Œuvres complètes (page 4)

Ne m’est remez vaillant .i. sac.

Bien m’a dit li évesque : « Eschac, »

Et m’a rendu maté en l’angle :

Sanz avoir m’a lessié tout sangle.

Or m’estuet-il morir de fain,

Se je n’envoi ma robe au pain !

Et ma mesnie que fera ?

Ne sai se Diex les pestera.

Diex ! oil ; qu’en a-il à fère ?

En autre lieu les covient trère,

Où il me fet l’oreille sorde,

Qu’il n’a cure de ma falorde

Et je li referai la moe.

Honiz soit qui de lui se loe !

N’est riens c’on por avoir ne face ;

Ne pris riens Dieu ne sa manace.

Irai-je me noier ou pendre ?

Je ne m’en puis pas à Dieu prendre,

C’on ne puet à lui avenir.

Ha ! qui or le porroit tenir

Et bien batre à la retornée,

Mult auroit fet bone jornée ;

Mès il s’est en si haut leu mis

Por eschiver ses anemis

C’on n’i puet trère ne lancier.

Se or pooie à lui tancier,

Et combatre, et escremir,

La char li feroie frémir !

Or est lasus en son solaz ;

Laz chétis ! et je sui ès laz

De povreté et de soufrète.

Or est bien ma viele frète,

Or dira l’en que je rasote :

De ce sera mès la riote.

Je n’oserai nului véoir :

Entre gent ne devrai séoir,

Que l’en m’i monsterroit au doi.

Or ne sai-je que fère doi ;

Or m’a bien Diex servi de guile.

Ici vient Théophiles

A Salatin, qui parloit

Au déable quant il voloit.

Qu’es-ce ? qu’avez-vous, Théophile ?

Por le grant Dé ! quel mautalent

Vous a fet estre si dolent ?

Vous soliiez si joiant estre !

théophiles parole.

C’on m’apeloit seignor et mestre

De cest païs, ce sez-tu bien :

Or ne me laisse-on nule rien !

S’en sui plus dolenz, Salatin,

Quar en françois ne en latin

Ne finai oncques de proier

Celui c’or me veut asproier,

Et qui me fet lessier si monde

Qu’il ne m’est remez riens el monde.

Or n’est nule chose si fière

Ne de si diverse manière

Que volentiers ne la féisse,

Par tel qu’à m’onor revenisse :

Li perdres m’est honte et domages.

Ici parole salatins.

Biaus sire, vous dites que sages ;

Quar qui a apris la richèce,

Mult i a dolor et destrèce

Quant l’en chiet en autrui dangier

Por son boivre et por son mengier ;

Trop i covient gros mos oïr.

théophiles.

C’est ce qui me fet esbahir,

Salatin, biaus très douz amis :

Quant en autrui dangier sui mis

Par pou que li cuers ne m’en criève.

salatins.

Je sai or bien que mult vous griève

Et mult en estes entrepris ;

Comme hom qui est de si grant pris

Mult en estes mas et penssis.

théophiles.

Salatin frère, or est ensis :

Se tu riens pooies savoir

Par qoi je péusse r’avoir

M’onor, ma baillie et ma grâce,

Il n’est chose que je n’en face.

salatins.

Voudriiez-vous Dieu renoier,

Celui que tant solez proier,

Toz ses sainz et toutes ses saintes ?

Et si devenissiez mains jointes

Hom à celui qui ce feroit

Qui vostre honor vous renderoit ;

Et plus honorez seriiez,

S’à lui servir demoriiez,

C’onques jor ne péustes estre.

Créez-moi, lessiez vostre mestre.

Qu’en avez-vous entalenté ?

théophiles.

J’en ai trop bone volenté :

Tout ton plesir ferai briefment.

salatins.

Alez-vous-en séurement ;

Maugrez qu’il en puissent avoir

Vous ferai vostre honor r’avoir.

