Œuvres complètes (page 8)

S’avons-nos pou à vivre ; s’ai-je bien retenu,

Bien avons mains à vivre quant nos sommes chenu.

Conquérons paradix quant le poons conquerre ;

N’atendons mie tant meslée soit la serre.

L’arme at tantost son droit que li cors est en terre :

Quant sentance est donée noians est de plus querre.

Dieux done paradix à touz ces bien voillans :

Qui aidier ne li vuet bien doit estre dolanz.

Trop at contre le Roi d’Yaumons et d’Agoulans :

Il at non li rois Charles : or li faut des Rollans.

Sains Andreuz savoit bien que paradix valoit

Quant por crucefier à son martyre aloit.

N’atendons mie tant que la mors nos aloit,

Car bien serions mort se teiz dons nos failloit.

Cilz siècles n’est pas siècles, ainz est chans de bataille,

Et nos nos combatons à vins et à vitaille.

Ausi prenons le tens com par ci le me taille ;

S’acréons seur noz armes et metons à la taille.

Quant vanra au paier coument paiera l’arme

Quant li cors selon Dieu ne moissone ne same ?

Se garans ne li est Dieux et la douce Dame,

Gezir les convanra en parmenable flame.

Pichéour vont à Roume querre confession

Et laissent tout encemble avoir et mansion.

Si vont fors pénitance, ci at confusion ;

Voisent .i. pou avant, s’auront rémission.

Bien est foulz et mauvais qui teil voie n’emprent

Por escheveir le feu qui tout adès emprant.

Povre est sa conciance quant de non reprent,

Pou prise paradix quant à ce ne se prent.

Gentilz cuens de Poitiers, Diex et sa douce Meire

Vous doint saint paradyx et la grant joie cleire !

Bien li aveiz montrei loiaul amour de frère,

Ne vos a pas tenu convoitize la neire.

Bien i meteiz le vostre, bien l’i aveiz jà mis ;

Bien monstreiz au besoing que vos iestes amis :

Se chacuns endroit soi c’en fust si entremis,

Ancor oan éust Charles mult moins d’anemis.

Prions por le roi Charle ; c’est por nos maintenir,

Por Dieu et sainte Églize c’est mis au convenir.

Or prions Jhésu-Crit que il puist avenir

A ce qu’il a empris, et son ost maintenir.

Prélat, ne grouciez mie dou dizèime paier,

Mais priez Jhésu-Crit qu’il pance d’apaier ;

Car se ce n’a mestier, sachiez sanz délaier,

Hom panrra à méimes : si porroiz abaier.

Explicit.

CI ENCOUMENCE

La Chansons de Puille.

Ms. 7633.

Qu’à l’arme vuet doner santei

Oie de Puille l’errement ;

Diex a son règne abandonei,

Li sien le nos vont présentant

Qui de la terre ont sarmonei.

Quanques nos avons meserrei

Nos iert par la croix pardonei :

Ne refusons pas teil présent.

Jone gent, qu’aveiz enpencei ?

De quoi vos iroiz-vos vantant ?

Quant vos sereiz en viel aei

Qu’ireiz-vos à Dieu reprouvant

De ce que il vos a donei

Cuer et force, et vie et santei ?

Voz li aveiz le cuer ostei,

C’est ce qu’il vuet tant seulement.

Au siècle ne sons que prestei

Por veoir vostre efforcement ;

Nos n’avons yver ne estei

Dont aions asséurement :

Si avons jà grant pièce estei,

Et qu’i avons conquestei

Dont l’arme ait nule séurtei ?

Je n’i vois fors despérement.

Or ne soions désespérei,

Crion merci hardiement,

Car Dieux est plains de charitei

Et piteuz juqu’au jugement ;

Mais lors aura-il tost contei

Un conte plein de grant durtei :

« Venez, li buen, à ma citei ;

Aleiz, li mal, à dampnement

Lors seront li fauz cuer dampnei

Qui en cest siècle font semblant

Qu’il soient plain d’umilitei

Et si boen qu’il n’i faut noiant,

Et il sont plain d’iniquitei ;

Mais le siècle ont si enchantei

C’om n’oze dire véritei

Ce c’on i voit apertement.

Clerc et prélat qui aünei

Ont l’avoir et l’or et l’argent,

L’ont-il de lor loiaul chatei ?

Lor pères en ot-il avant ?

Et lorsque il sont trespassei,

L’avoir que il ont amassei

Et li ombres d’un viez fossei

Ces .iij. chozes ont .i. semblant.

Vasseur qui estes à l’ostei,

Et vos li bacheleir errant,

N’aiez pas tant le siècle amei,

Ne soiez pas si non-sachant

Que vos perdeiz la grant clartei

Des cielz qui est sanz oscurtei.

