Œuvres complètes (page 5)

Sera mes cors rentez

Devant la fort justice.

Dame sainte Marie,

Mon corage varie ;

Ainsi que il te serve,

Ou jamès n’ert tarie

Ma dolors ne garie,

Ains sera m’âme serve ;

Ci aura dure verve

S’ainz que la mors n’énerve,

En vous ne se marie

M’âme qui vous enterve.

Souffrez li cors déserve,

L’âme ne soit périe.

Dame de charité,

Qui par humilité

Portas nostre salu,

Qui toz nos a geté

De duel et de vilté

Et d’enferne palu ;

Dame, je te salu !

Ton salu m’a valu

(Je l’sai de vérité),

Gar qu’avoec Tentalu

En enfer le jalu

Ne praingne m’érité.

En enfer ert offerte

Dont la porte est ouverte

M’âme par mon outrage :

Ci aura dure perte

Et grant folie aperte

Se là praing herbregage.

Dame, or te faz hommage :

Torne ton douz visage ;

Por ma dure déserte

El non ton filz, le sage

Ne sousfrir que mi gage

Voisent à tel poverte.

Si com en la verrière

Entre et reva arriere

Li solaus que n’entame,

Ainsinc fus virge entière

Quant Diex, qui ès ciex ière,

Fist de toi mère et dame.

Ha ! resplendissant jame,

Tendre et piteuse fame,

Quar entent ma proière,

Que mon vil cors et m’âme

De pardurable flame

Rapelaisses arrière.

Roïne débonaire,

Les iex du cuer m’esclaire

Et l’obscurté m’esface,

Si qu’à toi puisse plaire

Et ta volenté faire,

Car m’en done la grace ;

Trop ai éu espace

D’estre en obscure trace :

Encor m’i cuident traire

Li serf de pute estrace ;

Dame, jà toi ne place

Qu’il facent le contraire !

En vilté, en ordure,

En vie trop obscure

Ai esté lonc termine,

Roïne nete et pure,

Quar me pren en ta cure

Et si me médecine.

Par ta vertu devine,

Qu’adès est enterine,

Fai dedenz mon cuer luire

La clarté pure et fine,

Et les iex m’enlumine

Que ne m’en voi conduire.

Li proières qui proie

M’a jà mis en sa proie :

Pris serai et préez ;

Trop asprement m’asproie.

Dame, ton chier Filz proie

Que soie despréez ;

Dame, car leur véez

Qui mes mesfez véez

Que n’avoie à leur voie.

Vous qui lasus séez,

M’âme leur dévéez

Que nus d’aus ne la voie.

Ici parole Nostre-Dame à Théophile et dist :

Qui es-tu, va, qui vas par ci ?

— Ha ! Dame, aiez de moi merci !

C’est li chétis

Théophile, li entrepris

Que maufé ont loié et pris.

Or vieng proier

A vous, Dame, et merci crier

Que ne gart l’eure qu’asproier

Me viengne cil

Qui m’a mis à si grant escil.

Tu me tenis jà par ton fil,

Roïne bele !

nostre-dame parole.

Je n’ai cure de ta favèle ;

Va-t’en, is fors de ma chapèle.

théophiles parole.

Dame, je n’ose.

Flors d’aiglentier et lis et rose

En qui li filz Dieu se repose,

Que ferai-gié ?

Malement me sent engagié

Envers le maufé enragié.

Ne sai que fère !

Jamès ne finirai de brère,

Virge, pucèle débonère.

Dame honorée,

Bien sera m’âme devorée

Qu’en enfer sera demorrée

Avoec Cahu.

nostre-dame.

Théophile, je t’ai séu

Çà en arrière à moi éu ;

Saches de voir,

Ta chartre te ferai ravoir

Que tu baillas par non savoir :

Je la vois querre.

Ici va Nostre-Dame prendre la chartre Théophile.

Sathan, Sathan ! es-tu en serre ?

S’es or venuz en ceste terre

Por commencier à mon clerc guerre,

Mar le penssas.

Rent la chartre que du clerc as,

Quar tu as fet trop vilains cas.

sathan parole.

Je la vous rande !…

J’aim miex assez que l’en me pende.

Jà li rendi-je sa provande

Et il me fist de lui offrande

Sanz demorance,

De cors et d’âme et de sustance.

nostre-dame.

Et je te foulerai la pance.

Ici aporte Nostre-Dame la chartre à Théophile.

Amis, ta chartre te raport.

Arivez fusses à mal port

Où il n’a solaz ne déport ;

A moi entent :

Va à l’évesque et plus n’atent ;

De la chartre li fai présent,

Et qu’il la lise

Devant le pueple en sainte yglise,

Que bone gent n’en soit sorprise

Par tel barate.

Trop aime avoir qui si l’achate ;

L’âme en est et honteuse et mate.

théophile.