Revenez demain au matin.

théophiles.

Volentiers, frère Salatin.

Cil Diex que tu croiz et aeures

Te gart, s’en ce propos demeures !

Or se despart Théophiles de Salatin, et si pensse que trop a grant chose en Dieu renoier et dist :

Ha, laz ! que porrai devenir ?

Bien me doi li cors dessenir

Quant il m’estuet à ce venir.

Que ferai, las ?

Se je reni saint Nicholas,

Et saint Jehan, et saint Thomas,

Et Nostre-Dame,

Que fera ma chétive d’âme ?

Ele sera arse en la flame

D’enfer le noir :

Là la convendra remanoir.

Ci aura trop hideus manoir,

Ce n’est pas fable,

En cele flambe perdurable

N’i a nule gent amiable,

Ainçois sont mal qu’il sont déable,

C’est lor nature ;

Et lor mesons r’est si obscure

C’on n’i verra jà soleil luire,

Ainz est uns puis toz plains d’ordure.

Là irai-gié !

Bien me seront li dé changié

Quant por ce que j’aurai mengié

M’aura Diex issi estrangié

De sa meson ;

Et ci aura bone reson :

Si esbahiz ne fu mès hom

Com je sui, voir.

Or dit qu’il me fera r’avoir

Et ma richèce et mon avoir ;

Jà nus n’en porra riens savoir :

Je le ferai.

Diex m’a grevé, je l’ greverai ;

Jamès jor ne le servirai :

Je li ennui.

Riches serai se povres sui :

Se il me het je harrai lui.

Preingne ses erres

Ou il face movoir ses guerres :

Tout a en main et ciel et terres ;

Je li claim cuite

Se Salatins tout ce m’acuite

Qu’il m’a promis.

Ici parole Salatins au déable et dist :

Uns crestiens s’est sor moi mis

Et je m’en sui mult entremis,

Quar tu n’es pas mes anemis ;

Os-tu, Sathanz ?

Demain vendra se tu l’atans.

Je li ai promis .iiij. tans :

Aten-le don,

Qu’il a esté mult grant preudon :

Por ce si a plus riche don,

Met-li ta richèce à bandon.

Ne m’os-tu pas ?

Je te ferai plus que le pas

Venir, je cuit,

Et si vendras encore anuit,

Car ta demorée me nuit ;

G’i ai béé.

Ci conjure Salatins le déable.

Bagahi, Laca, Bachahé,

Lamac, Cahi, Achabahé,

Karrelyos,

Lamac, Lamec, Bachalyos,

Cabahagi, Sabalyos,

Baryolas,

Lagozatha, Cabyolas,

Samahac et Famyolas,

Harrahya.

Or vient li Déables qui est conjuré et dist :

Tu as bien dit ce qu’il i a.

Cil qui t’aprist rien n’oublia ;

Mult me travailles.

salatins.

Qu’il n’est pas droiz que tu me failles

Ne que tu encontre moi ailles

Quant je t’apel.

Je te faz bien suer ta pel.

Veus-tu oïr .i. geu novel ?

I. clerc avons

De tel gaaing, com nous savons ;

Soventes foiz nous en grevons

Por nostre afère.

Que loez-vous du clerc à fère

Qui se voudra jà vers çà trère ?

li déables.

Comment a non ?

salatins.

Théophiles par son droit non.

Mult a esté de grant renon

En ceste terre.

li déables.

J’ai toz jors éu à lui guerre,

C’onques jor ne le poi conquerre.

Puisqu’il se veut à nous offerre,

Viengne en cel val

Sanz compaignie et sanz cheval ;

N’i aura guères de travail,

C’est près de ci.

Mult aura bien de lui merci

Sathan et li autre nerci ;

Mès n’apiaut mie

Jhésu le fil sainte Marie :

Ne li ferions point d’aïe.

