracieus et soutiex,

En doctrine entendans, de meffaire doutiex,

Servichaules, rians, de servir volentiex ;

As chiens et as oîsiaus par nature ententiex,

Et pour chou n’estoit-il des dames mie eskiex,

Ains l’en metoit amours des plus beles à kiex.

Ains qu’il fust eslevés ne que il fust parcriex

Portoit-il hardement en vairs amoureus iex,

Et anchois qu’il fust nés le saintefia Diex,

Car au naistre aporta le crois roial con chiex

Qui seroit roys du mont après le roy des chiex.

Com plus vint en avant, plus crut se renommée,

Et parole est tantost en divers lieus volée.

S’avint que en Provenche ert li nouvele alée

Tant que chele l’oï qu’il éut puis espousée

Qui demoisele estoit et hoirs de le contrée,

Car par loy revient là li hoirs à la mainsnée,

Li bons freres Charlon quel vie j’ai contée.

Li autre estoit au roy d’Engleterre donnée,

L’autre au roy d’Alemaigne, chi ot gente portée.

Seur ches .iii. ne ferai ore plus de demourée.

Li quarte, qui n’estoit encor pas mariée,

Du bon renon Charlon ne fust jà saoulée,

Ains s’est tant de bon cuer en l’oïr delitée

Qu’ele se sent aussi que toute enfantosmée.

De gai cuer, d’œil riant, de légière pensée,

Et amours, qui trouva le porte deffremée,

Saut ens, adont fu-ele de s’amour embrasée.

Dont ne fu-ele à pais si ot véu Charlon,

Car amours et désirs le cachoit savoir mon

Se li personne estoit concordant au renon,

Et quant el ot véue se fourme et se fachon,

Dont fu-ele d’amours en plus male frichon,

Ne onques au sanlant ne li n’à se raison,

Ne le puet nus savoir tant fust de se maison,

Ains suchoit à par li ses cans par s’occoison.

Elas ! et pour che sont cuer de feme larron

C’on ne puet riens savoir de leur entention,

Et nous leur disons tout : chi a male parchon.

Longuement fu ensi tant qu’en se region

Un riche conte avoit qui Raimons ot à non

C’on li voloit donner, mais ses cuers disoit non.

Comment qu’el en fesist pour s’onneur sanlant bon,

Dont ne se paut cheler, ains a pris .i. garchon,

A son ami l’envoie à coite d’esperon.

En un petit d’escrit li a fait mention

Comment amé l’avoit et se li faisoit don

De son cors s’il voloit li rescourre à Raimon.

Li nouvele estoit jà tout partout espandue

De quel cuer, de quel forche et de quel value

Ert li frères au Roy par sanlant de véue.

Nature à tous faisoit sa personne cremue,

Anchois que li proueche i fust onques séue.

Quant il eut par loisir le lettre pourvéue,

Vit que chele dansele voloit estre sa drue ;

Amours li entre ou cuer et li sans li remue ;

De désirrier frémist et d’espoir s’esvertue :

Prist gent, vint en Prouvenche et chele ert jà méue

Pour mener espouser dolante et irascue.

Et quant li enfès ot la novele entendue

Et le route des gens à plains cans connéue

Et vit en milieu d’aus le puchele en sambue,

Et chelui qui le nuit le cuidoit tenir nue,

Les chevaus ont restrains et l’enfès premier hue.

De lonc lanche seur fautre et sans atendre aieüe

Les escrie et chil ont se vois reconnéue :

Se fuient comme aloe fait esprevier de mue :

La puchele remest, et chiex l’a retenue

Envers cui ele fust à envis desfendue.

Qui dont véist Charlon à joie repairier

Et douchement d’amours l’un à l’autre acointier,

Beles paroles dire et dous regars lanchier,

Et en le partefin acoler et baisier

Et le seurplus prometre et enconvenenchier

Par veu de mariage et par foy fianchier,

Nis dou mal de le mort se peust rehaitier.

Loeus qui vinrent à Ais en un secré moustier,

Le prist chele à signeur et il li à moullier,

Car li uns ne cuidoit jà à l’autre aprochier.

Dont fist Charles le fait à son frère nonchier ;

Qui véist Loéys de joie appareillier,

La royne méisme avoit assez plus chier

Qu’il eust se sereur que autre chevalier.

