Œuvres complètes (page 7)

Or prions au Roi glorieux

Et à son chier Fil précieux

Et au Saint-Espérit ensemble,

En cui toute bonteiz s’asemble,

Et à la précieuse Dame

Qui est saluz de cors et d’arme,

A touz sainz et à toutes saintes

Qui por Dieu orent painnes maintes,

Qu’il nos otroit sa joie fine.

Rutebues son sarmon define.

Explicit.

ci encoumence

LA Desputizons dou Croisié et dou Descroizié.

Ms. 7633.

L’autr’ier entour la Saint-Remei

Chevauchoie por mon afaire,

Pencix, car trop sunt agrumi

La gent dont Diex a plus afaire,

Cil d’Acre, qui n’ont nul ami,

Ce puet-on bien por voir retraire,

Et sont si près lor anemi

Qu’à eux puéent lancier et traire.

Tant fui pancis à ceste choze

Que je desvoiai de ma voie,

Com cil qu’à li méimes choze,

Por le penceir que g’i avoie.

Une maison fort et bien cloze

Trouvai, dont je riens ne savoie,

Et c’estoit là-dedens encloze

Une gent que je demandoie.

Chevaliers i avoit teiz quatre

Qui bien seivent parleir fransois.

Soupei orent, si vont esbatre

En un vergier deleiz le bois.

Ge ne me veulz sor eux embatre,

Que ce me dist uns hons cortois :

Tiez cuide compaignie esbatre

Qui la toust cost or sans gabois.

Li dui laissent parleir les deux

Et je les pris à escouteir,

Qui leiz la haie fui touz seux ;

Si descent por moi acouteir.

Si distrent, entre gas et geux,

Teiz moz com vos m’orreiz conteir.

Siècles i fut nomeiz et Deus :

De ce pristrent à desputeir.

Li uns d’eux avoit la croix prise,

Li autre ne la voloit prendre.

Or estoit de ce lor emprise,

Que li croisiez voloit aprendre

A celui qui pas ne desprise

La croix, ne la main n’i vuet tendre,

Qu’il la préist par sa maîtrize,

Ce ces sans ce puet tant estendre.

Dit li croisiez premièrement :

« Enten à moi, biaux dolz amis ;

Tu seiz mult bien entièrement

Que Diex en toi le san a mis,

Dont tu connois apertement

Bien de mal, amis d’anemis.

Se tu en euvres sagement,

Tes loïers t’en est promis.

« Tu voiz, et parsois, et entens

Le meschief de la sainte terre.

Por qu’est de proesse vantans

Qui le leu Dieu lait en teil guerre ?

S’uns hom pooit vivre .c. ans

Ne puet-il tant d’oneur conquerre

Com se il est bien repentans

D’aleir le sépulchre requerre. »

Dit li autre : « J’entens mult bien

Por quoi vos dites teiz paroles.

Vos me sermoneiz que le mien

Doingne au coc et puis si m’envole.

Mes enfans garderont li chien

Qui demorront en la parole.

Hon dit : Ce que tu tiens, si tien ;

Ci at boen mot de bone escole.

« Cuidiez-vos or que la croix preingne

Et que je m’en voize outre meir,

Et que les .c. soudées deingne

Por .xl. cens réclameir ?

Je ne cuic pas que Deux enseingne

Que hom le doie ainsi semeir :

Qui ainsi senme pou i veigne,

Car hom les devroit asemeir. »

— « Tu naquiz de ta mère nuz,

Dit li croiziez, c’est choze aperte :

Or iez juqu’à cel tens venuz

Que ta chars est bien recoverte.

Qu’est Diex nès qu’alors devenuz

Qu’à cent dobles vent la déserte ?

Bien i ert por meschéanz tenuz

Qui ferat si vilainne perte.

« Hom puet or paradix avoir

Ligièrement ! Diex en ait loux ;

Asséiz plus, ce poeiz savoir,

L’acheta sainz Pière et sainz Poulz,

Qui de si précieux avoir

Com furent la teste et li coux,

L’aquistrent, se teneiz à voir :

Icist dui firent .ij. biaux coux. »

Dit cil qui de croizier n’a cure :

« Je voi merveilles d’une gent

Qui asseiz sueffrent poinne dure

En amasseir .i. pou d’argent ;

Puis vont à Roume ou en Esture,

Ou vont autre voie enchergent :

Tant vont cerchant bone aventure,

Qu’il n’ont baesse ne sergent.

« Hom puet mult bien en cest payx

Gaaignier Dieu cens grant damage ;

Vos ireiz outre meir lays

Qu’à folie aveiz fait homage.