De ci m’en vois :

Or soiez vers moi plus cortois ;

Ne me traveilliez mès des mois,

Va, Salatin,

Ne en ébrieu ne en latin.

Or revient Théophiles à Salatin.

Or suis-je venu trop matin ?

As-tu riens fet ?

salatins.

Je t’ai basti si bien ton plet

Quanques tes sires t’a mesfet

T’amendera,

Et plus forment t’onorera,

Et plus grant seignor te fera

C’onques ne fus.

Tu n’es or pas si du refus

Com tu seras encor du plus.

Ne t’esmaier :

Va là aval sanz délaier ;

Ne t’i covient pas Dieu proier

Ne réclamer :

Se tu veus ta besoingne amer.

Tu l’as trop trové à amer,

Qu’il t’a failli ;

Mauvèsement as or sailli.

Bien t’éust ore mal bailli

Se ne t’aidaisse

Va-t’en, que il t’atendent ; passe

Grant aléure ;

De Dieu réclamer n’aies cure.

théophiles.

Je m’en vois ; Diex ne m’i puet nuire

Ne riens aidier,

Ne je ne puis à lui plaidier.

Ici va Théophile au Déable. Si a trop grant paor, et li Déables li dist :

Venez avant, passez grant pas ;

Gardez que ne resanblez pas

Vilain qui va à offerande.

Que vous veut ne que vous demande

Vostre sires ? Il est mult fiers !

théophiles.

Voire sire ! il fu chanceliers ;

Si me cuide chacier pain querre.

Or vous vieng proier et requerre

Que vous m’aidiez à cest besoing.

li déables.

Requiers-m’en tu ?

théophiles.

Requiers-m’en tu ? Oïl.

li déables.

Requiers-m’en tu ? Oïl. Or joing

Tes mains, et si devien mes hon.

Je t’aiderai outre reson.

théophiles.

Vez ci que je vous faz hommage,

Mès que je r’aie mon domage,

Biaus sire, dès or en avant.

li déables.

Et je te refaz .i. couvant

Que te ferai si grant seignor

C’on ne te vit onques greignor.

Et puisque ainsinques avient,

Saches de voir qu’il te covient

De toi aie lettres pendanz

Bien dites et bien entendanz ;

Quar maintes genz m’en ont sorpris

Por ce que lor lettres n’en pris :

Por ce les vueil avoir bien dites.

théophiles.

Vez les ci, je les ai escrites.

Or baille Théophiles les lettres au Déable, et li Déables li commande à ouvrer ainsi :

Théophile, biaus douz amis,

Puisque tu t’es en mes mains mis,

Je te dirai que tu feras.

Jamès povre homme n’ameras :

Se povres hom sorpris te proie,

Torne l’oreille, va ta voie ;

S’aucuns envers toi s’umélie,

Respon orgueil et félonie ;

Se pauvres demande à ta porte,

Si garde qu’aumosne n’enporte.

Douçor, humilitez, pitiez,

Et charitez et amistiez,

Jeûne fère, pénitance,

Me metent grant duel en la pance ;

Aumosne fère et Dieu proier,

Ce me repuet trop anoier ;

Dieu amer et chastement vivre,

Lors me samble serpent et guivre

Me menjue le cuer el ventre.

Quant l’en en la meson Dieu entre

Por regarder aucun malade,

Lors ai le cuer si mort et fade

Qu’il m’est avis que point n’en sente :

Cil qui fet bien si me tormente.

Va-t’en ! tu seras séneschaus :

Lai les biens et si fai les maus :

Ne juger jà bien en ta vie,

Que tu feroies grant folie

Et si feroies contre moi.

théophiles.

Je ferai ce que fère doi ;

Bien est droiz vostre plesir face

Puisque j’en doi r’avoir ma grâce.

Or envoie l’Évesque querre Théophile.

Or tost liève sus, Pince-guerre ;

Si me va Theophile querre :

Se li renderai sa baillie.

