Œuvres complètes (page 6)

Qu’ele est jà si forment empainte

Que ses pooirs n’est mès demis :

De légier sera mès atainte

Quant sa lumière est jà estainte

Et sa cire devient remis.

De la terre Dieu qui empire,

Sire Diex, que porront or dire

Li Rois et li quens de Poitiers ?

Diex resueffre novel martire.

Or facent large cimetire

Cil d’Acre, qu’il lor est mestiers :

Toz est plains d’erbe li sentiers

C’on soloit batre volontiers

Por offrir l’âme en lieu de cire ;

Et Diex n’a mès nus cuers entiers

Ne la terre n’a nus rentiers,

Ainçois se torne à desconfire.

Jhérusalem, ahi ! ahi !

Com t’a blecié et esbahi

Vaine gloire, qui toz maus brasse,

Et cil qui seront envaï

Et charront là où cil chaï

Qui par orgueil perdi sa grâce !

Or du fuir la mort les chace

Qui lor fera de pié eschace :

Tart crieront : « Trahi ! trahi ! »

Qu’ele a jà entesé sa mache,

Ne jusqu’au férir ne manace ;

Lors harra Diex qui le haï.

Or est en tribulacion

La terre de promission,

A pou de gent tout esbahie :

Sire Diex ! porqoi l’oublion,

Quant por nostre redempcion

I fu la char de Dieu trahie ?

L’en lor envoia en aïe

Une gent despite et haïe,

Et ce fu lor destruction.

Du roi durent avoir lor vie ;

Li Rois ne l’a pas assouvie :

Or guerroient sa nascion.

L’en sermona por la croiz prendre,

Que l’en cuida paradis vendre

Et livrer de par l’apostole :

L’en pot bien le sermon entendre,

Mès à la croiz ne vout nus tendre

La main por piteuse parole.

Or nous deffent-on la carole,

Que c’est ce qui la terre afole,

Ce nous vuelent li frère aprendre ;

Mès faussetez, qui partout vole,

Qui crestiens tient à escole,

Fera la sainte terre rendre.

Que sont les deniers devenuz

Qu’entre Jacobins et Menuz

Ont recéuz de testament,

De bougres por loiaus tenuz

Et d’useriers viex et chenuz

Qui se muèrent soudainement ;

Et de clers aussi fètement,

Dont il ont grant aünement,

Dont li ost Dieu fust maintenuz ?

Mès il le font tout autrement,

Qu’il en font lor grant fondement :

Et Diex remaint là outre nuz.

De Gresse vint chevalerie

Premièrement d’ancesserie ;

Si vint en France et en Bretaingne :

Grant pièce i a esté chiérie ;

Or est à mesnie eschérie,

Que nus n’est tels qui la retiengne.

Mort sont Ogier et Charlemaine :

Or s’en voist qui plus n’i remaingne.

Loiautez est morte et périe ;

C’estoit sa monjoie et s’ensaingne,

C’estoit sa dame et sa compaigne,

Et sa mestre herbregerie.

Coument amera sainte Esglize

Qui ceux n’aimme pas c’on la prize ?

Je ne voi pas en queil menière :

Li rois ne fait droit ne justize

A chevaliers, ainz les desprize,

Et ce sunt cil par qu’ele est chière,

Fors tant qu’en prison fort et fière

Met l’un avant et l’autre arière,

Jà tant n’iert hauz hom à devise ;

En leu de Naimon de Bavière

Tient li Rois une gens doublière

Vestuz de robe blanche et grize.

Tant faz-je bien savoir le roi,

S’en France sorsist .i. desroi,

Terre ne fust si orfeline,

Que les armes et le conroi,

Et le conseil et tout l’erroi,

Lessast-on sor la gent béguine.

Lors si véist-l’en biau couvine

De cels qui France ont en sesine,

Où il n’a mesure ne roi ;

Se l’ savoient gent tartarine,

Jà por paor de la marine

Ne lesseroient cest enroi.

Li Rois qui paiens asséure

Pensse bien ceste encloéure :

Por ce tient-il si près son règne ;

Tels a alé simple aléure

Qui tost li iroit l’ambléure

Sor le destrier à lasche resne.

Coite folie est plus saine

Que langue de fol conseil plaine.

Or se tiengne en sa tenéure :

S’outre mer n’éust fet estraine

De lui miex en vousist le raisne :

S’en fust la terre plus séure.

Mesire Giefroi de Surgines,

Je ne voi mès deçà nus signes

Que l’en desormès vous seuqure.

Li cheval ont mal ès eschines

Et li riche homme en lor poitrines ;

Que fet Diex, qui ne’s par anqure ?

Encor viendra tout à tens l’eure

Que li maufé noir comme meure

Les tendront en lor desciplines !