Je di que cil est foux nayx

Qui ce mest en autrui servage,

Quant Dieu puet gaaignier sayx

Et vivre de son héritage. »

— « Tu dis si grant abusion

Que nus ne la porroit descrire,

Qui vues sans tribulation

Gaaignier Dieu por ton biau rire ;

Dont orent fole entencion

Li saint qui soffrirent martyre

Por venir à redempcion ?

Tu dis ce que n’uns ne doit dire.

« Encor n’est pas digne la poingne

Que n’uns hom puisse soutenir

A ce qu’à la joie sovrainne

Puisse ne ne doie venir :

Par ce se rendent tuit cil moinne

Qu’à teil joie puissent venir.

Hom ne doit pas douteir essoinne

C’on ait pour Dieu juqu’au fenir. »

— « Sire qui des croix sermoneiz,

Resoffreiz-moi que je deslas.

Sermoneiz ces hauz coroneiz,

Ces grans doiens et ces prélaz,

Cui Diex est toz abandoneiz

Et dou siècle toz li solaz :

Ciz geux est trop mal ordeneiz

Que toz jors nos meteiz ès laz.

« Clerc et prélat doivent vengier

La honte Dieu, qu’il ont ces rentes.

Il ont à boivre et à mengier :

Si ne lor chaut c’il pluet ou vente.

Siècles est touz en lor dangier ;

C’il vont à Dieu par teile sente,

Fol sunt c’il la vuelent changier,

Car c’est de toutes la plus gente. »

— « Laisse clers et prélaz esteir

Et te pren garde au roi de France

Qui por paradix conquesteir

Vuet metre le cors en balance

Et ces enfanz à Dieu presteir ;

Li près n’est pas en esmaiance :

Tu voiz qu’il ce vuet apresteir

Et faire ce dont à toi tance.

« Mult a or meillor demoreir

Li Rois el roiaume que nos,

Qui de son cors vuet honoreir

Celui que por Seignor tenons,

Qu’en crois se laissa devoreir.

Ce de lui servir ne penons,

Hélas ! trop aurons à ploreir,

Que trop fole vie menons ! »

— « Je vuel entre mes voisins estre

Et moi déduire et solacier :

Vos ireiz outre la meir peistre

Qui poez grant fais embracier.

Dites le soudant vostre meistre

Que je pris pou son menacier :

S’il vient desà, mal me vit neistre,

Mais lai ne l’irai pas chacier.

« Je ne faz nul tort à nul home,

N’uns hom ne fait de moi clamour ;

Je cuiche tost et tien grant soume,

Et tieng mes voisins à amour.

Si croi, par saint Pierre de Roume,

Qu’il me vaut miex que je demour,

Que de l’autrui porter grant soume

Dont je seroie en grant cremour. »

— « Desai bées à aise vivre,

Seiz-tu se tu vivras asseiz ?

Dis-moi ce tu ceiz en queil livre

Certains vivres soit compasseiz.

Manjue et boif et si t’enyvre,

Que mauvais est de pou lasseiz ;

Tuit sont .i., saches à délivre,

Et vie d’oume et oez quasseiz.

« Laz ! ti dolant ! la mors te chace,

Qui tost t’aura lassei et pris ;

Desus ta teste tien sa mace :

Viex et jones prent à .i. pris.

Tantost at fait de pié eschace,

Et tu as tant vers Dieu mespris !

Au moins enxui .i. pou la trace

Par quoi li boen ont los et pris. »

— « Sire croiziez, merveilles voi ;

Mult vont outre meir gent menue,

Sage, large, de grant aroi,

De bien metable convenue,

Et bien i font, si com je croi,

Dont l’arme est por meilleur tenue :

Si ne valent ne ce ne quoi

Quant ce vient à la revenue.

« Se Diex est nule part el monde,

Il est en France, c’et sens doute ;

Ne cuidiez pas qu’il se reponde

Entre gent qui ne l’aimment goute.

Et vostre meir est si parfonde

Qu’il est bien droiz que la redoute ;

J’aing mieux fontaine qui soronde

Que cele qu’en estei s’esgoute. »

— « Tu ne redoutes pas la mort,

Si seiz que morir te convient,

Et tu diz que la mers t’amort !…

Si faite folie dont vient ?

La mauvistiez qu’en toi s’amort

Te tient à l’osteil se devient ;

Que feras se la mort te mort

Que ne ceiz que li tenz devient ?

« Li mauvais desà demorront

Que jà n’uns boens n’i demorra ;

Com vaches en lor lit morront

Buer iert neiz qui de lai morra,

Jamais recovreir ne porront :

Fasse chacuns mieux qu’il porrat ;

Lor peresce en la fin plorront,

Et c’il muerent n’uns n’es plorra.

« Ausi com par ci le me taille,

Cuides foïr d’enfer la flame

Et acroire, et metre à la taille,

Et faire de la char ta dame.

