Œuvres complètes (page 3)
Et il i deit par raison estre,
Qu’il laissa son leu et son estre
Por cele glorieuze jame
Qui a non la joie célestre :
Mieudres de li ne porra nestre,
Mien esciant, de cors de fame.
Li Cuens fu tantost chevaliers
Com il en fu poinz et mestiers,
Qu’il pot les armes endureir ;
Puis ne fu voie ne sentiers
Où il n’alast mout volentiers
Se hom s’i pot aventureir.
Si vos puis bien dire et jureir,
C’il péust son droit tenz dureir
C’onques ne fu mieudres terriers,
Tant se séust amesureir
Au boenz et les fauz forjureir,
Auz unz dolz et auz autres fiers.
Ce pou qu’auz armes fu en vie,
Tuit li boen avoient envie
De lui resambleir de menière ;
Se Diex n’amast sa compaignie,
N’éust pas Acre desgarnie
De si redoutée banière.
La mors a mis l’afaire arière
D’Acre, dont n’uns mestiers n’en ière :
La terre en remaint esbahie ;
Ci a mort délireuse et fière,
Que n’uns hom n’en fait bele chière,
Fors cele pute gent haïe.
La terre plainne de noblesce,
De charitei et de largesce,
Tant aveiz fait vilainne perte !
Ce morte ne fust gentilesce,
Et vaselages et proesce,
Vos ne fusiez pas si déserte.
Haï ! haï ! genz mal aperte !
La porte des cielz est overte ;
Ne reculeiz pas por peresce :
En brief tanz l’a or Diex offerte
Au boen Conte par sa déserte,
Qu’il l’a conquise en sa jonesce.
Ne fist mie de sa croix pile,
Si com font souvent teil .x. mile
Qui la prennent par grant faintize ;
Ainz a fait selonc l’Évuangile,
Qu’il a maint borc et mainte vile
Laissié por morir en servize
Celui Seigneur qui tot justize.
Et Diex li rent en bele guize
(Ne cuidiez pas que se soit guile),
Qu’il fait granz vertuz à devize :
Bien pert que Diex a s’arme prise
Por mettre en son roial concile.
Encor fist li Cuens à sa mort,
Qu’avec les plus povres s’amort :
Des plus povres vot estre el conte.
Quant la mort .i. teil home mort,
Que deit qu’ele ne ce remort
De mordre si tosl .i. teil conte ?
Car qui la véritei nos conte,
Je ne cuit pas que jamais monte
Sor nul cheval fèble ne fort
N’uns hom qui tant ait doutei honte,
Ne mieulz séust que honeurs monte :
N’a ci doleur et desconfort.
Li cuers le Conte est à Citiaux
Et l’arme lasus en sains ciaux,
Et li cors en gist outre meir.
Cist départirs est boens et biaux ;
Ci a trois précieulz joiaux
Que tuit li boen doivent ameir :
Lasus elz cielz fait boen semoir,
N’estuet pas la terre femreir
Ne ne c’i puet repaitre oiziaux.
Quant por Dieu se fist entameir,
Que porra Diex sor li clameir,
Quant il jugera boens et maux ?
Ha ! cuens Jehan ! biau très dolz sire !
De vos puisse hon tant de bien dire
Com hon puet dou conte Huede faire,
Qu’en lui a si bele matyre
Que Diex c’en puet joer et rire
Et sainz paradix c’en resclaire !
A iteil fin fait-il bon traire
Que hon n’en puet nul mal retraire !
Teil vie fait-il boen eslire !
Doulz et pitouz et débonaire
Le trovoit-hon en toz afaires :
Sages est qu’en ces faiz ce mire.
Mesire Erart, Diex vos maintiegne
Et en bone vie vos tiegne,
Qu’il est bien mestiers en la terre !
Que c’il avient que tost vos preigne,
Je dout li païs ne remeigne
En grant doleur et en grant guerre.
Com li cuers el ventre vos serre,
Quant Diex a mis sitost en serre
Lou Conte à la doutée enseigne !
Où porroiz teil compagnon querre ?
En France ne en Aingleterre
Ne cuit pas c’om le vos enseigne.
Ha ! Rois de France ! Rois de France !
Acre est toute jor en balance :
Secoreiz-la, qu’il est mestiers !
Serveiz Dieu de vostre sustance :
Ne faites plus ci remenance,
Ne vos ne li cuens de Poitiers.
Diex vos i verra volontiers,
Car toz est herbuz li sentiers
C’on suet batre por pénitance.
Qu’à Dieu sera amis entiers,
Voit destorbeir ces charpentiers
Qui destorbent nostre créance.
Chevalier, que faites vos ci ?
Cuens de Blois, sire de Couci,
Cuens de Saint-Pol fiz au boen Hue ?
Bien aveiz avant les cors ci.