Pour che se pena plus de le feste essauchier ;

Ensi se commencha Charles à assaier,

Que il estoit si jones qu’encore à guerroier

N’avoit-il fait barnage quant il fist che premier.

S’amours l’assali jone, il s’en seut bien aidier :

Ensi doit-on d’enfanche à valour commenchier.

Au point que Charles fist ce premier vasselage,

N’estoit-il chevaliers, ne n’avoit iretage,

Mais ses frères li Roys li fist tant d’avantage

Qu’il li donna tantost d’Angau le signerage

Pour partie de terre à tenir en hommage,

Et le fist chevalier, tel que cuer et usage

Mist tout en armes puis pour avoir vasselage,

Et avoecques tout che eut-il le cuer si large

Et manière si bone et si bele et si sage

C’on ne savoit si bon nului de son éage.

Il ne refroida pas pour estre en mariage

Ne pour castiement d’omme de son lignage,

Mais par jour et par nuit, par vent et par orage,

Aloit de marche en marche acroistre son barnage,

Et chascuns le sievoit com pantière sauvage,

Ne nus pour li sievir ne metoit terre en gage,

Mais qui n’avoit de coi s’estoit de son mainnaige,

Ou il avoit au mains bouche à court et fourage.

Seur lui pooient tout li bon clamer haussage,

Et as osteus paioit si despens et ostage

Que nus ne s’en plaingnoit ne n’i avoit damage.

Droit en armes estoit, si parans et si biaus,

Plus ates et plus joins qu’en ses plumes oisiaus,

Et séurs au cheval plus que tours en chastiaus.

S’il aloit à le jouste ou à si fais chembiaus,

Du cors droit apensés et des gambes isniaus,

En aloit en planant plus tost c’uns arondiaus

De si près qu’il riffloit gloières et bouriaus.

Sachiés n’i jouoit mie li ber à reponnaus,

Mais ou plus grant tintin d’espées seur cherviaus,

Là où véoit le plus machues et coutiaus

Et hiaumes effondrer et decauper musiaus,

Là ert adès li queins et s’ensengne royaus

De aus prendre et donner tous jours frès et nouviaus.

Du cors faisoit estaque et des deux bras flaiaus

Et de son elme englume et d’espées martiaus.

Il ne raportoit mie à l’ostel ses labliaus ;

Le plus sovent metoit sen content as fissiaus.

Hé ! Jehans de Bailloeus ! frans chevalier loiaus,

Dieu ait merchi de vous ! jà fustes-vous de chiaus !

Encore paroît-il à vous de ses meriaus.

Il féist à envis deffendre ne deffaire

Tournois, festes ne jeus, ains les faisoit atraire,

Menestreus envoisier, hiraus crier et braire,

Nis li gent gaaignant amoient son repaire,

Et or le veut chascuns et tolir et fourtraire.

Par lui régnoit Amors, qui ne set ore où traire ;

S’on amoit par amours en aussi bon affaire

Li siècles seroit bons et la gent débonnaire ;

Mais jà bon ne seroit ensanle doi contraire ;

Puisque haïne règne, amours n’i a que faire.

Nus n’aime par amours, on le veut contrefaire ;

Qui à droit ameroit il ne li porroit plaire

Riens dont il ne s’amie i péussent meffaire.

Qui se fait bon ouvrier drois est c’à l’œuvre paire ;

Mais on puet maintenant par maint essample estraire

De quele amour on aime et s’on jue à mestraire,

Car quant il ont goï ne s’en puéent-il taire.

Ahi ! Charles, bons roys, on pouroit mout retraire

De bien de vos amours et tant bel essamplaire :

C’est drois c’oisiaus gentiex par lui s’afaite et maire.

Folie me seroit ore plus arester

As enfanches de lui, car trop ai à conter

Des proueches de lui et por terre et por mer,

Et de Marcelle aussi qui cuida reveler

Contre lui par deus fois, dont il fist rafrener

Les uns par encachier, les autres par tuer,

Vous péusse assés dire et lui à droit loer ;

Mais de plus haute estoire ai tant à deviser

Qu’il m’estuet des meneurs legièrement passer.