A moi ne chaut coument qu’il aille,

Mais que li cors puist sauver l’âme,

Ne de prison ne de bataille,

Ne de laissier enfant ne fame. »

— « Biaux sire chiers, que que dit aie,

Vos m’aveiz vaincu et maltei.

A vos m’acort, à vos m’apaie,

Que vos ne m’aveiz pas flatei.

La croix preing sans nule délaie,

Si doing à Dieu cors et chatei ;

Car qui faudra à cele paie

Mauvaisement aura gratei.

« En non dou haut Roi glorieux

Qui de sa fille fist sa meire,

Qui par son sanc esprécieux

Nos osta de la mort ameire,

Sui de moi croizier curieux

Por venir à la joie cleire ;

Car qui à s’ame est oblieux

Bien est raisons qu’il le compeire. »

Explicit .

CI ENCOUMENCE

Li Diz de la Voie de Tunes.

Ms. 7633.

De corrouz et d’anui, de pleur et d’amistié

Est toute la matière dont je tras mon ditié :

Qui n’a pitié en soi bien at Dieu fors getié ;

Vers Dieu ne doit trouveir amour ne amistié.

Évangelistre, apostre, martyr et confesseur

Por Jhésu-Crit soffrirent de la mort le presseur :

Or vos i gardeiz bien, qui estes successeur,

C’on n’at pas paradyx cens martyre pluseur.

Onques en paradix n’entra n’uns fors par poinne,

Por c’est-il foulz cheitis qui por l’arme ne poinne.

Cuidiez que Jhésu-Cris en paradyx nos mainne

Por norrir en délices la char n’est pas sainne ?

Sainne n’est-ele pas, de ce ne dout-je point :

Or est chaude, or est froide, or est soeiz, or point.

Jà n’iert en .i. estat ne en un certain point ;

Qui sert Dieu de teil char n’aime-il bien s’arme à point.

A point la moinne-il bien à cele grant fornaize,

Qui est dou puis d’enfer où jà n’uns n’aura aise.

Bien se gart qui i vat, bien se gart qui i plaise,

Que Dieux ne morra plus por nule arme mauvaise.

Dieux dist en l’Évuangile : « Se li preudons séust

A queil heure li lerres son suel chavéir deust,

Il veillast por la criente que dou larron éust,

Si bien qu’à son pooir de rien ne li néust. »

Ausi ne savons-nos quant Dieuz dira : « Veneiz ; »

Qui lors est mal garniz, mult iert mal aseneiz ;

Car Dieux li sera lors com lions forceneiz :

Vos ne vos preneiz garde, qui les respis preneiz.

Li Rois ne le prent pas, cui douce France est toute,

Qui tant par ainme l’arme que la mort n’en redoute,

Ainz va par meir requerre cele chiennaille gloute :

Jhésu-Chriz, par sa grace, si gart lui et sa route.

Prince, prélat, baron, por Dieu preneiz ci garde ;

France est si grace terre, n’estuet pas c’om la larde.

Or la vuet cil laissier qui la maintient et garde

Por l’amor de celui qui tout a en sa garde

Désormais se déust li preudons séjorneir

Et toute s’atendue à séjour atourneir :

Or vuet de douce France et partir et tornei :

Dieux le doint à Paris à joie retorneir !

Et li cuens de Poitiers, qui .i. pueple souztient,

Et qui en douce France si bien le sien leu tient

Que .xv. jors vaut miex li leux par où il vient,

Il s’en va outre meir, que riens ne le detient.

Plus ainme Dieu que home qui emprent teil voiage,

Qui est li souverains de tout pélerinage

Le cors mettre à essil et meir passer à nage

Por amor de celui qui le fist à s’ymage.

Et messires Phelipes et li boens cuens d’Artois,

Qui sunt preu et cortois et li cuens de Nevers

Refont en lor venue à Dieu biau serventois :

Chevaliers qui ne suit ne pris pas .i. Nantois,

Li boens rois de Navarre, qui lait si bèle terre

Que ne sai où plus bele puisse-on troveir ne querre,

Mais hom doit tout laissier por l’amor Dieu conquerre :

Ciz voiages est cleis qui paradix desserre.

Ne prent pas garde à choze qu’il ait éu à faire ;

S’a-il asseiz éu et anui et contraire :

Mais si con Dieux trouva saint Andreu débonère,

Trueve-il le roi Thiebaut doulz et de boen afère.

Et li dui fil le Roi et lor couzins germains,

Ce est li cuens d’Artois, qui n’est mie dou mains,

Revont bien enz dézers laboreir de lor mains,

Quant par meir vont requerre Sarrazins et Coumains.

Tot soit qu’à moi bien fère soie tardiz et lans,

Si ai-je de pitié por eulz le cuer dolant ;

Mais ce me réconforte (qu’iroie-je celant ?)

Qu’en lor venues vont, en paradix volant.