Or varra-hon vostre bontei :

Preneiz la croix, Diex vos atant.

Cuens de Blois, bien aveiz errei

Par desai au tornoiement :

Dieux vos a le pooir prestei,

Ne saveiz com bien longuement.

Montreiz-li se l’en saveiz grei,

Car trop est plainz de nicetei

Qui por .i. pou de vanitei

Lairat la joie qui ne ment.

Explicit

DE LA

Descorde de l’Université et des Jacobins,

OU CI ENCOUMENCE LA DISCORDE

DES JACOBINS ET DE L’UNIVERSITEI,

ou

DES JACOBINS

Mss. 7218, 7633, 7615.

Rimer m’estuet d’une descorde

Qu’à Paris a semé Envie

Entre gent qui miséricorde

Sermonent et honeste vie.

De foi, de pais et de concorde

Est lor langue mult replenie,

Mès lor manière me recorde

Que dire et fère n’i soit mie.

Sor Jacobins est la parole

Que je vos vueil conter et dire,

Quar chascuns de Dieu nous parole

El si deffent corouz et ire ;

Et c’est la riens qui l’âme afole,

Qui la destruit et qui l’empire :

Or guerroient por une escole

Où il vuelent à force lire.

Quant Jacobin vindrent el monde,

S’entrèrent chiés Humilité :

Lors estoient et net et monde

Et s’amoient Divinité ;

Mès Orguex, qui toz biens esmonde,

I a tant mis iniquité

Que par lor grant chape roonde

Ont versé l’Université.

Chascuns d’els déust estre amis

L’Université voirement,

Quar l’Université a mis

En els tout le bon fondement,

Livres, deniers, pains et demis ;

Mès or lor rendent malement,

Quar cels destruit li anemis

Qui plus l’ont servi longuement.

Miex lor venist, si com moi membre,

Qu’alevez ne’s éussent pas :

Chascuns à son pooir desmembre

La mesnie saint Nicholas,

L’Université ne si membre

Qu’il ont mise du trot au pas,

Quar tel herberge-on en la chambre

Qui le seignor gète du cas.

Jacobin sont venu el monde

Vestu de robe blanche et noire :

Toute boutez en els abonde,

Ce puet ici quiconques voudra croire.

Se par l’abit sont net et monde,

Vous savez bien, ce est la voire ;

S’uns leus avoit chape roonde

Si resambleroit-il provoire.

Se lor oevre ne se concorde

A l’abit qu’amer Dieu devise,

Au recorder aura descorde

Devant Dieu au jor du juise ;

Quar se Renart çaint une corde

Et vest une cotele grise,

N’en est pas sa vie mains orde :

Rose est bien sor espine assise

Il puéent bien estre preudomme :

Ce vueil-je bien que chascuns croie ;

Mès ce qu’il pledoient à Romme

L’Université m’en desvoie.

Des Jacobins vous di la somme :

Por riens que Jacobins acroie,

La peléure d’une pomme

De lor dete ne paieroie.

Explicit la Descorde de l’Université et des Jacobins.

CI ENCOUMENCE

Li diz de l’Universitei de Paris.

Ms. 7633.

Rimeir me convient d’un contens

Où hon a mainz divers contens

Despendu et despendera :

Jà siècles n’en amendera.

Li clerc de Paris la citei

(Je di de l’Universitei,

Nouméement li arcien,

Non pas li preudoms ancien)

Ont empris .i. contans encemble.

Jà bien n’en vanrra, ce me cemble,

Ainz en vanrra mauz et anuiz,

Et vient jà de jors et de nuiz.

Est or ce bien choze faisant ?

Li filz d’un povre païsant

Vanrra à Paris por apanre :

Quanques ces pères porra panrre

En un arpant ou .ij. de terre,

Por pris et por honeur conquerre,

Baillera trestout à son fil,

Et il en remaint à escil.

Quant il est à Paris venuz

Por faire à quoi il est tenuz

Et por mener honeste vie,

Si bestorne la prophétie.

Gaaing de soc et d’aréure

Nos convertit en arméure ;

Par chacune rue regarde

Où voie la bele musarde.

Partout regarde, partout muze ;

Ces argenz faut, et sa robe uze :

Or est tout au recoumancier.

Ne fait or boen ci semancier

En quaresme, que hon doit faire

Choze qui à Dieu doie plaire.

En lieu de haires, haubers vestent,

Et boivent tant que il s’entestent.

Si font bien li troi ou li quatre

Quatre cens escoliers combatre,

Et cesseir l’Universitei :

N’a ci trop grant aversitei.

Diex ! jà n’est-il si bone vie,

Qui de bien faire auroit envie,

Com ele est de droit escolier !