J’avoie fet mult grant folie

Quant je tolue li avoie,

Que c’est li mieudres que je voie,

Ice puis-je bien por voir dire.

Or respont Pince-guerre.

Vous dites voir, biaus très douz sire !

Or parole Pince-guerre à Théophile et Théophile respont.

— Qui est céenz ? — Et vous qui estes ?

— Je sui un clers. — Et je sui prestres.

— Théophile, biau sire chiers,

Or ne soiez vers moi si fiers ;

Mes sires .i. pou vous demande :

Si r’aurez jà vostre provande,

Vostre baillie toute entière.

Soiez liez, fètes bele chière :

Si ferez et sens et savoir.

théophiles.

Déable i puissent part avoir !

J’éusse éue l’éveschié,

Et je l’i mis, si fis péchié.

Quant il i fu, s’oi à lui guerre ;

Si me cuida chacier pain querre.

Tripot lirot ! por sa haïne

Et par sa tençon qui ne fine

G’i irai ; s’orrai qu’il dira.

pince-guerre.

Quant il vous verra si rira,

Et dira por vous essaier

Le fist ; or vous reveut paier,

Et serez ami com devant.

théophiles.

Or disoient assez souvant

Li chanoine de moi granz fables ;

Je les rent à toz les déables.

Or se liève l’Évesque contre Théophiles, et li rent sa dignité, et dist :

Sire, bien puissiez-vous venir !

théophiles.

Si sai-je bien me sostenir :

Je ne sui pas chéus par voie.

li évesques.

Biaus sire, de ce que j’avoie

Vers vous mespris je l’vous ament,

Et si vous rent mult bonement

Vostre baillie : or la prenez,

Quar preudom estes et senez,

Et quanques j’ai si sera vostre.

théophiles.

Ci a mult bone patrenostre,

Mieudre assez c’onques mès ne dis.

Désormès vendront .x. et .x.

Li vilain por moi aorer,

Et je les ferai laborer.

Il ne vaut rien qui l’en ne doute :

Cuident-il je n’i voie goute ?

Je lor serai fel et irous.

li évesques.

Théophile, où entendez-vous ?

Biaus amis, penssez de bien fère.

Vez-vous céenz vostre repère,

Vez-ci vostre ostel et le mien :

Noz richèces et nostre bien

Si seront désormès ensamble ;

Bon ami serons, ce me samble :

Tout sera vostre et tout ert mien.

théophiles.

Par foi, sire, je le vueil bien.

Ici va Théophile à ses compaignons tencier, premièrement à .i. qui avoit non Pierres.

Pierres, veus-tu oïr novèle ?

Or est tornée ta rouele,

Or t’est-il chéu ambes as,

Or te tien à ce que tu as,

Qu’à ma baillie as-tu failli.

L’évesque m’en a fet bailli :

Si ne t’en sai ne gré ne grâces.

pierres respont.

Théophiles, sont-ce manaces ?

Dès ier priai-je mon seignor

Que il vous rendist vostre honor,

Et bien estoit droiz et resons.

théophiles.

Ci avoit dures faoisons

Quant vous m’aviiez forjugié.

Maugré vostres or le r’ai-gié :

Oublié aviiez le duel.

pierres.

Certes, biaus chers sire, à mon vuel

Fussiez-vous évesques éus

Quant nostre évesques fu féus ;

Mès vous ne le vousistes estre

Tant doutiiez le Roy célestre.

Or tence Théophile à .i. autre.

Thomas ! Thomas ! or te chiet mal,

Quant l’en me r’a fet séneschal.

Or leras-tu le regiber,

Et le combattre et le riber ;

N’auras pior voisin de moi.

thomas.

Théophile, foi que vous doi,

Il semble que vous soiez yvres.

théophiles.

Or en serai demain délivres,

Maugrez en ait vostre visages.

thomas.

Par Dieu ! vous n’estes pas bien sages :

Je vous aim tant et tant vous pris !

théophiles.