Coument querreiz à Dieu merci,
Se la mors en voz liz voz tue ?
Vos véeiz la terre absolue
Qui à voz tenz nos ert tolue,
Dont j’ai le cuer triste et marri.
La mors ne fait nule attendue,
Ainz fiert à massue estandue :
Tost fait nuit de jor esclarci.
Tornoieur, vos, qu’atendeiz,
Qui la terre ne deffendeiz
Qui est à vostre Créatour ?
Vos aveiz bien les yex bandeiz
Quant ver Dieu ne vos deffendeiz
N’en vos ne meteiz nul atour !
Pou douteiz la parfonde tour
Dont li prison n’ont nul retour
Où par peresce descendeiz.
Ci n’a plus ne guanche ne tour :
Quant la mors vos va si entour,
A Dieu cors et arme rendeiz.
Quant la teste est bien avinée,
Au feu, deleiz la cheminée,
Si nos croizons de plain eslaiz ;
Et quant vient à la matinée,
Si est en cette voie finée.
Teil coutume a et clers et lais,
Et quant il muert et fait son lais,
Si lait sales, maisons, palais
A doleur, à fort destinée.
Lai s’en va où n’a nul relais :
De l’avoir r’est-il bone pais
Quant gist mors desus l’échinée !
Or prions au Roi glorieux
Qui par son sanc esprécieulz
Nos osta de destrucion,
Qu’en son règne délicieuz,
Qui tant est doulz et gracieuz,
Faciens la nostre mansion,
Et que par grant dévocion
Ailliens en cele région
Où diex soffri la mort crueulz.
Qui lait en teil confusion
La terre de promission,
Pou est de s’arme curieulz.
Explicit.
De Maistre Guillaume de Saint-Amour,
ou ci encoumence
LI DIZ DE MAITRE GUILLAUME DE SAINT-AMOUR, COUMENT IL FUT ESCILLIEZ,
ou
DE MÈTRE GUILLAUME DE SAINT-AMOUR.
Mss. 7218, 7633, 7615.
Oiez, prélat et prince et roi,
La desreson et le desroi
C’on a fet à mestre Guillaume :
L’en l’a banni de cest roiaume ;
A tel tort ne morut mès hom.
Qui escille homme sanz reson,
Je di que Diex qui vit et règne
Le doit escillier de son règne.
Qui droit refuse, guerre quiert ;
Et mestre Guillaume requiert
Droit et reson sanz guerre avoir.
Prélat, je vous faz asavoir
Que tuit en estes avillié.
Mestre Guillaume ont escillié
Ou li rois ou li apostoles :
Or, vous dirai à briez paroles
Que se l’apostoiles de Romme
Puet escillier d’autrui terre homme,
Li sires n’a nient en sa terre,
Qui la vérité veut enquerre.
Se li Rois dit en tel manière,
Qu’escillié l’ait par la prière
Qu’il ot de la pape Alixandre,
Ci poez novel droit aprendre ;
Mès je ne sai comment a non,
Qu’il n’est en droit ne en canon ;
Car rois ne se doit pas mesfère
Por chose c’on li sache fère.
Se li Rois dist qu’escillié l’ait,
Ci a tort et péchié et lait,
Qu’il n’afiert à roi ne à conte,
S’il entent que droiture monte,
Qu’il escille homme, c’on ne voie
Que par droit escillier le doie ;
Et se il autrement le fet,
Sachiez, de voir, qu’il se mesfet.
Se cil devant Dieu li demande,
Je ne respont pas de l’amande.
Li sans Abel requist justise
Quant la persone fu ocise.
Por ce que vous véez à plain
Que je n’ai pas tort, si le plain ;
Et que ce soit sanz jugement
Qu’il sueffre cest escillement,
Je le vous monstre à iex voians,
Ou droiz est tors et voirs noians.
Bien avez oï la descorde
(Ne covient pas que la recorde)
Qui a duré tant longuement
(.Vij. ans tos plains entirement)
Entre la gent Saint-Dominique
Et cels qui lisent de logique.
Assez i ot pro et contrà :
L’uns l’autre sovent encontra,
Alant et venant à la cort.
Li droit aus clers furent la cort,
Quar cil i firent lor voloir,
Cui qu’en déust le cuer doloir,
D’escommenier et d’assaudre :
Cui blez ne faut, sovent puet maudre.
Li prélat sorent cele guerre :
Si commencièrent à requerre
L’université et les frères
Qui sont de plus de .iiij. mères,
Qu’il lor lessaissent la pais fère.
Et guerre si doit mult desplère
A gent qui pais et foi sermonent
Et qui les bons examples donent,
Par parole et par fet ensamble.
Si comme à lor oevre me samble,
Il s’acordèrent à la pès,
Sanz commencier guerre jamès :
Ce fu fiancié à tenir
Et scelé por souvenir.