Volontiers, Dame,

Bien fusse mors de cors et d’âme :

Sa painne pert qui ainsi same,

Ce voi-je bien.

Ici vient Théophile à l’Évesque, et li baille sa chartre, et dist :

Sire, oiez-moi ! Por Dieu merci,

Quoi que j’aie fet or sui ici.

Par tenz sauroiz

De qoi j’ai mult esté destroiz :

Povres et nus, et maigres et froiz

Fui par défaute.

Anemis qui les bons assaute

Ot fet à m’âme geter faute

Dont mors estoie.

La Dame qui les siens avoie

M’a desvoié de male voie

Où avoiez

Estoie et si forvoiez

Qu’en enfer fusse convoiez

Par le déable,

Que Dieu, le père espéritable,

Et toute ouvraingne charitable

Lessier me fist.

Ma chartre en ot de quanqu’il dist ;

Séelé fu quanqu’il requist :

Mult me greva

Par poi li cuers ne me creva.

La Virge la me raporta,

Qu’à Dieu est mère,

La qui bonté est pure et clère.

Si vous vueil proier com mon père

Qu’el soit léue,

Qu’autre gent n’en soit decéue

Qui n’ont encore apercéue

Tel tricherie.

Ici list l’Évesque la chartre, et dist :

Oiez, por Dieu le filz Marie :

Bone gent, si orrez la vie

De Théophiles

Qu’anemis servi de guile.

Ausi voir comme est Évangile

Est ceste chose :

Si vous doit bien estre desclose.

Or escoutez que vous propose :

« A tos cels qui verront ceste lettre commune

« Fet Sathan à savoir que jà torna fortune,

« Que Théophiles ot à l’évesque rancune,

« Ne li lessa l’évesque seignorie nesune.

« Il fu désespérez quant l’en li fist l’outrage ;

« A Salatin s’en vint qui ot el cors la rage,

« Et dist qu’il li feroit mult volentiers hommage

« Se rendre li pooit s’onor et son domage.

« Je le guerroiai tant com mena sainte vie,

« C’onques ne poi avoir desor lui seignorie.

« Quant il me vint requerre, j’oi de lui grant envie,

« Et lors me fist hommage, si r’ot sa seignorie.

« De l’anel de son doit séela ceste lettre ;

« De son sanc les escrist, autre enque n’i fist metre,

« Ains que je me vousisse de lui point entremettre

« Ne que je le féisse en dignité remettre. »

Issi ouvra icil preudom.

Délivré l’a tout à bandon

La Dieu ancele ;

Marie, la virge pucele,

Délivré l’a de tel querele :

Chantons tuit por ceste novele.

Or levez sus ;

Disons : Te Deum laudamus !

Explicit le Miracle de Théophile.

De Monseigneur Anseau de l’Isle,

ou ci encoumence

DE MONSEIGNEUR ANCÉEL DE L’ISLE,

ou

DE MONSEIGNOR ENCEL DE LILLE.

Mss. 7218, 7633, 7615.

Iriez, à maudire la mort

Me voudrai désormès amordre

Qui adès à mordre s’amort,

Qui adès ne fine de mordre ;

De jor en jor, çà et là, mort

Cels dont le siècle fet remordre :

Je di que si grant mors a mort,

Que Valmondois a geté d’ordre.

Valmondois est de valor monde ;

Bien en est la valor mondée,

Quar la mort, qui les bons esmonde,

Par qui larguesce est esmondée,

A or pris l’un des bons du monde.

Las ! com ci a male estondée !

De France a osté une esponde :

De cele part est afondée.

Avoec les sainz soit mise en sele

L’âme de mon seignor Ansel,

Car Diex, qui ses amis ensèle,

L’a trové et fin et féel ;

Mès la mort, qui les bons flaèle,

A aporté félon flael ;

A l’Isle fors lettres saèle :

Osté en a le fort séel.

Je di fortune est non voianz,

Je di fortune ne voit goute,

Ou en son sens est desvoianz ;

Les uns atret, les autres boute.

Li povres hom, li meschéanz

Monte si haut chascuns le doute ;

Li vaillanz hom devient noianz :

Issi va sa manière toute.

Tost est uns hom enson la roe :

Chascuns le sert, chascuns l’oneure,

Chascuns l’aime, chascuns l’aroe ;

Mès ele torne en petit d’eure,

Que li serviz chiet en la boe

Et li servant li corent seure ;

Nus ne tent au lever la poe :

En cort terme a non Chantepleure.

Toz jors déust uns preudon vivre,

Se mort éust sens ne savoir ;

S’il fust mors, si déust revivre,

Ice doit bien chascuns savoir.

Mès mort est plus fière que guivre,

Et si plaine de non-savoir,

Que des bons le siècle délivre

Et aus mauvès lest vie avoir.