Il ont plus poinne que colier,

Por que il vuelent bien aprendre ;

Il ne puéent pas bien entendre

A seoir asseiz à la table.

Lor vie est ausi bien metable

Com de nule religion :

Por quoi lait hon sa région

Et va en estrange païs,

Et puis si devient foulz naïz,

Quant il i doit aprendre sens ?

Si pert son aveir et son tens,

Et c’en fait à ces amis honte,

Mais il ne seivent qu’oneurs monte.

Explicit.

Les Ordres de Paris.

Mss. 7633, 7615.

En non de Dieu l’esperité

Qui treibles est en unité

Puissé-je commencier à dire

Ce que mes cuers m’a endité ;

Et ce je di la vérité,

N’uns ne m’en doit tenir à pire.

J’ai coumencié ma matire

Sur cest siècle, qu’adès empire,

Où refroidier voi charité ;

Ausis s’en vont sans avoir mire

Là où li diables les tire

Qui Dieu en a désérité.

Par maint samblant, par mainte guise

Font cil qui n’ont ouvraingne aprise

Par qu’il puissent avoir chevance ;

Li un vestent coutelle grise

Et li autre vont sans chemise :

Si font savoir lor pénitance.

Li autre par fauce samblance

Sont signeur de Paris en France ;

Si ont jà la cité pourprise.

Diex gart Paris de meschéance

Et la gart de fauce créance,

Qu’ele n’a garde d’estre prise !

Li Barré sont près des Béguines :

Xxix. en ont à lor voisines

(Ne lor faut que passer la porte),

Que par auctorités devines,

Par essamples et par doctrines

Que li uns d’aus à l’autre porte,

N’ont povoir d’aler voie torte.

Honeste vie les desporte

Par jeûnes et par deceplines,

Et li uns d’aus l’autre conforte :

Qui tel vie a ne s’en ressorte,

Quar il n’a pas gite sans signes.

L’ordre as Béguines est légière ;

Si vous dirai en quel manière :

En s’an ist bien por mari prandre ;

D’autre part qui baisse la chière

Et a robe large et plenière,

Si est Béguine sans li randre ;

Si ne lor puet-on pas desfandre

Qu’eles n’aient de la char tandre

S’eles ont .i. pou de fumière :

Se Diex lor vouloit pour ce randre

La joie qui est sans fin prandre,

Sains Lorans l’acheta trop chière.

Li Jacobin sont si preudoume

Qu’il ont Paris et si ont Roume,

Et si sont roi et apostole,

Et de l’avoir ont-il grant soume.

Et qui se muert, se il ne’s noume

Pour exécuteurs, s’âme afole :

Et sont apostre par parole.

Buer fu tés gent mise à escole :

N’uns n’en dit voir, c’on ne l’asoume :

Lor haïne n’est pas frivole.

Je, qui redout ma teste fole,

Ne vous di plus mais qu’il sont home.

Se li Cordelier pour la corde

Puéent avoir le Dieu acorde,

Buer sont de la corde encordé.

La Dame de miséricorde,

Ce dient-il, à eus s’acorde,

Dont jà ne seront descordé ;

Mais l’en m’a dit et recordé

Que tés montre au disne cors Dé

Semblant d’amour qui s’en descorde :

N’a pas granment que concordé

Fu par un d’aux et acordei

Un livre dont je me descorde.

L’ordre des Sas est povre et nue,

Et si parest si tart venue

Qu’à envis seront soustenu.

Se Dex ot teil robe vestue

Com il portent parmi la rue,

Bien ont son habit retenu :

De ce lor est bien avenu.

Par un home sont maintenu ;

Tant comme il vi vra Dex aiue !

Se mors le fet de vie nu,

Voisent lai dont il sont venu :

Si voist chascun à la charrue.

Li Rois a mis en .i. repaire,

Mais ne sai pas bien por quoi faire,

Trois cens aveugles route à route.

Parmi Paris en vat trois paire ;

Toute jour ne finent de braire

Au .iij. cens qui ne voient goute.

Li uns sache, li autre boute :

Si se donent mainte sacoute,

Qu’il n’i at nul qui lor esclaire.

Se fex i prent, se n’et pas doute,

L’ordre sera brullée toute ;

S’aura li Rois plus à refaire.

Diex a non de filles avoir,

Mais je ne puis onques savoir

Que Dieux éust fame en sa vie.

Se vos créez mensonge à voir

Et la folie pour savoir,

De ce vos quit-je ma partie.

Je di que ordre n’est-ce mie,

Ains est baras et tricherie

Por la fole gent decevoir.

Hui i vint, demain se marie ;

Li lignaiges sainte Marie

Est plus grant que ne fu ersoir.

Li Rois a filles à plantei,

Et s’en at si grant parentei

Qu’il n’est n’uns qui l’osast atendre.