Thomas, Thomas ! ne sui pas pris :

Encor porrai nuire et aidier.

thomas.

Il samble vous volez plaidier,

Théophile ; lessiez me en pais.

théophiles.

Thomas, Thomas ! je que vous fais ?

Encor vous plaindrez bien à tens,

Si com je cuit et com je pens.

Ici se repent Théophile, et vient à une chapèle de Nostre-Dame, et dist :

Hé, laz ! chétis ! dolenz ! que porrai devenir ?

Terre, comment me pués porter ne soustenir

Quant j’ai Dieu renoié et celui voil tenir

A seignor et à mestre qui toz maus fet venir ?

Or ai Dieu renoié, ne puet estre téu ;

Si ai laissié le basme, pris me sui au séu.

De moi a pris la chartre et le brief recéu

Maufez, se li rendrai de m’âme le tréu.

Hé, Diex ! que feras-tu de cest chétis dolent

De qui l’âme en ira en enfer le boillant,

Et li maufez l’iront à leur piez défoulant ?

Ahi terre, quar oevre, si me va engloutant !

Sire Diex ! que fera cist dolenz esbahis

Qui de Dieu et du monde est huez et haïs

Et des maufez d’enfer engigniez et trahis,

Dont sui-je de tristoz chaciez et envaïs ?

Hé, las ! com j’ai esté plains de grant non savoir

Quant j’ai Dieu renoié por .i. petit d’avoir !

Les richèces du monde que je voloie avoir

M’ont geté en tel leu dont ne me puis r’avoir.

Sathan, plus de .vii. anz ai tenu ton sentier ;

Maus chans m’ont fet chanter li vin de mon chantier :

Mult félonesse rente m’en rendront mi rentier,

Ma char charpenteront li félon charpentier.

Ame doit l’en amer ; m’âme n’ert pas amée :

N’os demander la Dame qu’ele ne soit dampnée.

Trop a male semence en semoisons semée

De qui l’âme sera en enfer forsemée.

Ha, las ! com fol bailli et com fole baillie !

Or sui-je mal baillis et m’âme mal baillie !

S’or m’osoie baillier à la douce baillie,

G’i seroie bailliez et m’âme jà baillie.

Ors sui, et ordoiez doit aler en ordure ;

Ordement ai ouvré, ce set cil qui or dure

Et qui toz jors durra : s’en aurai la mort dure.

Maufez, com m’avez mors de mauvèse morsure !

Or n’ai-je remanance ne en ciel ne en terre.

Ha, las ! où est li lieus qui me puisse soufferre ?

Enfers ne me plest pas où je me voil offerre ;

Paradis n’est pas miens quant j’ai au Seignor guerre.

Je n’os Dieu réclamer ne ses sainz ne ses saintes,

Las ! que j’ai fet hommage au déable mains jointes.

Li maufez en a lettres de mon anel empraintes.

Richèce, mar te vi : j’en aurai dolors maintes.

Je n’os Dieu ne ses saintes ne ses sainz réclamer,

Ne la très douce dame, que chascuns doit amer.

Mès por ce qu’en li n’a félonie n’amer,

Se je li cri merci nus ne m’en doit blasmer.

C’est la proière que Théophiles dist devant Nostre-Dame :

Sainte roïne bele,

Glorieuse pucèle,

Dame de grâce plaine

Par qui toz biens revèle,

Qu’au besoing vous apèle

Délivrez est de paine,

Qu’à vous son cuer amaine

Ou pardurable raine

Aura joie novèle,

Arousable fontaine

Et delitable et saine,

A ton Filz me rapèle.

En vostre douz servise

Fu jà m’entente mise,

Mès trop tost fui temptez

Par celui qui atise

Le mal et le bien brise.

Sui trop fort enchantez ;

Car me désenchantez,

Que vostre volentez

Est plaine de franchise,

Ou de granz orfentez