Qui remire la bele chace

Que fère soliiez jadis,

Lès voz braches entrer en trace

Çà .v. çà .vij. çà .ix. çà .x.

(N’est nul qui li cuers mal n’en face),

Ne por âme nul bien jadis :

Dieu pri qee vous otroit sa grâce,

Et doinst à l’âme paradis.

Amen.

Explicit de mon seignor Anseau de l’Isle.

La Complainte d’Outre-Mer, ou C’EST LA COMPLAINTE D’OUTRE-MEIR.

Mss. 7218, 7633, 7615.

Empereor et roi et conte,

Et duc et prince à cui l’en conte

Romanz divers por vous esbatre

De cels qui se seulent combatre

Çà en arriers por sainte Yglise,

Quar me dites par quel servise

Vous cuidiez avoir paradis.

Cil le gaaignièrent jadis

Dont vous oez ces romans lire,

Par la paine et par le martire

Que li cors souffrirent sor terre.

Vez ci le tems ; Diex vous vient querre,

Braz estenduz de son sanc tains,

Par qui li feus vous ert destains

Et d’enfer et de purgatoire !

Recommenciez novele estoire :

Servez Dieu de fin cuer entier,

Quar Diex vous monstre le sentier

De son païs et de sa marche,

Que l’en, sanz raison, li sormarche.

Por ce si devriiez entendre

A revengier et à deffendre

La terre de promission

Qui est en tribulacion,

Et perdue, se Diex n’en pensse,

Se prochainement n’a deffensse.

Soviegne-vous de Dieu le Père

Qui por souffrir la mort amère

Envoia en terre son Fil ;

Or est la terre en grant péril

Là où il fu et mors et vis.

Je ne sai que plus vous devis :

Qui n’aidera en ceste empointe,

Qui ci fera le mésacointe,

Poi priserai tout l’autre afère,

Tant sache le papelart fère ;

Ainz dirai mès et jor et nuit :

« N’est pas tout or quanqu’il reluit. »

Ha ! rois de France, rois de France,

La loi, la foi et la créance

Va presque toute chancelant !

Que vous iroie plus celant ?

Secorez-la, c’or est mestiers ;

Et vous et li quens de Poitiers

Et li autre baron ensamble :

N’atendez pas tant que vous emble

La mors l’âme, por Dieu seignor ;

Mès qui voudra avoir honor

En paradis, si le déserve,

Quar je n’i voi nule autre verve.

Jhésu-Criz dist en l’Évangile,

Qui n’est de trufe ne de guile :

« Ne doit pas paradis avoir

« Qui famé et enfanz et avoir

« Ne lest por l’amor de celui

« Qu’en la fin ert juges de lui. »

Assez de gent sont mult dolant

De ce que l’en trahi Rollant,

Et pleurent de fausse pitié,

Et voient à iex l’amistié

Que Diex nous fist qui nous cria,

Qui en la sainte croiz cria

Aus Juys qu’il moroit de soi :

Ce n’ert pas por boivre à guersoi ;

Ainz avoit soi de nous réembre.

Celui doit l’en douter et criembre,

Por tel seignor doit l’en plorer

Qu’ainsinc se lessa devoier,

Qui se fist percier le costé

Por nous oster du mal osté :

Du costé issi sanc et ève

Qui ses amis nétoie et lève.

Rois de France, qui avez mis

Et vostre avoir et voz amis

Et le cors por Dieu en prison,

Ci aura trop grant mesprison

S’à la sainte terre failliez.

Or covient que vous i ailliez

Ou vous i envoiez de gent,

Sanz espargnier or ne argent,

Dont li droiz Dieu soit calengiez.

Diex ne veut fère plus lons giez

A ses amis, ne longue lenge ;

Ainçois i veut metre calenge,

Et veut cels le voisent véoir

Qu’à sa destre voudront séoir.

Ahi ! prélat de sainte Yglise,

Qui por garder les cors de bise

Ne volez aler aus matines,

Mesires Giefrois de Surgines

Vous demande de là la mer ;

Mès je di cil fet à blasmer

Qui riens nule plus vous demande

Fors bons vins et bone viande

Et que li poivres soit bien fors !…

C’est vostre guerre et voz effors ;

C’est vostre Diex, c’est vostre biens :

Vostre père i tret le fiens.

Rustebues dist, qui riens ne çoile,

Qu’assez aurez d’un pou de toile,

Se les pances ne sont trop grasses ;

Et que feront les ames lasses ?

Els iront là ou dire n’ose :

Diex ert juges de ceste chose.

Quar envoiez le redéisme

A Jhésu-Crist du sien méisme :

Se li fetes tant de bonté,

Puis qu’il vous a si haut monté.