France n’est pas en orfentei ;

Se Diex me doint boenne santei,

Jà ne li covient terre rendre

Pour paour de l’autre deffendre :

Car li Rois des filles engendre,

Et ces filles refont auteil.

Ordres le truevent Alixandre,

Si qu’après ce qu’il sera cendre

Serat de lui .c. ans chantei.

La Trinitei pas ne despris :

De quanqu’il ont l’année pris

Envoient le tiers à mesure

Outre meir raembre les pris.

Ce ce font que j’en ai apris,

Ci at charitei nete et pure ;

Ne sai c’il partent à droiture.

Je voi desai les poumiax luire

Des manoirs qu’il ont entrepris.

C’il font de la teil fornesture.

Bien oeuvrent selonc l’Escriture :

Si n’en doivent estre repris.

Li Vaux des escoliers m’enchante

Qui quièrent pain et si ont rente

Et vont à chevaul et à pié.

L’Universitei la dolante,

Qui se complaint et se démante,

Trueve en eux petit d’amistié,

Ce ele d’ex éust pitié,

Mais il se sont bien aquitié

De ce que l’Escriture chante :

« Quant om at mauvais respitié,

Trueve l’an puis l’anemistié ;

Car li mauz fruiz ist de male ente. »

Cil de Chartrouse sont bien sage,

Car il ont lessié le bochage

Por aprochier la bone vile.

Ici ne voi-je point d’outrage :

Ce n’estoit pas lor éritage

D’estre toz jors en iteil pile.

Nostre créance tourne à guille,

Mensonge devient Évangile,

N’uns n’est mais saux sans béguinage ;

Preudons n’est créux en concile,

Nès que .ij. genz contre .ij. mile :

A ci douleur et grant damage.

Tant com li Guillemin esturent

Là où li grant preudome furent

Sà en arrière comme rencluz,

Itant servirent Deu et crurent ;

Mais maintenant qu’il se recrurent,

Si ne les dut-on croire plus.

Issu s’en sont comme conclus :

Or gart uns autres le rendus

Qu’il en ont bien fet se qu’il durent.

De Paris sunt .i. pou en sus :

S’aprocheront de plus en plus ;

C’est la raisons por qu’il s’esmurent.

Explicit le Dit des Ordres

Des ordres,

ou

LA CHANSON DES ORDRES,

ou

LES AUTRES DIZ DES ORDRES.

Mss. 7218, 7633, 7615.

Du siècle vueil chanter

Que je voi enchanter ;

Tel vens porra venter

Qu’il n’ira mie ainsi.

Papelart et Béguin

Ont le siècle boni.

Tant d’ordres avons jà

Ne sai qui les sonja,

Ainz Diex tels genz noma

N’il ne sont si ami.

Papelart et Béguin

Ont le siècle honi.

Frère Prédicator

Sont de mult simple ator,

Et s’ont en lor destor

Mainte bon parisi.

Papelart el Béguin

Ont le siècle honi.

Et li Frère Menu

Nous ont si près tenu

Que il ont retenu

De l’avoir autressi.

Papelart et Béguin

Ont le siècle honi.

Qui ces .ij. n’obéist

Et qui ne lor géhist

Quanqu’il oncques féist,

Tels bougres ne nasqui.

Papelart et Béguin

Ont le siècle honi.

Assez dient de bien,

Ne sai s’il en font rien ;

Qui lor done du sien

Tel preudomme ne vi.

Papelart et Béguin

Ont le siècle honi.

Cil de la Trinité

Ont grant fraternité ;

Bien se sont aquité :

D’asnes ont fet roncin.

Papelart et Béguin

Ont le siècle honi.

Et li Frère Barré

Resont cras et quarré,

Ne sont pas enserré :

Je les vi mercredi,

Papelart et Béguin

Ont le siècle honi.

Nostres Frère Sachier

Ont luminon fet chier.

Chascuns samble vachier

Qui ist de son mesni.

Papelart et Béguin

Ont le siècle honi.

Set vins filles ou plus

A li Rois en reclus ;

Oncques mès quens ne dus

Tant n’en congenui.

Papelart et Béguin

Ont le siècle honi.

Béguines a-on mont

Qui larges robes ont ;

Desouz les robes font

Ce que pas ne vous di.

Papelart et Béguin

Ont le siècle honi.

L’ordre des non-voianz

Tels ordre est bien noianz,

Il tastent par léanz :

« Quant venistes-vous ci ? »

Papelart et Béguin

Ont le siècle honi.

Li frère Guillemin

Li autre frère Hermin

M’amor lor atermin :

Je’s amerai mardi.

Papelart et Béguin

Ont le siècle honi.

Expliciunt les Ordres.