Cels apeleront Chantepleure,

Et sans sejor lor corront seure

Qui lor liront longues matines.

Explicit la Complainte de Constantinoble.

ci encoumence

La Nouvele Complainte d’Outre-Mer.

Ms. 7633.

Pour l’anui et por le damage

Que je voi en l’umain linage,

M’estuet mon pencei descovrir :

En sospirant m’estuet ovrir

La bouche por mon voloir dire

Com homs corrouciez et plains d’ire.

Quant je pens à la sainte terre

Que péchéour doient requerre

Ainz qu’il aient pascei jonesce,

Et je’s voi entreir en viellesce,

Et puis aleir de vie à mort,

Et pou en voi qui s’en amort

A empanrre la sainte voie,

Ne faire par quoi Diex les voie :

S’en suiz iriez par charitei ;

Car sainz Poulz dist par veritei :

« Tuit sons .i. cors en Jhésu-Crit, »

Dont je vos monstre par l’escrit

Que li uns est membres de l’autre,

Et nos sons ausi com li viautre

Qui se combatent por .i. os :

Plus en déisse, mais je n’oz.

Vos qui aveiz sens et savoir,

Entendre vos fais et savoir

Que de Dieu sunt bien averies

Les paroles des prophécies.

En crois morut por noz mesfais

Que nos et autres avons fais ;

Ne morra plus, ce est la voire :

Or poons soz noz piauz acroire.

Voirs est que David nos recorde,

Diex est plains de miséricorde ;

Mais veiz-ci trop grant restrainture.

Il est juges plains de droiture,

Il est juges fors et poissans,

Et sages et bien connoissans,

Juges que on ne puet plaissier,

Ne hom ne puet sa cort plaissier,

Fors li fors (fox est qui c’efforce

A ce que il vainque sa force) ;

Poissans que riens ne li eschape,

Por quoi qu’il at tot soz sa chape ;

Sages c’on non puet desevoir ;

Se puet chacuns aparsovoir,

Connoissans qu’il connoist la choze

Avant que li hons la propoze,

Qui doit aleir devant teil juge

Sens troveir recet ne refuge.

C’il at tort, paour doit avoir

C’il a en lui sans ne savoir.

Prince, baron, tournoiour,

Et vos autre séjornéour

Qui teneiz à aise le cors,

Quant l’arme serat mise fors,

Queil porra-ele osteil prendre ?

Sauriiez-le me vos aprendre ?

Je ne le sai pas, Diex le sache !

Mais trop me plaing de vostre outrage,

Quant vos ne pouceiz à la fin

Et au pélérinage fin

Qui l’arme pécherresse afine

Si qu’à Dieu la rent pure et fine.

Prince premier qui ne saveiz

Combien de terme vos aveiz

A vivre en ceste morteil vie,

Que n’aveiz-vos de l’autre envie

Qui cens fin est por joie faire,

Que n’entendeiz à vostre afaire,

Tant com de vie aveiz espace ?

N’atendeiz pas que la mors face

De l’arme et dou cors deservrance.

Ci auroit trop dure atendance,

Car li termes vient durement,

Que Dieux tanrra son jugement.

Quant li plus juste d’Adam nei

Auront paour d’estre dampnei,

Ange et archange trembleront,

Les laces armes que feront ?

Queil part ce porront-elz repondre,

Qu’à Dieu ne’s estuisse répondre

Quant il at le monde en sa main

Et nos n’avons point de demain ?

Rois de France, rois d’Aingleterre,

Qu’en jonesce deveiz conquerre

L’oneur dou cors, le preu de l’âme,

Ainz que li cors soit soz la lame,

Sanz espargnier cors et avoir,

S’or voleiz paradix avoir

Si secoreiz la Terre-Sainte

Qui est perdue à seste empainte,

Qui n’a pas .i. an de recours,

S’en l’an méismes n’a secours ;

Et c’ele est à voz tenz perdue,

A cui tenz ert-ele rendue ?

Rois de Sézile, par la grâce

De Dieu, qui vos dona espace

De conquerre Puille et Cézille,

Remembre-vos de l’Évuangile

Qui dist qui ne lait peire et meire,

Fame et enfans et suers et freires,

Possessions et manandies,

Qu’il n’a pas avec li parties.

Baron, qu’aveiz-voz en pancei ?

Seront jamais par vos tensei

Cil d’Acre qui sunt en balance

Et de secorre en espérance ?

Cuens de Flandres ou de Bergoingne,

Cuens de Nevers con grant vergoingne

De perdre la terre absolue

Qui à voz tenz nos iert tolue !

Et vos autres baron encemble,

Qu’en dites-vos ? que il vos cemble ?

Saveiz-vos honte si aperte

Com de soffrir si laide perte ?

Tournoieur, vos qui aleiz

En yver, et vos enjaleiz

Querre places à tournoier,

Vos ne poeiz mieux foloier.