Ahi ! grant cler, grant provandier,

Qui tant estes grant viandier,

Qui fetes Dieu de vostre pance,

Dites-moi par quel acointance

Vous partirez au Dieu roiaume,

Qui ne volez pas dire .i. siaume

Du Sautier (tant estes divers),

Fors celui où n’a que .ij. vers.

Celui dites après mengier.

Diex veut que vous l’alez vengier

Sanz controver nul autre essoine,

Ou vous lessiez le patremoine

Qui est du sanc au Crucéfi.

Mal le tenez, je vous afi :

Se vous servez Dieu à l’église,

Diex vous resert en autre guise,

Qu’il vous pest en vostre meson !

C’est quite quite par reson ;

Mès se vous amez le repère

Qui sanz fin est por joie fère,

Achetez-le, que Diex le vent ;

Quar il a mestier par couvent

D’acheteors, et cil s’engingnent

Qui orendroit ne le barguignent ;

Quar tels foiz le voudront avoir

C’on ne l’aura pas por avoir.

Tornoieor, vous que direz,

Qui au jor du juyse irez ?

Devant Dieu que porrez respondre ?

Quar lors ne se porront repondre

Ne gent clergies, ne gent laies,

Et Diex vous monsterra ses plaies !

Se il vous demande la terre

Où por vous vout la mort soufferre,

Que direz-vous ? Je ne sais qoi.

Li plus hardi seront si qoi

C’on les porroit penre à la main :

Et nous n’avons point de demain,

Quar li termes vient et aprouche

Que la mort nous clorra la bouche.

Ha, Antioche ! terre sainte !

Com ci a dolereuse plainte

Quant tu n’as mes nus Godefroiz !

Li feus de charité est froiz

En chascun cuer de crestien :

Ne jone homme ne ancien

N’ont por Dieu cure de combatre.

Assez se porroit jà débatre

Et Jacobins et Cordeliers,

Qu’il trovaissent nus Angeliers,

Nus Tancrés, ne nus Bauduins ;

Ainçois lèront aus Béduins

Maintenir la terre absolue,

Qui par défaut nous est tolue ;

Et Diex l’a jà d’une part arse.

D’autre part vienent cil de Tharse :

Et Coramin et Chenillier

Revendront por tout escillier !

Jà ne sera (pii la desfande.

Se mesires Giefroiz me demande

Secors, si quière qui li face,

Que je n’i voi nule autre trace ;

Quar com plus en sermoneroie

Et plus la fère empireroie !

Cis siècles faut : qui bien fera

Après la mort le trovera.

Explicit la Complainte d’outre-mer.

La Complainte de Constantinoble,

ou ci encoumence

LA COMPLAINTE DE CONSTANTINOBLE.

Mss. 7218, 7633.

Souspirant por l’umain lingnage

Et penssis au cruel domage

Qui de jor en jor i avient,

Vous vueil descouvrir mon corage,

Que ne sai autre laborage :

Du plus parfont du cuer me vient.

Je sais bien, et bien m’en sovient,

Que tout à avenir covient

Quan c’ont dit li prophète sage :

Or porroit estre se devient

Que la foi qui foible devient

Porroit changer nostre langage.

Nous en sons bien entré en voie ;

N’i a si fol qui ne le voie,

Quant Constantinoble est perdue,

Et la Morée se r’avoie

A recevoir tele escorfroie

Dont sainte Yglise est esperdue !

Que l’ cors a petit d’atendue,

Quant il a la teste fendue.

Je ne sai que plus vous diroie !

Se Jésu-Chris ne fet aïue

A la Sainte Terre absolue,

Bien li ert esloingnie joie !

D’autre part vienent li Tartaire,

Que l’en fera mès à tart taire,

C’on n’avoit cure d’aler querre :

Diex gart Jasphes, Acre, Césaire !

Autre secors ne lor pui faire,

Que je ne sui mès hom de guerre.

Ha, Antioche ! sainte terre,

Qui tant coustastes à conquerre,

Ainz c’on vous péust à nous traire !

Qui des ciex cuide ouvrir la serre

Comment puet tel dolor soufferre ?

Sil à Dieu cert dont par contraire ?

Isle de Cret, Corse et Sezile,

Chypre, douce terre et douce isle

Où tuit avoient recouvrance,

Quant vous serez en autrui pile

Li rois tendra deçà concile

Comment Aiouls s’en vint on France ;

Et fera nueve remanance

A cels qui font nueve créance,

Novel Dieu et nueve Évangile ;

Et lera semer par doutance,

Ypocrisie, sa semance

Qui est dame de ceste vile.

Se li denier que l’en a mis

En cels qu’à Dieu se font amis

Fussent mis en la Terre-Sainte,

Ele en éust mains d’anemis

Et mains tost s’en fust entremis

Cil qui l’a jà brisie et frainte ;

Mès trop à tart en faz la plainte,