Mestre Guillaume au roi vint,
Là où des gens ot plus de .xx.
Si dist : « Sire, nous sons en mise
Par le dit et par la devise
Que li prélat deviseront :
Ne sai se cil la briseront. »
Li rois jura : « En non de mi !
Il m’auront tout à anemi
S’ils la brisent ; sachiez sans faille :
Je n’ai cure de lor bataille ! »
Li mestres parti du palais,
Où assez ot et clers et lais,
Sanz ce que puis ne mefféist,
Ne la pais pas ne defféist :
Si l’escilla sanz plus véoir.
Doit cis escillemenz séoir ?
Nenil, qui à droit jugeroit,
Qui droiture et s’âme ameroit.
S’or fesoit li rois une chose
Que mestre Guillaume propose
A fère, voir ce que il conte,
Que l’oïssent et roi et conte,
Et prince et prélat tout ensamble,
S’il dit riens que vérité samble,
Se l’ face l’en, ou autrement
Mainte âme ira à dampnement ;
S’il dit chose qui face à tère,
A enmurer ou à desfère,
Mestre Guillaume du tout s’offre
Et otrie s’il ne se sueffre.
Ne dites pas que ce requière
Por venir el roiaume arrière ;
Mès s’il dit riens qu’aus âmes vaille,
Quant il aura dist si s’en aille ;
Et vous aiez sor sa requeste
Conscience pure et honeste.
Et vous tuit qui le dit oez,
Quant Diex se monsterra cloez
Que c’ert au jor du grant juise,
Por lui demandera justise.
Et vous, sor ce que je raconte,
Si en aurez paor et honte.
Endroit de moi vous puis-je dire,
Je ne redout pas le martire
De la mort, d’où qu’ele me viègne,
S’èle me vient por tel besoingne.
Explicit de mestre Guillaume de Saint-Amor.
De Maistre Guillaume de Saint-Amour,
ou ci encoumence
LA COMPLAINTE MAÎTRE GUILLAUME DE SAINT-AMOUR,
ou
LA COMPLAINTE DE SAINT-AMOUR.
Mss. 7218, 7633, 7615.
« Vous qui alez parmi la voie,
« Arestez-vous, et chascuns voie
« S’il est dolor tel com la moie »,
Dist sainte Yglise.
« Je sui sor ferme pierre assise :
« La pierre esgrume et fent et brise,
« Et je chancèle.
« Tel gent se font de ma querele
Qui me metent en la berele ;
« Les miens ocient
« Sanz ce que pas ne me desfient,
« Ainz sont à moi, si comme il dient,
« Por miex confondre.
« Por ce font-il ma gent repondre,
« Que nus à els n’ose respondre,
« Ne mès que sire.
« Assez puéent chanter et lire,
« Mès mult a entre fère et dire ;
« C’est la nature.
« Li diz est douz et l’uevre dure :
« N’est pas tout or quanqu’on voit luire.
« Ahi ! ahi !
« Com sont li mien mort et trahi
« Et por la vérité haï
« Sanz jugement !
« Ou cil qui à droit juge ment,
« Ou il en auront vengement,
« Combien qu’il tart ;
« Com plus couve li feus, plus art.
« Li mien sont tenu por musart,
« Et je l’ compère :
« Pris ont César, pris ont Saint-Père,
« Et s’ont emprisoné mon père
« Dedenz sa terre.
« Cil ne le vont guères requerre
« Por qui il commença la guerre
« C’on n’es perçoive :
« N’est mès nus qui le ramentoive ;
« S’il fist folie, si la boive.
« Hé ! arcien !
« Décretistre, fisicien,
« Et vous la gent Justinien
« Et autre preudomme ancien,
« Comment souffrez en tel lien
« Mestre Guillaume
« Qui por moi fist de teste hiaume ?
« Or est fors mis de cest roiaume
« Li bons preudom
« Qui mist cors et vie à bandon !
« Fet l’avez de Chastel-Landon.
« La moquerie
« Me vendez, par sainte Marie.
« J’en doi plorer, qui que s’en rie ;
« Je n’en puis mais.
« Se vous estes bien et en pais,
« Bien puet passer avril et mays.
« S’il en carcha por moi tel fais,
« Je li enorte
« Que jus le mete où il le porte,
« Que jà n’est nus qui l’en déporte,
« Ainz i morra,
« Et li afères demorra.
« Face du miex que il porra,
« Je n’i voi plus ;
« Por voir dire l’a l’en conclus.
« Or est en son païs reclus,
« A Saint-Amor,
« Et nus ne fet por lui clamor.
« Or i puet fère lonc demor,
« Que je l’i lais,
« Quar vérité a fet son lais.