Vous avez bien oï de l’empereur parler,

Fédri, qui piechà fu condampnés par errer

Contre Roume et le foy que il devoit tenser :

Lui et ses successeurs le convient comparer,

Mainfrois, qui descendi de lui, cuida régner

Ensi qu’il avoit fait, et au pape estriver

Et encontre l’Eglize usages alever.

Li papes, qui tout puet et cangier et muer,

Loier et desloier, assaure et condampner,

Pensa comment porroit ceste honte amender ;

Si fist les cardonnaus et les frères mander.

Quant furent assanlé et li papes souspire

En recordant comment Mainfroi les mésatire,

Que pour amonnester ne pour lui entre dire

Ne laist Dieu ne le foy ne l’Eglize à despire,

N’enver aus ne se daigne amender n’escondire.

Et si fu condampnés l’empérère se sire,

Dont chil ne doit tenir le règne ne l’empire ;

Par coi il leur loa c’on fesist tost escrire

Au bon conte d’Angau, meilleur ne sot eslire,

Qui les viegne sekeure ains que li cose empire,

Et que le terre il ait s’il le puet desconfire.

Pour le besoigne avoec le lettre miex pardire,

Et on ne dist ne fait, n’en parkemin n’en chire,

Chose, quels qu’ele soit, que on n’en oie espire.

Et quant Mainfrois le sot d’orgueil prist à sourrire,

Ne sanlant ne daingna faire qu’il s’en aïre,

Car il ne cuidoit mie, et chou le fist ochire,

Que tous li mons péust à lui tenir eslire.

Tout s’acordent ensanle à che sans contredire

Et ont messages pris tés qui doivent souffire.

Biaus chevaliers, et preus, et sages fu Mainfrois,

De toutes bonnes tèches entechiés et courtois ;

En lui ne faloit riens fors que seulement fois ;

Mais ceste faute est laide en contes et en roys.

En son demaine avoit, com sires, n’iert pas drois,

Le règne de Sezile et Puille, outre le pois

De toute sainte Eglise, et menoit son gabois

De le venue au conte et de tous les Franchois,

Et si faisoit gaitier les passages destrois,

Qu’il n’estoit ens trouvés chevaus ne palefrois

Qui ne fust retenus et pris outre sen pois,

Pour chou espéroit-il Charlon tenir as dois,

N’il ne se pourveoit de gent ne de harnois,

Ains atendi le pril sans lui vuaitier anchois.

Et unne mesquéanche en atrait .ij. ou trois.

Autre scienche estuet de guerre que de loys :

Par engien conquiert-on sen plus fort maintefois ;

Si fist Charles, qui tant ama guerre et tournois

Qu’il en dut bien adont avoir pris tous ses plois.

Pour chou fu-il mandés et pris par esliture

A si noble besoing seur toute créature,

C’ons nous essauche plus quant il va loing et dure

C’avoirs dont li tenans honnerer ne s’en dure.

Honnis soit li avoirs qui singneur deffigure,

Car c’est dou cucuel faire le nourreture.

Et si règne plus grans avarisse et usure,

Che sont li visce ou mont, che tesmoingne Escriture,

Par coi toutes vertus devient anchois oscure.

Ensi va maintenant li siècles male alure,

Car puis que li chiés faut, il convient par droiture

Les membres par desous traire à desconfiture.

Li prinche en leur sougis ne resgardent mesure,

Ne prélas en le foy, dont or fust mal séure

Toutes crestientés, et souffrist grant laidure,

Se Charles n’i éust mis piechà si grant cure ;

Par devers mescréans garda bien le pasture :

Il tous seus nous tu clés et deffense et closure.

Or vaurrai revenir à me première ourture

Des messages au pape et de leur aventure.

Quant orent besoingnié et pris congiet à droit,

Retourné sont à Rome, où on les atendoit,

Et revenu anchois c’on ne les espéroit.

Sans arester venu sont au pape tout droit ;

Le pié li ont baisié, si com il afferoit,

Et puis li ont conté comment le cose aloit,

Et en contant, chascuns de Charlon se looit

Selonc che qu’en sen lieu retenus les avoit.

Après li ont baillié l’escrit qui contenoit

Le besoingne plus clère, et plus grant foi portoit,

Car li propres séaus du bon conte i estoit.