Vos despandeiz et sens raison

Vostre tens et vostre saison,

Et le vostre et l’autrui en tasche ;

Le noiel laissiez por l’escraffe

Et paradix pour vainne gloire.

Avoir déussiez en mémoire

Monseignor Joffroi de Sergines,

Qui fu tant boens et fu tant dignes

Qu’en paradix est coroneiz

Com sages et bien ordeneiz,

Et le conte Huede de Nevers

Dont hom ne puet chanson ne ver

Dire se boen non et loiaul

Et bien loei en court roiaul.

A ceux déussiez panrre essample,

Et Acres secorre et le Temple.

Jone escuier au poil volage,

Trop me plaing de vostre folage,

Qu’à nul bien faire n’entendeiz

Ne de rien ne vos amendeiz.

Si fustes filz à mains preudoume,

Teil com je’s vi, je les vos nome,

Et vos estes muzart et nice

Que n’entendeiz à vostre office ;

De veoir preudoume aveiz honte.

Vostre esprevier sunt trop plus donte

Que vos n’iestes, c’est vériteiz ;

Car teil i a, quant le geteiz,

Seur le poing aporte l’aloe :

Honiz soit qui de lui se loe,

Se n’est Diex ne vostre pays :

Li plus sages est foux nayx.

Quant vos deveiz aucun bien faire,

Qu’à aucun bien vos doie traire,

Si le faites tout autrement,

Car vos toleiz vilainnement

Povres puceles lor honeurs ;

Quant ne puéent avoir seigneurs,

Lors si deviennent dou grant nombre :

C’est .i. péchiez qui vos encombre.

Vos povres voizins sozmarchiez,

Ausi bien at léans marchiez

Vendre vos bleiz et vostre aumaille

Com cele autre povre piétaille.

Toute gentilesce effaciez ;

Il ne vos chaut que vos faciez

Tant que viellesce vos efface,

Que ridée vos est la face,

Que vos iestes viel et chenu

Por ce qu’il vos seroit tenu

A gilemeir dou parentei,

Non pas par vostre volentei.

S’estes chevalier leiz la couche

Que vous douteiz .i. poi reproche,

Mais se vos amissiez honeur

Et doutissiez la déshoneur,

Et amissiez vostre lignage,

Vos fussiez et preudome et sage.

Quant vostre tenz aveiz vescu,

Qu’ainz paiens ne vit vostre escu,

Que deveiz demandeir celui

Qui sacrefice fist de lui ?

Je ne sai quoi, se Diex me voie,

Quant vos ne teneiz droite voie.

Prélat, clerc, chevalier, borjois,

Qui trois semainnes por .i. mois

Laissiez aleir à vostre guise

Sens servir Dieu et sainte Église,

Dites ! saveiz-vos en queil livre

Hom trueve combien hon doit vivre ?

Je ne sai : je non puis troveir ;

Mais je vos puis par droit proveir

Que quant li hons commence à nestre

En cest siècle a-il pou à estre,

Ne ne seit quant partir en doit.

La riens qui plus certainne soit,

Si est que mors nos corra seure :

La mains certainne si est l’eure.

Prélat auz palefrois norrois,

Qui bien saveiz par queil norrois

Li filz Dieu fu en la crois mis

Por cofondre ces anemis,

Vos sermoneiz aus gens menues

Et aux povres vielles chenues

Qu’elz soient plainnes de droiture.

Maugrei eulz font-ele penance,

Qu’eles ont sanz pain assé painne,

Et si n’ont pas la pance plainne.

N’aiez paour ; je ne di pas

Que vos meueiz isnele pas

Por la sainte terre défendre ;

Mais vos poeiz entor vos prendre

Asseiz de povres gentilz homes

Qui ne mainent soumes ne soumes,

Qui doient et n’ont de qu’il paient,

Et lor enfant de fain s’esmaient ;

A cex doneiz de vostre avoir

Dont par tens porreiz pou avoir :

Ces envoiez outre la meir

Et vos faites à Dieu ameir.

Montreiz par bouche et par example

Que vos ameiz Dieu et le Temple.

Clerc à aise et bien séjornei,

Bien vestu et bien séjornei

Dou patrimoinne au Crucéfi,

Je vos promet et vos afi,

Se vos failliez Dieu orendroit,

Qu’il vos faudra au fort endroit.

Vos sereiz forjugié en court,

Ou la riègle faut qui or court :

« Por ce te fais que tu me faces,

Non pas por ce que tu me haces. »

Diex vos fait bien ; faites-li donc

De quoi, de cuer, et d’arme don ;

Si fereiz que preu et que sage.

Or me dites queil aventage

Vos puet faire vostres trésors

Quant l’arme iert partie dou cors ?