« Ne l’ose dire clers ne lais :
« Morte est Pitiez,
« Et Charitez et Amistiez ;
« Fors du règne les ont getiez
« Ypocrisie,
« Et Vaine-Gloire et Tricherie,
« Et Faus-Samblant et dame Envie
« Qui tout enflame.
« Savez porqoi ? Chascune est dame,
« C’on doute plus le cors que l’âme ;
« Et d’autre part,
« Nus clers à provende ne part,
« N’à dignité que l’en départ,
« S’il n’est des lor.
« Faus-Samblant et Morte-Color
« Emporte tout ; a ci dolor
« Et grant contrère.
« Li douz, li franz, li débonère,
« Cui l’en soloit toz les biens fère,
« Sont en espace ;
« Et cil qui ont fauce la face,
« Qui sont de la devine grâce
« Plain par defors,
« Cil auront Dieu et les trésors
« Qui de toz maus gardent les cors.
« Sachiez, de voir,
« Mult a sainte chose en avoir
« Quant tel gent la vuelent avoir,
« Qui sanz doutance
« Ne feroient por toute France
« Jusqu’au remors de consciance.
« Mès de celui
« Me plaing qui ne trueve nului,
« Tant ait esté amez de lui,
« Qui le requière.
« Si me complaing en tel manière :
« Ha ! fortune ! chose légière,
« Qui oins devant et poins derrière,
« Comme es marrastre !
« Clergie, comme estes mi fillastre !
« Oublié m’ont prélat et pastre ;
« Chascuns m’esloingne,
« A poi lor est de ma besoingne :
« Séjorner l’estuet en Borgoingne,
« Mat et confus.
« D’iluec ne se mouvra-il plus,
« Ainz i sera ce seureplus
« Qu’il a à vivre,
« Que jà n’ert nus qui l’en délivre.
« Escorpion, serpent et guivre
« L’ont assailli :
« Par lor assaut l’ont mal bailli,
« Et tuit mi droit li sont failli,
« Qu’il trait avant.
« Il auroit pais, de ce me vant,
« S’il voloit jurer par convant
« Que voirs fust fable,
« Et tors fust droiz, et Diex déable,
« Et fors du sens fussent resnable,
« Et noirs fust blanz ;
« Mès por tant puet user son tans,
« En tel estat, si com je pans,
« Que ce déist,
« Ne que jusques là mefféist,
« Comment que la chose préist ;
« Quar ce seroit
« Desléautez : n’il ne l’ feroit,
« Ce sai-je bien ; miex ameroit
« Estre enmurez,
« Ou desfez ou desfigurez ;
« N’il n’ert jà si desmesurez,
« Que Diex ne veut :
« Or soit ainsi comme estre puet.
« Encor est Diex là où il suet,
« Ce sai-je bien ;
« Je ne me desconfort de rien.
« Paradis est de tel merrien
« C’on ne l’a pas
« Por Dieu flater isnel le pas ;
« Ainz covient maint félon trespas
« Au cors soufferre.
« Por cheminer parmi la terre,
« Por les bones viandes querre,
« N’est-on pas sains ;
« S’il muert por moi, s’ert de moi plains.
« Voir dires a cousté à mains
« Et coustera ;
« Mès Diex, qui est et qui sera,
« S’il veut, en pou d’eure fera
« Cest bruit remaindre :
« L’en a véu remanoir graindre.
« Qui verra .ij. cierges estaindre
« Lors si verra
« Comment Jhésu-Crist ouverra,
« Qui maint orguillex à terre a
« Plessié et mis.
« Se il est por moi sanz amis,
« Diex s’ert en poi d’eure entremis
« De lui secorre.
« Or lera donc fortune corre,
« Qu’encontre li ne puet-il corre ;
« C’est or la somme.
« Où a-il nul si vaillant homme,
« Qui por l’apostoile de Romme
« Ne por le Roi,
« Ne veut desréer son erroi,
« Ainz en a souffert le desroi
« De perdre honor ?
« L’en l’apeloit mestre et seignor,
« Et de toz mestres le greignor.
« Seignor et mestre,
« Li enfant que vous verrez nestre
« Vous feront encor herbe pestre
« Se il deviennent
« De cels qui ensamble se tienent,
« Et c’il vivent qui les soustienent
« Que j’ai descrit !
« Or prions donques Jhésu-Crist
« Que cestui mete en son escrit
« Et en son règne
« Là où les siens conduit et maine ;
« Et si l’en prit la souveraine
« Virge Marie,
« Qu’avant que il perde la vie
« Soit sa volonté acomplie. »
Amen.
Explicit de mestre Guillaume de Saint-Amor, ou Explicit la Complainte de Saint-Amor.
ci commence Le Miracle de Théophile.
Ms. 7218.
Ahi ! ahi ! Diex, rois de gloire,
Tant vous ai éu en mémoire,
Tout ai doné et despendu,
Et tout ai aus povres tendu ;