Sains Jehans eschiva compaignie de gent,

En sa venue fist de sa char son serjant ;

Plus ama les désers que or fin ne argent,

Qu’orgueulz ne l’i alast sa vie damagent.

Bien doit ameir le cors qui en puet Dieu servir,

Qu’il en puet paradix et honeur déservir.

Trop par ainme son aise qui lait l’arme aservir

Qu’en enfer sera serve par son fol messervir.

Veiz-ci mult biau sermon : li Rois va outre-meir

Pour celui Roi servir où il n’a point d’ameir.

Qui ces .ij. rois vodra et servir et ameir,

Croize soi, voit après : mieulz ne puet-il semeir.

Ce dit cil qui por nos out asseiz honte et lait :

« N’est pas dignes de moi qui por moi tot ne lait.

« Qu’après moi vuet venir, croize soi, ne délait ;

« Qui après Dieux n’ira mal fu norriz de lait. »

Vauvaseur, bacheleir plain de grant non-savoir,

Cuidiez-vos par desà pris ne honeur avoir ?

Vous vous laireiz morir et porrir vostre avoir,

Et ce vos vos moréiz, Diex nou quiert jà s’avoir.

Dites, aveiz-vos plèges de vivre longuement ?

Je voi aucun riche home faire maisonnement ;

Quant il a assouvi trestout entièrement

Se li fait-on .i. autre de petit coustement.

Jà coars n’enterra en paradyx célestre,

Si n’est n’uns si coars qui bien n’i vouxist estre,

Mais tant doutent mesaize et à guerpir lor estre,

Qu’il en adossent Dieu et metent à sénestre.

Dès lors que li hons naît a-il petit à vivre ;

Quant il a .xl. ans, or en a mains on livre.

Quant il doit servir Dieu si s’aboivre et enyvre :

Jà ne se prendra garde tant que mors le délivre.

Or est mors, qu’a-il fait qu’au siècle a tant estei ?

Il a destruiz les biens que Dieux li a prestei :

De Dieu ne li souvint ne yver ne estei ;

Il aura paradix, ce il l’a conquestei.

Foulz est qui contre mort cuide troveir deffence ;

Des biaux, des fors, des sages fait la mort sa despance ;

La mors mort Absalon et Salomon et Sance ;

De légier despit tout qu’adès à morir pance.

Et vos à quoi penceiz qui n’aveiz nul demain,

Et qui à nul bien faire ne voleiz metre main ?

Se hom va au moustier vos dites : « Je remain ; »

A Dieu servir dou vostre iestes-vos droit Romain.

Se hom, va au moustier là n’aveiz-vos que faire ;

N’est pas touz d’une pièce, tost vos porroit maufaire ;

A ceux qui i vont dites qu’ailleurs aveiz à faire :

Sans oïr messe sunt maint biau serf embiaire.

Vous vous moqueiz de Dieu tant que vient à la mort ;

Si li crieiz merci lors que li mors vos mort

Et une consciance vos reprent et remort :

Si n’en souvient nelui tant que la mors le mort.

Gardeiz dont vos venistes et où vous revandroiz :

Diex ne fait nelui tort, n’est n’uns juges si droiz.

Il est sires de loiz et c’est maîtres de droiz ;

Toz jors le trovereiz droit juge en toz endroiz.

Li besoins est venuz qu’il a mestier d’amis ;

Il ne quiert que le cuer de quanque en vos a mis.

Qui le cuer li aura et donei et promis,

De resouvoir son reigne c’eirt mult bien entremis.

Li mauvais demorront, ne’s convient pas eslire,

Et c’il sunt hui mauvais il seront demain pire ;

De jour en jour iront de roiaume en empire,

Se nos ne’s retrouvons si n’en ferons que rire.

Li Rois qui les trois rois en Belléem conduit,

Conduie touz croisiez qui à mouvoir sunt duit,

Qu’osteir au soudant puissent et joie et déduit,

Si que bonnes en soient et notes et conduit !

Explicit.

CI ENCOUMENCE

Li diz de Puille.

Ms. 7633.

Cil Damediex qui fist air, feu, et terre et meir,

Et qui por nostre mort senti le mors ameir,

Il doint saint paradix qui tant fait à ameir

A touz ceulz qui orront mon dit sans diffameir !

De Puille est la matyre que je vuel coumancier

Et dou Roi de Cézile, que Dieux puisse avancier !

Qui vodrat elz sainz cielz semance semancier

Voisse aider au boen roi qui tant fait à prisier.

Li boens Rois estoit cuens d’Anjou et de Provance,

Et c’estoit filz de roi, frères au roi de France.

Bien pert qu’il ne vuet pas faire Dieu de sa pance

Quant por l’arme sauveir met le cors en balance.

Or preneiz à ce garde, li groz et li menu,

Que puis que nos sons nei et au siècle venu,