Li exécuteur le retiennent

Juqu’à tant qu’à lor fin reviennent

Chacun son éage à son tour :

C’est manière d’exécutour ;

Ou il avient par méchéance

Qu’il en donent por reparlance

Xx. paire de solers ou trente :

Or est sauvé l’arme dolante.

Chevaliers de plaiz et d’axises,

Qui par vos faites vos justices

Sens jugement aucunes fois,

Tot i soit sairemens ou foiz,

Cuidiez-vos toz jors einsi faire ?

A un chief vo covient-il traire.

Quant la teste est bien avinée,

Au feu deleiz la cheminée,

Si vos croiziez sens sermoneir.

Donc v’erriez grant coulz doneir

Seur le sozdant et seur sa gent :

Forment les aleiz damagent.

Quant vos vos leveiz au matin,

S’aveiz changié vostre latin,

Que gari sunt tuit li blecié

Et li abatu redrecié.

Li un vont au lièvres chacier

Et li autre vont porchacier :

Cil panront .i. mallart ou deux,

Car de combatre n’est pas geux.

Par vos faites voz jugemens,

Qui sera vostres dampnemens

Se li jugemens n’est loiaus,

Boens et honestes et féaus.

Qui plus vos done si at droit :

Ce faites que Diex ne voudroit.

Ainsi defineiz vostre vie,

Et lors que li cors se dévie

Si trueve l’arme tant à faire

Que je ne porroie retraire,

Car Diex vos rent la faucetei

Par jugement ; car achatei

Aveiz enfer et vos l’aveiz ;

Car ceste choze bien saveiz :

Diex rent de tout le guerredon,

Soit biens, soit maux, il en a don.

Riche borjois d’autrui sustance,

Qui faites Dieu de vostre pance,

Li povre Dieu chiez vos s’aünent

Qui de fain muerent et géunent

Por atendre vostre gragan,

Dont il n’ont pas à grant lagan ;

Et vos entendeiz au mestier

Qui aux armes n’éust mestier,

Vos saveiz que morir convient ;

Mais je ne sai c’il vos souvient

Que l’uevre ensuit l’ome et la fame ;

C’il at bien fait bien en a l’arme,

Et nos trovons bien en escrit :

« Tout va fors l’amour Jhésu-Crit. »

Mais de ce n’aveiz-vos que faire !

Vos entendeiz à autre afaire.

Je sai toute vostre atendue :

Dou bleis ameiz la grant vendue

Et chier vendre de si au tans,

Seur lettre, seur plège, ou seur nans,

Vil acheteir et vendre chier,

Et uzereir et gent trichier,

Et faire d’un déable Deus

Por ce que enfer est trop seux.

Jusqu’à la mort ne faut la guerre,

Et quant li cors est mis en terre

Et hon est à l’osteil venuz,

Jà puis n’en iert contes tenuz.

Quant li enfant sunt lor seigneur,

Veiz-ci conquest à grant honeur

Au bordel ou en la taverne :

Qui plus tost puet, plus c’i governe.

Cil qui lor doit si lor demande ;

Paier covient ce c’om commande.

Teiz marchiez font com vous éustes,

Quant en vostre autoritei fustes.

Chacuns en prent, chacuns en oste.

Enz osteiz pluée s’en vont li oste :

Les terres demeurent en friche ;

S’en sunt li hom estrange riche ;

Cil qui lor doit paier n’es daingne,

Ansois convient que hon en daingne

L’une moitié por l’autre avoir.

Veiz-ci la fin de vostre avoir.

La fin de l’arme est tote aperte :

Bien est qui li rant sa déserte.

Maistre d’outre meir et de France,

Dou Temple par la Dieu poissance,

Frère Guillaume de Biaugeu,

Or poeiz veioir le biau geu

De quoi li siècles seit servir.

Il n’ont cure de Dieu servir

Por conquerre sainz paradis,

Com li preudome de jadiz,

Godefroiz, Briemons et Tancreiz.

Jà n’iert lor ancres aencreiz

En meir por la neif rafreschir ;

De ce ce vuelent-il franchir.

Ha, bone gent ! Diex vos sequeure !

Que de la mort ne saveiz l’eure.

Recoumanciez novele estoire,

Car Jhésu-Criz li rois de gloire

Vos vuet avoir, et maugré vostre

Sovaingne-vos que li apostre

N’orent pas paradix por pou :

Or vos remembre de saint Pou,

Qui por Deu ot copei la teste.

Por noiant n’en fait-hon pas feste,

Et si saveiz bien que sainz Peires

Et sains Andreuz, qui fu ces frères,

Furent por Dieu en la croix mis.

Por ce fu Dieux lor boens amis

Et li autre saint ansiment.

Que vos iroie plus rimant ?

N’uns n’a paradix c’il n’a painne ;

Por c’est cil sages qui s’en painne.